رواية لا زعلت وجاك مني خطا إمسكني بيدي وعلمني خطاي /بقلمي

**ازديان** · 05-08-2015, 07:11 AM

رد: رواية لا زعلت وجاك مني خطآ إمسكني بيدي وعلمني خطآي /بقلمي

الصبح هذا من بياضك كساني ..
بسمه لها عامين مامرت شفاي !!

كن النسايم من شذاها أغاني ..
كن الأغاني من شذاها/ هداياي !!

هاتي يدينك مابقى لي مواني ..
فيني من اللي راح مايخجل الجاي !!

ودي معاك ارجع/ ونرجع ثواني !
ل جروح طابت / للتناهيد / ل غناي !!

خليني افقد في مكاني / مكاني !
ودي أحس ب لهفة الروح / وخطاي !!

الليلة ب سكب مابقى من حناني !!
الليلة بشعل داخلك شمعة مناي !!

فتشت في صدري عليك / ولقاني !!
طفل يفضفض للعصافير ... شكواي !!

أنتي له أجمل من كلام .. المحاني !
وانتي له اصدق من دموعي وبلواي !!

شقيت ثوب الليل يوم احتراني ..!
صبح يطل اب مبسمه في زواياي !!

الليلة ب رجع طفل مملي أماني !!
واشوفك أحلى ما ملكته من اشياي !!

ودي أرطب كلمة في لساني ..
جفت ومعها جف مايشبه الماي !!

معاك ابذكر ضحكة اللي نساني !!
لعلي أنسى ..ضيقة داخل حشاي !

معاك ودي أرجع إنسان ... ثاني !!
وارجع معك وياك من دون ... وياي !!!

البارت_الأول ..

.

يا وسادتي صفي الحكايات بالدور
و احكي علي وسلي أوجاع قلبي = (

..

... / هالواطية ما تجلس بيتي ولا ثانية وحدة فاهمه .. اتصلي ع اخوك قولي له يجي يقطها بالدار ..
والا انا بتصرف ..

... / يمه حرام اللي تسوينه فيها .. شنو ذنبها تعيش في دار الايتام .. حنا اهلها ..
لا تنسين انها اختي ..

... / حرمت عليك عيشة العدو .. ذنبها انها بنت امها خطافة الرياجيل ..
لا ما انتم اهلها ولا هي اختك .. وما ابي أي نقاش .. قومي تحركي اتصلي ع اخوك خليه يجي للبيت ..

... / ان شاء الله ..

استدارت وتوجهت للغرفتها .. وتتمنى لو تقدر تغير الواقع اللي هي عايشته ..
ما توقعت ان امها لهدرجه قاسيه .. شكثر هالحياة قاسية .. تجعلنا نتحطم مجرد ما الاشخاص الاخرين يحكمون علينا بحياة ثانية .. حياة حرمان والم وفقد وخوف وضعف ..
قدرت انها تتأقلم مع اختها بهالفترة البسيطة .. قدرت انها تفتح قلبها لاختها بهالبساطة ..
مع ان فارق السن بينهن كبير حيل .. بس تحسها مختلفه عن اختها الهفوف ..
وصلت لغرفتها وجلست ع الاريكة وبدت بنوبكة البكاء .. شلون تقدر انها تبعد عن اختها ..
قرار امها كان بالنسبة لها صدمة كبيرة .. وبعد ما هدت اخذت جوالها واتصلت ع اخوها .. لكن مارد ..
وعادت الاتصال وهم مارد .. وهم عادت الاتصال لكن بهاللحظة حالفها الحظ ورد اخوها ..

... / هلا وغلا ريافي .. اخبارك ي عيوني ..

ريوف من سمعت صوت اخوها خنقتها العبرة / وافي امي قررت انها انها ما قدرت تكمل
وبدت تبكي بكا يقطع القلب ..

وافي انصدم من بكاها المفاجئ / غلاتي شنو فيك ؟ .. وامي شنو قررت ..

ريوف وما زالت تبكي / وافي تعال للبيت بسرعه .. امي تبيك ..

وافي بضيق من صوتها / غلاي شنو فيك .. صوتك مو عاجبني ..

ريوف / ما اقدر اقولك .. انا حيل متضايقه وحيل مخنوقه .. لا جيت للبيت اقولك ..

وافي حس بالحقد ع امه شلون تضايق غلاه وقلبه / مسافة الطريق وانا عندك ..

ريوف / طيب استناك .. انتبه لنفسك .. مع السلامه ..

وافي / طاب حالك .. من عيوني .. فمان الله ..

سكرت من اخوها وحست ما زالت تبي تبكي .. واطلقت العنان للدموعها .. ما قط بكت ع احد
من قبل كثر هالبكا .. تحبها حيل تحسها قريبه منها .. تحس انها لقت تؤمها .. لقت اللي تحكي لها
اسرارها .. تبكي عندها .. تضمها .. تخاف عليها .. ما قط بحياتها حست بهالشعور مع الهفوف ..

كانت مصدومه من اللي سمعته .. معقوله يفكرون انهم يقطونها بدار ايتام .. ومن فكرت
بس مجرد التفكير انهم بيقطونها بدار الايتام بكت .. شلون طاوعهم قلبهم يسوون فيها كذا شلون ..
قررت انها تتصل ع خالها .. يجي ياخذها وترد لم ديرتها .. ترد لحياة الترف هناك .. اخذت جوالها
واتصلت ع خالها .. ومن الرنه الرابعه رد عليها ..

... / هلا وغلا بقلبي .. اخبارك ي روحي ...

... ببكا / امير الله يخليك رد لي .. ابي اروح وياك .. ما ابي اعيش هنا ...

امير بصدمه وخوف من صوتها / توليني صغيرتي شفيك .. ليش م تبين تعيشين مع عايلتك ..

تولين / هم يبون يرموني بالميتم .. كلهم يخططون انهم يتخلصون مني .. الله يخليك رد ..
ابي اروح معك لالمانيا ...

امير بعصبيه / طيب ي حلوتي .. جايك والله م تقعدين عندهم .. دبارهم عندي ...

تولين / انتظرك ...

سكرت من خالها وهي تحس بقعشريره تهز جسمها هز .. توجهت لكبت ملابسها وصارت
تجمعهم وترتبهم بشنطة السفر .. واخذت كل شيء يخصها .. وجلست ع الاريكة تنتظر امير ..
وهي تفكر باخوانها .. حبتهم من قلبها وبادلوها بالخيانة .. نزلت دموعها بقوة .. وصارت تبكي تبكي ..
لحد ما حست انها ارتاحت من البكى ...

طلع من الشركة وهو مو شايف شيء قدامه .. كل ما يتذكر صوتها .. وركب سيارته قدام عيال
عمومه وشخط بقوه .. لدرجة طلع غبار من الكفرات .. والكل مستغرب شنو صاير .. اما وافي
كان معصب من اللي صار .. ليه تبكي .. وشنو قالت لها .. اه يا يمه من اللي قاعده تسوينه ..
وقطع سرحانه صوت جواله .. شاف منو

المتصل .. ومزاجه متعكر .. رد عليه وصوته مبين فيه الضيقه ...

وافي / هلا والله راجح ..

راجح عرف ان فيه شيء من صوته / هلا وافي .. انت بخير ..

وافي عرف انه كان شاك انه صاير شيء / لا ي الغالي ما فيني الا العافيه ..

راجح عرف انه يصرفه / متاكد .. تبيني اجي لكم للبيت .. واجيب معي الهفوف ..

وافي / ايه متاكد .. يعني معقوله اكذب عليك .. ما فيه داعي تجي انت والهفوف .. روحوا اطلعوا
لاي مكان ..

راجح / طيب .. يصير خير ..

وافي / رجوح وصلت للبيت .. انا استئذنك ..

راجح / رجوح بعينك .. اصغر عيالك انا ..

وافي / هههههههه لا ي الخبل مو اصغر عيالي .. بس شسوي احبك ي اخي ..

راجح / ههههههههههههههههههههه الله يخسك .. اذنك معك .. الله وياك ..

وافي / مع السلامه .. فمان الله ..

