في القلب اشياء اكبر من ان تحكى

**Ђŋt ą ßσЎ** · 20-12-2015, 05:05 PM

رد: روايات طويلة

رواية حلوه ..!
ما عجبني تركيزك على شخصية وحده ..!
عطينا موعد البارتات واحنا بانتظارك ..!؟

**nesreen** · 22-12-2015, 04:25 AM

رد: روايات طويلة

نزلت ذا البارات والبارت الثاني ان شاء الله الاربعاء او الخميس بس استنى متابعين للراوية

**أنة حرف** · 22-12-2015, 06:02 PM

رد: روايات طويلة

بداية موفقة
كملي يعطيك العافية بانتظارك

**nesreen** · 26-12-2015, 11:51 AM

رد: روايات طويلة

معليش تأخرت عليكم بس تعرفو الوضع إختبارات وكذا
قراءة ممتعهه
موده : مشاعل خلاص لا تبكين
مشاعل : بس نايف ما يحبني
موده : جاي اليوم اللي يحبك فيه لا تخافين
مشاعل : انا برجع البيت
موده : طيب انتبهي على نفسك وطمنيني اذا وصلتي
مشاعل : ان شاء الله باي
ونزلت وطلعت برا البيت وكان نايف واقف برا
نايف : مشاعل
مشاعل : نعم
نايف : صدقيني موب قصدي اجرحكي انتي بنت عمي مو اكثر ولا اقل
مشاعل : نايف هذي حياتك وانت حر فيها انا ما ادخل نفسي في شي
نايف : صدقيني اذا فيه نصيب ما راح اتردد بس التقاليد لازم تروح لانهم يعلقوا قلوب ببعض
مالهم دخل وش ذنبك تحبيني من تعليقاتهم لازم نعيش الواقع
مشاعل وهي تبكي : عن اذنك
نايف مسكها من يدها : ما خلصت كلامي
مشاعل تبعد يدها عنه : اترك يدي .. اخلص وش تبي
نايف : لو بفكر اتزوج فعلا ما راح القى بنت احسن منك .. بس انا ما فكرت ولا راح افكر
ابي اعيش حياتي وبعدين افكر اذا براسي اتزوج ولا لا وما ابي اوقف نصيبك
مشاعل : خلصت ؟
نايف : ايهه
مشاعل : سلام

