رد: رواية الموت ماهو انك تكتفن بترابك الموت أنك تحب حي ويفارقك للكاتبة{!karisa}م

البارت الاول:
قبل 18 سنه:
صراخه كان عالي و دليل واضح على جنونه اللي كان ناوي يسويه: اتركوني.. مستحيل تشوف الشمس بعد اللي سوته!!!
منصور رفع مسدسه في وجه اسماء اللي ما كانت حاسه بشيء ، شلون تحس وهي لا تسمع ولا تتكلم حركت عيونها على اللي حولها... الكل كان ساكت... محد راضي يفهمها ايش اللي صار...
الوحيد اللي ما كان عاجبه اللي يصير مشى و بقوه سحب المسدس من منصور: انهبلت يا منصور...
منصور ضرب صدر محمد وحاول يرجع المسدس منه بس ما قدر خصوصا ان محمد كان اضخم و اطول منه بكثير: انت اللي انهبلت يا محمد... بعد ما شفتها بعيني وهي معه في الغرفه!!! ومقفله الباب بعد!!!!!!
محمد حرك عيونه لابوه ينتظر منه رد: ابوي تكلم ... هدا ولدك قبل لا اتهور و اكسر له راسه او ضلع من ضلوعه...
بو محمد حرك عيونه من محمد و منصور الى ولده اسامه اللي كان واقف ببرود وكان الموضوع ما يخصه و احمد اللي كان متاثر بس خايف يتدخل بينهم، ثم لولد اخوه جاسم اللي كان معطي الموضوع نظره اشمئزاز... واخيرا لاسماء زوجته ( بالاسم) اللي كانت عيونها كلها دموع باتجاهه، و بعدها قال: محمد!!! .. منصور معه حق... ايش اللي يدخل رجال غريب لغرفه نوم حرمه !!! و ينقفل الباب عليهم!!
محمد :قلت لك عامل بيصلح لها التكيف العطلان.. هي قايله لي!!! و الباب اكيد احد قفله عليهم..!!!
اسامه بنظره غضب: احد!!! مثل منووووو !! الشغالات كلهم كانوا في الحديقه يجهزون للحفله و خالتك هي الوحيده اللي في البيت مع العامل اللي ما عرفت تطلبه الا اليوم بالذات و اللي ما كنا بنعرف بموضوعه الا لما جا اخوي منصور و شاف بابها مقفول ، طبعا وهو شيء ممنوع عليها !!!!!!! وهي لحالها او مع احد من اهلنا كيف و معها رجل غريب يعني...
محمد: احترم نفسك يا اسامه!!!!!!! ويا ويلك ان عدت هذا الكلام من جديد.... خالتي بريئه بررررررررررريئه!!!!!!!
......................: لا ماهي برئيه!!!!!
عيون الكل في المجلس تحركت لصبي ال 14 سنه و هو يدخل بثقه للعندهم ، محمد زفر بقوه و قال: عيد اللي قلته ان كنت رجال يا نوووووووووووواف!!!!
نواف ابتسم وهو يرمش بعيونه الزرقاء: هذي ماهي اول مره يدخل فيها هذا العامل البيت و تقدر تتحقق من الشغالات ... و لا اول مره اشوفه مع المدام واللي تظن انها بترشيني بكم ريال تعطيني اياهم
محمد بجنون سحب يد نواف اللي كان ياشر فيها على اسماء و و ضربه بقوه للارض، جاسم ركض لعنده و سحب ولده بقوه من يد محمد المجنون...
جاسم: مشاكلكم لا تدخلوون ولدي فيها يا محمد... هو قال اللي شافه...ولا تنسى ان الاطفال ما يكذبون..
نواف كان يتظاهر بالبكي على صدر ابوه وهو مبتسم، طفل ،، هذي نظرتهم له رغم انه عقله كان اكبر ن عمره بكثير..
منصور بصراخ: ايش تبي دليل اكثر من هذا،، خالتك هذي لازم تموووووووووت... تموت و يموت عارها معها!!!
محمد مشى لعند خالته اللي كانت خايفه منه و حط يده على كتوفها: قلتها بلسانك!! خالتي!! ولانها خالتي انا اقرر مصيرها!!!!!!!! بما ان ابوي طلقها و انتوا كلكم مانتوا عيال اختها!!!!!
بو محمد: ايش قصدك يا محمد...
محمد: انا ما عاد لي بقى في هذا البيت يا ابوي!!!! ان كانت خالتي اسماء مالها بقى!!!
اسامه: ههههه يعني تعتقد بتجبرنا نقبل فيها بعد اللي سوته بتصرفك هذا!!!
محمد: انت اسكت ولا تتكلم !! انا اكلم ابوووووي.... ابوووي... للمره الاخيره ان بقت خالتي اسماء... راح ابقى و بس هذا اخر كلام عندي...
منصور: باللي ما يحفظك ..... يا ولد اخت اسماء.ال******
بو محمد بضعف شخيصه معتاد منه لما يكون بين اسامه و منصور اخذ صفهم كالعاده: محمد ان استمريت على هذا الشيء فانا ما عندي الا اني اقولك اطلع انت وياها و الا راح نذبحها
احمد من القهر اخيرا تكلم: ابوووووووي!!!!!!!!
محمد مد يده قدام احمد و بهدوء كلم لابوه: ان كان هذا قرارك!! فلك اللي بيصير ... انا الحين بروح اخذ جسار و فواز و الاشياء اللي املكها انا من فلوسي الخاصه و اطلع... ولك وعد اني لا انا و لا خالتي ولا حتى عيالي بنوريك وجهنا بعد اليوم!! ولا راح نطلب منكم شيء...
منصور: روحه بلا رجعه!!!!!!!
اسامه: اللي تشوفه هو اللي صح دايما!! ههه
احمد مشى لعند ابوه و بدأ يترجاه: ابوي ارجوك!!! وقف محمد ارجوك!!1
بو محمد دفع اصغر عياله عنه و عطى نظره غضب لمحمد: اطلع منت ولدي ولا اعرفك!!!!!
محمد اخذ اسماء معه و بسرعه على جناحه ... اخذ عياله و اغراضه مثل ما قال و طلع من البيت من غير كلام...
احمد انهار الم على اخوه اللي يحبه، اسامه و منصور تبادلوا النظرات لفتره و بعدها كل طلع بطريق.. بو محمد كان وجهه رغم كل التصنع واضح عليه الالم و شيء من الخوف.. جاسم سحب ولده نواف ودخله جناحه....
ساره : جاسم حبيبي ايش اللي صار؟؟؟؟
جاسم هز راسه باسى و كان بيتكلم بس انتبه على نواف رغم انه عارف ان نواف فاهم الموضوع سحب زوجته لغرفته الخاصه و روا لها اللي صار ما كان في داعي يعرف اي شيء ما كان يعرفه و يتعمق يموضوع اكبر من سنه .... بس لو كان يعرفون ان نواف عقله و تفكيره كان اكبر من الكل... بعد ما تسكر باب غرفه النوم ابتسم نواف ابتسامه نصر و طلع من جيبه المفتاح الخاص بغرفه اسماء: هذي اسماء حبيبه القلب و محمد الغالي و طلعوا من حياتك يا بو محمد الكلب.... و اللي جايك اكيد اكبر... طول ما راسي يشم الهوا... و راح تندم و تندم حتى ما تتمنى الموت يجي و ياخذك..!!!
-
-
-
-
ادعى علي بالموت والا سمني
بس لا تفارقني دخيل الله وتغيب
طال السفر يا بعد عمري همني
شلون اودع في المطار اغلي حبيب
تعال قبل تروح عني ضمني
اقرب من انفاسي ترى حالى صعيب


ابنتثر قدام عينيك لمني
ابسالك هل نلتقي عما قريب
نسيت حتي اسمي دخيلك سمني
باللى تسمينى البيلك واجيب
مجنون عاقل ما علي من لامني
انا مع نفسي واحس اني غريب


الحظ الأوفر للأسف ما عمني
ما عمني غير بعذابي والنحيب
يسألني عنك العطر من يشمني
من قلت بتسافر همل دمعه سكيب

