استرجعي ثقتك بنفسك بجمال جسمك

مايخص جسم المرأة من عناية و تجميل و عمليات شد و ليزر ولايت و مشاكل صحية وغيرها ارسال إلى Twitter ارسال إلى facebook
  1. صعبة المنال
    14-01-2008, 11:58 AM

    استرجعي ثقتك بنفسك بجمال جسمك

    استرجعي ثقتك بنفسك بجمال جسمك


    أول شي قوليلي عندك ثقه بنفسك؟



    عيونك..حلوه؟؟ اذا حلوه الحمد لله.. بس لاحظي ان حلاوة العيون مو بالضروره يعني انها كبيره وواسعه ... ممكن تلقين عيون كبيره وشينه اما بسبب بروزها مثلا او جمود نظراتها او تكون الرموش خفيفه ومفقده العين جاذبيتها او يكون فيه عيب جمالي فالوجه وخلق الله حسن بس يكون في شي فالوجه من بشاعته يخليك تفقد الرتركيز فالعيون..صح؟
    طيب اذا ما اقتنعتي ... بقولك ليش ماتكبرينها ؟؟

    وهاذي عاد مايبيلها شرح.. كحل داخلي خارجي ظل ماسكرا كحل اسود بني اخضر ازرق تركواز ابيض لتوسيع العين ... ظل غامق تحت العين يخفف التورم كونسيلر يخفي السواد تحت العين الوان فاتحه توسع العين والوان غامقه تعني للعين توازن وماسكرا تكثف وماسكرا تطول ... بس جيبيلك أي مجله او ادخلي منتدى عشان تتعلمين مو عشان تتفرجين وبتلقين اللي يناسب عيونك ويعطيها جمال ولو اني ماظن الحين في وحده ماتعرف تتكحل وتضبط عيونها ...

    وبرضو الحين كل الوان العدسات اللي فالدنيا تقدرين تختارين منها اللي تبين وطبعا سيد الالوان الرمادي المموج مع سماوي وعسلي هذا اللون اللي اثبت فعاليته مع كل انواع العيون وكل الوان البشره وعمر احد ماحط هاللون الا يطلع قمر ونظراته جذابه
    وبرضو اذا كنتي تلبسين نظاره طبيه جا الوقت انك تشيلينها .. عندك ليزر وليزك واذا ماتبين او ظروفك ماتساعد سويلك عدسه طبيه وقضينا

    ولو ماتبين برضو تقدرين تظلين على نظاراتك بس تختارين موديل يناسب تقاطيع وجهك واطار حلو يناسب كل شي ممكن تلبسينه يعني مايكون مره شكله عملي مثل البرواز البني او الاسود العريض ولا يكون فيه فصوص او كريستال او تدرجات الوان زي اللي طالعه الحين وتطلع عيونك كنها فكرنفال لحالها ...

    واذا على الرموش تقدرين تستخدمين ماسكارا زيت الخروع من بودي شوب تغذي لك رموشك زود على تجميلهم وفي كثير انواع ماسكارا مرطبه ومغذيه للرموش ماتكسرها ..

    طيب لنفرض ان عيونك ولا شي ولا في امل تحلى فعينك ولا فعين غيرك؟؟

    ممم بشرتك...

    بالنسبه للنعومه ...

    0 اول شي تهتمين تزيلين شعر جسمك شهريا بعد كل دوره واذا كان نموه سريع مرتين فالشهر ولا تتعيجزين مره لانك بتعيجزين دايم.. ومابيمر سنه الا والشعر اللي فجسمك خفيف بنسبة 50 فالميه لان البصيلات تضعف مع الاستمرار انك تشيلينها اول ماتطلع
    0 كريم مرطب للجسم ويكون عطري وحلو على ذوق زوجك؟

    بعدها دهني يدينك ورجولك وركبك واكواعك ماياخذ منك ثلاث دقايق بكريم معطر لو نفس ريحة عطرك يكون احسن وبخي فوق الكريم بخة عطر قبل يشربه الجسم عشان يثبت ومرطب حلو لوجهك وبتصيرين ولا انعم

    0 اذا بشرة جسمك خشونتها مستعصيه بس قبل ماتتحممين افركي سيقانك وركبك ويدينك واكواعك بزيت زيتون مع سكر افركي بشكل دائري لحد ما يحمر الجلد شوي وبعدها بنفس اللحظه بتصيرين حرير كرريها كل اسبوع مره تجدد بشرتك وتنعمها 0 طيب فرضا ماقتنعتي

    وش اخبار فمك بكل ما احتواه من شفايف ولسان واسنان وصووت وهذا الفقره الاخيره لان اذا ماقتنعتي بشي منها لاتكملين قراءة موضوعي هههههه اول شي يقابلك وانتي رايحه للفم الشفايف

    أول مشكله يانها تكون صغيره يانها تكون كبيره صح؟
    طيب لو كانت صغيره ..
    ممكن ترسمين بمحدد الشفايف خط شفايف وهمي خارج الحدود الاصليه بس لازم يكون لون المحدد نفس درجة الروج تماما عشان يضبط وبيطلع حلو بعد ماتتمرنين على وضعه

    0 القلوس او الملمع من اكثر الاشياء اللي تكبر الشفايف وتحليها وحسب ما اسمع انه جذاب جدا ا واكيد فهمكم كفايه.. فيه منه انواع والوان واشكال وانا عن نفسي جربت ماركات كثير ...