رجعت مشاعل بيتها ونايف طلع غرفة موده
يدق الباب
موده : اتفضل
نايف : ممكن ادخل
موده : خير وش تبي
نايف : خليني ادخل ابي اتكلم معك
موده : ادخل
نايف : ليش زعلانه مني
موده : نايف انت غلطت بحقها حرام عليك تحبك انت وش سويت غير انك جرحتها
نايف : شفتها وهي طالعه وتكلمت معها وفهمتها
موده : انا مالي شغل تحمل اللي بيجيك
نايف : انا ما احب احد ولا ابي اتزوج ابى اعيش حياتي
موده : أي عيش حياتك معها
نايف : البنت كانت تلعب بحضني وهي صغيره والحين تصير زوجتي
موده : وين المشكله
استمر الكلام لوقت طويل اقنعت موده نايف يطلبها للزواج
اتصلت موده على مشاعل
مشاعل وصوتها مكتوم وتبكي : الو
موده : ميشو خلاص اقنعت نايف
مشاعل : اذا هو اقتنع انا ما اقتنعت ولا ابى واحد اقتنع فيني ابى واحد مقتنع
موده بصدمه : مشاعل وش فيكي بالاخير القرار لكم انتو الاثنين محد يجبركم
مشاعل : وعشان كذا وصلي له يختار له وحده غيري انا ما بوافق عليه
موده : طيب انتي ارتاحي الحين ونتكلم بوقت ثاني
مشاعل : اوكي سلام
موده قامت تركض لغرفة نايف تحكي له دقت الباب بقوه
نايف فتح لها مفجوع : خير وش فيه
موده تاخذ نفس : كلمت مشاعل
نايف : خير صاير معها شئ
موده : قالتلي انا ما اقتنعت ولا ابى واحد اقتنع فيني ابى واحد مقتنع وكمان
وصلي له يختار له وحده غيري انا ما بوافق عليه
نايف يجلس على سريره : خوفتيني طلع الموضوع كذا
موده عصبت : نايف حرام عليك ذا كله من ورا قلبها لأنها مكسورة
نايف : طيب لصقيها
موده معصبه : شارب شئ ؟
نايف بضحكه استهتار : لا أشم شراريب واسكر كويس
موده : يووووووه يعني انقلع ولا وشلون
نايف ببرود: والله مدري اللي يريحك لون اخضر- ازرق اللي يعجبك
موده : ما اعرف متى يصير عندك احساس وتحس بالبشر
ترى حتى هي عندها احساس تتألم هي متوجعه منك وانت جالس تخفف دمك
نايف ببرود : والله مادري وش اسوي بس هذا الحال يعني ليش احرق دمي على موضوع تافهه
موده : تافهه والبنت ميته عليك لو انا منها عمري ما حبيتك
نايف : ليش مضايقه كذا عليها ؟
موده نزلت دمعتها : انت ما عندك ضمير
طلعت لغرفتها وتركض وقفلت الباب ونايف يلحقها
نايف : موده افتحي الباب بس شوي
موده : روح مابي اسمع منك شئ
نايف : قلت افتحي الباب مو بكيفك ولا والله العظيم لا اكسره
موده فتحت الباب دخل نايف وقفله
نايف يحط يده على ظهرها ويمسح عليه : حبيبتي ليش مضايقه عليها ؟
موده : لأنك ما جربت تحب شخص ويجرحك ضميرك ما يعورك لازم تحس ب الواقع اللي نعيشه
نايف : خلاص انا راح اتزوجها عشانكم بس وما راح اقصر معاها ولها كل اللي تبيه
إلا الحب .. اسف اعفيني حب ما اقدر احبها.
موده : هذا اخر كلامك ؟
نايف : الحب يجي مع الأيام يعني اذا حبيتها بعد الزواج كان بها لكن اجبر نفسي على حبها
والله ما اجبر نفسي على كذا
موده : نايف اوعدني تكون معاها على طول ومن بكرا تكلم ابوي انك تبى تخطبها !
نايف : إن شاء الله
موده : الله لا يحرمك السعاده
نايف : امين وما انحرم منك ابد

نايف : ابوي ابيك تخطب لي مشاعل
ابو نايف : الله يرضى عليك يا ولدي ان شاء الله اكلم عمك
نايف : مشكور ما تقصر
...
الجمعه