رد: رواية الموت ماهو انك تكتفن بترابك الموت أنك تحب حي ويفارقك للكاتبة{!karisa}م

أحسن بك النية وتفتح علي أبواب
باب النكد يا عجل ما تفتح أبوابه
إن جيت أبين لك على رغبتي بأسباب
أخطيت في تقدير ظني مع أسبابه
خليتني أخشاك ما كننا أحباب
متعوس قلب ما توفق مع أحبابه
واليا بغيت أطلب حسبت ألف وألف حساب
يرضيك من حبك معك يسقط حسابه
إن قلت لك مرتاح والله أنا كذاب
وإن كان روحي سرها البعد كذابه
الشوق يدني ربع من طولوا غياب
والشوق يذبح لي تباطوا غيابه
أقولها والنفس تحفظ لك الترحاب
يسوقها فكر عطاك كل ترحابه
إني بحبك سيد الحب ولا ترتاب
أسكنك يا حب هجر نفس مرتابه

البارت الاول:
•
• * *الرياض* *
" أشكر لك تفهمك للوضع سيد عبدالناصر ... و اتمنى ما تترد في طلب اي مساعده في المستقبل سواء في الشغل و غيره فاحنا راح نظل رغم كل اللي صار اصحاب...
في مكتبه الضخم اعلن رئيس مجموعات شركات نواف البدر...... استولاءه على شركات عبدالناصر الخالد.... واللي كان بكل مشروعيه و قانونيه ، عبد الناصر راهن بشركته و دخل صفقه فاز فيها نواف بكل سهوله خصوصا لما تكون في مجاله الخاص... المجال اللي كان كل من يحاول يدخل يتدمر بكل سهوله مهاما كان مكانه. .. وهو شيء صار معروف بين التجار... نواف خط احمر لازم محد يقرب منه... واللي يغامر و يتعامل معه لازم ياخذ كل وسائل الحذر ...
طبعا عبدالناصر كان واحد من هالمغامرين و مثل العاده خسر و طلع مكسور في الوقت اللي ابتسم فيه نواف لاعضاء مجلس ادارته...: نقدر الحين نحتفل بهذا الانتصار الكبير شركه لها فروع مهمه في تركيا و مصر برأس مالي قدره 70 مليون دولار... اضافه الى كم مخرن مهم هنا في المملكه...
نواف انتظر دقايق و بعدها رفع حاجبه لاعضاء المجلس اللي كان جزء منهم موظفين في الشركه و الجزء الثاني مجرد اصحاب ملك : ممكن افهم سبب هذا الهدوء؟؟
بو نواف كان اكثر شخص ملك الجرأه يتكلم بعد نفس طويل: ولدي نواف .. ما كان في داعي ابدا لتصرفك هذا... عبدالناصر ولد نصار شريك قديم للوالد و عمي ... رجال كبير و محترم... ما كان في داعي تس..
نواف ببرود ابتسم و قاطعه: ابوي.. العزيز... الشغل شيء و المشاعر و الاحاسيس شيء ثاني..... من استلمت هذا الشغل وهو في ازدهار و توسع و السبب الاهم في نظري هو ان كل مشاعري و احاسيسي متروكه عند باب المكتب .... انساها كلها بمجرد دخولي له.. ان راعيت هذا لانه صديق ابوي.. وهذا لانه نسيبي ... وهذا لانه ابن جيرانا ... ابدا ما راح اتقدم و راح اظل محصور في المجتمع الصغير اللي انتوا تتعاملون معه.... وهو الشيء اللي كان مانعكم من التقدم في المجتمعات الغربيه ... و توسيع تجارتنا و صفقاتنا بشكل اكبر...
بو مشاري ( نائب المدير) : نواف عزيزي اللي يقصده ابوك ماهو اللي انت تصورته... انا واثق من انه قصد طريقه سحب الاملاك من عبدالناصر ... يعني لو انك تركت لهم فرصه... على الاقل يت...
نواف: ان تركت لهذا الشخص فرصه .. فلازم اترك لغيره و لازم تعرف يا خالي العزيز ان في كل ثانيه نعطيها لهم ممكن نكسب ملايين ...
فارس ( مدير قسم التخطيط) : اخوي نواف معاه كل الحق ... نقدر نبدي من هذي اللحظه التخطيط لمشروعنا الجديد و بهذا يتضاعف المكسب المتوقع لهذا الشهر مرتين...
بومشاري: ولدي فارس .. تتكلمون عن الفلوس و كانها كل شيء علما ان عندنا اللي يكفينا و زياده لسنين كثييييييييييييييييره.... فما في داعي ابدا نهين و نزعل ناس غاليه علينا علشانها.. انا بصفتي نائب المدير لي حق الاعتراض
نواف عطى نظره قويه لابو مشاري: لك حق الاعتراض صحيح بما انك احد الاعضاء في مجلس الاداره... بس انا صاحب ال 51% من اسهم و رئيس المجلس لما اقول شيء يتنفذ حتى من غير موافقتكم كلكم ... بما فيهم ابوي العزيز.. اللي اتمنى ما يزعل من كلامي هذا...
مثل العاده جاسم ( بو نواف ) انقهر من كلام ولده بس تظاهر بالعكس رغم ان الكل كان عارف حقيقه مشاعره اتجاه ولده الكبير.. نواف صرف مجلس الاداره على البوفيه اللي خصصه بمناسبه النجاح و هو ظل بروحه .... في بحر افكاره العميقه اللي لحد هذي اللحظه محد قدر يوصل سطحها حتى يوصل عمقها...
" أغبياء ... كل اللي حولي اغبياء ... يحبون اللي ما يحبهم و يدافعون عن اللي مستعد يبيعهم بارخص الاثمان ان كان يقدر.... حب نفسك و بس هذا هو السبيل الوحيد للحياه.. القوي يعيش بسعاده و الضعيف لازم يتحمل نتائج ضعفه .... الموت بعد عذاب طويل. "
* *الكويت* *
قبل عده ساعات في وحده من المدارس الثانويه للبنات.. الصف الحادي عشر... الطالبات مثل عادتهم كل دقيقه تدخل وحده منهم و تسمع التعليق المتكرر من بعض البنات...
وحده من الطالبات: يعني حتى انتي انظميتي لقائمه الجبناء ههههههههههههه
ايمان اللي هي وحده من اجرأ البنات في الصف انحرجت لما دخلت الصف و سمعت التعليق: ما قدرت البسه... بابا عصب... و خاف ان الاداره يعاقبوني...
رغم التبرير الكل ضحك خصوصا اكثر وحده ما تطيقها ايمان ، هند: هههههه اصلا الموضوع مستحيل.. فما كان في داعي انكم تتظاهرون بالقوه و تتدحدون غيركم...
ايمان مدت لسانها لها: ما خلص الصف... نوف ما جت لحد الحين..
هند انفجرت ضحك : ههههههههههههه ما لقيتي الا نوف؟؟؟ تتاملين فيها خير...
ما خلصت هند من كلمتها الا و البنت اللي يتكلمون عنها داخله الصف و حامله شنطتها بهدوء على ظهرها : السلام عليكم..
هند ضحكت و هي تتامل وجه ايمان اللي عصبت و انفجرت بعصبيه: نوووووووووف احنا ما اتفقنا امس نلبس وشاح اسود كاعتراض على مناهجهم المستحيله و امتحاناتهم التعجيزيه !!!!!!!
نوف ببراءه حركت عيونها لبنات الصف وجاوبت بهدوء: انا اصلا ما وافقت على الموضوع ثانيا ماني الوحيده اللي ما لبست فليش تكلميني بهذا الشكل اموون
هند بغرور ضحكت : عين العقل يا خطيبه اخوي العزيزه... سمعتي يا الضفدعه ايمان ...!!!
نوف ابتسمت بخجل وايمان انقهرت من كلمتها و ضربت هند بعلبه اقلامها و كالعاده اضطروا البنات يبعدونهم عن بعض...
ابتدى الدرس و كانت حصه الرياضيات الممله هي الاولى ... بعد السلام اللي من غير نفس من اكره معلمه عندهم ابتدت رحله الاهانه: انا حاولت كثر ما اقدر اصلح كل الامتحانات البارح حتى تشوفوووها و تتمتعوا بدرجاتكم اللي مثل الزفت خلال الويك اند... و تعرفون مستواكم شلون صاير و تعدلون طريقه دراستكم...
اميره وحده من الطالبات الممتازات في الصف رفعت يدها بخجل: ابله لو سمحتي كل الصف درجاته كانت سيئه؟
المعلمه بنبره غاضبه: لا!!!! درجتك 15 من 20 يا اميره و بالنسبه لمستواك المفروض تكون اكثر من جذي..
ايمان وهي تهمس لرزان صديقتها: اذا اميره ماخذه 15 احنا كم ماخذين..
رزان: الله يسترك شكلنا راسبين....
نوف كانت جنبهم على الجهة الثانيه : مافي داعي للخوف ان شاء الله زينه...
المعلمه ضربت الطاوله بيدها حتى حتى يتوقف الهمس: راح اقرا الدرجات علني....
البنات اعترضوا بس المعلمه مثل العاده تجاهلتهم و كملت: اميره 15، سعاد 8، الهنوف 6، عذبيه 5،................................................ .....................، هند 9 ، ايمان 4.....
ايمان وقفت بنص الصف و بدت تصفق: ههههههههههههههههههههههههههيا الحمد لله ماني صفر....
المعلمه: ايمان ارجعييييييييييييييي مكانك ولا لعند المديره بتروحين....
ايمان قعدت و بدت تهمس مع المعلمه نفس الكلمات اللي بتقولها بالضبط خصوصا ان الاسم الاخير كان اسم نوف: وطبعا الوحيده اللي درجتها كانت تشرف معروفها.. مثال الادب و الاخلاق العاليه و الالتزام بالقوانين ... نوف 20 من 20 ...
ايمان بصوت مسموع لكل: بل ... الامتحان كان تعجيزي وفوق هذا ماخذه علامه كامله...
المعلمه: ايمان احترمي نفسك!!!! ولا بنقصك بالشفوي...
ايمان : يعني كلش مو درجتي صفر من البدايه هههههههه
نوف بابتسامه وهي تاخذ ورقتها: ماعليه ابله سامحيها ... امووون عزيزه و غاليه مهما قالت وسوت....
ايمان ابتسمت و غمزت لنوف، الابله بتافف اشرت عليها: تعلمي ... الادب و الاخلاق من نوف ولو شوووووي ... الله يعين اهلك عليك...
ايمان ضحكت و ضحك الصف معها وهو الشيء اللي قهر ابلتهم و خلها توقفهم علشان يبدون الدرس....
هذا الروتين كان شيء معتاد في مدرستهم و في الصف نفسه... ايمان كانت وحده من اكثر الطالبات المشاغبات و دايما تتشاجر مع البنات و تشاغب، هند كانت ام وجهين ثعلب تنافق و جاسوسه للادراه تبلغهم عن اي شيء يسونه البنات من وراهم .... نوف الطالبه المثاليه المتميزه... الاولى على المرحله و مثال الالتزام بالقوانين كلها...
بعد كم ساعه:
انتهى الدوام المدرسي و مثل كل نهايه دوام كل البنات كانوا يتسارعون لباب المدرسه و على طول للبيت نوف كانت ترتب اغراضها بهدوء في شنطتها الشيء اللي يقهر ايمان اللي ترميهم بفوضويه و نصهم تتركه في المدرسه ولا يهمها ضاع ولا لا .. بس في النهايه لازم تنتظرها حتى يمشون للباب مع بعض.. هند قربت لعندها و بنبره تحاول تخفي فيها حماسها: نوف...
نوف بهدوء: هلا حياتي؟؟
هند بابتسامه: فواز اخو الضفدعه ما رجع من رحلته.. للندن؟
نوف ببراءه: لا حبيبتي.. ما رجع بس لا تخافي باذن الله اول ما يرجع بجيب لك الاغراض اللي وصيته فيهم.. انا سبق و قلت لج اني مفهمه ايمان انهم لي.. فاكيد بتحرص عليهم
هند: مشكوووووره يا قلبي..
ايمان ما كان عاجبها الوضع وانهم يتهامسون سحبت نوف معها : ايمان ايشفيج؟