    0 بالنسبه لتشققات الشفايف في فنكتار وبرضو عند بودي شوب مرطبات قويه وحلوه بالفواكه وزبدة الكاكاو وبعد كويسه تدهنين فيها الشفايف

    0 اما بالنسبه للتصغير .. فاول شي ماتستخدمين الوان غامقه .. الالوان الترابيه واللحميه تناسبك كثير والافضل ماتستخدمين قلوسات لانها تزيد حجم الشفايف ..والمحدد اللي بارز ولونه قوي ومو ممزوج فالروج مايناسبك لانه يركز النظر على حجم الشفايف ..

    0 اما اذا كان لون شفايفك غامق او محدده شفايفك رباني بلون غامق فالحل انك تحطين طبقة كريم اساس على شفايفك قبل تحطين الروج عشان يعطي اللون اللي تبغينه

    وغالبا لما تبغيت تشترين روج عاجبك لونه خوذي نفس اللون افتح بدرجه عشان مع شفايفك يطلع اللون اللي تبين ..

    0خلصنا من الشفايف ولو ماقتنعتي خلينا نروح للأسنان

    0 طبعا التسوس او اذا فيه اسنان بارزه او مو مرتبه الاسنان فانتي بقمة الغباء اذا سكتي على نفسك لان جمالك وجهك مايكمل الا بابتسامتك وابتسامتك عمرها ماتصير مشرقه الا باسنان صحيه على الاقل ومرتبه ونظيفه لو ماكانت بيضا ثلج..

    ولو اطراف اسنانك مكسره روحي لدكتور اسنان كويس يسوي لك اياها لو طرفها مكسور

    وطبعا اكيد اذا اسنانك يبغالها تقويم حتى لو عندك عشر عيال لازم تسوينها كفايه اللي راح من عمرك...

    واذا اسنانك تعبانه ركبي اسنان

    واذا لثتك فيها نزيف او التهابات لازم تتعالج مالها حل لانها بتتعب اسنانك وبتسويلك رائحه فالفم وانتي فغنى عن هالاشياء اتفقنا

    نجي للنظافه الللي مافي مفر منها لاي انسان فكيف عاد فمرأه ومتزوجه وتبي تدلع ؟ فرشه ومعجون وخيط تنظيف اسنان + فحم تفركين فيه الاسنان كل كم يوم يشيلك الطبقه المتراكمه على الاسنان من بقايا الاكل تمام ويبيضها او ملح وهيل يطيب فمك ويبيض اسنانك... هذا بشكل شبه يومي ...
    0 بالنسبه للسان تنظيفه يكون بالفرشه حقت الاسنان وفي فالصيدليه حاجه اسمها معلقة اللسان تنظفين فيها اللسان الصباح او بعد الاكل تتخلصين من البقايا او من مسببات رائحة الفم اللي تكون على اللسان ...وفي كثيرررر انواع غسولات فم ومضمضات بكل النكهات ..لكن سيمعت ان طعمها مش ولابد بالنسبه للطرف الاخر

    وبرضو في بخاخات للفم فكل الماركات وممكن تلاقينها فالصيدليه تعطر الفم ...
    وطبعا مافي احسن من السواك تنظفين اسنانك وتطيبين فمك فيه .. واذا غلبتي حبة هيل تمضغينها ولا حبوب مص مثقل بولو وغيرها تقوم فالواجب ... ولاعاد تجين تقولين فمي واسناني ؟؟

    وبالنسبه للزينه ... طايحين الحين بالكرستالات اللي تنحط على واحد من الاسنان الاماميه .. وطالعه حلوه على كثير بنات ممكن تحطينها من باب التغيرر والاحلى تكون صغيره ...
    أظافرك...

