قصتي مع بطاقة الاحوال

قصة قصيرة - قصه جميلة - اجمل قصص وحكايات قصيرة منوعة مفيدة ارسال إلى Twitter ارسال إلى facebook
  1. لورد الشرقية
    21-01-2008, 11:54 PM

    قصتي مع بطاقة الاحوال

    قصتي مع بطاقة الاحوال


    قصتي مع بطاقة الاحوال

    بدت قصة معاناتي يوم كنت في الصف الثالث متوسط
    قررت اني اصير سعودي , المهم وانا اللي اقول للوالد الله يخليه ابي اصير سعودي قال هاه؟! قلت اي ابي اصير سعودي , قال طيب. قلت انا (يس) <<... (في قلبي) قال اجل جهز اوراقك و اطلب تعريف من المدرسة. قلت انشاء الله وانا اللي اروح للمدرسة و اروح للوكيل و اقول له : السلام عليكم الوكيل : وعليكم السلام تفضل ياولدي امر خير وشعندك قلت ابد ما يامر عليك عدو بس بغيت لو تكرمت تعريف من سعادتكم. الوكيل عشان ايش؟؟ قلت عشان الاحوال. قال ليش ما بعد طلعت؟؟ انا (منحرج) لا قال : طيب جبت صورة ؟ قلت اي تفضل شاف الصورة والا انا اللي اشوف ملامح خشته تغيرت !! قلت خير عسى ما شر؟ قال : لا ابد بس متأكد انك انت اللي في الصورة؟ قلي: اي انا اجل منهو؟ قال لا بس طالع في الصورة اصغر و احلى بكثير . قلت: تدري عوامل الشارع و لعب الكورة العصر خلوني كذا. قال: طيب. قلت : واخيرا المهم طبع تعريف يوم طبع التعريف سأل وقال : تبيها من احوال 00000 ولا من احوال الدمام؟ قلت لا من احوال الدمام. قال الله يصلحك طيب ليش ماقلت من اول ؟ قلت: اقول وشو؟ قال انك تبيها من احوال الدمام , قلت ليش من اي جهة حطيتها قال الوكيل : من احوال 000000 طيب مو مشكلة الحين اطبع لك تعريف جديد . وطبع وخلص وانا طاير من الفرحة . طيب رحنا البيت وجا ابوي من الدوام وشاف التعريف وقال خلاص من بكرة اجل نروح ونسوي الامور <<.. فرحت انا وقلت جاء الفرج ان الله مع الصابرين . المهم : جلست من الصباح قبل لا يجلس ابوي عشان بس يجلس نحرك على طوول. واروح اصلي الفجر (قضاء) واروح اغسل وجهي بالماي والصابون وافرش اسناني لين طلعت منهم الدم <<.. مصاص دماء واروح والبس الثوب المكوي الابيض و اتشمغ <<.. سخصية الفنان خالد عبد الرحمن . وجلس ابوي وشافني في احسن طلة وقال ايه لو قايلين اجلس روح للمدرسة ماقمت من صباح الله خير زي الحين. قلت اشهد ان لا اله الا الله وأن محمد رسول الله اذكر الله يا يبه . المهم ويروح يطلع دفتر العايلة و باقي الاوراق اللي مالي ومالكم فيها شغل وبس قال الوالد عطني كم صورة لك. انا تقول لحظتها لو تنشق الارض وتبلعني كان اهون لي من هالسؤال قلت وانا ارجف : ماعندي قال اجل وشو له كل هالكشخة و ماعندك صور لك انا مو قايل لك جهز كل شي ؟؟ قلت اي بس ما دريت انهم يبون صور . قال لي روح نام اجل دامك مو جاهز . ها؟؟!! اروح انام؟؟!! اي روح نام قلت طيب اروح اصور اليوم ؟ قال اي قلت طيب واروح الغرفة من القهر انزل الستاير وانزل على المكيف عشان يهف علي واتلحف واسدح والديها نومة لين العصر واجلس واقول لاخوي قم ودني المصور قال اخوي يالله البس . لبسنا وانطلقنا للمصور ورحنا ولقيناه مغلق للصلاة وننتظر . وفتح وزحمة (تقول كل الناس تبي تطلع بطاقات زيي؟) المهم واتخرنا على ما صورنا والمصيبة ان الصور يطلعون متأخر الساعة 11 في الليل وانا بكرة وراي دوام في المدرسة وابوي وراه طلعة شباب ذيك الليلة . قلت شكلها بنجي بكرة يا اخوي قال : هذا اللي بيصير. قلت : يعني في تأخير يوم ثاني على البطاقة . قال اي . وانروح له اليوم الثاني وناخذ الصور واروح البيت وانام بدري عشان اجلس بدري ويشوفني ابوي جاهز . واجلس الصباح وانا مستعد و جاهز وقال الوالد: افاء وين الصور اللي لي ؟؟! قلت (في قلبي افا يعني يوم اصير انا جاهز الوالد ما يحهز؟؟ وش هالحظ ) قال لي نفس الجملة اللي امس روح نام . جاءاليوم اللي بعده ويطلع يوم خميس والدواير الحكومية تسكر الخميس والجمعة قلت اوف يالله عاد مالها الا السبت . وجا السبت وقال الوالد ضروري البطاقة؟ وش تحتاجها فيه؟؟ وبعدين ليش تبي تكبر نفسك بالقوة؟ قلت بس ابيها لاني بصير اول الاهل اللي يطلع بطاقة جديدة ممغنطة قال الوالد : ليش متحدي مع احد؟ قلت : بصراحة اي . قال : منهو؟ قلت الاهل و اخوي و ولد عمي و خالي . قال: الله يهديك ليش تتحدى <<.. معصب . قلت له: خلاص خلاص لا تتعب روحك خلها بعدين . قال : احسن لأني مو فاضي هاليومين . و مرت الايام ونجحت ولله الحمد من المتوسطة و يوم جاو يعطوني الملف و ينقلوني للثانوي سألني المرشد و قال : اثباتك عشان نحطه في الملف ونرسله للثانوي. تلعثمت ما عرفت وش اقول حرجني قدام الطلاب ليش اني تخرجت و للحين بلا اثبات قال روح البيت وجيب الاثبات الطويل و تعال<<.. يقصد دفتر العايله . واوديله صورةمن الدفتر و قلت له : لا تطالع اسم الوالدة ترا فيها قبايل<<.. عن مزح مو جد. وقام يضحك وقال سرك في بير قلت كفو . وجات الاجازة وقلت للوالد : نبي نروح للمدينة المنورة شباب انا واخوي ولد عمي و خالي وولد عمتي بس. قال ابشر عشان هالنتيجة الطيبة اللي جبتها تستاهل يا بو مالك . قلت الله يخليك . المهم اتصل علي ولد عمتي وقال انه لقا حملة تودي للمدينة شباب عندهم في الاحساء و بسعر مناسب. قلنا يالله وهالخبر جا في وسط الاسبوع . وقال الوالد اجل روحو انت واخوك بالنقل الجماعي . ونروح انا واخوي للنقل وقالو العبارة الكئيبة بالنسبة لي : اثباتك واثبات خويك قال اخوي: اخوي ما عنده اثبات و لازم نروح الاحساء اليوم . قال موظف الاستقبال راجع المدير. ونروح للمدير ويقول وين اللي ما عنده اثبات منكم ؟ قلت انا. تفاجأ !! افا شوف شنبك مغطي نص وجهك وما عندك اثبات ؟ طيب طيب انا بمشيك هالمرة بس على مسؤولية اخوك قلت : طيب بس خلنا نركب الباص قال : يا حمدي <<.. اسم الفراش . روح جيب ورقة تعهد وتعال بسرعة الشباب وراهم موعد مهم . وراح اخوي و وقع على التعهد . وقال افا يا ابو مالك انا على اخر عمري اكتب تعهد ؟؟ قلت له : كله في سبيل الاخوة وانا اخوك. المهم وصلنا الاحساء وانطلقنا من هناك للمدينة . واحنا في الطريق كل ما نمر على نقطة تفتيش وقفونا احنا الشباب . وكالعادة السؤال اللي ما اطيقه : اثباتاتكم يا شباب. (ودي اصيح على هالكلمة) واعطيه صورة من كرت العايلة و ها ذا حنا على هالمنوال كل نقطة تفتيش الا وحدة كانت بعد ما رحنا للمدينة قررنا نروح لجدة اهل الرخا والشدة واحنا جايين من جدة للمدينة بس احنا الشباب في تفتيش قوي مرة للدخول من جدة للمدينة. و ينفض العسكري التكسي نفاض وقال السؤال البايخ ( الاثبات يا شباب ) وينزلني من التكسي بس انا و يقعد لك سين وجيم <<.. طبعا الشباب اللي وياي نزلو عشان يشوفو الوظع وش بيصير لي هل بيمسكوني ولا لا ؟ . ويشوفهم العسكري ويزأر عليهم ذيك الزأرة اللي مثل زأرة الاسد ويقول يالله انت وياه ارجع مكانك. وانا مرتبك شوي بس عدانا يوم نزل اخوي وراه اثباته ولقاه مطابق لاسم الوالد في كرت العايلة و مشانا ولا كان يومها برحلوني للهند ولا بنغلادش ليش اني ما عندي اثبات <<.. تقول هندي مضيع الاقامة ذاك اليوم. المهم و جينا الشرقية ويعطي اخوي ابوي التعهد اللي كتبه في مكتب النقل الجماعي . ويقول ابوي طيب اصبر اعدل وضعي و وضعك عشان ما يصير لنا زي هذيك المرة . وقلت اخيرا فرجت بصير سعودي! وصرت انتظر يوم اسبوع شهر شهرين وانا نتظر الوالد يقول يالله. و جا يوم وصار فيه تفتيش قريب الحارة وانا طالع مع اخوي. وحنا جايين قال الشرطي الاثباتات . قال اخوي: اخوي هذا اللي في السيارة . و ما صدق الشرطي و يصك اخوي مخالفة .