صبااااح / مساااء الفل للكل ..☆

اليوم كان كله شغل وتعب وارهااق من الضهر للساعة تمانية ونص بالليل ، بس بجد ارهااق وخاصة الدنيا برد ومطر ..والدفا والبطانيات تناديك تعالالي

دخلت البيت تقريبا تمانية ونصف ولقيت الجميع جالسين بغرفة شي ماسك جواله ،شي متابع للاخبار ةشي مابعرف ايه ...وانا رحت جالسه على اساس اجلس مافي ربع ساعة الا انا بسابع نومه .

صحيت بعد ساعة ونصف تقريبا ..امي تحكي لي انتي تحبي التعب جيبي وحده تساعدك واعطيها راتب ههه ماتعرف لسه بحكي ياهادي والمبلغ بوفره الي افضل

الموهيم انه بضاعتي وصلت الحمد لله واتفقدتها ومافي اخطاء،وعال العال ماشاء الله ربي يبارك فيها ..دوم تجيني فيها اخطاء هاده المره حكيت بما انه البضاعة بتجنن رح اعمل مقلب بابو محمد وارفع ضغطه

وفعلا كلمته على اني زعلانه وحكيت له شو هاده لبضاعة يا ابو محمد تحكيلي خامات ممتازة شي رايح ايده ..شي ماله طوق شي ماله شال هلا هلا رح رجع لك لبضاعة لشركة الشحن يرجعوها لتركيا


يعني الصراحة شعرت ضغطه وصل العالالي وهوي يحكيلي انا مشرف عليها بيدي مارح اسكت ...وبس شفته عصب اعترفت انه مقلب ..واتزعد يرد المقلب بمقلب

الله يستر من مقالبه ههه

هلأ في وحده تشتغل معي اونلاين ..تاخد مني بضاعة متلا القطعة ببيعها ب ٣٠ دولار هي تبيعها باربعين او اكتر ..وكانت رح تبيع صبية فستان اسمها الاونلاين مها ..انا ما ارتحت لها شعرتها طماعة ..المهم والاهم انه اخدت فستان مني على ٣٥ دولار ..باعته لصبية على اساس ٥٠ دولار تقريبا ..

انا شو دخلني المهم انه تدفع لي المبلغ ..
بس تفاجئت انه صبية تتصل علي ..تحكيلي انتي .....
حكيت لها تفضلي اي خدمة
حكت بدي رجع الفستان اجاني دياق ..حكيت لها عفوا اي فستان ترجعيه ..حكت اشتريته من مها وماخدته منك واعطتني الرقم .

حكيت لها تفضلي تشرفي بس كم باعتك ايياه ..قالت ٥٠ دولار ..حكيت لها انا بعتها ايياه ب ٣٥ دولار وان بدك تبدلي شي من عيوني بس بالمبلغ يلي بعته انا مو بالمبلغ يلي باعتك فيه

زعلت قال ..بتحكيلي وانا شو ذنبي ما اجى علي الفستان ..حكيت لها سؤال انا بعتك شي ..حكت لا
انا بعرفك .حكت لا
حكيت لها ..روحي للي باعتك ورجعيلها ايياه انا ماخصني ..

فعلا رجعت تكلم الاونلاين بس طلعت اونلاين طماعة وكمان دخلت لي خاص تحكيلي شو دخلك بمربحي انتي وهي لدها ترجعه ورجعيه او بدليه .
حكيت لها بهدوء انه الصبية رح ترجع الفستان او تبدله وانتي ليه المربح لكان مادام رح ترجعلك فستانك يعني هيك طمع بدك الربح منها حكت ما تدخلي ..

هون حكيت ايه مادام مارح اتدخل انا بفرجيك كيف رح ترجعي الفلوس كاملة للصبية ومارح اسمح تنصبي عليها لانه ما اخدت الفستان فكيف تطمعي عليها ..هي من محافظة بعيدة اسمها الخليل ونحنا محافظة جنين ...فاعطتني حظر من المسنجر ..

بعد شوي رجعت لي الصبية وحكت ساعديني الفستان ماجاي على مقاسي والله مو ذنبي ..والله حزنت عليها قلبيا ..
حكيت لها انا رح ساعدك مو بس انه رح بدلك ايياه وباقي حقك رح تاخديه باذن الله ..

