صحى صوت الملام وكل عبرة في بيوت الطين
تعانق مجد بابل .. والسحاب يصافح ترابه
لمحت الفجر مر وفي جيوبه دبلة .. وحرفين
رمته الشمس في وجه الظلام .. وشقق ثيابه
وغارت بالحشا خيل الشعر ياعادل الشاهين
وسرت في كل عرق سيوف عز وصيحة .. ولابه
يشوش الحرف مثل الفارس اللي ينطح الغازين
وقصيدي فيه من صدق البياض .. وثورة اعصابه
ملامح طفل ضاع بكلمتين وردد "امي وين؟"
كسر صمت الجبال الشامخات .. وحطّم ألعابه
تثور بداخله فزعات ابن مهذل .. وابن حثلين
وعزاوي "يام" لا طار الفشق .. والنار شبابه
سرى مابين واحات النخيل .. وضفة النهرين
ونادى للسهول .. ووادي الريحان .. واعشابه
سلام الله على بغداد .. في وقت العسر واللين
لو يشح الزمان .. بنفحة التاريخ .. واطيابه
على اطول ضلع في صدر الغياب ابني لها بيتين
والوّح للحمام اللي هجرها .. واجمع ترابه
أصب الغيم يا عادل ولو طال السهر والبين
تطمّن .. والله ان الحق .. له لابه .. وطلابه
جبل سنجار لو نادى وردد .. يا صلاح الدين
نبيت في كل ذرة رمل سيف ودرع .. وعصابه
تحزّم وارفع البيرق يا عادل .. وازهم القاصين
وصوتك ما ذبل .. يوم الليالي السود .. مرتابه
يسوقه ساسك الطيب .. ونخوة ربعك الوافين
مقابيس الوغى "شمّر" .. نهار الهوش .. حرّابه
يقولون البدو علم الحيا .. والطيبين .. يبين
وانا اخيل البروق .. وكل ضامي .. يشعب ركابه
امانة وصّل عيوني يا عادل .. ديرة الغالين
وبلّغ صبحها المكسور .. يطوي صفحة كتابه
وعلّمها عن اخر سالفة للجرح .. والسكين
وطمّن كل مسجد في ثراها .. ضج .. بحرابه
عزاوة طفل فينا لا وصل راس اللهب للدين
تهزم الفين ظالم .. وألف طيارة .. ودبابه
صبرنا لين فاض الكيل بين الشك .. والتخمين
وحنّا روس قومٍ .. ماتهاب الموت .. واسبابه
خلاص من الظلام اللي تمادى .. واستحل العين
خلاص .. وكل درب لجنة الفردوس .. حيّابه