تويت
.
.
.
أبين الفرحة وانا أصارع الموق
وأقول لاحزاني تعدي و طوفي
يا غايتي ما كن بك دم وعروق
حملتني صبر ثقل عن كتوفي
حسسني بحبك واحسسك بالشوق
اللي براكينه تفجر بجوفي
أعلمك كيف الغرام .. ولك اسوق
اللي تراكم من وفا في عزوفي
ما دامك اللي عن جميع البشر فوق
محتاجك تبدد بالإحساس خوفي
قول أعشقك .. واصير عاشق ومعشوق
وأعذرك بظروفك و أعاند ظروفي
مخلوق أنا مثلك ومثل أي مخلوق
محتاج أحب إنسان للحب يوفي
مليت اطل الشمس بغروب وشروق
والبحر واوراق القصيد برفوفي
لا غيم يغريني ولا رعود وبروق
ولا لون قطرات المطر في كفوفي
حتى شعاع الشمس باهت ومسروق
والليل من سكناه ابعثر حروفي
وجهك ومنطوق محى كل منطوق
رجع لي احساسي بسمعي وشوفي
تعبت اوقف عند الأحباب مخنوق
واصد عنهم .. وانحرج من وقوفي
-
.
#شعر//
عبدالجبار الجفيني
.
تعليق