123

ديوان الشاعره غريبة الدار

ديوان قصائد الشاعر - ديوان قصائد الشاعره ارسال إلى Twitter ارسال إلى facebook
  1. *مزون شمر*
    01-02-2010, 02:01 PM

    ديوان الشاعره غريبة الدار


    دمع وجراح




    قصايدي تدفع ثمنها فروحي
    ماقد خبرت اللي كتب شعر مرتاح

    لا صرت لاهي عن دموعي ونوحي
    وشلون ابوصف دمعة بين الأفراح

    يا اللي كتبت الشعر طرب مزوحي
    مايستوي شعرك مع دمع وجراح

    بيني وبينك مثل ماقيل شوحي
    تصبح على فرحك وأنا فرحي ما لاح

    هم يجي قلبي وهم يروحي
    مهما تناسى شفت ماراح ما راح

    لا جيت أبحكي خانني صدق بوحي
    ياطا على جمرة خفوقي ولا صاح

    في غربة أيامي مع جرح روحي
    لا حاصل فرحة ولا نزعة أرواح

    صبرت ماجاني بوقتي فروحي
    يا من يشوف الوقت بعيون مرتاح
  2. *مزون شمر*
    01-02-2010, 02:02 PM

    ديوان الشاعره غريبة الدار


    تعبت اسامح الأيام





    ندور وكل مافي ذا الوجود وذا الحياة يدور
    حياة نعيشها هذا عرف قصده وذا غادي

    نحاول في الأماني ويتكرر كل يوم الدور
    سباق نهايته مابين باكي واخر شادي

    عسى ربي يهون عبرة بالخاطر المكسور
    لها عامين مسجونه مابين العين وفوادي

    يجض القلب منها جضة اللي بالمنا مجبور
    سبايب سجنها من خوف عدواني وحسادي

    تعبت اسامح الايام وأقول الزمن معذور
    تعبت اشربها سكر حظي المتعوس وانكادي

    على نفسي كذبت وعشت في كذب الأماني شهور
    وعايشت الأماني لين ذقت الغبن وسهادي

    وبدا ميلاد قلبي من عرفتك بالبها والنور
    وتباهيت بطلايع طلتك في يوم ميلادي

    هو اليوم الوحيد اللي ترك فيني وفا وشعور
    وهو اليوم الوحيد اللي حرمني روعة اعيادي

    وفاق القلب من حلم تنثر واخره مبتور
    على صوت الحقيقه والفلاح يصيح وينادي

    ورجعت لخالق يجعل نهايتنا فنا وقبور
    وطلبت العفو من وجه الكريم المشرق البادي
  3. *مزون شمر*
    01-02-2010, 02:03 PM

    ديوان الشاعره غريبة الدار


    ندري ولكن




    قليلة احسان يادنيا العنا فينا
    نار بأثر نار..ماتبرد ماوجعنا

    الفرحة اللي خذيتيها من يدينا
    والصرخة اللي تردد في مسامعنا

    لحظات ميلاد فيها الموت يطوينا%
    ويزورنا لين..تذرف له مدامعنا

    نبكي على الميت اللي راح يبكينا
    ونمشي بدربه..ولا يقدر يرجعنا

    ندري بما صابنا..ماهوب يخطينا
    ندري..ونجهل على الحق بتواضعنا

    رحلة..خذينا بها زاد يكفينا
    ولاخذينا بها نار..تمزعنا

    ننسى..ونذكر..والى منا تناسينا
    نعيش مثل الوحوش اللي تروعنا

    نزعل..ونرضى..وكلش مايكفينا
    ياكبر في ذا الحياة..اصغر مطامعنا

    نزيف احلامنا..ونبيع امانينا
    والصوت سيف..نخاف انه يقطعنا
123