اتصلت على الشاب بشركة التوصيل وخبرته انا صاحبة البوتيك الفلوس يلي اعطتيك ايياهن الضهر توصلهن لصبية بالخليل وقفهم لاتبعتهم ..
وحكيت للصبية يلي اشترت الفستان ..اتصلي بالاونلاين مها وخبريها ..صاحبة البوتيك مابدها ترجع الفستان وتخانقت معها واعطتني عنوانكم ورقمك ورح اجي عند خالتي بالخليل واجي لبيتك رجع الفستان ..

وفعلا عملت متل ما حكيت لها ..وردت مها عليها لاتجي الفستان رجعيه لصاحبة البوتيك ومابدي فلوس ومابدي اخد منها مره تانية .

هلا ضلت ساعة تتشكر فيني الصبية
وفرحانه رجع لها حقها ..بس والله والله اني فرحت اها وشمتت بمها لانها طماعة ومااخدت شي ...وزارتني اليوم ببوتيكي الصبية مع والدتها وبدلت الفستان ووعدتني تجيب لي صديقاتها كمان ..

بس لما شافتني حكتلي الي يشوفك على الجوال يتوهم عليك شكلك بالواقع ماتخانقي قطة هههه مابعرف ليه اختارت القطط يمكن لانه بحبهن

انا مابحب الظلم بجد وبتعبني ..واهلي وصديقاتي كان نظرتهم انه غلطانه ولازم ماخسرت مها يلي تاخد مني بضاعة كرمال وحده مابعرفها ..وحكولي ماتربح مالك فيها ..بس مربحها كان نصب وانا مرتاحة انه خسرتها بس بالمقابل الصبية رجع لها حقها وبكفي فرحتها والله

وبس

لحظة

لحظة من بعض وقت ضائع خلف طيفك
لحظة من بعص أمنيات حبيسة خلف اسطر تحمل عبق انفاسك ..
لحظة من بعض حرف لا يكتمل الا ان ذكرك ..عشق تائه بلا مكان ولا ميعاد ..

لحظة من بين اكوام الساعات المارة هبائا دونك ...

هي تلك اللحظة التي أتمنى ان تجمعني....... بك ♡


..

●
●
☆
كل شيء هادىء الا ذاك الضجيج الذي يناديني بين الأسطر •°

والحلم فيه يعانق أطراف الليل °•
وشموع التمني تضيء حزن الحروف التي تفتقدك

حرفي مبعثر
ونبضات قلبي لا تبدو لي الليلة مستقرة
فهي بين مد وجزر "

أيها الراقد بين نبضي والوتين ▪•
بعدك مهول بحجم تلك المساحة الهائلة بحجم وطن.


فكلما مر طيفك القيت على روح قلبي السلآم °•

"

مساااء الخير ..♡


صراحة في كتير أشيا نفسي أحكي فيها ..ومواقف كتيرة صارت معي ..وصراحة مالي نفس احكي مابعرف يمكن لانه شعلي بضل فيه احكي احكي مابسكت الا لما بكون لوحدي فمليت من شيء اسمه كلااام ..حتى صرت اختصر الكلام مع بعض المقربين ..
في صديقات لي كنا دوم على تواصل ومقربات عندي في قروب الواتس اخواتي ونسوان اخواني ..كنا نسهر تقريبا كل ليلة للفجر ..لي شهر ما تكلمت معهن وعتبانات وعندهن انه صرت شوف نفسي ومغرورة عليهم ..بس جد بتضايق من هيك نظرات سطحية ..بس الغريب انه ما عدت حب برر حتى بلتزم بالصمت اغلب الوقت ..

الفرق انه كنت قبل فاضية اشغال وما في غير جامعتي اليوم شغلي ونص وقتي ببحث بمواقع وازياء واتعرف على اشيا تفيدني بشغلي ..

وكمان سجلت في دورة بمعهد خيروني بين لغات ..او اكون مشرفة لاطفال التوحد او يلي عندهم صعوبة في النطق ..وهاده الفئات ..المفرح انه الوظيفة بعد الدورة باذن الله مضمونه خاصة معي جامعة ..

