منين انت يابدر الليالي منين انت
بين النجوم تقول شوفوا حلاتي
****
محدٍ ذبحني بالهوى غيرك الا انت
توي دريت النور من وين ياتي
****
من يوم جيت ومن حياتي تمكنت
علمتني معنى الهوى ياحياتي
****
عالي مقامك في حياتي ولاهنت
لوهي عيوني سبتك ماتباتي
****
من كاس حبك اشرب اليوم وادمنت
محدٍ غصبني من رضايه وذاتي
****
مشيت حبك ياهوى البال وايقنت
انه خفوقي راح ماعاد ياتي
****
اهيم واسرح بالفكر وين ماكنت
لا شفت زولك مقبلِ ياغناتي
****
ضعت بصلاتي بالتشهد تسننت
ياما وياما عدت لجلك صلاتي
****
ياما كتبت الشعر ياما ولحنت
وياما كتبت ايام بعدك وصاتي
****
صحح دروسي هاك اكتبلي احسنت
لاتقول راسب واجلدك في عصاتي
****
والله انا اللي بالتلاميذ لك صنت
حفظت درس الحب لك باورقاتي
****
والله ماشفت بحياتي وعينت
من راح قبلك والذي راح ياتي
****
يكفيني انك بين هالناس لي انت
من غير حبك وشهي تسوى حياتي