راجح / بحفظ الرحمن ..

سكر من راجح ونزل من السيارة متوجه لبيتهم .. فتح باب الشارع ودخل جوا القصر .. وقف ياخذ نفس .. بيواجه اعصار .. عارف اسلوب امه .. واسلوب اخته .. امه قويه ومو هامها مشاعرهم .. واخته ضعيفه
من جوا .. واي كلمه تجرحها وتبكيها .. واستعد لدخول .. ومشى ودخل البيت .. وهو ماشي بيصعد الدرج .. سمع صوت امه هي توجه الخدم .. حس بمشاعر غريبه بس استدار .. ودخل المطبخ وشاف امه
معطيته ظهرها .. وقف وهو يحس نفسه متزلزل .. وقرب من امه وباس راسها .. ورسم ع وجهه
احلى ابتسامة ..

وافي بابتسامه كبيره / مساك الله بالخير ي الغاليه ..

ام وافي بابتسامه بارده / هلا امي .. مساك الله بالنور والعافيه ..

وافي تعود ع امه واطباعها / الغاليه وش تسوي بالمطبخ .. اكيد بتسوي الغداء لنا ..

ام وافي / لا مو مسويه الغداء .. اوجه الخدم اللي م يفهمون .. وش يسون ع الغداء ..

وافي / يمه م في داعي تضغطين ع نفسك .. اهم شيء راحتك .. باس راسها واستدار بيطلع من
المطبخ وقفه كلام امه اللي طعنه بالصميم ..

ام وافي / تبي راحتي .. اخذ هالواطيه لدار الايتام .. ما بيها تقعد بيتي ثانية وحدة .. ولا انا بتصرف
بطريقتي الخاصه ..

وافي لف على امه .. وهو مصدوم من اللي قاعده تقوله .. شلون يرمي اخته بدار ايتام .. صعب يسويها .. مستحيل يسمح لنفسه .. ولا لأمه انهم يرمونها .. تكلم وهو حاس انه منهار من جوا وبصوت
مخنوق / يمه الله يهديك .. شنو هالكلام اللي تقولينه .. اكيد تمزحين معي ..

ام وافي بعصبيه / لا م امزح .. م ناقصني غيرها .. انا مو متكلفه فيها .. تفهم .. وان م سويت
اللي قلت لك عليه .. والله لغضب عليك ليوم الدين .. الحين تاخذها وتقطها بدار ايتام ..

وافي طالعها بنظرات م فهمتها .. لكن شافت الحزن والقهر بعيونه .. لكن ما اهتمت كل همها ان
بنت زوجها تذلف عنها .. استدار عن امه .. وهو يحس بغشاوه عاميه عيونه .. مو قادر يركز
باللي قدامه .. وقف وغمض عيونه بقوه .. وصارت تنزل دموعه من دون ما يحس .. بعد ما فتح
توجه لغرفته .. دخلها واستند ع الباب .. وهو يبكي .. وبعدها طاح ع ركبه .. وايديه ع الارض ويبكي ..
ومن بين دموعه صار يتكلم .. ليش يمه .. ليش تحديني ع شيء م اقدر عليه .. اه ي يبه .. ماني رجال ..
ما حافظت ع وعدي لك .. اخلفته يبه اخلفته .. سامحني يبه .. ان م سويت اللي تبيه راح تغضب علي ..
قام ودخل دورة المياه .. وفتح الماي .. وصار يتسلل بين ايديه .. رفع راسه وطالع نفسه بالمرايه ..
عيونه حمرا وانفه كمان احمر .. مبين عليه انه كان يبكي .. رفع يديه لوجهه .. وصار يغسل وجهه
بالماء .. وبعدها وضاء وطلع من الحمام .. اخذ السجاده وفرشها .. وبدا يصلي .. وبعد ما خلص ..
اخذ المصحف وصار يقرا .. وبعد ما حس انه خلاص ارتاح .. قام طلع من غرفته .. متوجه لغرفة
اخته .. وقف وهو ياخذ نفس .. علشان يقدر يتكلم مع اخته .. طق الباب مرة ومرتين .. وبعدها سمع
صوتها .. لما سمحت له يدخل .. وفتح الباب ودخل عليها وهو يطل من ع الباب ..

وافي بابتسامه صفراء / مرحبا ي غناتي ..

ريوف من شافت وجهه كذا .. عرفت ان الموضوع وصل له .. طالعت فيه .. تحبه وما تقدر تعيش
بدونه .. عوضها عن سنين الحرمان .. اللي عاشتها بموت ابوها .. وبعد امها .. وجفا اختها .. كان لها
الام والابو والاخت .. طالعت بعيونه شافت فيها حزن وكسر .. حقدت ع امها كثير .. ع اللي تسويه
فيهم .. ابتسمت ابتسامه تحاول تكون فيها فرح لاخوها / هلا وغلا بووفي .. تو منورة غرفتي
ي الغلا ..

وافي وهو متجه لها .. علشان يجلس بجنبها ع السرير .. وجلس ومسك يدها .. وطالع بعيونها ..
عارف انها بكت وبكت لين قالت بس .. / اممم منوره بوجود راعيتها .. ورا مو جالسه بالصاله ..
ليش جالسه بغرفتك ....

ريوف قطعت كلامه / امي قالت لك صح ..

وافي يسوي نفسه مادرا عن شيء / قالت لي شنو ..

ريوف عرفت انه يخبي عنها علشان م يضايقها / لا تسوي نفسك م دريت .. انا عارفه ان امي
قالت لك .. والدليل عيونك .. اعرفك لما تكون حزين ومكسور .. اعرفك لما تكون متضايق
وتخبي ورا ابتسامتك ضيقتك .. اعرفك زين ووفي ..

وافي نزل راسه .. ما يبيها تشوف دموعه .. حتى لو كانت اقرب الناس له .. هي الوحيده اللي تفهمه ..
حتى تفهمه من دون ما يتكلم .. / اه ي ريافي .. خيبت ظن ابوي فيني .. م قدرت احافظ ع وصيته ..
وصاني ع تولين .. وما قدرت احافظ عليها ..

ريوف / لا ما خيبت ظن ابوي فيك .. اللي صار مجبور عليه .. انا ما اقول هالكلام لاني متفقه مع امي ..
انا اقول هالكلام لاني ابيها تعيش بسعاده ..

وافي رفع راسه / شلون بتعيش بسعاده .. وحنا بنرميها بدار ايتام ..

ريوف / ومن قال بنرميها بدار ايتام ..

وافي باستغراب من كلام اخته / شلون اجل ..

ريوف / نتصل ع خالها .. يجي ياخذها ويردون لالمانيا .. وبكذا بنسعدها ..

وافي كان بيتكلم .. بس قطع كلامه صفقة الباب .. اللي نقزت ريوف من مكانها .. ووقفت قلب وافي ..
لفوا ع ورا .. وشافوه والابتسامه شاقه وجهه ..

... / ارحب .. اخواني الاعزاء مجتمعين .. شعندكم .. اكيد مؤامره .. اخواني واعرفكم ..

وافي بضحكه كاتمها / وجع للعدو .. فيه احد يفتح الباب كذا ..

ريوف بعصبيه / حسبي الله ع عدوك .. كانك بتموني ناقص عمر ..

... / اما عاد .. كل ذا عصبيه .. اللي يشوفكم يقول ميت لكم احد ..

ريوف / رافيوه .. ليمتى م تجوز عن حركاتك .. تراك جننتنا ..

رافي / لا كبرت .. وصرت شايب اجوز عن هالحركات ..

وافي / لانك خبل ..

رافي بغرابه / انتم وراكم زعلانين .. تقول ميت لكم احد ..

وافي وريوف نزلوا روسهم شنو راح يقولون له ان صديقتك واختك بتروح وتتركك ولا بنقطها
بدار ايتام ..

رفع وافي راسه وهو يشجع نفسه يقول لاخوه الحقيقه ..

وافي / اجلس رافي .. بقولك شيء ..

رافي مستغرب من طريقة كلامه ومن ملامح وجهه اللي مبين عليها الحزن / هاه جلست ..
قول وافي وقفت قلبي ..

