تويت
قصيدة سالفة عمري- ناصر القحطاني
من أجمل ما قرأت للشاعر ناصر القحطاني
في رثاء زوجته
قمة الإحساس ومنتهى الحزن والألم
قصيدة سالفة عمري
مسا الخيرات وان طال البطى يالمنزل المهجور
ترى مابطى بي الا حالة(ن) مثلك يقدرها
إذا عندك عتب لا مانع من معاتب المذكور
وإذا عز الرضا تفداك الأعذار ومقابرها
أنا اللي جيت لك والريح تعوي والشتا مسعور
ولا به من دفا والمربعانية بأواخرها
تغير وانطبع دربك بلون المسك والكافور
وهذي رعشة كفوفي ولا به من يدثرها..
بعد ماكنت اجي بابك بدستور وبلا دستور
ولا ادري إلا وذيك الدرفة اليمنى على اخرها
طموحي عارضته اللي معاها كل شيء يبور
وجا كسر الطموح اهون علي من كسر خاطرها
سنة ماقبل نذير الشيب كانت بأول الطابور
وكنت أحلامها ذيك السنة وأول سراريها
لقت قدامها فوضى وقلب وشاعر وجمهور
وجات ورتبتني من جديد وصرت شاعرها
بقيت اسري لها لا همني وحشه ولا ديجور
أشيل أحلامنا تحت النجوم وهي تفسرها
سقى الله يوم جابت لي قبل يومين من عاشور
هذاك العسجد اللي جابه الله من عشايرها
غلاها كان تحويشة عمر بشعور فوق شعور
إلين اكتضت الأشواق والهاني تكاثرها
ربت ماهي تحت ريشة نعام وفي بلاط قصور
ولكن لا ترف له قيمة إلا تحت أوامرها
يحملن أمهات البيض تسع شهور .. تسع شهور
على رجوى بشايرها ولا لاحت بشايرها
تقل بدر(ن) ولابيات بدر.. تقول بدر بدور
ولا بيات بدر بدور يعني منت خابرها
لو استقصوك عنها منت محتاج لشهادة زور
تحت سقفك سحايب ملحها وأمواج سكرها
مرق المتحف اللي من ورى ضلوعك فدتك الدور
وأنا مقوى نظر ما فيه بعد غياب ناظرها
حديقة بيت أهلها ، سورها العالي ، حمام السور
زخارف بابها ، شباك غرفتها ، ستايرها
ورق جدرانها ، سجادها، تقسيمة الديكور
خزاينها ، هداياها ، رسايلها ، خواطرها
تحفها،مزهريتها ، قصصها، شعرها المكسور
صورها ، مكتبتها ، اقلامها ،لمة دفاترها
زمام السيف ،شال الليل، حنه الكف ،كحل الحور
حلقها ، عطرها،فستانها الابيض ،جواهرها
مرايتها، فصوص الساعة البيضا أم خمس سيور
خواتمها، قلايد جيدها، نقشات أساورها
ملابسها، بروق ألوانها، دولبها الممطور
من أزرقها إلى أحمرها إلى أخضرها إلى أصفرها
نسانيس الهوى اللي ترتشف يشمومها المنثور
سخيفات المناديل اللي احتضنت عبايرها
مصابيح المكان اللي خذا منه النهار النور
سنون امشاطها اللي ما نست عشرة ظفايرها
بطاقات يطرزها صغار يحملون زهور
رحيل الدبلة اللي ماتهنت في خناصرها
زوايا كنها بلورفي بلور في بلور
مسا رزنامة(ن) غاب الحرير اللي يغيرها
وش اقول ليتامها الكثير الممتلين كسور
وانا اشياها تحاصرني واحسب اني محاصرها
بكيت وصارت الدنيا قفص واستوحش العصفور
ضحكت وملت شبوك القفص من كذب طايرها
عرفت شلون الأرض تدور وأيام الزمان تدور
والاعيان انصفت كيف ومتى تنصف محاجرها
ومتى تصير القبور بيوت وتصير البيوت قبور
وكيف الذكريات يذوب ماضيها بحاضرها
على الله وانت ابيك المتحف اللي للعرب معذور
إذا جتك العيون وصدت أبوابك نواظرها
تمر اجيال وتصدر سواليف وتعيش عصور
وتروي سالفة عمري من اولها لاخرها
تعليق