قررت العائله انها تجتمع في بيت العم ابو خالد الظهر
المجلس في الأعمام مجتمعين الاربعه على طرف والمجلس المكان اللي باقي طبعا للعيال
راكان و نايف و خالد و ريان وكل مين فيهم يقول سواليفه
فجأه تكلم العم ابو خالد وقاطع سواليفهم : مبروك يا نايف من اليوم اعتبر مشاعل لك
خالد : ههاه ؟ اختي ! وين بتروح ؟
الكل : ضحك على كلمة خالد
نايف : يشرفني والله يا عمي اكون اسعد إنسان
راكان و ريان : مبروك
نايف : الله يبارك فيكم
خالد : ههيييييه انتو شسالفه ؟
نايف بضحكه : واختك طارت منك ؟ باقي شئ ؟
خالد : من متى ؟
نايف : من اليوم ما سمعت عمي وش قال ؟
خالد : اختي بتتزوج وانا اخر من يعلم زينن والله
نايف : زين ولا موبايلي
خالد : نايف وش اخر شئ سويته ؟ الحشيش واضح عليك !
نايف : ايه اشرب حشيش نوع ممتاز تبي منه .. بس ها لا تعلم احد
خالد : هههههههههه واضح عليك من سماجتك
راكان : شفت هيا لا تزوجه اختك
نايف : اخ يا النذل هذا وانا اخوك
ريان : اقولكم من زمان راكان نذل امامي
....
والبنات جالسين شهد و روان و موده و مشاعل في غرفة مشاعل
موده : بنات انا مره طفشانه تكلمو أي شئ
مشاعل : بس بالعاده ما يجيب السواليف الا انتي
موده : ايه بس مخي مقفل يعني مع الدراسه وكذا
شهد : ايه واضح مره انك تذاكري مقطعه نفسك
روان : الا موده عاد
شهد : عاد ولا ثمود
الكل : ههههههههههههه
موده : احم احم محد قدي روان تدافع عني
شهد : سكتي بس انتي وياها مو لعيونك لعيون راكان
كلهم ضحكوا الا مشاعل
مشاعل : شسالفه بنات ؟
شهد : انا بروح اشرب مويه خليهم يفهموكي السالفه
نزلت شهد وموده تفهم مشاعل سالفة راكان و روان
عند العيال /
خالد : شوي وجاييكم بروح اشوف الغدا
راح خالد وقبله
شهد دخلت المطبخ وصبت لها مويه في كوب وجلست تشرب
دخل خالد المطبخ وشهد الكوب بيدها ومعلق بفمها تشرب ويوم سمعت صوت خالد
خالد : احم احم
شرقت بالمويه خالد جا عند شهد وضربها ضربه خفيفه على ظهرها وهي والحمدلله بدت تهدي شوي
طلعت تجري
خالد لمحها ويضحك : صحه
شهد بقلبها(على قلبك) : وبعد لك عين ترد
طلعت شهد للبنات
وخالد دخل المطبخ ما كان فيه احد دق على امه وجات المطبخ
ام خالد : ها وش بغيت ؟
خالد : ابد بس جاي اشوف اذا الغدا جاهز ولا لا
ام خالد : جاهز بس شوي ونحطه
خالد : مشكوره يا الغاليه
.. باس على راسها وطلع للعيال
شوي والغدا جا
بعد ما خلصو
ابو نايف : مشكور ان شاء الله غدا يدوم يارب
ابو ريان : ان شاء الله امين
ابو خالد : بالعافيه بالعافيه
..