ويروح اخوي يوري ابوي المخالفة ويقول ابوي: ليش انا ماطلعت لك بطاقة يوم جيت من المدينة؟؟ قلت له لا انت قلت بتضبط الوظع وبتقول يالله و هذانا صابر ووو ماشفتك قلت شي . قال طيب ليش ما تذكرني انت . قلت: انت ذيك المرة انا حنيت على راسك الين هونت. قلت ما ابيك تهون مرة ثانية اذا قلت لك . قال اجل يالله انا جاهز خلاص من بكرة تكون جاهز . و يسأل : معك صور؟ معك صورة من كرت العايلة؟ معك شهادة الميلاد ؟ قلت ايه ما عدا شهادة الميلاد عندك اهي . قال اوكي زين نبهتني لها . واجلس من الصباح والبس الثوب الابيض واتشمغ وعدل نفسي ويجلس ابوي ويقول انا جاهز وانت؟ قلت انا اجهز منك ترا . ونروح لمقر الاحوال في الدمام ويشوف ابوي المتطلبات وشاف من المتطلبات شهادة الميلاد . ويقول يا الله وش اللي نسيته ؟! انا ها وش نسيت قال شهادة الميلاد . (وحنا انتقلنا لمدينة سيهات مؤخرا عشان هدوووووووووءها) ومن الدمام طلعنا على طريق الظهران السريع . ويوم نطلع من مقر الاحوال ابوي طالع الساعة وشافها 9 قال الله يستر . و وصلنا البيت في سيهات خلال 12 دقيقة بس انا انذهلت ! (ابوي الهادي المتركد وصلنا للبيت في 12دقيقة بس؟ اوه نسيت انا لمحت العداد على 170 كلم/الساعة ) اي عدل من عذر واصلين خلال هالوقت. ونرجع مقر الاحوال بالدمام ويشوف التعريف من منطقة سيهات . ويقول بنحولكم لأحوال القطيف!! قلت افا وش هالحظ ونروح احوال القطييييييييييف وهنا تكمن القضية نروح الا و امة لا اله الا الله متجمعة هناك . تقول لو بيوزعون مليون لكل واحد ما صارو على هالكثر ؟ وندخل الساعة 10:04 دقايق وناخذ رقم وطلع الرقمممممم 155 ول اجل الى بكرة. ومن ذييييك الساعة لين الساعة 1:55 وحنا جالسين ننتظر الدور . المهم جا دورنا فرحت و حزنت في نفس الوقت ؛ فرحت لأنه واخيرا جا دوري و حزنت لأني كنت اعرف ان البطاقة ما راح تطلع اليوم . ونروح للموظف وابصم على اقرار ولوية و عوار راس و في الاخيير يقول الموظف : متى تبيها البطاقة قلت لو يحصل اليوم ما اقول لا. قال اسف ما اقدر اخدمك في ذي لأننا تونا اليوم الثالث نداوم في هالمبنا الجديد و ما في تصويرالا من يوم الثلاثاء الجاي و فوق قلت له بس انا ثنوي و راي اختبارات الاسبوع الجاي ذا كله و قال كم التاريخ اليوم قلت له 1429/1/12 و قال ارجع الاسبوع الجاي من الصباح و اخذ لك رقم عشان التصوير . قلت له يعني تبي تفهمني ان اليوم ما في اصدار بطاقات ؟ قال لي لا مع الاسف . (قلت في نفسي ردد ردد ياليييييييل ماطولك) مشكور اخوي ما قصرت زين . واطلع وانا منقهر حدي واصله معي لخشمي . يعني معقولة اصبر كل هالمدة و في الاخير يقول لي تعال الاسبوع الجاي ما يصير . قعدت اليوم بيني و بين نفسي مدي اهون عن الشغلة كلها ؟ يمكن تنحط خدمة التوصيل مجانا من الاحوال؟ و هذي قصتي مع بطاقة الاحوال الله لا يوريكم مثلها وشكرا لورد الشرقية (قصة واقعية حصلت لي اليوم في تاريخ 1429/1/12 ه)
  2. وزير السلطان
    22-01-2008, 01:32 AM

    قصتي مع بطاقة الاحوال


    الله يعنيك يارب إذا هي بطاقه عملت فيك كذا أجل وش نقوول لبطاقة العائله بكره؟؟؟

    يعطيك العافيه أخوي لورد على هالقصه
    يسعدك ربي
  3. zhr
    22-01-2008, 02:44 AM

    قصتي مع بطاقة الاحوال


    الله يعينك ...هادي ماهي قصة ... والله مغامرة..!!!!
  4. لورد الشرقية
    22-01-2008, 01:23 PM

    قصتي مع بطاقة الاحوال


    مشكورين ع الردود الحلوة واتمنى المزيد

    و شكرا

    لورد الشرقية
  5. قريب الأمل
    28-04-2008, 02:22 AM

    قصتي مع بطاقة الاحوال


    الله يوفقك يا أخوي......