تويت
مساكم الله بالخير
هذه قصيدة قريته من مجلة واعجبتني وقلت اكتبها لعلا وعسى تعجبكم
وهي قصيدة تعالج مشكلة خطيرة وهي جشع الاباء وبحثهم عن المال مقابل تزويج بناتهم
انظروا ماذا تقول
ريم الفلا:
أنا قليلة حظ وابوي طماع
واصبح شبابي في يدينه طماعه
يسعى وراء الدنيا على كل الاوضاع
ياويل من يأتي بطاري القناعة
ماهقوتي مستقبل البنت ينباع
لكن ابوي اللي تجرى وباعه
اليا ومر لازم نطيعه وننصاع
حتى الصغير اللي بسن الرضاعه
لاجل الفلوس ابوي سبب لي اوجاع
ماعاد بيدي حيلة واستطاعه
ماكني الاصنعة عند صناع
غشيم ما يحسن فنون الصناعه
ان حد خطب عنده يجي البيت فزاع
قام يتهددني بقوة ذراعه
زوجني اللي جاب لي هم وصداع
يقضي الليالي بالسهر والصياعه
ابكي على حظي ومستقبيلي ضاع
زوجي وابوي هما السبب في ضياعه
ياليت لي فوق البحر لنش وشراع
تهوي بي امواجه ويغرق شراعه
والا تعشى لحمي الطير وسباع
في مهمه بالبر تكثر سباعه
الزرع مايصلح مع غير زراع
اما خسر والا تموت الزراعه
حقيقة مادونها ستر وقناع
والكذب مذموم ويسقط قناعه
ليت الحلول تذاع في كل مذياع
واهل الصحافة يطبعونها طباعه
الشاعرة: ريم الفلا
تعليق