تويت
في ظلام الصمت خبيت الجراح
قلت نامي في الظلام بدون صوت
نومة اهل الكهف ماحولك صباح
لاتخافي مابقى شي يفوت
واستراح القلب ما ادري ما استراح
يوم غطتها بيوت العنكبوت
من نشدني قلت له مالك صلاح
خلني ساكت ويازين السكوت
وش يفيد الهرج واللي راح راح
حلم في غبة بحر في بطن حوت
كم ندبت الحظ يوم الحظ طاح
بعدما ضاعت مفاتيح البخوت
واقتنعت إني لحالي في البراح
وإن هذا هو نصيبي لين اموت
ماصحيت إلا على صوت الرياح
هزت البيبان واركان البيوت
والسحابة في السماء والبرق لاح
قلت دعوة واستجيبت في قنوت
واستهلت وامطرت عذب قراح
ينبت الأوراق في غصن محتوت
انتبهت وقلت يادنيا سماح
في القضايا كلها رغم الثبوت
كل جرح فاق من نومه وصاح
بعدما زالت بيوت العنكبوت .
----------
قصيده لــ عبدالله الطلحي ... .
تعليق