من خفق قلبي بحبك والله اني ما نسيتك
لو تشيبنا السنين ولو تفرقنا الليالي


ومن سرى عشقك بدمي والله اني ماسليتك
لو نشف نزف العروق ولو طفا جمر اشتعالي


كيف وانت اللي تقول بصادق احساسك فديتك
لين صرت أول حبيب ولين صرت أعز غالي


أول حروفي غلاك وكل بيت صار بيتك
من عرفتك والقصايد نبعها صافي زلالي


البدايات الخجولة علمتني من قريتك
سطرت صدق المشاعر في سكوني وانفعالي


حاسدي جنت جنونه يا غرامي من هويتك
شب ناره في قراره واكتوى يصلاه صالي


طاشت سهوم العواذل لاهجرت ولا جفيتك
لو خطيت ادمح خطاك وكل مرك صار حالي


ان وصفتك ما نصفتك وان بديتك ما انتهيتك
وان ذكرت أدنى المحاسن قالوا الشاعر خيالي


غبت عنك ويوم هز الشوق قلبي قلت جيتك
ما تباعدت الدروب ولا جراهيد السهالي


بيض الله وجه درب دلني فيك ولقيتك
وجمل الله حال حظي قام واعطاني منالي


كم خذلني قبل أعرفك يا دوا المحروم ليتك
جيتني بأول زماني كان والله طاب فالي


في غيابك ضاق صدري لادلهت ولاسليتك
والعرب لاضاق صدري رددوا «خلك شمالي»
.


#شعر
مشهور البلوي .

.
.