وافي كان راح يتكلم بس قطع كلامه صوت الصراخ اللي شدهم نزلوا كلهم لتحت عشان يشوفون
شنو سبب هالصراخ ..

**ازديان** · 05-08-2015, 07:13 AM

رد: رواية لا زعلت وجاك مني خطآ إمسكني بيدي وعلمني خطآي /بقلمي

... / ي ابو سلمان انت عندك حفيده وعايشه بدولة الاغراب .. ولزوم منك تجيبها تعيش تحت عشك .. الناس راح تتكلم عنك وعن عرضك ..

ابو سلمان بصدمه / انت وش قاعد تقول ي ابو سامي .. شلون عندي حفيده .. ومنو ابوها من عيالي ..

ابو سامي / ولدك هايف عنده بنت بس من زوجته الاجنبيه .. وانت لازم عليك تجيب بنت ولدك عند عينك .. م لازم تعيش بدولة الاغراب .. الناس لا عرفت ان عندك حفيدة وعايشة عند الاغراب .. وش بتقول عنك ..

ابو سلمان وكان جاته صاعقة صعقته من سمع هالكلام .. شلون ولده ذراعه اليمين يسوي فيه كذا .. متزوج ومن مرة اجنبيه .. حاس انه راح يجن .. م هو مصدق تكلم وهو يحس بغصه / تسلم ي ابو سامي ع انك قلت لي ان عندي حفيدة .. انا بتصرف ..

ابو سامي مقدر موقفه / والحين ابيك تستأذن لي .. عندي اشغال كثيره ..

ابو سلمان / الله معك ..

بعد م طلع ابو سامي جن جنانه .. م كان مصدق ان ولده هايف يسوي كذا .. اجنبيه ي هايف اجنبيه .. اتصل ع سكرتيره وناداه ..

.. / امر طالع عمرك ..

ابو سلطان / نواف ابيك تروح تنادي لي راجح .. ابيه ضروري ..

نواف / حاضر طال عمرك ..

طلع نواف من المكتب وهو مستغرب من وضع ابو سلطان .. وتوجه لغرفة الاجتماعات ..

بغرفة الاجتماعات كان جالس وقباله وجنبه اعضاء الشركه وكانو يتناقشون بموضوع ..

.. / ي عيال م استغربتوا من حالة وافي .. طلع من الشركة معصب ومو شايف قدامه ..

.. / سعيدان انت هذا اللي هامك الحين .. خل الرجال بحاله ..

سعود / وانا شقلت .. جد حالته كانت غريبه .. كان يسولف ويضحك معنا .. فجأة عصب .. وطلع من عندنا والشيطان متلبسه ..

راجح / م فيه شي .. انتم لا تحاتوون ..

كانوا الشباب راح يكملون كلامهم لكن قطع عليهم طرق الباب ودخل نواف بعد م سمح له بالدخول ..

نواف / السلام عليكم ..

الجميع / وعليكم السلام ..

نواف / استاذ راجح طويل العمر يريدك بمكتبه ..

راجح / خير اللهم اجعله خير .. م قالك جدي وش يبغى فيني ..

نواف / ابدا استاذ راجح ..

راجح مستغرب من جده وصار يتمتم بينه وبين نفسه ( غريبه جدي شيبي فيني .. ) .. / طيب .. قوله جاي ..

نواف / حاضر استاذ .. تامرني ع شي ..

راجح / مشكور .. م يامر عليك ظالم .. لا سلامتك ..

بعد م طلع نواف من غرفة الاجتماعات التفت ع الكل وبوجهه الف علامة استغراب ..

راجح / غريبه جدي شنو يبي فيني .. مو من عوايده ينادي بمكتبه الا لامور الشغل ..

خالد / لا غريبه ولا شي .. تلاقي جدي م نداك الا علشان الشغل ..

راجح / لا ي خالد جدي م ناداني علشان الشغل .. جدي يبيني في شيء ثاني .. جدي واعرفه .. بعدين لو جدي بغاني للشغل كان نواف قالي ..

حمد / كلام راجح صح .. جدي لو يبينا في امور الشغل كان قال لنواف ..

محمد / العلم عند الله .. رح شف شنو يبي منك ..

قام راجح وعطاهم ظهره وطلع من مكتب الاجتماعات وتوجه لمكتب جده .. اخذ نفس وهو يتهيأ لجده .. مع انه م سوا شيء غلط .. لكن هيبة جده تترك الكل يهابه ويخاف منه .. طق الباب ودخل ..

راجح / امرني جدي ..

ابو سلطان / م يامر عليك ظالم .. اقعد ي راجح ..

راجح / ابشر .. خير اللهم اجعله خير .. جاء لمي نواف وقال انك تبيني بامر ضروري ..

ابو سلطان / ايه ابيك تروح لبيت عمك هايف وتكلم وافي عن اخته الاجنبيه ..

راجح بغرابه من كلام جده / اروح لبيت عمي هايف .. ليه ي جدي .. بعدين عمي هايف ماله غير بنتين هفوف وريوف ..

ابو سلطان ببرود / عمك هايف متزوج من مرة اجنبيه وله بنت منها .. رح كلم وافي بامر اخته .. اكيد عنده علم ..

راجح بصدمه / عمي هايف متزوج .. اكيد تمزح جدي ..

ابو سلطان بصرامه / تدري اني م امزح ي راجح .. روح اسال نسيبك عن اخته وجب لي علومها .. واذا م جابها لسعودية تحجز تذكرة لالمانيا .. تروح تجيبها ..

راجح / طيب ي جدي انا وش دخلني بهالامور .. اتصل ع وافي وحاكه ..

ابو سلطان بحدة / من متى ي راجح تعصي امري هاه ..

راجح / حاشاك ي جدي من العصيان .. ابشر .. الحين اروح له ..

ابو سلطان / زين اجل ..

راجح / انا استأذن ..

ابو سلطان / الله معاك ..

طلع من مكتب جده والف فكره تجيبه والف فكره توديه .. معقوله عمه متزوج ووافي م قاله .. مو معقول وافي صديقه مستحيل يخبي عنه شي ..

بعد م نزلوا استغرب وافي وجود امير خال تولين عندهم بالبيت .. شنو يبي .. وليه معصب كذا .. وعيونه تنقط شرار ..

اما ريوف لما شافت امير تخبت تحت الدرج بحيث اهي تشوفه واهو م يشوفها ..

وافي بغرابه / اهلا نيكولاس ..

نيكولاس ( امير ) / اهلين وافي ..

وافي بغرابة اكثر / انت تتكلم عربي ..

امير / انا سعودي قبل لا اكون الماني ..

مها ( ام وافي ) / خير ان شاء الله .. شعندك جاي هنا ..

امير / انا جاي اكلم ولدك موجاي اكلمك ..

وافي / شنو فيه نيكولاس ..

امير / ابي اعرف وين وعدك لي .. وعدتني انك تحافظ ع تولين .. وبالاخير صرت مخطط تتخلص منها ..

مها / علشان هالموضوع جاي .. ابي اقولك اني مقررة اتخلص منها ..

وحدة مثل هذي م تجلس بيتي ..

امير جن جنانه / فشرتي تتخلصين منها .. ليه شايفه مالها والي ..

وبين م كانوا يتكلمون اهي نزلت مع الدرج لما سمعت صوت خالها .. وجت له ركض .. وحضنته واهي تبكي ..

تولين ببكا / بابا ..

امير / ي عيونه ..

وافي لما شافها بحضنه جن جنانه .. شلون تحضنه قدامه .. مع انه خالها .. بس غيرة الاخوة تحرقه حرق ..

وافي / نيكولاس بعد عنها ..

امير / نعم .. تراها بنتي قبل لا تصير بنت اختي ..

**ازديان** · 05-08-2015, 07:14 AM

رد: رواية لا زعلت وجاك مني خطآ إمسكني بيدي وعلمني خطآي /بقلمي

طلع من الشركه وتوجه لبيت عمه ومو شايف شي قدامه .. للحين مصدوم .. معقوله عندهم علم ولا قالو لنا .. معقوله هفوف تعرف بالموضوع و لا جابت لي طاري .. هه اساسا وهي متى جابت لي علم سنع .. ولما وصل لبيت عمه استغرب من الكم الهائل من البدوقارادات اللي محاوطين بيت عمه من كل الجهات من غير اللي بالسيارة ..

