وين انت يالغالي عسى مابك اخلاف
لك مدتن ما بن نورك علينا

ترى القمر لا غاب لابد ينشاف
لاجل الغلاء حنا ترانا عنينا

ما طاف يومن ما تحريت ماطاف
اتعبت قلبي وتونا ما بدينا

منت رخيصن ياريش العين تنعاف
لو تفقد عيوني نظرك انعمينا

منول قلبك على القلب ميلاف
ونعيش وبدنيا السعادة نشينا

واليوم قلبك ما تعطف ولاراف
وحديتني بدرب النهاية مشينا

خفاف سلوم الهوى ماهن اخفاف
نشفق على اللي بالمحبة يبينا

غلاك ما خلى لنا دين واسلاف
ويما صبرنا بالهوى ما شكينا

اخلصت لك من دون تحديد واسراف
ويا ليتنا في قربكم ما سعينا

رقيت بافكاري على راس مشراف
وصديت عنه يوم حنا شرينا

اعدل بحكمك وارجع بحكم الانصاف
لا تقلب الشكوى بحكمك علينا

وين انت يالغالي عسى ما بك خلاف
لك مدتن ما بان نورك علينا