قصيدة الجمس خله وريحنا يا بو جميشان - فيصل العدواني


الجمس خله وريحنا يا بو جميشان
والفرت هذا قديم ومنتهي دوره

الدعوه ماهي بكشته في هوا الصمان
ونعس قاع من الهتان ممطوره

مادام حنا بديار الغرب يا بليهان
والديره اللي نبيها باخر الكوره

عنها تحدينا بحور وسلسة وديان
وجبال ماهي برفعة اطويق وصخوره

حزم شناطك وسم بسم الله الرحمن
نركب مع اللي صداها يتلي الصوره

ماهي بايرباص ولاهي من وارد اليابان
من ديره علوم الغي مشهوره

كنكورد صنع البريسي فرانس ابن متران
صفوة نتاج المسيح وقايد الثوره

ماهي بكبيرة والا ياقلها البيبان
واح د واحدتميز لون بلوره

هيكل مهندس تضم اجنوبه الجنحان
والبوز طلقة فداوي رز شرشوره

تصميم منهو ترك بصمه على الاذهان
ماهي تريله ابو معطش وزموره

اليا استعدت تبي تقلع يجيها جنان
فوق المدرج عسا ماهي بمسحوره

ثم كفخها عسا من جابه النيران
يبغى غصبها يزيد وشد ماطوره

فزت وطرت في بالي فزعة العجمان
ينصون منهو تعزوا ضايق طوره

ثم تعلت وقلبك لامس المصران
والا تعدوا اقول شلون محظوره

والله ياسيتك لو ان ماثبته فنان
تهوى وكنك نزلت بوسط دحدوره

ثم استدارت ومالت ميلة الميزان
من فوق ديره ابو لحيه وباكوره

يتلها اللي ابد مارافق البدوان
ولاسرح يتبع الراعي ومقهوره

اسمه مركب واكيد ان ماخذه مجان
مجهول ساسه وامه بس مذكوره

اشقر وراسه بشادي دلة الرسلان
تكرم عساها ماتدني يم حنجوره

ابيض بشدة بياضه تجهر العميان
فوقه رشاش النمش متعنق زوره

خطت عروقه مثل كراسة استبيان
بدين ورع لغف لستاذ طبشوره

لاشفت شكله ابد ياخوك جنتل مان
بس المصيبه لامرك صابتك دوره

لكن شهاده يذا الكابتن نعم بطران
حنكه وخبرة وله بالجو منظوره

عدا المحيط وبلاد الترك والاسبان
والشرق الاقصى والادنى شاقح سوره

يالله وقلب المعنى هزه التحنان
يم الكويت وعساها دوم معموره

ديره رجال تعز وتكرم الضيفان
وشلون وهي تقاصر شعب اخو نوره

يالله عسى من بغانا بشر للبهتان
وترد عنا نوايا الخبث مدحوره

عجل علينا تأخرنا يابو جميشان
و الفرت خله وجمسك منتهي دوره