راجح / غريبه لمين هالحراس .. اساسا من متى وافي يجيب حرس ويوزعهم هالشكل .. نزل من سيارته وتوجه لبيت عمه لكن الحارس اللي ع الباب منعه .. راجح استغرب منه شلون يمنعه وهذا بيت عمه

راجح / هذا بيت عمي .. ابي ادخل .. بعد من هنا ..

الحارس م فهم شي من كلامه وظل يطالع براجح .. راجح ابتلش فيه .. شكله اجنبي .. اف منك ي وافي شله هالحراس .. اخذ الحارس جواله واتصل ع رئيسهم ..

الحارس / اهلا سيدي ..

الرئيس / اهلا جون ..

جون / سيدي يوجد هنا رجل .. يريد الدخول الى المنزل .. ماذا افعل ..

الرئيس / انتظر انني اتا اليك .. لا تسمح له بالدخول ..

جون / حسنا سيدي ..

راجح بما انه شاطر باللغه الالمانيه عرف كل كلامه .. وانتظر الرجال اللي حاكاه الحارس .. فجاه التفت ع ورا وشاف رئيسهم متوجه له ..

الرئيس / اهلين اخوي .. بغيت شي ..

راجح / اهلا .. ايه ابي ادخل لبيت عمي ..

الرئيس / شنو يثق لنا انه بيت عمك ..

راجح / طلع له البطاقه .. هو عمي وبنفس الوقت ابو زوجتي .. يعني نسيبهم ..

الرئيس بعد م شاف البطاقه تاكد بس شاف حالات الاستغراب ع وجه راجح .. ضحك بقلبه ( هه اكيد مستغرب رجال مين هذول .. ومنو سيدهم .. رحتوا فيها ي عايلة الرايف .. ) طالع فيه بتمعن فيه شبه من وافي بالغرور والكبرياء / تفضل ..

راجح وهو داخل للبيت معصب ويتحلف ف وافي ( وجع للعدو م دخلني الا بعد م نقعت ب الشمس .. هين ي ويفي .. بس خلن اشوفك ) فجاة سمع صوت صراخ .. اخترع ودخل داخل .. وانصدم من اللي شافه .. واحد وكانه اجنبي داخل للبيت ويتهاوش معهم .. تقدم راجح اكثر لهم .. وقت اللي دخل شافه وافي .. وانصدم م كان يبيه يجي هاللحظه ويشوف اللي صاير ..

راجح ومن دون م يلتفت ع امير/ وافي منو هذا ..

امير مستغرب منو هذا .. وشلون دخل .. معقوله يكون اخوهم .. بس يعرف وافي م عنده غير اخوا واحد .. وهو رافي .. اخذ تولين وخلاها ورا ظهره بحيث راجح م يشوف منها غير اشياء بسيطه .. / انا امير خال تولين .. انت اللي منو ..

راجح منصدم / يتكلم عربي راجح ..

امير بملل من هالوضع / اسمع ي وافي انت وعدتني انك تهتم فيها .. وعدتني انك تنفذ وصية ابوك بحذافيرها .. بس انت م نفذت وعدك لي ..

وافي بغصة مو قادر يتكلم هو صادق م نفذ وصية ابوه .. ( اه ي يمه .. شنو سويتي فيني .. ذبحتيني وانا عايش .. الله يسامحك يمه .. الله يسامحك ) .. / كلامك صح ي امير انا م وفيت بوعدي .. بس راح اوفي بوعدي لابوي انها راح تكون بامان عندك .. بس حبيتك تفهم شغله .. اني كنت بتخلص منها لاني برسلها لك ..

امير شاف بعيونه حزن وحزن كبير بقلبه وحز بخاطره م يعرف ليش سوى كذا / اها .. المهم راح تروح معي الحين ..

تولين تحب وافي وهي مصدقه كلامه بس تدري ان كل شي صار بسبب امه .. بعدت عن خالها حيث صارت قدامه وصارت تكلم وافي ..

تولين بحزن / وافي انا اسفه .. م اقدر اعيش معكم ..

راجح شده الصوت والتفت ع صاحبة الصوت وانصدم يوم شاف اللي قدامه م كان متوقع بنت عمه تكون بهالجمال هذا كله لاول مرة قلبه يدق

هالشكل مو قادر يشيل عيونه عنها كانت فاتنه بجمالها .. كانت لابسه شورت فخاذي جينز وقميص احمر ياصل لاطراف الشورت وشبشب فلات احمر ورافعه شعرها بفيونكه حمراء ووجها كان خالي من ادوات المكياج .. كانت ساحره حيل .. كانت عيونه تدور عليها وصار يتمتم ( انا شفيني ليه مو قادر اشيل عيووني عنها .. ليه قلبي يدق بهالشكل .. مو مصدق انا هذي بنت عمي .. مو معقوول .. هالملاك منا وفينا .. اه ي قلبي ) .. نزل عيونه بالقوه وهو رايح بخرايطها ..

وتولين م كانت اقل منه بعد م التقت عيونها بعيونه حست انها تغوص بهدومها .. اول مرة يدق قلبها حست ب احساس غريب متدري شنو .. هذا زوج اختها م توقعته جميل لهالدرجه وسيم لدرجه كبيره .. كان لابس ثوب ابيض وشاد ع جسمه .. وغترة بيضاء .. وجزمه ابيض .. ومحدد سكسوكه عريضه .. م قدرت تشيل عيونها عنه .. ( شنو صار لي .. ليه تنحت هالشكل .. ليه قلبي يدق .. شنو اللي صار فيني .. نيالك ي الهفوف ع زوجك .. ) .. نزلت عيونها عنه وهي منحرجه من نظراته ..

م كانوا حول العالم .. م كانوا يدرون شنو قالو .. الى الان م زالوا غرقانين بقلوبهم اللي تاهت بعض .. م زالوا يشعرون بالاحساس نفسه ..

امير انقهر من حركتها شلون تجي قدامه وتتكلم وهو مبعدها عن ولد عمها عشان م يشوفها .. م كان عاجبه اللبس اللي لابسته راح يتصرف وياها بعدين .. / تولين روحي جيبي اغراضك .. استناك برا ..

تولين / ان شاء الله ..

تركتهم وراح تجيب اغراضها وبين ماهي تجمع اغراضها قطع عليها رافي .. لفت تبي تطلع شافته قدامها .. كانت بتبكي بس قوة حالها .. يذكرها بوليد اخوها وخالها وصديقها وتوامها .. تشوف فيه الصداقه اللي شافتها بوليد .. شافت فيه الخوف والحب اللي شافته بوليد .. شافت فيه الهبال والازعاج اللي شافتها بوليد .. بهالفترة البسيطه صار كل كونها .. تحبه وم تقدر ع فراقه ..

رافي بحزن / هنت عليك تروحين وتتركيني ..

تولين بحزن اكبر / مو هاين علي ي روفي .. بس انا م فيني اعيش هنا .. امك م تريدني .. وفوق هذا كله خططت انها تتخلص مني .. م اقدر أامن نفسي عندكم ..

رافي / خليك من امي .. انا وريوف وافي نبيك تضلين هنا .. امي يمكن تزعل يوم او يومين وبعدها ترضى .. المهم لا ترووحين ..

تولين / هه شلون ترضى واهي هددت وافي اذا م سوا اللي تبيه بتغضب عليه .. قول شلون ..

رافي نزل راسه .. عارف ان كلامها صح .. كيف امهم تسوي فيهم كذا .. قامت ووقفت قدامه مسكت ايديه .. وهو رفع عيونه لها ..

تولين / ابيك تعرف انك بتضل رافي اخوي وصديقي ومنكد عيشتي .. ابيك تعرف انا راح نكون ع تواصل وم راح اقطعك ..

رافي / وشلون بتكونين ع تواصل معي وانتي عندك توامك .. وشلون بتتواصلين معي وانتي حولك كل اللي تحبينهم ..

