من يم نجد وشرق مكه وطيبه
لين الديار اللي جنوب القريات
جيت بخفوقي شوق ماينحكي به
اكبر من حروف الشعر والكتابات
شوق(ن) ماهو شوق الحبيب لحبيبه
شوق (الطنايا للكرم والجمالات)
ولو قالوا ان الدار ماهي قريبه
بقول : يعني ماتهون المسافات
ماهم بربعي بالليالي الصعيبه
أجل وربي ماحسبت المشقات
(شمر) ليا صك الصليب بصليبه
أهجد ياجن وأنس لاهل الطويلات
يرضخ لهم هالطيب حشمه وهيبه
ويرفع لهم بالعز بيرق ورايات
ومن مرهم طرقي بياخذ ضريبه
فنجال(اشدا من خضاب الخوندات)
والموقدة تشهد براس الرقيبه
ومن طيبهم ما ينزلون الطمانات
(والشمري) من طيب راسه وطيبه
به ميزة(ن) عدة حدود المروات
لاثارت الفزعات ، لاتنتخي به!
لانه يثور من(الطنا) دون فزعات
الله خلقهم للمصيبه مصيبه
وللنار نار٠٠ وللمعالي ريادات
وللموت موت ٠٠وللهيبه لهيبه
وللطيب طيب٠٠وللمراجل سيادات
لكن : بهم حاجه ، ولاهي غريبه
يمكن يخون بها الشعر والعبارات
اليا بطشوا: خلوا المضارب عطيبه
واليا عطوا: ما مدوا الا الجزيلات
ما ارفع مكانتهم بشعر(ن) اجيبه
هم يرفعون حروف شعري مقامات
واخر ما اقول بالشعر وانتهي به
بحطها بقوسين واربع علامات !!!!
(الشمري ! عيبه ! وعيبه ! وعيبه !
اليا ارتكي للحمل شال الثقيلات


صح لسانك ابن ساقان

منقول