تويت
انت الملك ؟!
صدري بلاد وحضني اوسع من الكون
لك مملكه يا شمس عمري وظله
خذ راحتك .. وانعم بها وصل وظعون
انت الملك .. والقلب .. كرسيك .. كله
من وين ما وجهت .. أو جيت مضمون
قلبي هو اللي .. شايلك ما تشله
سور عليك من الغلا عالي حصون
إو طار بك والشوق .. حل ابمحله
واليوم تسألني عن الحال وش لون
كلي معك منهوب .. وانته تدله
نهبتني من قبل .. ما تشوفك اعيون
ومن قبل ما رمشك علي تسله
كنت احلمك .. واتصورك .. فرح .. وشجون
واستلهمك لأجمل قصيدي واهله
والناس تلمزني يقولون مجنون
واقول في نفسي عساكم فدن له
ماهو ضروري تعرفونه من يكون
وش دخلكم مابين جسمي وعقله
العشق أجمل كل ما كان مكنون
ما يدري أحد عن كثيره وقله
كالسر يبقى سر بالحفظ والصون
وان انكشف كا للغز من بعد حله
هذا انت في صدري منزه عن الدون
اضم حبك في الحنايا واجله
أعيش بك عمري.. وبالعمر لك مون
واشوف نفسي بك رقيت الأهله
إن تبتسم تمطر على روحي امزون
وانبت على شانك خمايل مظله
وان ضقت احس الكون ضايق ومحزون
ما شوف به للرجل موطى تحله
وببقى الى اخر رمق فيك مفتون
بك مكتمل نصفي .. على خير مله
إلا اذا باياخذك شك وظنون
ما هو عزيز اللي غرامه يذله
با ودعك لو موت .. حسره ومغبون
واحيا العزيز بعين ربعه و خله
عبدالله صالح العمري
تعليق