تولين ببتسامه / ههه لو يكون حولي الكون كله م راح اقطعك .. ابيك تجيني هناك ب المانيا .. ابيك تشوف متحف الصور حقي .. اوك ..

رافي ببتسامه صفراء / ان شاء الله ..

تولين / يالله عاد م بيك تزعل ولا تحزن بعد .. مو انت تقول انا مزعجه .. شوف هذا انا بروح وم عاد ازعجك ابد ..

رافي / ازعاجك ع قلبي عسل .. اساسا انا غبي .. واحد عنده اخت مثلك وينزعج ..

تولين بضحكه حزنت رافي اكثر/ ههه اساسا انت من زمان خبل .. يعني توك تدري ..

رافي بحزن بس يحاول يخبيه عشان م يضيق صدرها .. / ههه م الخبل غيرك ي الهبلاء ..

تولين / ايه هذا رافي اللي اعرفه ..

رافي بضحكه / ههه بشتاق لك ..

تولين / وانا بعد ..

ضموا بعضهم بعدين بعدت عنه واخذت شنطتها ونزلت تحت .. طلعت بوجهها ريوف .. من شافت ريوف خنقتها العبره .. تعشقها بشكل كبير .. كانت لها الاخت والام والصديقه .. كانت تقولها عن مغامراتها والاشياء اللي تسويها .. كانت لما تشتاق حق سارا تروح لها وتضمها تحسها سارا .. تحسها سارا اللي تقعد وياها ب الساعات .. تحسها سارا لما تهاوشها ع شي غلط هي سوته .. تحسها سارا اللي لما تجي تنام تحط راسها ع صدرها تحس بامان .. وبدون مقدمات ركضت وضمتها

بكت لين م ارتاحت وبعدها اخذت شنطتها وطلعت من دون م تتكلم وياها .. خلاص الكلام اللي تبي تقوله قالته .. ولما وصلت للساحه الخارجيه شافت وافي وامير وبينهم الشرار عالي وقفت الشنطه واتجهت لهم ..

تولين / بابا خلصت ..

امير اخذ الشنطه وطلع / الحقيني ..

تولين / ان شاء الله ..

وقفت قدام وافي طالعت فيه بعيون دامعه تشوفه امير بكل حالاته .. ضمته وبكت بحضنه وبعدها بعدت عنه وركبة السيارة وتحركت ..

ظل واقف يطالعهم ودعها ودع وصاة ابوه ( فمان الله ي تولين .. سامحني يبه م اقدر أأمن عليها الا مع امير .. ) ..

مسح دموعه ورجع للبيت .. دخل مع الباب توجه للمجلس الضيوف تبع الرجال دخل لقي راجح قدامه ..

.

كت ..

( * الغيد .. ) ..

**smile123** · 05-08-2015, 07:51 AM

رد: رواية لا زعلت وجاك مني خطآ إمسكني بيدي وعلمني خطآي /بقلمي

روايتك رائعه أتمنى ان تكمليها

**ازديان** · 05-08-2015, 09:00 AM

رد: رواية لا زعلت وجاك مني خطآ إمسكني بيدي وعلمني خطآي /بقلمي

شاكررره لك مرووورك

**Ђŋt ą ßσЎ** · 05-08-2015, 12:59 PM

رد: رواية لا زعلت وجاك مني خطآ إمسكني بيدي وعلمني خطآي /بقلمي

روايه تجنن كملي

**ازديان** · 05-08-2015, 07:15 PM

رد: رواية لا زعلت وجاك مني خطآ إمسكني بيدي وعلمني خطآي /بقلمي

يسلموو ،، كلك ذووق
ابشري ي عيووني ..

**ازديان** · 06-08-2015, 12:38 PM

رد: رواية لا زعلت وجاك مني خطآ إمسكني بيدي وعلمني خطآي /بقلمي

.
.

هانت ياقلبي ! كلها يومين وتروح ,
هانت والله هانت !
لاعاد تتعب نفسك وتفكر ب إلي نسوك ؟
ولاتفكر بس ب إلي يجرحك ؟
كثير حبوك وحبوك وحبوك ! ونسيت حبهم وأخترت جارحك ؟
هذا قدرك ياقلبي !
تحب واحد يجرح فيك ؟
تسامح رغم خطاه ؟ وتنسى خطاياه
هانت ياقلبي والي خلقك هانت ,
لاعاد تهتم !
لاعاد تحب !
لاعاد تصدق أحد !
لاعاد ولاعاد ولاعاد
هانت صدقني هانت

البارت _ الثاني ..
.
وش أقول " غير أحبك . . !
................ " ثم أحبك . . !
لو | مساأإفاتي تطووول . . }

..
وصل للمطار بعد م اخذذ تولين معاه .. لف لجنبه لقاها نايمه ابتسم .. ونزل وراح لم جهتها حملها ع اكتوفه وتوجه فيها للطيارته ..
ركبها .. ووصل للجناح المخصص لها نزلها ع سريرها فسخ جزماتها ولحفها ب لحافها .. طلع من غرفتها
توجه للمقاعد وقعد ع اقرب مقعد له وهو حاس بتعب فضيع .. يومه متعب ب الشركه من هالعصابه واخوانه
اللي زادوه هم وكمل عليه مشكلة تولين ..
رجع راسه ع المرتبه ومسح ع وجهه .. وغمض عيونه وهو مهموم .. اللي يشوفه م يقول شخص عنده هموم قد الجبال ..
يقول عنه شامخ ومهيب .. هذا م يطلق عليه ب المجالس .. امير من برا قوي لكن من داخل ضعيف .. وقابل للكسر ..
ميل راسه ع جنب وهو يتمتم بين نفسه (ليه الناس تظن اني قوي .. ايه قوي وشامخ بس من برا .. لكن ضعيف من جوا ..
والله ضعيف .. ارحموني .. يكفيني هموم ومشاكل .. اه ي ييبه رحت وخليتني اشيل هالمسؤوليه .. عانيت وتعبت كثير ..
ربيت اخواني وحملت مسؤولية قد الجبال .. معقوله بردونها لي بيكونون لي مثل م كنت لهم .. فتح عيونه ع صوت فهد ..
فهد / ي طويل العمر نايم ؟
امير / هلا فهد .. لا صاحي .. بس حسيت نفسي مصدع قلت ارتاح شوي .. هاه جبت الاوراق .. اقعد جنبي علشان نشتغل ..
فهد اللي مو عاجبه حال امير ابد / انت الحين ارتاح ولا وصلنا ان شاء الله نكمل الشغل ..
امير ببتسامه صفراء / ولا يهمك .. انا بخير ..
فهد / وين بخير ي طويل العمر .. من الصبح مو نايم .. واضح من ملامحك مرهق .. رجيتك طال عمرك ارتاح ..
ولا صلنا لك مني اجيب كل الاوراق ونشتغل ..
ابتسم امير لفهد .. شكثر يعزه هالانسان .. معاه ب الحلوه والمره .. شاركه همومه ومتاعبه .. يتقاسمون التعب والارهاق سوا ..
عمره م راح مكان الا فهد معه .. / ابشر ..
ابتسم فهد للامير عطاه ظهره .. وتوجه للمقعد الجانبي للامير .. وجلس قريب للنافذه .. وصار يطالع ب السماء ..
تمنى يطير لابعد مكان .. مكان يكون فيه بعيد عن هالحياه ..
غمض عيونه وهو يحس بنفسه وده يبكي ليش مو عارف .. رغبه ب البكاء تحتال جوف عيونه .. اطلق تنهيده عميقه
من اعماق صدره .. التفت ع يمينه طاحت عينه ع امير .. يعزه حيل ويغليه .. يفديه بروحه ونفسه لا يصيبه مكروه ..
م ينكر فضله وفضل ابوه بعد الله .. يبي يرد هالجميل انه يحمي امير من المخاطر .. الله م رزقه باخو لكن رزقه بامير ..
يشوف فيه الامل والحياه والبلسم ..
وشكثر شافه عانى ولا قدر يسوي له شي .. وشكثر تحمل وصبر ع هالهموم .. شكثر تعدى المخاطر اللي تجتاحه ..
امير ب النسبه له قلبه .. م كان متوقع بيوم يتعلق فيه .. يحس نفسه ضايع بدونه ..
تمتم بين نفسه ( الله يحميك ي امير .. ويحفظك .. ) .. عدل راسه ورجعه للنافذه .. ولا حس بحاله الا غاط ب النووم ..

