وش يا تويتر علمك اللي لفاني
هرجن لفاني ممتلي بالخبالا
قحطان يا قومن كبار المباني
ذيك المباني اللي بعيدن تطالا
بايدي نفوس اهل الونا والتواني
ذيك النفوس اللي كساها الخذالا
وش عيبكم غير الكرم والتفاني
في خدمة المحتاج بذل و نوالا
ترقى بكم كل الحسان المعاني
تثمر ديار اللي دياره محالا
في قربكم تحيا قفار المكاني
ذيك القفار اللي محالن تحالا
في قربكم يا معدلين المحاني
يأمن بكم من هو ضعيف المقالا
كم قد حوى تاريخكم من حساني
تاريخكم سطر فعول الرجالا
يتذاكره اللي بعاد و عواني
تاريخكم يحوي جزالا الفعالا
تاريخ قومن ما بهم من اناني
قومن بعادن عن هروجن هزالا
قومن مجاورهم قرار واماني
قومن مخاواهم عظيم المنالا
ما ضرهم قولة جهول اللساني
ذاك اللذي هرجه دوادي خيالا
قحطان يا جاهل اسود الزماني
فيهم يطيب اللي قصيده يقالا
حتى الصبي منهم فعوله تباني
فعله سواة الليث عند النزالا
منها فعوله العوج راح ساني
مروي عطاش الهند وقت السجالا
ياليتني من لادكم يا قحطاني
وتزاح عن قلبي الهموم الثقالا
قومن اذا جاورتهم ما تهاني
كلا ولا لاهل الظلايم مجالا
مدت يديهم تشبع اللي يعاني
ترسي سفنهم بالعطايا الجزالا