محتارة اي اختار ..بجوز سابقا لوخيرت اختار مشرفة للاطفال لانه كنت اشعر بقلبي حنان كتير ..لكن اليوم مابعرف خايفه اظلمهم او ماكون بالمستوى من الحنية المطلوبة ..


سبحان الله الانسان بتغير وكل يوم بشعر انه بكتسب حلم اكبر .. بس،الجانب الحلو فيني بشعره ويلي قريبين متي بيحسوه هو على قولتهم الجانب الطفولي مسميينه ..لكن هوي مو جانب طفولي ..انا بشعر الانسان لو عمره ٨٠ بكون في جزء،من روحهه روح بريئة بتحتاج تضحك وتمزح بتحتاج براءة وبتحتاج حتى مين يمدها بالدفء ..

حتى مهما كان الانسان واصل لرتبة حتى الملك اعلى قيمة في دولته ..هوي انسان بيميل للحنان ويلي بيمنحه هالشعور ..



مابعرف صدقا هلأ لوين بتمشي الحياة فينا ..ولامحددة هدف معين ..عندي اهداف ،،ناس بتروح ناس بتجي ..بنزعل بنرضى ..بنتغير ايجابيا سلبيا ..


والحياة بتمشي ونحنا بنمشي
وفي موقع ازياء بيجنن اسمه نمشي

هاااياااات

كيفاتكم اخباركم عامليين ايه ...ازيكم ،،♡♡

يعني قالب شعوري حب للمصرين هالفترة شاعرة انهم اوبهةة قدا

هلا لي فترة بتعامل مع تاجرة لها شركة شحن مصرية في القاهرة واخدت منها بضاعة تجنن ماشالله ..ضايل نتوكل على الله ونشحن لفلسطين ..

لي فترة دايخة على فساتين سواريه تركية تكون تقيلة بناء على طلب بعض الزبونات ..وابو محمد فيه الخير والبركة بس طلبي مو لاقيته عنده ..والحمد لله انه بملك ارادة وعزيمة خاصة لما حط شي ببالي ..بعد عناء عشرين يوم وانا ابحث عن ماركات ومصادر لقيت الليلة ..مدام مصرية مقيمة في تركيا ..مو بس عندها الماركات كمان تاخد من المصدر الاسي بعتت لي موديلات تشرح الصدر وتفرح القلب واسعار تخليك طاير بلاعقل من الفرحة هههه بجد بجد شاعرة بسعادة ..كيف يلي يقدم اختبار بعد تعب ..وانا هيك شاعرة نجحت بالاختبار ولقيت هالمدام المصرية ..يعني هي والصبية يلي بمصر يكفوني بجد ...

وطبعا مافي غنى عن ابو محمد لانه ضحكته تجنن


دعواتكم

ويارب التوفيق

صبااااح / مساااء السعادة لقلوبكم وعيونكم ..♡

الأنسان لما يكون طموحه مدعوم بارادة قوية بيشعر انه كل الأزمات والمشاكل ممكن تهون امام نقطة يوصل فيها لهدفه .

هلأ الحمد لله شغلي كل يوم بيتطور اكتر بفضل الله وبوتيكي سميته 《 شهرزاد الأناقة 》
ورح أعمل له كارما محل تكون بحروف متحركة ♡
اجلت الكارما لانه كان مطر كتير وهلا بلش الربيع اول ما اعمل الكارما ان شاء الله رح صور لكم ايياها ..

هلا الشي المو متوقع انه صدر من فلسطين لبلدان تانية ..باخد بضاعة من تاجرة مصرية وعندها شركة شحن اختها .بستورد منهن

وباخد تركي
بس لبضاعة التركية لما يستوردوها المصريين تكون غالية جدا جدا عليهم بسبب الجمارك ..هلا بقترح على التاجرة لو استورد تركي لفلسطين الها وانا اشحنهم لمصر ..طبعا لو بدي اشحن تركي لمصر رح يضيفوا جمارك مضاعفة فاقترحت انه تطلب طلبيتها وتكون اقل شي ٢٠٠ قطعة ..وانا بأمنهم لها لمصر ..وفعلت انا قناة تلغرام لبيع الجملة ووعدتني تضيف لي تجار وتاجرات من مصر كمان ..هلأ ان زبط هالشي معي بكون حلو كتير مو بس انه صدر تركي رح صدر فلسطيني اردني وهندي وكل الماركات حتى لو افريقي


وياااااارب من نجاح لنجاح

بس المشكلة صاير كل وقتي شغل بشغل حتى وقت الفراغ بتلاقوني ببحث بالماركات وبكلم لا تاجرات وتجار او ببحث عن تجار بيعطوا ارخص

حتى المقربين لي صايرة ماعاد شوفهم غير قليل
بجد كل شي وله ضريبة سلبيات وايجابيات بس بيضل تحقيق الطموح متعة وراحة نفسية .