كان واقف عند باب غرفة المريض اللي هو مسؤول عنه .. طق الباب ودخل .. لمح بنت المريض جالسه تقرأ قران ..
رفعت نظرها له وسكرت المصحف وباسته ووضعته ع الطاولة القريبة منها .. قامت وتوجهت للدكتور بتسأله عن حال ابوها ..
رفع راسه لها وطاحت عينه بعينها .. ارتبك لكن م بين لها ..
... / دكتور طمني ع ابووي .. ؟
... / لا تخافين اختي .. الوالد بخير .. ولا يشكي باس .. وان شاء الله هاليومين نسوي له خروج ..
... بفرح / الحمد الله يارب .. طيب ي دكتور نقدر نرد لديرتنا .. ؟
... / لا ي اختي الوالد لسى م خلص علاجه بعد ..
... / ليش ي دكتور ؟ مو قلت لي ان ابوي بخير م يشكي باس ..
... / ايه وانا ابوك .. م اشكي باس .. الحمدالله حالي اليوم احسن من امس ..
قربت من ابوها وباسته ع راسه .. وهي تبكي كل م خطر ببالها انها ممكن تخسره .. م بقالها بعد الله الا هو ..
لا اخو يسندها بعد م يودع ابوها هالدنيا .. ولا ام واخت يخافون ويحرصون عليها ..
الرعب لا زال يدب بعروق جسمها ..
... ببكى / بظل وياك لاخر يوم بحياتي .. بفديك بروحي ودمي ي بو جود
ابو جود وبمحبة صادقه لبنته / يخليك لي ي بنتي ..
جود بحب / ولي ي اغلى ناسي .. ولا يحرمني منك ي تاج راسي ..
تأثر ب منظرهم شاف محبتهم الصادقه لبعضهم .. تمنى لو ابوه عايش .. والله م يتركه ثانيه وحده .. عطاهم ظهره وطلع من الغرفه ..
متوجه لمكتبه .. قطع عليه وحده من ممرضاته اللي يشرف عليهم ..
... بدلع / د . رائد ممكن شوي .. ؟
رائد امتلت عيونه بنظرة غضب من هالبنت اللي تحاول تغريه / خير ي اماني .. ؟ فيه شي .. ؟
اماني بدلع وغنج / سلامتك دكتور .. بس حبيت اعرف عن جدول مناوبتي ..
رائد رفع حاجبه وطالعها ب استحقار / اعتقد وصلك العلم اني وزعت الجدول عليكم .. ليه جايه تسألين .. ؟
اماني بجرأة / رائد انا احبك ليه م تفهم .. ليه م تسمع مني .. ليه دايم تصدني ..
رائد بصوت حاد / اسمعي ي اماني انا م افكر فيك الا اخت عزيزه .. واهتمامي فيك لا تفسرينه انه حب .. انتي لانك تدربين بديرة
الاغراب اظل احميك ..
اماني ببكى / بس انا حبيتك وتعلقت فيك .. الله يخليك عطنا فرصه لبعضنا ..
رائد بسخريه / هههه انت شقاعده تقولين .. أي حب واي فرصه .. ي بنت الناس انا حاولت اني افهمك بطريقة حلوة
ومن دون م اجرحك .. لكن انتي مو راضيه تفهمين .. فراح اقولها لك عشان اريحك .. انا م افكر فيك .. ولو تظلين اخر وحدة
ب الدنيا م خذيتك ولا حبيتك ..
اماني / ليه طيب ..؟ اكيد تحب احد غيري .. بس والله م تتهنى فيها .. انت لي انا ..
رائد بعصبيه / انتي غبيه ولا شنو .. قلت لك م احبك م تفهمين ..
اماني كتفت ايدها وتهز برجولها / السبب طيب .. ؟\
رائد ( صبرك ي ايوب ) / لانك وحدة حقيرة .. ورخيصه .. تعرضين نفسك للشباب .. ومستحيل استأمنك ع بيتي .. فهمتي
عطاها ظهره ومشى متوجه لمكتبه .. اما هي م زالت واقفه نفس وقفتها .. ردت للمكتب اللي هي فيه .. شافت صديقتها
جالسه وتطالع فيها وتبتسم ..
... / قلت لج م يحبج .. ولا يفكر فيج ..
اماني بعصبيه / تهين اكرميني بسكوتك .. دام النفس زينه عليك ..
تهاني ب سخريه / عطاج محاضرة من محاضراته صح .. شكل محاضرته هذي من العيار الثقيل ..
اماني / جب تهاني .. اسكتي الله ياخذك ..
..
وصل للمكتبه الخاص فيه .. وجلس ع كرسيه .. وهو يحاول يهدي نفسه لا يذبحها .. يحاول يفسر افعال هالبنت الغريبه ..
صار يتمتم بين نفسه ( ي ربي من هالبنت .. كم مرة افشلها بس مو راضيه تفهم .. اف اذا زادت عن حدها .. ببلغ المدير يتصرف معها ..
انا خلاص ماني قادر اتحمل اكثر .. ) ..
فتح ملفات واوراق المرضى اللي ع مكتبه .. وهو يحاول يشيل هالبنت من راسه ..

... / عليكم ان توقعوا نيكولاس ب الفخ .. اريد ان تفعلوا ذلك الكمين .. اريده بقبضتي هذا اليوم .. افهمت ماكس ..
ماكس / سيدي نيكولاس ليس سهلا .. لن يقع في قبضتنا بتلك السهوله ..
... بغضب / لا يهمني ذلك .. اريد نيكولاس اليوم .. اتفهم اريده اليوم ..
ماكس / وان لم نتمكن من القبض عليه .. ماذا سنفعل ؟
... / سأخطط بخطة جديده .. فأنا العقرب لا احد يجاريني بخططي .. حتى عدوي المدعو نيكولاس ..
رفع يده واشرها ع الباب .. ب معنى انصرف .. خرج ماكس وهو غاضب من اوامر العقرب .. توجه لسيارته ركبها وهو يضحك بخبث ..
ماذا ستفعل سيدي العقرب عندما تعلم بان عدوك علم بمخططك .. اخذ جواله واتصل ع امير ..
اتصل لكن خارج التغطيه .. عاود الاتصال ثاني مرة نفس الشي ..
تنهد .. وحرك سيارته للمقر الجرايم تبعهم .. وهو بداخله حقد دفين ع العقرب .. وبيحاول في امير لين يرد ..

