تويت
هذا ثمر قلبي تدلى قبل يأتي موسمه
مدي يدينك واجمعي فرقاك من عذق العتب
أنا ثملت من الفراق اللي خذا وجهي سمة
شوفي ملامح غيبتك تقرا قبل لاتنكتب
في وجهي الشاحب وفي آهات صدري ونسمه
في ناظر عيون هميل الوجد منها ينسكب
يا نور لحظات غدت من دون وجهك معتمة
وينك ..بدا هذا الحنين بجوف صدري يحتطب
ياحب إجتاح الضلوع وفج قلبي وقسمه
نصفين وأزريت اجمع النصفين وغيابك سبب
حب بقى لو واقعه مره بحاليه صدمه
عشق حيا رغم العطش في روض روحي معتشب
ليت الغلا ذنب تجناه الخفوق ويندمه
وليت الصبر جرم اليا طاولت همي يرتكب
إلى متى وأنا أهين الوقت وأرجع واحشمه
وأنا على رجم الوصال أشرف وأنادي وأرتقب
ياأم العيون الفاترات الناجلات المغرمة
يا من رموش عيونها تشكي سبب عكش الهدب
يامبسم له ضحكة تنطق بشي تبهمه
يانبرة لامن حكت كل المعاني تنقلب
ياللي خذيتي خافقي قبل اعرفك واقدمه
ياللي غيابك لحن تغني به أعواد القصب
عودي على قلب طواه الهم والشوق هزمه
قلب معك غنايمه ضاعت ولاادري وش كسب
أنا انتهيت وشوقي بصدري بدت له همهمه
جمر انتظاري سمدت ناره وانا صرت الحطب
حتى ثمر قلبي تدلى قبل ياتي موسمه
هزي طرف جذعه تساقط لك من عذوقه عتب .
قصيده لــ صالح السكيبي ... .
تعليق