اهداء حصري لقسم الشعر وفي امان الله



الليل واحساس القصيد استعزا
خفاق ابن خالد وجاز المحازي

سحابة تمطر وبرق استرزا
لعاج برقه صوب ذيك النوازي

نوازين منها الرجوله تنزا
ياعلها تسقى جبال الحجازي

وقم يانديبي ياعريب المبزا
واحمل معك رسله لناس عزازي

ناس لهم فالطيب بيرق يرزا
ربعي البقوم اهل القنا والمغازي

نطاحة الهيجا ليا من تعزا
خيالهم جوك الاسود الغوازي

ماكن فوق الارض شيئ تبزا
عدوهم مع عرض الارض متوازي

كسابة .. الطالات فوق المخزا
مافيهم اللي ينذكر بالمخازي

أسرح مع الغبشه على اللي تحزا
لقطع القفار المهلكات المبازي

جيب جديد وفيه هيبه ورزا
اربع عشر والفين سجل طرازي

اليا عطى الخرمه ابذيبا تهزا
أشهب ويطرونه روات الاحازي

ياعنك فوق الارض كنه يهزا
مثل الجلي فصحون ملس قزازي

ملفاك دار عزها مايوزا
ولايجحد الطالات كود الخنازي

ملفاك ابو بتال تركي وعزا
عز ل/ ابوه وكاسبين الجوازي

لاجيت داره قام رحب وفزا
ثم ساق لك طيب وعلوم حرازي

قوله من الفواز علم يبزا
مرسول والمرسول ماهو مجازي

الاوله نومه قزا واستقزا
يقزاه من حالي منامه قوازي

هذي ثلاث سنين فالقلب حزا
يحز قلبه شاطرات الحزازي

هم سطا بين المحاني وغزا
غز السهام ورامي السهم غازي

خشيف ريم قد رماه وتنزا
ما شاف مثله بين كل المعازي

واقفى وذب الضلع عجل بقمزا
واتعبت رجلي لين جيت القمازي

وكزيت قلب بين الاضلاع كزا
وأتلى يلم وأشغلنه بوازي

والثانيه شيئ على القلب لزا
عجزوا يداوونه تلاميذ رازي

ان جيت اجزي مالقيته يجزا
دواه عند اللي كبار العجازي

عجل يابن منصور برد يدزا
مع مرسلي كانك فهمت المغازي

قاف نسجته شطر اول على أزا
والشطر الاخر قفلته جات ازي

هذي سوالف شاعر واستفزا
الحر ميقاعه بروس النوازي

والبوم فصدوع الهضاب يتوزا
عسر عليه يصيد حتى الخزازي

واليل وأحساس القصيد استعزا
خفاق ابن خالد وجاز المحازي




بقلمي
فواز خالد