♡

هاااايااااات بالحلوين ...♡


يعني اللهم لا حسد اليوم هاد نايس على قولة اهل النايس ههه
اخر روقان اخر حلاوة وفرح لدرجة انه بدلل بالكل تجار زبوناتي والمارين والغير مارين من امامي ههههه حتى بفكر ابعت عروس بالبريد للعريس يلي موصيني عليها

ما اجملني وانا رايقة الله يسعدني


من كتر الحكي يلي عندي ما لي طاقة احكيه


°
☆


أعترف ..

أن حبك أعمق من بحار النسيان ..لذلك لا مفر من الغرق فيك .

○●
●○


لا أشعر اني بخير .. لست مجهدة . ولا ينقصني شيء .ولكن شعوري ذاك يدفعني للبكاء ..ليس رغبة به ولا مطالبة بشيء محدد ..
هناك شيء لا أدركه دواخلي يطالبني بالبكاء.
هناك شعور يلح على قلبي ان بنبضني بألم ..ببعض من حزن ..والكثير الكثير من الحروف على السطور ..
لا أرغب في الكتابة ..ولكني أكتب
لا يغريني الليلة القمر ولا صفاء السماء ..ولكني اتمعن به بعمق ..ولسان حالي الصمت ..وروحي فقط تناجيه بهذيان جنوني لا ادرك طلاسمه ..

غريلة هي انا هذه الليلة
لا أعرفني ..ولا ادرك ما تريد روحي ..

أتراه الحنين زارني بك
أاكن مولعة بشوق اوقد جمره على خاصرة الذكرى ..!

أاعترف لك ..؟
ينقصني أنت .

يا صبااااح الخيير يا صباحات الأنوار ...♡

يعني الليلة النوم مفارق مابعرف هوي فرح او ارهاق

اليوم استلمت بضاعتي الربيع التركية من التاجرة حسناء،هاده مصرية مقيمة في تركيا ..تعرفت عليها وانا عاملة كونان وابحث ولقيتها هههه مسكت فيها ماعدت تركتها

على قولتها ..يالهوووي انت سكرة يابت

●
○

ك مدمنة هي أنا ..أتقنت فن تعاطيك ..
ك حقنة عشق في الوريد ، ترفض البراءة
منك .

أتعاطى ذكراك كل أمسية ومحبرتي
لتنزفك أيقونة حب .

أزور الأسطر المضمخة بأنفاسك
أسكن الابجديات العبقة بأريجك ..أستنشقك
بصمت .

وعند كل نبضة حنين ..
أقدم لك الف وبعضا من الأعذار لذاك الغياب
حتى يحتضنك عند قدومك قلبي برفق ..وفي
هواك يضل من جديد الطريق .

فأني أعشق فيني عزلتي بك
وكم أهوى المضي في درب يجمعني بك .

•▪

●
■

أقتبس من ملامحك حرفي
ومن هيبتك أرسم امبراطورية عشق
فيها أبجدية مغرورة بحبك
شامخة بك
همسها جنوني حد اليقين أن لاعشق
بين القلوب سوى العشق لقلبك
ولا افتتان حد الافتتنان بك
مرهق هو الوقت بدونك ..اهرب من بعضه أليك
اشتاق لي فيك
ويفتقدني الآخرين ليجدوني بين سطر يحوي أنفاسك
أنت ..
كل الوجوه وجهك
وكل الاوطان أنت

أدمنتك محبرتي حد رسمك بيت القصيد
فشيئا منك على اسطري
وبعضا من طيفك يسكنني

حتى بت لي حكاية حنين
فيها أشتهي المطر
ولحن فيروزي وابتسامتك تلك التي
تشبه القمر