السلام عليكم ورحمة الله وبركاتة عندي ام استغفرالله غريبة جدا جدا مع ابوي طبعا ابوي كبير بالسن عمره 93 سنة وامي عمرها 87 سنة احكي لكم القصة الحين وساعدوني فيها


انا بنته والله العظيم ما عمري شفته الا هادي ومبتسم ويحاول يهدي الاوضاع باي صورة .
امي مدري وش فيها من اصلها عصبية وسليطة لسان والفاظها متبرية منها تسبنا وتشتمنا وتطقنا قدامه
يوم كانت محتاجة ما قصر معها يمشي لها على كيفها
قبل عشر سنوات اضيب بشلل ومن اول يوم وهي طالبة منه الطلاق .. لكن تحملها وستر على بيته وعياله
يوم طاب رجعت تطالبه كل مابغت شيء ازعجته لين يروح ويتسلف لها او يشحذ احد من ربعه
المهم الان من 5 سنوات جاه ضمور بسيط في المخ ووظائف الكلى
وجاه سلس بول
اول شيء طردته من غرفة نومه وغيرت المفتاح –
خلته ينام بالصالة واذا مرت عليه طفت المكيف عليه تقول يصرف كهرب – رغم ان ابوي هو اللي يدفع الفاتورة –
اذا جا بيجلس في اي مكان وهي موجودة سبته بصوت عالي حتى قدام حريم عياله وسبت والديه وقامت من عنده
ما يمر عليها في البيت احد الا سبته وسبت والديه واتهمته بأنه فاقد الذاكرة وانه بيجيه غيبوبة !!!! وقدامه وهو قاعد تقول ليت الله ياخذه ويريحني ويريح عياله منه فضحنا في الناس وثقل علينا وعكلنا عن السفر .
وهو كل حيلته يروح للشارع ويقعد يبكي .
عقدته في حياته وخلت الناس ينظرون له نظرة تزيده تعب وتشككه بعمره
تسبه قدام عياله وتقسي قلوبهم عليه لدرجة الان ما يجلس معه احد من عياله
اليوم اخر شيء قامت تسبه بصوت عالي وتسب امه – فانفجرت ماقدرت اتحمل وهو ساكت وقلت لها انتي وش فيك ؟؟؟ وش تبين منه ؟؟ فكينا من شرك
لا تكلمت مع اخواني قالوا وش تبينا نسوي .؟ كأنهم ماهم في وعيهم
كلن ياخذ حرمته ويوديها يمشيها من ديرة لديرة وابوهم له 5 سنوات يبي يعتمر ما قدر ولا لقى احد يوديه
الصلاة يروح للمسجد مشي وهو صايم في عو الظهر والعصر
رحت وتسلفت من وحدة من البنات 5 الاف واستاجرت سواق وسيارة – وتجي اميو تاخذ السسارة والسواق وتمر على جيرانها قريباتها توديهن معها للمسجد ، وتخلي ابوي يجي بهالليل يمشي ما يدل ولا يشوف زين . يوم كلمتها وقلت لها مستاجرته لبوي قالت الله يلعنك انتي وابوك ولا يوفقك لا دنيا ولا اخرة يا بنت الكلب وبنت الحرام .
انا من زمان شاكة ان فيها سحر . بس كيف وهي حافظة القران وتقراه ليل ونهار وداخلة دار ذكر ؟؟؟ وش هالسحر اللي ماراح بكثرة القران ؟
استاجرت بيت لمدة سنة بمنة فلان وعلان وانحشت فيه مع تهديد اخواني وسبهم وفضحتينا في الناس واتهامهم لي بالزنا
وحبيت رجله قلت خلنا نطلع من هالنار اللي عايشين فيها
بكى وقال الناس بتفضحنا ومابي افرج عليهم الاعداء ومابقى في العمر الا شوي باتحمل – وهذا بيتي بنيته من لحمي وعزمي ماني طالع منه .
بسبب سلس البول ما يلبس ملابس داخلليه – اذا جلس بالمجلس طردوه عياله زي الكلب يقولون رح البس والا لا تقعد مع الرجال ...
وانا اناظر كل هذا ومغبونة ومقهورة
ولاني حرمة لا شرطة تستقبلني ولا امارة تسمح لي بالكلام من غير ( محرم ) ؟؟؟ طيب المحارم مجرمين وحرامية وش اسوي انا ؟؟
صرت ما اطيق امي
اكرهها كرهي للعمى
ما اناظر في وجهها وارفع وصتي عليها من كثر القهر اللي فيني – وعلاقتي باخواني صارت زفت سبيتهم وسبيت حريمهم وما عاد عندي شيء اخسره –
دام ابوي حي باحاول لاخر قطرة – لكن لو صار له شيء باكتب القصة وبارسلها تنشر وبانتحر عندهم في بيتهم
مدري وش اسوي ؟؟
فوت قطار الزواج احاول احمي ابوي من اليهود اللي حوله – لا انا تزوجت وانجبت اطفال وافتكيت من هالمشاكل ولا انا اللي تحملت وبريت هالام اللي فيها بلا ولا انا اللي انقذت ابوي من مصيبته اللي هو فيها ...
مدري وش اسوي