تويت
فمان الجرح .. لا والله فمان احزاني الكبرى
فمان اغلى اربع سنين مت بها عشان اعيش
فمان الحب واحلام القلوب البيض والخضرا
فمان الآه من كثر الزعل والشوق والتطنيش
فمان عيونك اللي مالها بين العيون .. اخرى
فمان غرورك اللي علم الطاووس نفش الريش
فمان عطورك اللي تسكن انفاسي .. وبالأحرى
فمان انفاسك اللي تسكن عطوري ومدري ليش؟
فمان الليل .. واحضان الدفا .. ومصافح القمرا
فمان الباب والشباك يوم اواعدك ونطيش
فمان التوت .. والرمان .. واحلى فاكهه حمرا
فمان الضحكه اللي كنها من مبسمك بخشيش
فمان الفراق اللي ماترك لمواصلك .. بشرى
فمان الشك وظنون الخطا والكذب والتشويش
فمان العيد .. كني به يجيني وحالتي تزرى
يطبطب فوق أكتافي حزن ويقول لي: معليش
فمان الجوع واحساس العطش .. ومفارقك صحرا
تعبت افتش لواحاتها واضناني التفتيش
فمان ضلوع مكتوب على أنحاءها اليسرى
"هنا توجد جروحي " لو تكرمتي: بلا تنبيش
فمان دموع لا تسمن ولا تغني من الذكرى
وانا اللي ماقدرت اطلع من اجوائي معك بشويش
فمان الشارع اللي كلما جيته .. وانا أقرا
معاناتي من اول يوم في وصلك إلى التهميش
فمان الشاعر اللي يجمع بتجربته الصغرى
فكر بدر .. ورومنسية نزار .. وفلسفة درويش
فمان العاشق المجني عليه .. بتسلية عذرا
من اول "بعشقك " حتى نهاية "ما تصبرنيش "
فمان الخوف ويدينك جنود وأضلعي أسرى
وانا فيني من الإحباط .. مايكفي هزيمة جيش
فمان اشياء ماتنقال للعالم .. ولا تطرى
ممالك حب .. دمرها اللعب وسياسة التطفيش
فمان الإيش؟ ما أدري .. ولكن الزمان ادرى
وانا اللي ضاع مايدري .. حبيبه ضيعه لجل ايش؟
فمان الله ياقلبي مع انك جرح ما يبرى
كتب ربي علي اعيش من دونك .. وانا ما اعيش .
للشاعر : محمد الشهرري .
رااااقت لي كثيرا .
تعليق