ايمان من غير نفس: ما احبها ما احبهأأأأأأأأأأأأأأأأأأ .. تتصرف وكان الناس كلهم ميتين عليها و ان ...
نوف ببراءه: من حقها مو اخت الغالي؟
ايمان ضربت كتفها بقوه: غالي عليج اما انا ووووووووووووووع.....
نوف بضحك: عامر وع... اجل هيريتك روشان شنوو...
ايمان بشهقه: ووووووه فديته... طول و عرض ووسامه و خفه دم و .......
نوف بضحك: ههههههههه بس الله يخليج و لا بتصير لنا مصيبه..
ايمان حركت عيونها و انصدمت جنب سياره اهل نوف كان جالس خطيبها عامر ينتظر هند..
ايمان ضحكت و مشت باستعباط لسياره جسار اللي كان ينتظرها و نوف مشت لعند سياره اهلها
.. نوف بهدوء مشت لعند سياره اخوها اللي كان يتكلم مع عامر و قالت : السلام عليكم
عامر: وعليكم السلام..
نوف كانت منزله راسها بخجل عامر كان مبتسم بحب و وحشه و قالت: شلونك يا نوف.. ان شاء الله بخير..
نوف وهي منزله راسها و عيونها بالارض: الحمد لله.. بخير...
اخو نوف طلع نفس طويل و نبره استفزازيه: نوووف..... يالله مشينا
نوف ظلت عيونها بالارض و عطت عامر نظره اخيره و مشت مع اخوها .. و بعدها مشوا... هند مشت لعند عامر و بنبره بارده: غريبه اليوم جاي تاخذني؟؟؟
عامر: السواق مشغول مع امي... و انا قلت امرك دامني فاضي..
هند: جاي تمرني ولا جاي تشوف حبيبه القلب و الروح..
عامر بنبره ساخره: اكيد جايه اشوفها.. ما شاء الله عليها كل يوم عن الثاني يزيد حلاها...
هند: اقول اسكت و خلنا نروح البيت احسن ... احس بموت من الجوع...
من جهة ثانيه في سياره جسار ..
ايمان فصخت نظاراتها الطبيه و رجعتها شنطتها و طلعت من الشنطه من الشطنه موبايلها و بدت تكتب فيه..
جسار : ايمان بصراحه ماعاد فيني اتحمل طريقتك هذي...
ايمان رفعت حاجبها: وليش ما عدت تتحمل طريقتي يا ( شارلوك هومز) موبايلي مالي غناه عنه ولا يمكن اعيش من غيره ولو ان المدرسه ما تمنعنا نستعمله كان دخلته معي الصف..
. جسار تنهد و قال لها ببرود: انتي ليش غبيه و دايما تفهمين الموضوع غلط، من جاب موضوعك مع الموبايل؟؟
ايمان وهي عيونها على موبايلها : اجل شنو؟؟
جسار: انتي لمتى بتظلين تصطنعين شخصيه البنت الغبيه و المهمله و الصبيانيه..... المدرسه كانوا مستدعين ابوي اليوم بس ما قدر يحضر وانا جيت بداله.. الابله شوي و تبكي تقول امتحانك كان ورقه فاضيه من الاجوبه بس كله رسومات ، مع انها واثقه و متاكده ان مستوى ذكاءك اعلى من كل البنات في سنك...
ايمان ضحكت بجنون: هههههههههههههههههههههههههههههههههههههههههه..... ممتاز يا شارلوك هومز ... قدرت افوز عليك ، و الغي هذا الببرود اللي فيك من تصرفاتي؟؟
جسار بقهر : اوكي فزتي ممكن اعرف السبب..
ايمان: ما راح استفيد شيء من الدراسه...
جسار: اقدر اعرف ليش؟؟؟
ايمان: لانه مافي شيء بالدنيا احلم اسويه لما اتخرج طموحي الحالي هو ان اعيش اللحظه ... مع زميلاتي و صديقاتي.. بمعنى ان مافي داعي اضيع وقتي في الدراسه...
جسار: انا عارف السبب بس ودي اعرف دوافعك شنو؟
ايمان حاولت تغير الموضوع اللي كان اغلب الحديث الدايم بينها وبين جسار من مده : فواز ما اتصل؟
جسار:اتصل بس للاسف تاجل رجعوعه لانه رايح للرياض بدل واحد من الطيارين اصحابه .. و ان شاء الله بيكون عندنا الاثنين او الثلاثاء..
ايمان: اووووبس... الحين شقول لنووووف...
جسار: قولي لها حبيب القلب تاخر سامحينا اميره هند..
ايمان انقهرت: كم مره لازم اقووووولك ان نوووف هي اللي طلبت مووو هند الفيله!!!
جسار: هذي اخر عيشك للحظه... ما تعرفين اللي يخدعونج
ايمان عصبت و ضربت كتفه: لا تعيدها!!!1 فعلا ندمتني قد شعر راسي اني قلت لك!!!
جسار: ماهو طبيب منك.. انتي قلتي لي حتى اقنع فووووواز يخطبها و هو شيء مستحيل !!! صفات اميره احلامه بجهة و السيده هند بجهة...
ايمان بتأفف: و الحمد لله انه ما اقتنع ... انا علشان نوف قلت امشي نصيب اخت حبيب القلب بس ... فعلا طلعت على حقيقتها بعد ما رفضها فواز..
جسار: هذي المره قدرتي تنجين من تسرعك و اخطاءك في الحكم على الناس بس خوفي ان المره الجايه تكون اكبر من هذا بكثيرررر
نوف: ممكن تسكت و تسوق.. برجع البيت بجلس مع بابا... واحشني...
جسار: اوكي...
-
-
مطار هيثرو ( لندن) :
قبل موعد اقلاع الطائره بكم دقيقه دخل اثنين ببدلاتهم الرسميه و طولهم و ملامحهم العربيه و قعدوا في مقصوره الدرجه الاولى في الطائره واحد منهم كان هادي و الثاني كانت عيونه كلها عصبيه و نفسه بخشمه...
سعود بتافف معتاد منه : فعلا انسان وقح و ما يستحي على وجهه ... انا سعود البدر اركب طياره عاديه !!!!!!!!!!
مشاري طلع نفس طويل وحرك عيونه على الشباك اللي جنبه يتامل المطار: سعود... من عمرنا واحنا نركب في طيارات عاديه... ايش اللي تغير يعني في هذي المره..
سعود وعيونه كلها غضب: اللي تغير اني انا اخو زوجته الحين !! وماني مسافر اغير جو.. رايح بشغل له هو!!!
مشاري: سعود... هذا شغلك .... منصبك كمدير للمبياعات يحتم عليك السفر الدايم.. ولا نسيت؟؟ واذا هذا الوضع ما يعجبك ... بدل مع فارس؟
سعود: اعتراضي ما هو على السفر... لكن ان كل افراد العائله تكون الطيارات الخاصه تحت تصرفهم ولما اطلبها انا يرفضون ... في هذي اهانه ... و كبيره في حقي بالذات انا نسيبه..افرض ان ما حصلنا مكان على اول رحله للرياض.؟ كان تاخرت على عرس صاحبي .. و زعلته مني....و اللي اكيد ما راح يصدق موضوع اني ما حصلت حجز بما انا نملك ماهو بس طياره وحده ... طيارات
مشاري: سعود الطيارات و اغلب الاملاك كلها لنواف.. و لما سمح لنا نستخدمهم فهو كان بطيبه منه... و غير هذا لا..
سعود: ابوي سلطان شريكه في كل شيء و نصيبه في هذي الاملاك يعطينا الحق في التصرف...
مشاري تافف و رجع عيونه للشباك: سو اللي تبيه .... انا ما تفرق معي... في شيء... حتى اذا بغيت خل عمي اسامه او ابوك يكلمه... بما انهم اقرب له مني و منك.....
سعود: هذا اللي بيصير....
سعود رجع ظهره لورا و ربط الحزام بما ان الطياره كانت على وشك الطيران وبدأت التعليمات تنذاع... و الكابتن يتكلم..
" اعزائي المسافرين... سوف تقلع طائره الخطوط الجويه الكويتيه الرحله رقم 12229 المتجه من مطار هيثرو في لندن الى مطار الملك خالد الدولي في الرياض.. الجو خارجا ممطر و بارد نسبيا مع انخفاض في الضغط الجوي..و سوف نصل اليه في الساعه الثامنه مساء ... ارجو من الجميع قضاء رحله ممتعه على متن الخطوط الجويه الكويتيه...مع تحيات طاقم الطائره و الكابتن فواز البدر.."
سعود رفع حاجبه باستغراب و حرك عيونه على مشاري: ايش قال اسمه الكابتن...
مشاري: فواز البدر...... تتوقع..يكون ولد عمي محمد؟
سعود زفر و رجع ظهره على الكرسي: ليش لا؟ تبي تتاكد...
مشاري سكت و ما عطاه جواب... في نفسه وده يتأكد اذا هو ولد عمه ولا... بس عقله يرفض الشي... يعني ايش ينادون الرجال و يقولون له انت فواز ولد عمنا اللي ما شفناك من سنين...
-
-
-
ايمان دخلت البيت قبل جسار و هي تركض بسرعه لمحمد اللي كان جالس في الصاله يشرب قهوته: بابا
ايمان ركضت و رمت نفسها في حضن محمد اللي فتح يدينه لها و ضمها وبدا يبوسها مثل الطفل الصغير...: حبيبة بابا..
جسار تافف وهز راسه: انتي ما تستحين .... الطول مثل النخله و العقله مثل الصخله...شوي و بتصيرين طولي و لحد الحين تجلسين في حضن الوالد مثل الطفل؟؟؟
ايمان حضنة محمد بقوه اكثر ومحمد حضنها لصدره هما و قال بضحك: جسار... مانت ناوي تبطل هذي الغيره اللي تغارها من حبيبه ابوها؟؟؟
ايمان كانت تمد لسانها لجسار باستمتاع جسار زفر وجلس باستسلام بعد ما باس راس ابوه : فواز ... ماراح يرجع اليوم يا ابوي..
محمد رفع حاجبه و سال: ليش فيه شيء؟؟؟
ايمان قاطعت جسار قبل لايكمل: تعرف فواز طيب و بسرعه ينقص عليه.... طلبه واحد من اصحابه ياخذ مكانه وهو بكل طيبه نفذ له هذا الشيء...
جسار: ممكن ما تقاطعيني... ام وجهين؟؟
ايمان: ما ابي شارلوك هومز...
جسار تافف و بدا يلحقها و هي تدور حول ابوههم اللي بدأ يضحك عليهم اكثر و اكثر وبعد فتره قاطعهم: و اخوكم لوين رايح الحين...
ايمان: الرياض بابا
محمد تغيرت ملامحه السعيده و تافف ... جسار حرك عيونه لابوه و فهم بالضبط سبب هذي النظره على وجهه بس ما حب يببن و كمل مطاردته لايمان حتى ما تفهم اللي صار....
محمد في نفسه: اههه يا انك وحشتيني يا بلادي.....
ايمان ركضت بجنون على السلم تصعد: استاذن بابا وراي شغل...
جسار باستعباط: روووحي لشغلك ام وجهين
ايمان من فوق: shut up
جسار ابتسم يضحك لحد ما سمع صوت باب غرفتها يتسكر بقوه.. بعدها حول ملامحه للجديه و جلس جنب ابوه: ابوي... انت زعلان من فواز...
محمد : مليون مره اقوله مافي داعي للرحلات المتجه للرياض,, وفوق هذا يعاند و يكمل رحلاته...
جسار حط يده على كتف ابوه:يا الغالي لا تزعل من فواز... تراه يموت ان عرف انك زعلت منه... تلقى الموضوع صار صدفه.. و تعرف انه ما يحب يرد احد في طلبه
محمد تنهد بقوه: ولدي و اعرفه... بس يوم عن يوم يزيد خوفي عليه... طيب وعلى نيه في مجتمع كله وحوش...
جسار : طول ما انت معنا ما في علينا خوف...
محمد: خوفي عليك وعلى فواز ما يتقارن ابدا بخوفي على ايمان... مو انا خايف ان هذا كله ينتهي بمصيبه .. و تروح فيها هالبنت المسكينه...
جسار اشر على رقبته: على قطع رقبتي!!!!
محمد ابتسم و ضرب رقبته بضحك..: ايمان ماهي محتاجتك!!!!ولا محتاج فواز .... قووويه و عن عشره منك ومن اخوك...بس هذا اللي يخوفني عليها

