لمحبى صلاح جاهين الجزء الاول

سلام عليكم

طبعا مقدرش اقول غير الله عليك ياصلاح ياجاهين

واللى يعرف صلاح جاهين اكيد بيحب الرباعيات بتاعته

واللى مايعرفوش

من الرباعيات يعرفه


x.png


واول مجموعه من عندى لصلاح جاهين


خرج ابن ادم من العدم قلت : ياه

رجع ابن ادم للعدم قلت : ياه

تراب بيحيا ... وحي بيصير تراب

الأصل هو الموت ولا الحياه ؟

عجبي !!!


x.png


ضريح رخام فيه السعيد اندفن

و حفره فيها الشريد من غير كفن

مريت عليهم .. قلت يا للعجب

لاتنين ريحتهم لها نفس العفن

عجبي !!!


x.png


ياما صادفت صحاب و ما صاحبتهمش

و كاسات خمور و شراب و ما شربتهمش

أندم علي الفرص اللي أنا سبتهم

و الا علي الفرص اللي ما سبتهمش

عجبي !!

x.png



و الكون ده كيف موجود من غير حدود

و فيه عقارب ليه و تعابين ودود ؟؟

عالم مجرب فات و قال سلامات

ده ياما فيه سؤالات من غير ردود

عجبي !!!


x.png


أنا شاب لكن عمري ألف عام

وحيد لكن بين ضلوعي زحام

خايف و لكن خوفي مني أنا

أخرس و لكن قلبي مليان كلام

عجبي !!!!


x.png


يا باب يا مقفول ... إمتي الدخول

صبرت ياما و اللي يصبر ينول

دقيت سنين ... و الرد يرجع لي : مين ؟

لو كنت عارف مين أنا كنت أقول

عجبي !!!

x.png

أحب أعيش ولو في الغابات

أصحي كما ولدتني أمي و ابات

طائر .. حوان.. حشرة .. بشر ..بس أعيش

محلا الحياة.. حتي في هيئة نبات

عجبي !!


x.png


سهّير ليالي و ياما لفيت و طفت

و ف ليله راجع في الضلام قمت شفت

الخوف ... كأنه كلب سد الطريق

و كنت عاوز أقتله .. بس خفت

عجبي !!

x.png



كان فيه زمان سحليه طول فرسخين

كهفين عيونها و خشمها بربخين

ماتت لكين الرعب لم عمره مات

مع إنه فات بدل التاريخ تاريخين

عجبي !!


x.png


عجبتني كلمة من كلام الورق

النور شرق من بين حروفها و برق

حبيت أشيلها ف قلبي .. قالت حرام

ده أنا كل قلب دخلت فيه اتحرق

عجبي !!!

x.png



رقبه إزازة و قلبي فيها انحشر

شربت كاس و اتنين و خامس عشر

صاحبت ناس م الخمرة ترجع وحوش

و صاحبت ناس م الخمرة ترجع بشر

عجبي !!!!


x.png


ليه يا حبيبتي ما بيننا دايما سفر

ده البعد ذنب كبير لا يغتفر

ليه يا حبيبتي ما بيننا دايما بحور

أعدي بحر ألاقي غيره اتحفر

عجبي !!!

x.png

ورا كل شباك ألف عين مفتوحين

و انا وانتي ماشيين يا غرامي الحزين

لو التصقنا نموت بضربة حجر

و لو افترقنا نموت متحسرين

عجبي !!!

x.png


نوح راح لحاله و الطوفان استمر

مركبنا تايهه لسه مش لاقيه بر

اه م الطوفان واهين يا بر الأمان

إزاي تبان و الدنيا غرقانه شر

عجبي !!

x.png



علي رجلي دم .. نظرت له ما احتملت

علي إيدي دم.. سألت ليه ؟ لم وصلت

علي كتفي دم.. و حتي علي رأسي دم

أنا كلي دم .. قَتلت ؟ ..... والا اتقتلت

عجبي !!


x.png


انا كل يوم أسمع ........ فلان عذبوه

أسرح في بغداد و اوالعراق واتوه

ما أعجبش م اللي يطيق بجسمه العذاب

و اعجب من اللي يطيق يعذب أخوه

عجبي !!!


x.png


ينبوع و في الحواديت أنا سمعت عنه

إنه عجيب .. و ف وسط لهاليب لكنه

شقيت كما الفرسان طريقي .. لقيت

حتى الخنازير و الكلاب شربوا منه

عجبي !!!!


x.png


يا قرص شمس ما لهش قبة سما

يا ورد من غير أرض شب و نما

يا أي معني جميل سمعنا عليه

الخلق ليه عايشين حياه مؤلمة ؟؟ !!