ابو خالد : ها متى بغيت الملكه يا ابو نايف
ابو نايف : والله الشور ل مشاعل ونايف
ابو خالد : ها يا نايف ؟
نايف : والله عمي انا جاهز لو بغيت بكره المهم رأي مشاعل
ابو خالد : اذا السالفه هي على مشاعل ف متأكد إنها موافقه اصلا وشوله ترفض
نايف : انا جاهز يا عمي وانتظر الكلمه منكم
ابو خالد :على خير ان شاء الله
...
على العشا
ابو خالد : مشاعل
مشاعل : هلا
ابو خالد : اليوم نايف طلب رأيك بوقت الملكه متى تبينها ؟
مشاعل : وووش
ابو خالد : نايف طلبك مني واظن ما عندك اعتراض صح ؟
مشاعل : ههاه .. بس انا ما خلصت دراستي
ابو خالد : ايهه اكيد وهو موافق اكيد انك تكملين دراستك عنده
مشاعل : ايه ما ادري كيفكم
ام خالد : مبروك يا الغاليه الحمدلله بفرح فيكي عقبالك يا خالد
خالد : ايه اصلا انا مثل المزهريه الناس تتزوج وانا قاعد
ابو خالد : انت اشر و تم
خالد : مشكور .. ( وكمل بصوت واطي يكلم مشاعل ) اقول مشاعل ابيك بعد العشا بسالفه
مشاعل بهمس : طيب اطلع بعد العشا عندي الغرفه
ابو خالد : وش عندكم ؟
خالد : لا ابد بس ابارك لها
...
طلع خالد لغرفه مشاعل
مشاعل وتلعب بالجوال : هلا تعال
خالد : اقول مشاعل
مشاعل بدون اهميه وعيونها على الجوال : لبيه
خالد : اسمعيني هنا اتركي الجوال شوي ما بيطير
مشاعل تركت الجوال : هها اخلص علي
خالد : اليوم شهد نزلت المطبخ تشرب مويه صح ؟
مشاعل : ووش عرفك ؟
خالد : ادري شفتها مسكينه شرقت بالمويه يوم شافتني
مشاعل : ايهه وليه جاي تسأل
خالد : يا لبييييهه والله صارت حلوه عن وهي صغيره
مشاعل : ايهه صح توقعت يوم ابوي يسألك تقول له انك تبي شهد استغربت صمتك
خالد : اصبري علي شوي وراح اتزوجها قبلك انتي ونايف
مشاعل : هههههههه ما اظن
خالد : ايه يصير خير اصلا نايف يومه بسنه
...
اما في بيت العم ابو نايف تحديدا غرفة موده
موده دق باب غرفتها
موده : ميين
.... : انا نايف
موده : ادخل ادخل
نايف : موده ابي اكلم مشاعل لو اتصلت عليها من جوالي ما بترد علي ابي اتصل عليها من عندك
موده : بس كذا من عيوني ما طلبت شئ
نايف : يخليك لي يا احلى اخت بالدنيا كلها
اخذ الجوال واتصل عليها
مشاعل : الو اهلين موده
نايف : هلا
مشاعل : مين ؟
نايف : نايف معاكي
مشاعل : امر وش بغيت
نايف : انا طلبتك من ابوكي اتمنى ما ترفضي لأي سبب لأني ما راح اقبل برفضك
مشاعل : ادري ابوي قلي
نايف : ايه وانتي وش رأيك ؟
مشاعل : مادري
نايف : مشاعل يصير لو تكون الشوفه بعد يومين
مشاعل : ووش ؟؟ شوفه !! ليش ؟؟
نايف : ايه ابي اشوفك لي الحق
مشاعل : بس ما توقعت احنا نعرف بعض زين
نايف : اللي يريحك يا قلبي المهم ابي ملكتنا ما تكون بعيده خلها بهالاسبوعين
مشاعل : على خير
نايف : اوكي
مشاعل: سلام
نايف : مشاعل
مشاعل : هلا
نايف : لا ولا شي بس انتبهي لنفسك
مشاعل : ان شاء الله وانت بعد
..
مشاعل قفلت الخط ومستغربه من كلامه وبهمس بينها وبين نفسها : وش فيه هذا خبل
قلبي وو مستعجل وشوفه وش صار عليه كان ما يطيقني
نامت وهي تفكر بالكلام ذا كلهه
...
بعد اسبوع خطبها وصارت الملكه
يوم الملكه
بغرفة العروسه
نايف (وهو يطالعها): كيفك
مشاعل(منزله راسها وعيونها بالارض) :الحمدلله
نايف (يرفع راسها ويطالع بعيونها): ليش ساكته
مشاعل: مدري شقول
نايف :أحبك
مشاعل(تضيع الموضوع) : كم الساعه
نايف: طب خلاص بسكت
برى عند المعازيم
كانت شهد جالسه مع موده
شهد : اقول موده مو كأنهم تأخرو ع الزفه
موده : لا عادي دوبها الساعه 1
شهد: انا بقوم اشوف مشاعل اذا تبي شئ
طلعت للصالون اللي فوق وكانت داخله غرفة العروسه
دخلت للصالون وصقعت بشخص ضخم
شهد: غبي انت ما تشوف
........: عميه ما تشوفين
شهد(ابتسمت واستحت): اءء خالد
خالد(مبستم بخباثة): شهد
شهد : مبروك على مشاعل
خالد: عقبالك يارب
شهد : ممكن طريق بروح اشوف مشاعل
خالد (وهو واقف مكانه ومبلم فيها): أي تفضلي
شهد : شلون بعدي وانت واقف بطريقي
خالد(انتبه وتوهق ):هاه أي اسف تفضلي
شهد راحت وهي تضحك على تصرفاته
ودخلت ل مشاعل