-
-
في بيت عامر..
دخلت هند غرفه امها و رمت نفسها جنبها باستعباط: هلووو ماما
امها هزت راسها وكان تصرف بنتها ما عجبها: ليش يماما ما تسلمين لا دخلتي...
عامر مشى لعند امه وباس راسها: شلونك يا قلبي...
ام عامر بابتسامه: بخير دامك بخير يا روحي...
هند تاففت: يعني عامر عمرك و قلبك وانا بس تهاوشيني...
اما عامر دفعتها شوي عنها : بعدي عني .. دايما جذي مع اخوك.. مو كافي انه طول الوقت مشغول و يكرف علشان تعيشين عيشه الملوك هذي...
هند رفعت حاجبها و كانها تذكرت شيء: على طاري الشغل ... ماما وين كنتي اليوم؟
ام عامر مافهمت قصد بنتها: ما طلعت من البيت ليش السؤال؟؟
هند عطت اخوها نظره شريره: يعني السواق ما كان مشغول فاضطر اخوووي العزيز يمرني ...
ام عامر ما فهمت في البدايه بس لما طلع عامر من الغرفه فهمت: هند خفي على اخوك شوي... تراه خجول كثير..
هند: عارفه... و عارفه شكثر يحبنووووووووووف و يموت فيها...
ام عامر نزلت عيونها و هند حست ان الموضوع فيه شيء:ماما ايش فيك...
ام عامر : خالتك ام احلام اتصلت ....
هند: توسعت عيونها: خالتي ام احلام؟؟؟ شنو اللي ذكرها فينا بعد كل هذا الوقت...
ام عامر: تبي تعزمنا على عرس بنتها احلام...
هند حركت عيونها لبعيد: احلام تزوجت؟
ام عامر: يظهر انه سبب اتصالها هو ان سبب شجارنا القديم انتهى...
هند: ما تنلام يا ماما... بعد ما كانوا متسمين لبعض... لسنين... يجي عامر و يفك الخطبه بكل بساطه علشان يتزوج وحده غريبه....
ام عامر: لا تقولين غريبه يا هند...الجيران حسبه الاهل .. بس هما ما كان في ودي اخسر اختي الوحيده بسبب هذا الموضوع..
هند: بتروحين العرس ماما..
ام عامر: اكيد بروح يا بنتي.. بس ماني عارفه شلون بقابلها .. خصوصا ان عامر لازم يروح معنا... شلون بيقابل زوج اختي بعد الاهانه اللي تعرضوا لها بسببنا...
هند ماعرفت بشنو تخفف عن امها فيه حضنتها وحاولت تخفف عنها بهذا الشكل...
عامر كان واقف براه يسمع كل الحوار... لانه كان عارف ان امه مخبيه شيء عنه انقهر من الحوار وظل يعاتب نفسه: يا ربي... ايش اسوي... امي واحبها وما ابي ازعلها... بس ما كانت قادر امنع نفسي ... خصوصا اني يوم عن يوم احب نوف اكثر و اكثر...
-
-
-
بعد ما اخذت شور طويل و مريح اخذت ايمان مكانها قدام شاشه الابتوب الخاص فيها في غرفتها فتحت صفحتها الخاصه و حصلت على التحيه اللي صممتها
!& نأأدي العشاق &!
(( اهلا و سهلا في كل الاحباء و الاصدقاء ... ))
دخلت على جهة الاسم و سجلت اسمها و رقمها السري و دخلها و اخذت تحيه ثانيه ..
(( اهلا وسهلا ... بسيده الحب و العشق..
Miss Magi ))

