تويت
وجه العذر
بخيله يالظروف اللي عليك نعلق التقصير
*** بخلتي ما عطيتيه العذر باخر مواعيده
وانا كنت اعذره وانصب له بصدر الغلا تبرير
*** إلينه جف ما وجه العذر وارخا تجاعيده
وردد له مقولة كل تاخيره وفيها خير
*** عزانا كل ما مر الوعد واخلف تواكيده
ورغم اني انا الموجوع والمحتاج للتصبير
*** اداري خاطره واكتم ورا صدري تناهيده
اخاف يحس في نبرات صوتي للحزن تعبير
*** وا خاف يحس في صمتي عتب يشعل مواقيده
على قوله .. ؟ يحس فيني ولي في مهجته تاثير
*** مثل ماله على قلبي تحكم في مقاليده
اثاري حبه اعماني ومشاني بلا تخيير
*** كانه ساكب العناب في جسمي عناقيده
اذا في لحظة استيقض واروح بعيد بالتفكير
*** على كتفين حسن الظن ارد احمل مقاصيده
ولا أسمع من الواشي ولا من ناصح التحذير
*** كأن احبابي اعدائي اذا يطروا مناقيده
واقول ان حجة الغايب معاه ولو معه تدبير
*** ممات من العطش من رام يشرب من مباريده
ولكن للاسف ما عاد له حجه وقع فى البير
*** وراح بدلو غيري بعد ما ساقاني مناكيده
لبس من عشقتي ثوب الغرور وظن عند الغير
*** يلاقي ما لقي عندي من الصبر ومحاميده
انا اشبعته غلا واسرفت في حبه الى التبذير
*** على بالى الى منه كبر بجني محاصيده
بسيطه خله بكيفه ولو عنده جناح يطير
*** فضاءات السما ماحد .. بها يلقى مسانيده
الى منه تعب واحتاج لكسور الزمن تجبير
*** بيذكر من هو الاوفى والاخبر في تضاميده
ومادام الزمان يسير وحنا في الحياه نسير
*** اكيد الحي يتلاقى ولو طالت مباعيده
ولا منا تلاقينا وهلت عينه التفسير
*** انا با سامحه لكن علي تحرم مواريده
عبدالله صالح العمري
تعليق