في لندن

غلا : بدر يصير لو نفتح قلوبنا لبعض او أي شئ يعني كذا
بدر : يصير طبعا .. قايل لك ألف مره اذا بخاطرك أي شئ وما تكلمتي بزعل منك
غلا : تردد بسيط يعني بس ..
بدر : بسيط ولا سبونج بوب !
غلا : هههههههههه لا والله الوضع ما يطمن اسكت احسن لي
بدر : لا بس كلمة وقلتها وش كنتي بتقولين
غلا : مادري نسيت
بدر : لا والله جد يعني شكله مهم ولو مهم ما تنسين
غلا : خلاص ياخي مو مهم خلينا نمشي
بدر : مو ماشيين قبل ما تقولين
غلا : انا مابي اقول الحين ولو غصبتني باضطر
اكذب عليك فخلي الكذب بعيد عننا واتعوذ من ابليس
بدر : طيب بس حاسس على فكره لك يومين وفي شئ تبين تقولينه ومتردده في كلام بعيونك
غلا : ان شاء الله كل شئ بوقته حلو
بدر : طيب تحبي نقوم او نكمل الجلسه
غلا : لا بخاطري امشي شوي
بدر : يلا
بدر ماشي قبلها وهي وراه ومغمضه عيونها وتغني
غلا :
في كل يوم احس اني عايش بخيير
وانت معاي اشوف الدنيا بعيني غيير
حتى الهوى اتنفسه مسك وعبير
صوتك حبيبي لا سمعته قلبي يطير
في كلل يووم احس اني عايش بخي...
وهي تغني طاحت ورجولها اتلوت تناديه وتصرخ
غلا : اه .. بدر
بدر يركض لها ويساعدها
بدر : وش فيكي مو عارفه تمشين خلي الطرب ينفعك
غلا : اه لا تعور خليها
بدر : وش فيكي ما تشوفين قدامك
غلا : يوووه مابي مساعدتك روح عني
بدر : خلاص اسكتي فضحتينا
غلا : انت اللي فضحتني عشان طحت وكأني متعمده اطيح نفسي
بدر وهو يتأملها وبصوت حنون : خلاص ما صار شئ
غلا : وش فيك تطالع فيني كذا
بدر بدأ يعصب منها : ابد بس قاعد اتذكر انا وين شفتك قبل كذا
غلا بنرفزه : بحظيرة الاحصنه اللي جنب حظيرة البقر اللي كنت فيها انت
بدر : وش فيكي
غلا : ابد بس ترى مكاننا غلط بنص الطريق
بدر : طب اسندي نفسك علي اساعدك تجلسين تريحين شوي
غلا : طيب شوي شوي ترى اللي بيدك انثى
بدر : ما اظن دامك تمشين وتفكرين بشي ثاني
غلا : خلينا نرجع الفندق ابي اريح
بدر : طيب بس لازم رجولك قبل نشوف لها حل
غلا : شلون يعني نرجع الفندق انام واصحى وتصير بخير
بدر : لا اسكتي انا بتصرف بوديكي المستشفى نسوي اشعه نطمن
غلا : ترى مو حادث ولا شئ مو محتاج كل ذا
بدر : اشش مو شغلك
بوقف تكسي واجيكي لا تتحركين ولا تدعسين على رجولك انتبهي زين
راح وقف تكسي بسرعه ورجع لها
بدر : يلا قومي هاتي يدك وتعالي بثقلك علي
غلا : طيب
طالعين من المستشفى
بدر : شفتي وش ينفع فيه المشي على عماك
غلا : ترى مجرد رضوض لمتى بتذلني فيهم
بدر : لين ما تروح يلا قربي شوي اساعدكي
غلا مقربه منه وضامها له ويده على خصرها
غلا : بدر ممكن تبعد شوي ! اقدر اساعد نفسي .
بدر : لا ما اظن انك تقدرين .. وانا مرتاح كذا
غلا : بس مو مرتاحه انا اقدر اسند نفسي
بدر : اششش ولا كلمه .. أعرف راحتكي زين

المهم البارت الثالث حيكون يوم الخميس مو الجاي اللي بعدو

**أنة حرف** · 26-12-2015, 08:01 PM

رد: روايات طويلة

كملي يا عسل
بانتظارك
موفقة

**ام رموسه** · 26-12-2015, 08:10 PM

رد: في القلب اشياء اكبر من ان تحكى

روووووعه استمري

**nesreen** · 26-12-2015, 11:07 PM

رد: في القلب اشياء اكبر من ان تحكى

الله يسعد قلبكم حبايبي حاولو تنشرو الروايه ابكمل وانا متحمسهه وابغى توقعات جميلهه زيكم

في القلب اشياء اكبر من ان تحكى

في القلب اشياء اكبر من ان تحكى

تعليق

تعليق

تعليق

تعليق

تعليق

تعليق

تعليق

google Ad Widget