ايمان ابتسكت بفخر على انجازاتها الروعه في المنتدى وانها في كل مره تدخل تلقى البريد مليان .. كثيرين يحتاجون النصح منها.. طبعا بمساعده من بعض العضوات..
طوووووووووووووووووووووووووووووووووووووووووووووأأأأ
قطع استمتاع ايمان بالقراءه رساله تنبيه من عضوه معها ...
Magi:
فيفي .. كم مره قلت لج لا ترسلين لي رسايل تنبيه جذي تخرعني...
-
فيفي:
احسن تستاهلين ... و ثانيا ان ما سويت جذي ما راح تردين علي...
-
ماغي ابتسمت و ارسلت لفيفي (نوف)
اكثر شيء اكرهه فيج انج تفهميني...
-
فيفي:
عشره عمر... و صداقه سنين ....
-
ماغي بتأفف:
فيفي.. ممكن تختصرين وراي شغل كثير... البريد مليان...
-
فيفي :
حوليهم على الاعضاء .. وخلينا نكمل سوالفنا.....
-
ماغي:
ما اقدر .. في اكثر من وحده انا مهتمه بموضوعها بشكل خاص...
-
فيفي:
صحيح نسيت... ( القلب المكسور) و (سراب الليل) كانوا ينتظرونك من زمان... بس بما انك تأخرتي ... ردت عليهم ( كوكي) ... انا قلت لها لا ترد بس هي قالت لي انها و انتي واحد...
-
ماغي عصبت و زفرت :
انا صحيح وياها واحد و مستوانا متساوي و اعتمد عليها لكني اكثر من مره طلبت منها ما تتدخل في هالثنين بالذات... مشكلتهم احسها ما تتحمل اي غلط..
-
فيفي:
انا قلت لها بس هي ما ردت علي.. وانتي الله يهداج تأخرتي كثير...
-
ماغي:
ادري .. بس شسوي تاخرت على ما رجعت البيت و بعدها تغديت و تروشت ... و بعد عندي تقرير .. مال ابله الاحياء ما ابي اتأخر فيه...
-
فيفي:
ما اصدق ... ماغي... تضيع وقتها الغالي على تقرير
-
ماغي:
احسديني احسن.. مالت...
-
فيفي:
.. بس ما تعتقدين احسن لو نقول لكوكي .. اني انا وانتي طالبات ... على الاقل تتواجد في الوقت اللي احنا ... مو موجودين... بما انها افضل الموجودين..
-
ماغي:
فيفي.. انا ما انكر ان كوكي ممتازه .. و يعتمد عليها.. بس هما هي غير متواجده دايما.. تعرفين ظروفها .. و ظروف عايلتها... هي تدخل في الوقت اللي تقدر عليه.. و انا ما اقدر اجبرها على شيء... مسكينه.... ثانيا انا مستحيل اقولها عن عمرنا.. لان يا حلوه معناها انا افتتحنا هذا الموقع و احنا اعمرنا 14 .. يعني ما عندنا اي خبره و بجذي راح نخسر .. الناس اللي تسالنا..
-
فيفي:
اعتقد ان كلامج في شي معقول-
-
ايمان اعترض محادثتها مع ايمان طلب محادثه صوتيه.. ايمان تاففت و كتبت لنوف
-
ماغي
عن اذنج فيفي.. عند محادثه ثانيه.. ثواني و ارجع لج..
-
فيفي:
اذنج معج..
-
ايمان لبست السماعات و قربت المايك من فمها و من غير نفس: هلا...
صوت يصطنع الخشونه: ما هو فيلم الرعب المفضل لديك؟؟؟
ايمان تنهدت وردت هما من غير نفس: كوكي في ارض الاطفال...
كوكي ضحكت بصوت عالي و بعدها حاولت تخففه بس ما قدرت: خخخخ لهذي الدرجه معصبه؟
ايمان: لاني يا حلوه قلت لك مليون مره اني ما احب المحادثات الصوتيه... بس انتي مصره على ....
كوكي قاطعتها بهدوء: سوري هذي المره كان عندي ظرف صعب... كنت ارد على العضوات وولدي جنبي و من غير قصد سكب الحليب على الكيبورد و اخترب...
ايمان: الله يكون في عونك...
كوكي: اجمعين......
ايمان: خير ليش تبين تكلميني؟؟
كوكي: ما راح تصدقين ان قلت لك ان صوتك واحشني.؟؟
ايمان بضحك: ههههه اكيد لا...
كوكي: انا و عايلتي باذن الله مسافرين للكويت الاسبوع الجاي..و اخيرا بعد كل هذي السنين مع بعض حصلت الفرصه الوحيده اشوفك فيها...
ايمان شهقت من الخوف: نعم!!!!!!!!!!!!!!!!!!!!!!!!!!
-
-
بعد كم ساعه في الطياره المتجهه للرياض.. سعود استسلم للنوم خصوصا انه كان تعبان و حاب ينسى الموضوع اللي بينه و بين زوج اخته.. مشاري حاول بس ما قدر لانه كان مشغول بموضوع كابتن الطياره اللي اسمه ما كان غريب عنه..
قام من مكانه و من غير تفكير توجه لغرفه الكابتن.... لما وقفته المضيفه.
المضيفه: لو سمحت يا سيد... ممنوع الدخول!!
مشاري ابتسم لها و وبتوتر قالها: ممكن اقابل الكابتن فواز.... لو سمحتي..
المضيفه: الكابتن فواز مشغوول. و مستحيل يترك مكانه علشان شيء عادي... من انت و انا اشوف اذا بيسمح لك تشوفه ولا لا...
مشاري توتر ... سواء كان فواز ولد عنه ولا... ما هو سهل يقوله انا مشاري البدر تعرفني....تنهد و قرر يرجع مكانه...
المضيفه اللي شكت في الموضوع دخلت غرفه القياده: كابتن..
فواز بابتسامه معتاده: اهلا... في شي؟
المضيفه: في كان واحد من ركاب الدرجه الاولى طالب يقابلك... بس انا منعته فرجع لمكانه..
فواز: حرام عليك كان سمحتي له يدخل..
الكابتن المساعد اللي كان جنب فواز: من صجك انت؟ ممنوع احد من بره القروب يدخل...
فواز بابتسامه عفويه: اوبس نسيت الحمد لله انك هنا حتى تذكرني...
الكابتن المساعد ابتسم له و كمل شغله...
فواز قام من مكانه و فصخ سماعاته و حزامه: اخذ مكاني... بروح اشوف هذا الرجال...
الكابتن المساعد : اوكي...
فواز قام من مكانه و سمح للمضيفه تاخذه لمكان مشاري و سعود.. قرب من عند مشاري و تكلم: السلام عليكم... شلون الرحله.
مشاري توسعت عيونه لما قرا الاسم المكتوب على البدله ( فواز محمد البدر) من غير تفكير قال : فوووووووووووووووووووواز
-
-
-

