حب الوطن يجري غلا بالشرايين ... بارواحنا نفديه لو هي مليحه




حب الوطن إيمان حب الوطن دين ... أرضٍ لنا تعطي ولاهي شحيحه



حب الوطن ماهو فِتَن يالرديين ... أكبر من الداب الحقود وفحيحه



ويامدعين الدين وانتم بعيدين ... أهدافكم وِضحت وصارت صريحه



وياللي تحسبون التطرف من الدّين... باسبابها دم الضعّيف تبيحه



الدين ماهو ذبح ناس برييّن ... تذبح وتفرح تحتفي بالذبيحه




أيضاولا تفجير دوروميادين ... الدين والله نعرفه بالقريحه



الدين سلم ونصح عند النصوحين ... الدين عند الله دين النصيحه



" وجدان " تشهد فعلكم يالخبيثين ... الغافلة تلعب بالارض الفسيحه




ذِبحت بعمر الورد عمر الرياحين ... وش ذنبها ياهل القلوب السطيحه



وِش ذنب اهلها تفجعون المساكين ... أبو تنكّد وام ثكلى طريحه



لا شافوا " المريول " هو "والفساتين" ... والعابها وجوّال ماله شريحه



وش ذنب من ذِبحوا صغار ومسنين ... باسبابكم ياهل الفعال القبيحه



من عقب ما كنا بأمن وهنيين ... والدار كانت ا منه مستريحه



فعلٍ جرى منكم ترى يفضح وشين ... أرض الحرم والنور منكم جريحه



ياسرع طيحتكم تراكم قريبين ... من عقبها تجنون خزي وفضيحه



وحكامنا " ال السّعود " الميامين ... ماقصروا بيض الوجيه الفليحه



مِنّا وفِينا هم ماهم غريبين ... وايامنا صارت بَعدهم مريحه




أبواننا وجِداننا اللي موصين ... في حبهم ثمّ الوفا والنصيحه



واجب علينا نحطهم داخل العين ... ولاَ نتبع ( سعد الفقيه ) ونبيحه



بيعة وَفَا منّا لهم يالحقودين ... يشهد لها التاريخ بيعة صحيحه



وارض الجزيرة تفتخر بالوفييّن ... والخاين الفتّان عنها تزيحه



وصلوا على اللي قنّن الدين تقنين ... نزل الوحي بلسانه اللي فصيحه