الا يالهنوف الجادل الفاتن المغرور
وصوف الجمال اليوسفي كلها فيها
ترا فال عرجاء شاعرن له بحبش دور
ابيوته لاجل عينش يسطر معانيها
ولا له مع الساحه ولا له مع الجمهور
ولا يبغي الشهره ولا هو يدانيها
تهلهل عليه بيوت شعره بدون شعور
على صورتش يبغي بيوته ويخطيها
دون بش قصيد مثل ما دون ابن سرور
على الجادل اللي في قصيده ينحيها
بخلقش وصوف كنها من وصوف الحور
محاسن وصوفش جل ربن مسويها
لعب به غرامش والهوى جور يتلى جور
وتصبر على فرقاش ما حر ما فيها
وقفى وقفيتي وهو خاطره مكسور
تخلف ادموع الحزن من طرف راعيها
له اربع اسنين ما ذكر خاطره مسرور
وعيونه لذيذ النوم قدله مجفيها
مع هاجسه يسرح ويمسي وهو مقهور
وروحه شريط الهم والحزن باريها
ولا ينفع القاري ولا ينفع الدكتور
وغير الولي ومواجهك رايحن فيها
عساها عقب الامحال تاتي رغد وقفور
وحزن اول الدنيا يقفي بتاليها