رد: رواية الموت ماهو انك تكتفن بترابك الموت أنك تحب حي ويفارقك للكاتبة{!karisa}م

عائله سلطان البدر..( حاليا عمره 73 سنه)
سلطان ( بومحمد) الولد الاكبر لعائله البدر .. عنده اخوين اثنين واحد تزوج كويتيه وعاش في الكويت و الثاني مات بعد ما ترك وراه حرمه وولدها...ورث فلوس كثيره من ابوه شغلها و استمر يشغلها حتى تزيد رغم كل الصعوبات اللي واجهه... تزوج من لطيفه قريبته لما كان عمره 20 سنه .. بس ما رزقه الله عيال.. فبعد سنتين لما تعرف على سكان قريه قريبه من مزرعته اشتراها انعجب بوحده من بناتهم و اللي كان اسمها ( ميثا) تزوجها.. الشيء اللي ثور زوجته لطيفه و خلها تنفصل عنه.. حملت ميثا بولدها البكر ( محمد) و بعد ما ولدته ثارت لطيفه اكثر و قررت ترجع لزوجها حتى ترجعه لها هي... ابتدت بعد رجوعها رحله طويله من المشاجرات و التحرشات بميثا اللي كانت طيبه قلبها تمنعها ترد عليها و كان خيارها الوحيد هو انها تصبر .. بعد سنتين حملت لطيفه اخيرا.. جابت اولا ولدت ( منصور)، بعده على طول (اسامه) و بعده على طول (احمد).. في هذا الوقت كانت ميثا مريضه و ما قدرت تحمل ولا تعيش حياتها بشكل طبيعي بعد ست سنين قدرت تحمل و جابت ( ساره ) زاد مرضها بعدها و ماتت بعدها باربع سنين... لطيفه ظنت يومها انها ارتاحت من ميثا وللابد.. لكن الوضع ما استمر على هذا الحال خصوصا ان سلطان دلل عيال ميثا على عيالها.. بعد خمس سنين مات اخر قريب لعائله ميثا .. خالها و ظلت اختها ( اسماء ) اللي ما تسمع ولا تتكلم من غير اي قريب اخذها بو محمد عندهم تعيش مع عياله خصوصا انها كانت بعمر بنته ساره ... لطيفه ابدا ما حبت اسماء .. لكنها تحملتها بما انها صغيره و راح يجي يوم تتزوج فيه و يرتاحون منها .. المصيبه هي انها ما تقدم لها احد بحكم انها يتيمه و لاتسمع ولا تتكلم و ظلت عندهم رغم جمالها الكبير.... واللي كان تحت نظر بومحمد اللي حبها كثير واللي قرر يختصر الموضوع و قال انه راح يتزوجها بما انه ما عاد محرم لها... ... الشيء اللي زاد من قسوه لطيفه عليها اكثر...
1 – محمد (50 سنه ): محمد موظف كبير في السفاره السعوديه في الخارج .. و هو الاقرب لابوه رغم انه بره الشغل في الشركه و المصانع، لكن بعد مشكله صارت بين العائله و خالته ( اسماء ) قرر ياخذها و ياخذ عياله و يسافر للكويت و يشتغل في السفاره هناك..
** عياله : جسار ( 27 سنه ) محامي، الولد الاكبر لمحمد، رغم تظاهره بالبرود والامباله الا انه حنون القلب على اخوه فواز و ايمان، يحترم ابوه كثير و ما يحب احد من عائله ابوه لانهم في نظره سبب الحياه الصعبه اللي عاشوها في الوقت اللي كانوا عيال عمهم يعشون بارخى رخاء.. في حاله تعرض احد لعائلته ينزع قناع البرود و بسرعه كبيره و يتحول لمفترس يستخدم اي اسلوب للانتقام...( مثله الاعلى شارلوك هومز)، طويل جسمه عريض شوي.. عيونه بنيه ناعسه و شعره بني غامق.. اسمر البشره دايما مرجع شعره لورا (مثل شارلوك هومز..على قوله ايمان )
** فواز ( 26 سنه ) طيار، انسان مرح و كسول في الوقت نفسه.. يموت بسوالف الابداع و التحف الغريبه، اللي من خلال سفراته كان يشتريها باي مبلغ الشيء اللي كان يجنن ابوه.. الاقرب لايمان رغم بعده عنها في سفراته لانه من نفس الطبع.. يتقمص شخصيات الافلام المشهوره و يشتري اغراضهم المميزه ... التقمص المفضل عنده راعي البقر، قلبه ابيض رغم اي ازعاج او قهر يتعرض له، ودايما يحب يفرفش اللي حوله ، أطول من جسار و عريض جسمه و رياضي كثير يشبه جسار بلون العيون و الشعر الا ان فواز يحب يرفع شعره دايما و عيونه احد و اعرض من جسار... و بشرته اغمق..
2- منصور (48 سنه ) ) . المدير العام : اكثر عيال بو محمد شبها فيه، يموت في شيء اسمه الفلوس و السلطه و كان يهدف دايما انه يتولى منصب ابوه ، ويكره محمد كثير خصوصا انه كان اكبر منافس له، لكن دخول نواف في الشغل غير كل شيء و ما كان بيده الا انه يكون المدير العام حتى يكون كل شيء تحت عينه و تصرفه رغم ان كلمه رئيس مجلس الاداره تغير دايما تخطيطها.. ، زرع في قلب ولده سعود حب السيطره و النظره العلويه و الطاعه العمياء له، والشيء نفسه لبنته ديما..
** زوجته دلال (47 سنه : انسانه انانيه و حقوده و تموت على زرع الفتنه بين عيالها و عيال عمامهم حتى يكونون لها بروحها و تتحكم فيهم بعيد عن سيطره العائله... مسيطره على زوجها بالكامل..
** عياله : سعود ( 26 سنه ) مدير قسم المبيعات : نسخه ابوه في الشغل و حب السلطه ينظر لنفسه على انه اعلى من جميع عيال عمه ، وانه الاقرب لتولي السلطه باي طريقه كانت ، خطب (( فاطمه )) مرتين و رفضته و بعدها حول على عواطف بيخطبها بس ينتظر الطفله المدلله فاطمه تتحرك من طريقه و تتزوج... في سبيل تقويه العلاقات مع نواف و الاستلاء على نصيبهم في الشركه..
ديما ( 20 سنه ) : هي النسخه الاثنويه من سعود واللي تموت في المظاهر الشيء اللي خلها بعد ما خلصت الثانويه تتفرغ لجمعيات امها النسائيه و زياراتها مع سيدات المجتمع تتعرف عليهم... رمت نفسها على نواف كثير ... في المناسبات تطلع بوجهه على انها صدفه، في الطلعات، و دايما متواجده في بيت عمتها ... ( ساره) لما يكون في الديره.... شعرها احمر ناري ( حاليا ) طبعا لانها دايما تصبغه و تقصه بطرق مختلفه تحاول تلفت فيها الانتباه ، عيونها بنيه غامقه بس نفس حال شعرها كانت تلبس اغلب الوقت عدسات اشكال و انواع، جسمها ممتاز و واضح عليها الاهتمام بشكلها الخارجي.. بعد محاولات و تلميحات من امها لعمتها (ساره ) و تلميحات من منصور لابو نواف ..، اقنعوا نواف انه يخطبها و يتزوجها...
ندى ( 17 سنه ) المراهقه المختلفه عن عائلتها ، حياتها كلها دراستها ، في تخصص علمي، ما تفكر الا بالدراسه ولا تهتم بمظهرها و لا لبسها ، منغلقه على نفسها و تكره التجمعات اللي تفرضها امها عليها و على اختها ، تموت في ولد عمها عبدالعزيز بس تخفي هذا الشيء عن الكل و احيانا تحاول تقنع نفسها بانها تحس بالعكس..
3 اسامه ( 47 سنه )، المدير المالي ،
هو الثعلب المكار و سيد النفاق، لما يكون مع نواف دايما يايده باي شيء ، ولما يكون مع بقيه اخوانه يذم فيه و يايدهم هم... الصدمه القاضيه كانت له لما عرف ان نواف خطب بنت منصور ، ومات قهر لانه ضيع فرصه مثل هذي منه، واللي ما قدر ينفذها لانه ما عنده بنات... الشخص الوحيد اللي يعرف ببراءه (اسماء ) خاله محمد بس فضل الصمت حتى تتنحي هي و محمد من طريقه، يهدف يزيح منصور من طريقه حتى ياخذ مكانه و ثروته ..
زوجته سهام (47سنه ): مالها دور واضح في حياته تزوجته حبا فيه و اعجابا بثروته و مكانته لكنها انصدمت في حياتها بعد ما تزوجته لكن انكشف على حقيقته الوحيده اللي تعرف انه له وجهين مع كل شخص وجه ، وعلاقات محرمه ، وتصرفات قذره... هدفها الوحيده من الاستمرار في حياتها معه انها ما تسمح له يضيع عيالها ...
عياله :
فارس ( 25 سنه ) مدير قسم التخطيط: هو الشخص اللي يجمع بين اسوء صفات ابوه و عمه منصور... التظاهر بعكس اللي داخله و رغبته في السلطه، في نظره ان نواف ما يستحق تكون الشركه تحت يده و لا اي احد من عمامه او حتى ابوه بس ما يبين هذا الشيء لاحد.. مع اهله و امه عادي و طيب القلب و حتى مع عيال عمه قمه في الهدوء و الذكاء.. هدفه فاطمه اللي واثق انها معجبه فيه، نظراتها و تلميحاتها في الطلعات و ثالثا انها رفضت سعود المغرور اكثر من مره...
فيصل ( 21 سنه ) نائب مدير قسم التخطيط: انسان ماله شغل في تصرفات اعمامه ولا حتى الشركه، ولا كان في باله اصلا انه يشتغل فيها، بس اجبار ابوه له دمر مخططه في انه يكون مهندس حكومي و اجبره يكون في قسم التخطيط في المشاريع اللي يقدمونها ، لما كان صغير كان يحب ديما بنت عمه بس تغير كل شيء من كبروا و بدت ديما تتغغير في تصرفاتها و بدت تنزل من عينه لما ترمي بنفسها على نواف ، و كره شيء اسمه الحب و البنات .. لانه انصدم في هذا الشيء...
عبدالعزيز ( 17 سنه ) طالب: الصوره المذكره عن بنت عمه (ندى )يدرس في التخصص العلمي و يحلم يصير دكتور.. في نظره ندى هي مجرد منافسه لازم يفوز عليها و لا كان ابدا حاس بمشاعرها اتجاهه.. مثله الاعلى هو اخوه فيصل و لا يعجبه ولا يحب اخوه فارس.