وصل امير من بعد التعب , نزل من طيارته وهو حامل تولين ب ايده .. وتوجه للقصره .. دخل داخل , وتفاجأو اهله
بوجود تولين بين احضان امير ...
توجه امير لجناح تولين دخل داخل ونزلها ع سريرها لحفها ب لحافها وطلع من الجناح .. متوجه لامه واخوانه اللي
جالسين ب الصاله يستنونه يتكلم .. توجه لامه وباس راسها وجلس جنبها وهو ميت من التعب ...
هديلا ( ام امير ) / هلا امي .. تعبان يمه .. ؟
امير ببتسامه صفراء وهو يتمدد ويريح راسه ع رجلين امه / أي يمه تعبان حيل .. منهد حيلي , مو قادر اركز ..
لكن ببدا بشغلي الحين ..
هديلا / روح نام بغرفتك يمه .. ارتاح حبيبي .. ممدي ع الشغل والتعب ..
امير / ولا يهمك ي الغاليه , لا خلصت شغلي , برتاح بعون الله ..
رائد / امير .. ليش تولين ردت للالمانيا مو هي عند اخوانها .. ؟
امير كل م يتذكر اللي صار يعصب / م راح ترد لها العايله .. راح تعيش تحت ظلي ..
طلال / بس اهل ابوها لهم حق ي امير .. لهم حق انهم يربون بنتهم ..
امير وهو يعدل جلسته وبحده / الله واكبر الحين صار لهم الحق .. وينهم السنين اللي فاتت .. الحين اللي فكروا فيها ..
عبدالعزيز / م كان عندهم خبر , هايف خبا عن اهله انه متزوج تالا ..
امير / اهلها ذول اللي انتم تدافعون عنهم كانوا مقررين يرمونها بدار ايتام .. لو تولين م اتصلت وخبرتني كان قطوها وعليها السلام ..
الكل بصدمه من كلام امير .. م توقعوا هالشيء وخصوصا من عايلة الرايف .. اهل ابوها ..
هديلا / هذي الاوامر اكيد من زوجته العقربه .. اعرفها ام لسان ..
امير والبقيه بصدمه اكبر .. امهم تعرف زوجته ؟ . وكيف ؟ . ومن متى .. ؟
امير بصدمه / يمه تعرفين زوجة هايف .. ؟
هديلا / انا مو بس اعرف زجت هانا اعرف عايلته كلها .. من اصغرهم لكبرهم ..
بيان / كيف يمه ؟شلون تعرفينهم ..وليش م قلتي لنا من قببل .. ؟
هديلا بحزن ع ماضيها / قصه طويله يمه .. قصه كل م ذكرتها يتجدد فيني الحزن .. وتخنقني العبره ..
سارا / قولي يمه .. حنا نسمعك ؟ .. كلنا بنشاركك همك ي الغاليه ..
هديلا هزت راسها بصمت وبدت تسرد لهم الماضي اللي مازال عايش معها .. هديلا بحزن / اسمعوني عدل ..
ولا تقاطعوني ابد ..
كان فيه مناسبه عند عايلة الرايف .. ولانهم كانوا جيرانا قررنا نحضر المناسبه .. المهم هم كانوا من طبقه مرموقه ..
حنا كنا ع قد حالنا .. لحنا فقراء ولا اغنياء .. كنا متوسطين الحاله .. لبسنا وتوجهنا لقصر الرايف .. وبعدها دخلنا داخل القصر ..
شفنا ناس من عوايل مرموقه .. لكن هالشي م هز ثباتنا ب العكس .. حمدنا الله ع اللي احنا فيه ..
وجتنا امهم زوجة عبدالعزيز الرايف .. ورحبت وهلت فينا .. والناس كانت تطالع فينا بشفقه وبنظرات اشمئزاز .. جلسنا ..
وفجأة .. سمعنا صوت وحدة تصرخ .. وتوجهت لي وقالت هذي زوجة هادي البسام .. زوجها الظالم .. وصارت تجيب كلام
وتهم بابوكم م كنت عارفه هي منو .؟ م قدرت ارفع راسي من الظلم .. الكلام اللي قالته بحقي وحق ابوكم كبير حييل .. اخذت
نفسي وطلعنا من القصر متوجهين للبيت .. خبرت ابوكم ب الحقيقه وعصب .. وبعدها قرر ابوكم ينتقم من عايلة الرايف ..
بعد الاهانات والكلام اللي قالوه بحقنا .. تعذبنا تعبنا وانأهنا .. قرر ابوكم نعيش برا السعوديه .. بعد م ظاقت الدنيا فينا ..
وم كانت الديره اللي بنعيش فيها هي المانيا .. عشنا هناك وقدرنا نكسب لقمة عيشنا منها .. وابدت نفوذ ابوكم تكبر وتكبر ..
لين صار اكبر تاجر سعودي في المانيا .. ووصل هالخبر لعايلة الرايف .. وابوكم مات مقهور من الحياة والظلم ..
وصارت بينا وبينهم حرب .. وبعدها قرر ولد عبد العزيز هايف يعيش برى السعوديه .. او يقيس الاخبار هناك ..
وجاب ولد زوجته معه .. شاف اختك وتزوجها .. وبعد السنين هذي عرفت منو اللي اهانتني .. وحبيت انتقم منها ..
وهي مثايل زوجة هايف .. وصل لها خبر ان زوجها تزوج .. وخبرتها المكان وكل شي عنه بشخصية مجهول ..
وبكذا انتقمت منها ..
امير بحقد / هين ي عايلة الرايف .. والله لوريكم نجوم السماء بعز القايله .. لخليكم تعرفون منهم عيال هادي البسام ..
رائد بهدوء / وشنو بتسوي امير ؟ .. تكفى يكفي اللي صار ..
امير / انا قررت نعيش ب السعوديه .. راح نرد لديرتنا .. غصب عن اللي م يرضى ..
الكل بصدمه من قرار امير المفاجئ .. قبل كان رافض فكرة انه يرد يعيش ب السعوديه ..
كامل / لا امير تكفى .. خلنا هنا عايشين .. اغلب ربعي هنا .. انا كبرت وعشت ف ذا الديره ..
نور / أي امير .. حنا تعودنا ع المانيا .. لا يمكن نعيش ب السعوديه ..
طلال / اللي تشوفه سووه .. انت اعلم ب اللي يسعدنا ..
نجلاء / لا امير تكفى خلنا هنا عايشين .. احسن لنا ..
سارا / أي امير .. دامهم انفونا من السعوديه .. شله نرد لها ..
حور / امير الله يخليك .. حنا تعودنا ع المانيا م نبي نرد للسعوديه ..
بيان / امير لو بنرد للسعوديه .. كيف بندير امورنا هنا .. شركاتنا مصانعنا والمراكز .. ومن غير جامعتي ..
نورا / أي امير .. امورنا كيف بنديرها .. لا م نبي نبي نظل ب المانيا ..
كان يطالعهم بصمت .. وهو بقرارة نفسه مقتنع ب اللي يسويه .. صار وقت يحط النقاط ع الحروف .. طول هالسنين انظلموا
وانفنوا من ديرتهم من دون سبب .. والحين بيرجع ينتقم .. مد يده واخذ جواله واتصل ع فهد ...

دخل البيت بعد م ودع اخته .. كان بتوجه للجناحه .. لكن نبهه راجح ..
راجح بعد م شاف وافي متوجهه للجناحه / وافي اوقف .. فيه كلام مبينا ..
وافي نسى وجود راجح عندهم . ببرود رد / هلا راجح .. امر شبغيت ..؟
راجح / ابي افهم اللي صاير .. صرت غريب م اعرف عنكم شيء .. هذا وحنا من صغرنا م نخبي عن بعض شيء ..
وافي جلس وهو يمسح ع وجهه وشعره / شتبي تعرف .؟ .. ان ابوي تزوج ع امي من 17 سنه .. وان له بنت من مرة اجنبيه ..
وان اختي عاشت طول حياتها ب المانيا .. شتبي اقولك ان ابوي كان عارف ان له بنت وانفاها عنا .. ا نامي لها خبر ولا جابت لنا
طاري .. شنو تبي اقولك .. تكفى خل اللي ب القلب ب القلب ..
راجح بضيق ع حال رفيق عمره / وافي انا م قصدي اضايقك .. بس جدي عنده خبر ..
التفت وافي بصدمه لراجح / شقلت ؟.. جدي عنده خبرر .. من قاله .؟
راجح يهز كتوفه بمعنى م ادري / مدري .. هو قالي رح لوافي .. وجب لي خبر عن اخته ؟ .. وقالي اذا م جابها ..
اطلع لالمانيا واجيبها ..
وافي بضيق فتح ياقة الثوب / ياربي شسوي .. يارب منك الفرج .. راجح شنسوي الحين ؟ .. كيف بنردها ؟ .. خالها لا يمكن
يردها بعد اللي صار .. ؟ والحل ..
راجح / مدري ي وافي مدري .. م فيه الا نقول لجدي الحقيقه .. م فيه غير هالحل ..
وافي بقلق / الشكوى لله .. نقوله وانا متأكد من ردة فعله ..
راجح / ربك المعين وافي .. قم ريح .. واجيك بعد ساعه نروح لجدي ..