عجبي !!!

x.png

شاف الطبيب جرحي وصف له الأمل

وعطاني منه مقام يا دوب ما اندمل

مجروح جديد يا طبيب و جرحي لهيب

ودواك فرغ مني .... و إيه العمل

عجبي !!!

x.png


أعرف عيون هي الجمال و الحسن

و اعرف عيون تاخد القلوب بالحضن

و عيون مخيفة و قاسية وعيون كتير

وباحس فيهم كلهم بالحزن

عجبي !!


x.png


إيش تطلبي يا نفس فوق كل ده

حظك بيضحك و انتي متنكده

ردت قالت لي النفس : قول للبشر

ما يبصوليش بعيون حزينة كده

عجبي !!

x.png



إقلع غماك يا تور وارفض تلف

إكسر تروس الساقية و اشتم وتف

قال : بس خطوة كمان .. وخطوة كمان

يا اوصل نهاية السكة يا البير تجف

عجبي !!!


x.png


يا حزين يا قُمقُم تحت بحر الضياع

حزين أنا زيك و إيه مستطاع

الحزن ما بقالهوش جلال يا جدع

الحزن زي البرد ... زي الصداع

عجبي !!!!


x.png


في يوم صحيت شاعر براحة و صفا

الهم زال و الحزن راح و اختفي

خدني العجب و سألت روحي سؤال

أنا مت ؟ و لا وصلت للفلسفة

عجبي !!!

x.png


الفيلسوف قاعد يفكر سيبوه

لا تعملوه سلطان و لا تصلبوه

ما تعرفوش إن الفلاسفه يا هوه

اللي يقولوه بيرجعوا يكدبوه

عجبي !!!

x.png


علي بعد مليون ميل من أرضنا

من الفراغ الكوني بصيت أنا

لا شفت فرق بين جبال و بحور

و لا شفت فرق ما بين عذاب أو هنا

عجبي !!

x.png



إنسان أيا إنسان ما أجهلك

ما أتفهك في الكون و ما أضألك

شمس وقمر و سدوم و ملايين نجوم

و فاكرها يا موهوم مخلوقه لك

عجبي !!

x.png



نظرت فوق للنجوم و انا ساير

رجليا عترت في الحفر و الحجاير

بقيت أقول و انا ع التراب: يا سلام

مش بس عبره أخذت لكن عباير

عجبي !!!


x.png


- يا نجم .. نورك ليه كده بيرتجف ؟

هو انت قنديل زيت ؟ أو تختلف

- أنا نجم عالي .. بس عالي قوي

و كل ما انظر تحت اخاف انحدف

عجبي !!!!

x.png



السم لو كان في الدوا منين يضر ؟

و الموت لو عدونا .. منين يسر؟

حط القلم في الحبر و اكتب كمان

.. و العبد للشهوات .. منين هو حر؟

عجبي !!!

x.png

الله عليك والله ياجاهين

لو عجبكم عجبى

ابقا انزلكم الجزء التانى منه ياحلوين

اختكم /من انا؟
x.png
 
السلام عليكم...

عزيزتي من أنا؟؟...

أنا لم أكن أعرف من هو صلاح جاهين و بصراحة دخلت من باب الفضول..

و لكن ما قرأته أذهلني بحق...

و أثار دهشتي و عجبي...

حقا أيا عجبي...

كلمات قمة في الروووعة ...

و الأروع منها أنت عزيزتي..

فلولا الله ثم أنت لكانت ضاعت عليا قراءة تلك الكلمات...

ليك أرق تحياتي يا قمر...

و أنا مستنية الجزء التاني على أحر من الجمر...

و ألف شكر مرة تانية...
 
السلام عليكم...

عزيزتي من أنا؟؟...

أنا لم أكن أعرف من هو صلاح جاهين و بصراحة دخلت من باب الفضول..

و لكن ما قرأته أذهلني بحق...

و أثار دهشتي و عجبي...

حقا أيا عجبي...

كلمات قمة في الروووعة ...

و الأروع منها أنت عزيزتي..

فلولا الله ثم أنت لكانت ضاعت عليا قراءة تلك الكلمات...

ليك أرق تحياتي يا قمر...

و أنا مستنية الجزء التاني على أحر من الجمر...

و ألف شكر مرة تانية...


ههههههههههههههههههههههههه

ياعسل نورتى الموضوع والله

بيقولوا الفضول مفيد فى بعض الاوقات ياعسل

والحمد لله انك عرفتى صلاح جاهين

والرائع مرورك ياعسل

والجزء الثانى علشان خاطر عيونك

كام محاميه عندنا
وحده وليها عيونا
 
من انا

كالعاده طبعا موضوع اكثر من رائع

بجد موضوع تحفه

انا بموت فى صلاح جاهين
 
عودة
أعلى