4- احمد (46 سنه ) (نائب المدير العام ) زوجته بسمه (45 سنه )
مثال على كناري الحب حتى مع مرور السنين و الاسره السعيده، احمد اكثر انسان حنون على عياله . يموت عليهم و مدلله كثير في حدود المعقول .. و الدليل هو ان عياله الوحيدين المتلزمين بصلواتهم كلها و كل الفروض مهما سافروا و راحوا اي مكان. وهو شيء لاحظه الكل لما يكون في الطلعات و الجمعات العائليه.. مشاري هو الشخص الوحيد اللي عارض طرد محمد و اسماء من البيت و لانه كان الاصغر محد رد عليه.. يكره تعاملات اهله الجديده في الشغل و انه يجي فوق اي علاقات اجتماعيه.. و كان يتمنى يطلع هو بعد لكن خايف على عياله من انهم يكرهونه .. ان يترك حياه الرغد و الثراء و يعيشهم على راتبه بس
مشاري ( 24 سنه ) مدير العلاقات العامه: مشاري واحد من الناس اللي رفضوا الشغل في الشركه مع اعمامه بس ما فضل يترك ابوه لحاله مع مجموعه وحوش. ورث عن ابوه كل الطيبه اللي فيه و الهدوء انسان راقي في تعامله و احترامه للناس.. الشيء اللي خلا الناس نفسها تحترمه و تقدره كثير، يحلم يتزوج وحده مثل امه بهدوءها و طيبتها و حبها لعائلته... اقرب واحد له من العائله هو فيصل ..
ريم ( 19 سنه ) طالبه قسم عربي: انسانه راقيه مثل امها و هاديه تخصصت بقسم العربي، لانها تحب الشعر الغزلي القديم و الجديد.. هما.. ما عندها اي صديقات من بنات العائله لانهم كلهم اسلوبهم كان غير عنها.. بس تتماشى شوي مع عواطف بس مو كثير.. ولا تحب ديما بنت عمها .. والسبب الاول كان غرورها الكبير و الثاني انها اخذت نواف اللي كانت عينها عليه بس ما سوت اي مبادره اتجاهه لانها عرفت بموضوع زواجاته المتكرره و نفرت منه ..ريم كان طولها حلو.. و خصرها حلو و جهها دائري شعرها اسود قصير لتحت رقبتها بشوي و عيونها بنيه غامقه ... كانت مملوحها و خجوله كثير ...
سديم ( 14 سنه ) النقض لاختها .. انسانه فوضيه و ما تملك اي ذره من الهدوء.. و عصبيه لاتفه شيء.. دايما تضرب اختها ان لمست اغراضها.. و هي اللي دايما يسميها ابوها ( مانتي بنتي انتي بنت الشغاله) .. و حياتها كلها ما بين العاب البلاستيشن و الكمبيوتر..اطول من ريم بكثير و شعرها بوي اسود و
5 – ساره ( 44 سنه ) زوجها جاسم ( 52 سنه )
ساره هي البنت الوحيده لسلطان ( في نظر الكل لكن هذي الحقيقه تتغير بعيدن ) انسانه طيبه و هاديه و حنونه على عيالها و تحب كل عيال اخوانها و لا تحب انها تزعل اي واحد منهم.. لما كان عمرها لما كان عمرها 18 سنه بلغها ابوها ان ولد عمها جاسم خطبها و انه وافق.. ساره في ذاك الوقت ما كانت تعرف اي شيء عن جاسم اللي كان كل حياته عايش برا و يشتغل في فرع الشركه في الخارج.. من غير اي مناقشه بينها و بين اهلها تم زوجها.. عاشت ساره من غير عيال سنتين و بعد هالسنتي جابت فاطمه و بعدها بسنتين عواطف... كان جاسم دايما يتذمر و يقول انه يبي ولد.. بس طبعا هذا الشيء كان يخوف ساره منه خصوصا انها كانت هاديه وهو بسرعه يعصب.. حاولت تحمل بعد عواطف بس ما قدرت.. سافر جاسم و تركها و بعد شهرين رجع و معه و لد عمره 12 سنه .. وفهمها و فهم العائله انه ولده ( نواف) من زواجه الاول في الخارج و ان امه ماتت فهو اضطر يجيبه..، الشيء رفضه اخوانه ساره كلهم الا ان الابو سلطان وافق لانه قال انه كان يعرف بالموضوع كله..ساره اخذت نواف اللي كان بالكاد يتكلم عربي و ربته مع عيالها على انه واحد منهم حتى ان الناس صارت تناديها ام نواف...
** نواف ( 32 سنه) : رئيس مجلس ادراه و صاحب 51 % من كل الاملاك و هذا طبعا غير الاملاك الخارجيه اللي بره نطاق الاسره عندهم .. هو ولد جاسم من زواجه الاول هذا الشيء اللي كان الكل يعرفه لكن الحقيقه كانت انه ،طفل غير شرعي من سكرتيره ، بعد مابغلت السكرتيره الابو الظالم ( جاسم ) بحملها .. رفضها جاسم و طردها من الشركه بعد ما رمى عليها بعض الدولارات... نواف عاش مع امه تحت اسم كيفن لوروسل وهو اسم عائلته امه حتى عمر 12 كان متفوق في دراسته و متخطي المراحل الدراسيه و هو النظام المتبع في الخارج انه الطالب اللي يكون مستوى ذكاءه اكبر من عمره يتخطى المراحل الدراسيه حتى يوصل الى المرحله اللي تناسب عقلها رغم ان كيفن كان عمره 12 الا انه كان متخرج من المرحله الثانويه و كان مقدر له ان يدخل لمركز ابحاث عالمي الا ان شيء وقفه، وهو دخول رجال غريب حياته.. رجع كيفن البيت مره قبل امه و بعد فتره طرق رجال غريب عليه البيت و لما فتحه استقبله بهدايا كثيره كانت من الرجال الغريب كيفن قرر يتظاهر انه مجرد طفل عادي و سمح له يدخل.. و سمع من الرجال انه ابوه كان متسغرب لما رجعت امه انفجرت في وجه الرجال و طردته .. و ظلت تسبه بكلام اول مره تتكلم فيه، بعد يومين بالضبط و هو في السوق مع امه قرب من حرامي و سرق شنطه امه و لما حاولت تسحبها رماها بالرصاص..
ماتت ام كيفن في نفس اللحظه لان الضربه كانت قاضيه .. الشيء اللي عطى الحق لابوه انه ياخذه كيفن كان فاهم ان الموضوع كله مدبر بس ما كان بيده حيله، سافر مع ابوه لعائلتهم و عاش معهم باسم نواف البدر و تعلم طبعاهم بس ماهو قبل لا بحلف انه سلطان الابو . اللي اقترح على ابوه جاسم يتزوج ساره اولا و ثانيا اللي اقترح انه ياخذ نواف عنده بما انه محتاج ولد يساعده اذا كبر..... ابتدى باسماء بعد ما عرف حقيقه العلاقه اللي بينها و بين الابو و بعدها بالاملاك.. لبس قناع الشاب البسيط و انه بشتغل معهم و تدريجيا التفت على رقبه سلطان و بدأ يشتري من الاملاك بحكم الربح من الصفقات اللي يخطط لها .. و تدريجا تحول الى رئيس مجلس الادراه بنسبه 51% و عائله بو محمد كلها 49% ..
نواف طويل كثير و بشرته فاتحه كثير شعره اسود مثل ابوه طويل شوي من جهه العنق، و عيونه زرقاء واسعه و رموشها كثيره مثل امه ( الشيء اللي جذب ابوه لها في البدايه ) نقطه ضعفه الحريم ... نسوونجي
** فاطمه ( 20 سنه ) هي بنت ساره الكبيره و الي الكل يسميها الطفله المدلله ، في البدايه دللها ابوها و امها و تدرجيا دللها نواف كثير طلبات فاطمه كانت اوامر حتى ان كان الشيء اللي تبيه عند غيرها اذا كانت تبيه لازم تاخذه حتى بالقوه و الشيء اللي مخلي اغلب البنات في صفها قبل لا تتخرج يكهرهووونها و اللي ما خلها تكمل الجامعه ، تركت الدراسه و قررت تقعد في البيت بحكم ان سيده راقيه مثلها و غنيه ما تحتاج الدراسه و لا راح تستفيد منها بشيء، عيونها على فارس ولد خالها لانه بنظرها مثال للثقل و الهدوء و الطيبه بعكس سعود اللي يرمي نفسه عليها و تشوف في عيونه الطمع ، واثقه ان الناس كلها ميته عليها ، فاطمه تتماشى مع ديما شوي لان ديما دايما تسكت على تصرفات فاطمه المغروره و سخريتها منها ، لا تطيق ريم.. فاطمه شعرها صابغته ثلجي و عيونها بنيه دايما ما تنزل منها الكحل الاسود و جسمها حلو و رشيق ... بس لما يتاملها الشخص يحسها باهته مثل اللوحات .. مالها اي جوهر..

