قصيدة يا بوهلا شوفي تردى مع الحيل - فيصل العدواني


هذه قصيده كتبها الشاعر

فهد بن هادي العدواني رحمه الله تعالى واسكنه فسيح جناته

لأبنه الشاعر فيصل العدواني



يا بوهلا



بديت بسم الي عليه التواكيل

الواحد المعبود قايد رجاها


ولعت بالطاروق وعجبني القيل

ابيات شعر تعجب الي قراها


يا بوهلا شوفي تردى مع الحيل

وازريت أميز أرضها من سماها


دنيا كفا الله شرها و الغرابيل

لا ما ربح منهو تعنى وشراها


ياما وطت بقدامها من رجاجيل

داستهم الدنيا وقفت وراها


وياما خذت بشنابها من مشاكيل

خذتهم الدنيا وتنهض عصاها


متحيزمه للناس جيل بعد جيل

متحيزمه للخلق تطحن رحاها


وين النشاما وين دقت الهيل

ريف الركاب اللي يتواكف حفاها


لا من طرالي ذكرهم و التعاليل

تزايدن عبرات عيني وماها


وصلاة ربي عد وبل الهمايل

على نبي بالهدايه جداها







وكان رد الشاعر فيصل العدواني



يا مرحبا وعداد رمل الغراميل

وعداد من شاف الثريا بسماها


وعداد من شرف على صافي النيل

وعداد فيافي نجد واللي وطاها


والف هلا يابوي ياوافي الكيل

ياشاعر جزل المعاني بداها


يا مبدع بالقاف عذب التماثيل

ببياتك الي كالدرر محتواها


تشكي بها يابوي من قلة الحيل

وعين تردا شوفها مع ضواها


وشكيت لي يابوي دنيا بها ميل

دنيا غريبه ولا نعرف منتهاها


ان اقبلت تمشي كما جارف السيل

وان ادبرت يكثر غثاها وبلاها


كم واحد فيها يذوق البهاذيل

وكم شيخ قوم خلته من عشاها


أصبر على الي نزل الحق تنزيل

الواحد المعبود محصي حصاها


يجعل أمورك كل ابوها تساهيل

بإذنه وهو الي عليم بخفاها