بمقر الجرائم ..
كان يجهز المخطط اللي انأمر فيه .. وهو مصر ع انه يخبر امير ب الكمين .. توجه لسيارته وركبها واخذ جواله .. يتصل ع امير ..
رن المرة الاولى ولا فيه مجيب .. والرنه الثانيه نفس الشيء .. كان راح يفقد الامل .. بس حالفه الحظ ف الرنه الثالثه .. رد امير
بصوت كله ارهاق / أهلا ..
... / سيد نيكولاس هو محدثي ..
امير ب غرابه من الشخص اللي يحادثه / نعم .. انا هو نيكولاس ..
... / سيد نيكولاس اريد اخبارك بأمر ما .. هو ان العقرب يريد النيل منك .. لقد يريدك ان تقع ب الكمين ..
امير بصدمه وخوف ان الكمين ينصاب لاخوانه / متى ؟ واين .؟
... / لا اعلم صدقني .. لكنه الان يخطط لكمين يوقعك به ..
امير / اشكرك ع اخباري .. انا ممتن لك ..
... / لم افعل شيء .. وحينما اعلم متى واين سنفعل الكمين ساخبرك ..
امير / حسنا .. انا ب انتظارك ..
سكر منه والتفت ع فهد .. امير / لازم تاكد الحجز خلال باكر .. لازم اطلع من المانيا ب اسرع وقت ..
فهد بقلق / ليش مستعجل طال عمرك .. ؟ يمدينا نرجع للسعوديه خلال يومين ..
امير بهم / العقرب عامل لي كمين .. ولازم اطلع اهلي من المانيا وامن عليهم ب السعوديه .. وبعدها نلتفت للعقرب .. فهد شدد
الحراسه ع القصر واخواني واخواتي ..
فهد / امرك طال عمرك .. لا تخاف من ناحية الحراسه .. البدوقارد جاهزين ..
امير / فهد ابي من رجالك اللي تثق فيهم يشددون الحراسه ع وليد ورائد .. هالاثنين ابي الحراسه عليهم مكثفه ..
فهد / امرك .. تامرني ع شي ي طويل العممر ..
امير / لا ابي سلامتك .. انتبه لنفسك ي فهد ..
هز فهد راسه وطلع .. وبقى امير لوحده توجه لكبته وخرج فرده وظل يطالع فيه .. وصار يتمتم بينه وبين نفسه ( بحميكم من أي اذى
, لو كلفني حياتي .. بحميكم من المخاطر .. انا لك ي العقررب .. ) ..

نزل امير لتحت عند اخوانه .. وكنت ملامحهم تدل ع العصبيه والقهر .. وليد بعد م شاف امير توجه له
وهو معصب ..
وليد / امير ليش مشدد الحراسه علي .. انا لا يمكن اطلع ومعي هالكم الهائل من رجالك ..
طنش وليد وتوجه للكنبه وجلس عليها .. شغل اللاب وصار يشتغل .. وهو يسمع لكلامهم ..
رائد / امير انا مو صغير لتشدد حراستك علي .. بلاش تعصبني لاني جد بديت افقد اعصابي ..
هديلا / ي يمه شله هالرجال .. القصر والسيارات والشركه كلها محاوطه ب رجالك ..
امير / خلصتوا .. ؟
الكل / أي خلصنا ..
امير وهو قايم طالع لبرا / اوامري تتنفذ ومن دون نقاش .. واللي يعارض بيصير له عقاب .. طلع برا القصر وهو يسمعهم
يتاففون وميتين من القهر ..

ب السعوديه ..
الجد / سعود اجمع الكل عندي ب القصر .. ابيهم في موضوع هام ..
سعود / حاضر ي طويل العمر ..
طلع سعود .. بقى الجد يفكر بموضوع ولده .. لازم يرد بنت ولده لسعوديه لازم ..
توجه للقصر بعد م اجتمع الكل .. دخل بهيبته وشموخه المعهود عند الكل .. طالع بعياله واحفاده وزوجاتهم ..
جلس متراس المجلس / انا جمعتكم لموضوع مهم .. موضوع الكل لازم يعرفه ..
قال هالكلام وهو يطالع ف وافي .. / هايف ولدي من قبل 16 سنه .. متزوج من مرة اجنبيه .. وله بنت انفاها عن الوجود ..
ولا اعترف فيها .. ولا عطانا حتى خبر .. ووافي واهله عندهم خبر ب الموضوع .. وانا اليوم جمعتكم علشان هالموضوع ..
الكل منصدم من هالخبر اللي طاح عليهم مثل الصاعقه .. م كانوا مصدقين الكلام اللي انقال ..
ابو جراح / شقاعد تقوول يبه ؟؟ انت متأكد من هالموضوع ..
ابو مهنأ / أي يبه كلام اخوي صح .. صدق الخبر اللي قلته لنا .. يعني يبه لو انا اللي مسوي هالشي .. او سلطان او
سليمان او احد من اخواني اقول يمكن .. بس هايف لا مو معقول يبه مو معقول ..
ابو سلمان / أي صدق الخبر .. وعلشان كذا انا قررت اجيبها تعيش تحت ظلنا .. وبروح انا وراجح اجيبها ..
وافي ببرود / ما راح ترد .. لا تتعب حالك ب الروحه ..
ابوسلمان / ليش ؟.. بنت ولدي ولازم تعيش تحت ظلي .. م راح اخيها تعيش ف بلد الكفار ..
وافي / لاني رحت لالمانيا وجبتها تعيش وياي .. وصار , طالع بامه وبعيونه لمعة حزن ) .. وصار امي م تبيها تعيش ويانا ..
جاء خالها وردها وياه ..
ابوسلمان / متى ؟ .. وكيف ؟ .. وشلون انا م عندي خبر ..
مهره / قبل اسبوع .. وكيف وصلنا خبر وراح وافي وجابها تعيش ويانا .. وانا قلت اذا م وداها لخالها برميها ب دار ايتام ..
وكيف م عندك خبر هذا شي راجعلنا ..
الكل بصدمه من كلامها .. كيف تقرر ع كلامها .. م هو من حقها ابد ..
ابوسلمان بحقد / انت مالك كلمه ع عيالك من بعدي فاهمه .. وانا بردها وبتعيش ببيت ابوها .. واذا فيك خير قربي صوبها ..
مهره بعصبيه مكبوته / اذا بتردها ردها تحت جناحك وقصرك .. بيتي م تجيه ولا تقرب صوبه ..
قالت هالكلام وعطتهم ظهرها .. ولحقتها بنتها الهفوف .. ووافي ورافي وريوف مو قادرين يتحملون اسلوب امهم ..
ابوسلمان / راجح جهز حالك .. بعد ساعه ونص رحلتنا للمانيا ..
راجح يهز براسه بمعنى الموافقه .. قام الجد وتوجه لجناحه علشان يريح .. وراجح توجه لبيته علشان يريح بعد ..

هفوف بعصبيه / راجح ليش بتروح مع جدي ؟.. ليش انت اللي بتجيبها ؟ ..
راجح ببرود وهو يسكر الشنطه ويزين الكبك تبع كم اليد / لان جدي امرني .. ولاني م اقدر اخالف له امر ..
هفوف / وانا م ابيك تروح لها .. م ابيك تجيبها .. خلي احد ثاني غيرك يجيبها او ..
راجح بصداع منها قطع كلامها / انتهى خلاص .. انا قلت بروح مع جدي وانتي م راح تمنعيني ..
عطاها ظهره .. واخذ شنطته وتوجه فيها لسيارته .. علشان ياخذ جده ويروحون للمطار ..
هفوف بعصبيه ونرفزه / هين ي تولين .. والله ليكون موتك ع يدي .. مثل م اخذتي انتي وامك ابوي .. هين ..
.
.
.
كت ..
( * الغيد .. )

**smile123** · 07-08-2015, 05:56 AM

رد: رواية لا زعلت وجاك مني خطآ إمسكني بيدي وعلمني خطآي /بقلمي

يعطيك العافيه على البارت

رواية لا زعلت وجاك مني خطا إمسكني بيدي وعلمني خطاي /بقلمي

رواية لا زعلت وجاك مني خطا إمسكني بيدي وعلمني خطاي /بقلمي

تعليق

تعليق

تعليق

تعليق

تعليق

تعليق

تعليق

تعليق

تعليق

google Ad Widget