** عواطف ( 18 سنه ) طالبه أداب انقلش رغم الدلاله اللي حصلت عليه من عائلتها الا انها كانت انسانه متواضعه و خجوله بعض الشيء شعرها اللون الطبيعي له اسود.. و عيونها بنيه ،، تموت في البساطه وحياتها اغلبها على الافلام الاجنبيه او مع صديقاتها اللي تحاول تتقرب منهم اختها فاطمه بس تبعدهم عنها حتى ما يكرهون عواطف، عواطف خجوله و مثل ريم بالضبط اللي تبتعد عنها بسبب اختها، على عكس اختها ما تعرف تتصرف في المواقف، ما تؤمن بشيء اسمه الحب و تحلم تتزوج زواج عادي... انسانه واقعيه ... المعارضه الوحيده لزواج اخوها من ديما... بس ما تكلمت حتى ما تسبب مشاكل..
6- ايمان عمرها (16سنه ) طالبه علمي .. بطله القصه تقريبا,, بنت طلعت على هذي الدنيا ما لقت عندها الا ثلاث رجال، محمد اللي صار ابوها و جسار و فواز اللي صار اخوانها ، هي بنت اسماء من ( سلطان ) و الشخصين الوحيدين اللي يعرفون هذا الشيء هو ابوها (سلطان ) واللي دخل على اسماء من غير لا احد يدري حتى ما تعرف لطيفه و تسوي مشاكل .. و نواف اللي شاف سلطان وهو يدخل و يطلع من غرفه اسماء اللي كانت جنب غرفته و استغل هذا الشيء و قفل على اسماء المسكينه واللي كانت ما تسمع مع عامل التصليح في الوقت اللي رجع فيه منصور لدخل البيت و شافهم ..
اسماء قالت الحقيقه لمحمد لما ولدت وهي انها كان ابوه يجيها .. وان هذي بنته وحلفت له قبل لا تموت، محمد سجل البنت صحيح على انها اخته لكنه كان لها مثل الابو بكل حنان و مشاعر ابويه .. حتى هي رغم انها تعرف انه اخوها الكبير الا انه كان ابوها في نظرها .. ايمان بنت طويله كثير.. تقريبا في طول جسار.. و جسمها رياضي.. لانها تلعب سله.. كتوفها عرضين، و رجولها طوال.. شعرها الشعر البني المايل للون الذهبي.. العيون العسليه الواسعه الطويله المكحله و الرموش الثقيه الشفايف الورديه المرسومه بدقه .. الشامه على خدها، رغم كل هذا الجمال الا ان حياتها مع الصبيان طول عمرها حولها لواحد منهم، تصرفاتها صبيانه و لبسها مثلهم.. لكن دخول( نوف) في حياتها في عمر 12 غير حياتها و صارت التوأم الروحي لها ... يطلعون مع بعض طول الوقت و يتكلمون في الموبايل بالساعات .. و احينان كل وحده تنام في بيت الثانيه..
افتتحت ايمان نادي العشاق في عمر 14، لما تأثرت بفيلم لويل سميث ( (Hitch و مع الوقت صارت الشغل تستمتع فيها و تعجبها حتى انها صارت تقضي فيها الساعات الطويله... بس ما كانت تعرف ان هذا الشيء جر عليها اشياء اكبر و اكبر..

-
-
-

مسكين يا قلبي أنا باع الهنا وشرا العنا
يمشي ويطرق كل باب ولا لقا غير العذاب
فهمها متأخر كثير انه ركض خلف السراب
في البداية كان لي دنيا وحكاية
كنت أعطي ما امل احتري بارق أمل
ابغي عشرتنا أمان عشره تكفيني الزمان
كنت عاشق كنت هايم كان قلبي ما يخاف
كنت أظن العشق دايم من هنا صار اختلاف
أثره ما شفته دعاية من البداية للنهاية
يلي عرف معنى الهوا اشرايك نفكر سوا
وين النهاية في المسير وين الهوى عن الضمير
حنا نداري جرحنا وانحمل القلب الكبير
وإلا محبتنا دعاية من البداية للنهاية
مني الخطا وإلا الخطا فالي عشقته وما عطا
وش أخر الحب والغرام أخذ وعطا وإلا كلام
حنا خدعنا بعضنا زورنا أسباب الخصام
حتى تفاهمنا دعاية من البداية للنهاية

-
-
-


يتبع:



انتظر تعليقاتكم الطوووويله الحلوه

حتى يوم الخميس الجاي بيكون البارت الثاني...

رد: رواية الموت ماهو انك تكتفن بترابك الموت

الروايه روووعه حبيبتي تسلم ايدك

رد: رواية الموت ماهو انك تكتفن بترابك الموت

يسلمك ربي فدييييتك

رد: رواية الموت ماهو انك تكتفن بترابك الموت أنك تحب حي ويفارقك للكاتبة{!karisa}م

وينك كملي :'(