انا ويني وهو وينه نسيته وقفت سنينه

بقت ذكرى تحث فيني جرح نايم على نزفه

بها صرخه شكت طعنه بها جادت لي يدينه

وتدري وش سبب جرحي مشاعر بالغلا تحفه

تبي تعرف انا منهو انا واحد نسى وينه

نسى منهو جرح قلبه نسى وشهو عنى حرفه

طلبتك خل فؤادن مل ومل موقه سهر عينه

ولا توقظ الم ذكرى بها نصفه هجر نصفه

يعاتبني على بعدي وهو مبعد عناوينه

ويسألني عسى قلبي وهو غايب حفظ وصفه

تهمني بالقسا ناسي قسا يسكن شرايينه

نسى غدره نسى هجره نسى عشقة وفا وعفه

ويا ذكرى تجي هونك وحالي لا تلومينه

خذت قلبي تواصيفن بها قلبي سهل عسفه

كلامه به امل يبني قصر تزهى دواوينه

يواعدني امل كاذب يفز شوقي ولي يزفه

تعب قلبن يبي ينساك يا ذكرى تخاوينه

ابي ادله عسى عيني ترى جرحي ولا تعرفه

ويا ذكرى جفل نومي يجي عينن تزورينه

ترى سهدي قلع عينن بكت من هو بخل طرفه