    صدق الاظافر تكون انيقه وهي طويله شوي لكن تطولينها عشان سهره ولا عزومه كل اسبوع اسبوعين وكل يوم تطبخين وتغسلين وتمحين وانتي اظافرك طويله وسودا واطرافها مكسره كله عشان بعد فتره تصير مناسبه واظافرك طويله وقتها تطيرين لاقرب صالون منيكير وبديكير واحلى مناكير ليش ؟ طيب وزوجك مايستاهل ؟

    اللبس

    أدري انك فالبيت تبين ترتاحين طيب هذا متفقين عليه بس ليش هالراحه ماتجي الا بقميص قديم ولونه غبي ووسيع كنه مو لك وموديله نص ونص ؟

    ليش مجرد مسمى اسم لبس البيت صار معناته قميص قطني من ابو عشرين ولا من ابو خمسه مشي حالك..
    وان تكرمتي لبستي بودي ولا بلوزه من اللي كرفتيهم لبس برا او شكلهم طلع مو مره مع جنز قديم ولا أي شي ومشي حالك وغالبا حافيه
    ولا شبشب من تزوجتي ماغيرتيه ليه؟

    طيب ليش الاكسسوار بس برا البيت طيب اقنعيني ؟ يعني بتفقدين توازنك لو لبستي حلق كل يوم؟ ولا يعني اصبعك بيطلع من مكانه اذا لبستي خاتم ناعم .. ولا بتختنقين اذا لبستي سلسله لو بدون تعليقه ؟

    طيب قوليلي من اللي قال بس ان اللبس المريح لازم يكون شين او خلينا نتجاوز ونقول مو جذاب ...

    طيب ليش ممنوع لونه يصير فاتح وحلو ويفتح النفس طيب القميص الواسع اللي مكبر سنك ومزود حجمك ومخفي ملامح جسمك وماظن بتجرأين على حركة دلع وحده وانتي لابسته؟

    ومن قال ان القميص اذا صار جذاب وناعم ويفتح النفس بيصير مو مريح ههههههه

    طيب مو أريح البنطلون القطني او الجنز او أي قماش فالدنيا مو شرط يكون لاصق فيك وكاتم انفساك؟

    مو احلى بودي ناعم او توب او بلوزه احلى من القميص اللي كمه مكشكش وزرايره تهبل ويقهر قهر

    طيب ليش القمصان كيف بيجيك نفس تدلعين وانتي كاشخه بقميص لابسته امس وقبل امس واللي قبله ؟ طيب فرضا صرتي وسيعة وجه وتدلعتي منهو بالله اللي بيتقبل منك؟

    نكمل

    . ليش ماتاخذين من الطقوم اللي تشبه الترنقات الرياضه اللي تجي ثلاث قطع بنطلون وبودي وجاكيت قصير ...

    ليش ماتجيبين من القمصان اللي تكون نص كم وطولها لين نص الساق ومرسوم عليها دبدوب ولا ارنوب ولا اي رسمه ناعمه تفتح النفس ولا تجيبين من البجامات اللي تكون بودي وبنطلون قطني ومعاه روب نعوم تطلعين كأن عمرك 17

    وكل بجامه معها شبشب لونه مناسب ونظيف ويفتح النفس ...

    ولا تشترين من البرمودات اللي بالكوم فالسوق وبارخص الاسعار ليه حارمه نفسك الدلع والثقه والاناقه وحارمه زوجك ليه

    انا عارفه ليه ماتدلعين خصوصا انا للحين مامات احساسك

    لو فكرتي تدلعين بينك وبين نفسك بتقولين مالاق الدلع الا علي يعني ؟ اكيد بيحس انه مصطنع .. يمكن مايتقبل ... يمكن تلوع كبده من دلعي الماصخ؟

    ليش طيب جاك هالاحساس ؟

    مو لانك قبل شوي قبل لاتكشخين كنتي لابسه القميص القديم اللي من كم شهور وانتي تكرفينه غسيل ولبس غسيل ولبس ؟

    مو لان قبل امس قرب منك وانحرجتي وتوترت اعصابك ولا بادلتيه الضمه زي منتي ودك وهو وده تقولين ماله داعي تحك يدي بيده وهي خشنه؟

    طيب ليش لما يكون قاعد عند التلفزيون ماتجين بكل دلع وتجلسين بحضنه؟ لك وجه وانتي رجولك متشققه ويدينك كلها شعر واسنانك نسيتي تغسلينها بعد الغدا ومنتي واثقه من شكل شعرك مع انه مغسل لكن مو مسشور ؟

    طيب بالأمانه لما يجي فبالك زوجك وانتي قاعده معك اقصد تبغينه مثل ماتبغى الزوجه زوجها اكيد فهمتيني امانه جاوبي نفسك بصدق .. على طول وبكل ثقه وبنفس اللحظه تقومين له وتبوسينه وتحسسينه برغبتك بكل ثقه ولا تطيرين تاخذين دش والموس يشتغل فكل انحاء الجسم وتطيرين كريم من هنا وعطر من هناك وفرشة اسنان من هنا ؟ ولا والمصيبه لما تروح السكره وتجي الفكره وترجعين له المجلس ..

    تقولين لنفسك؟؟ لالا الحين يقول ماتحممت وتزينت الا يوم بغتني ؟

    اذا يبيني هو يجي ولا بكيفه مالي خلقه بعد يعلق علي ..ولاصار هالموقف مره ثانيه تقولين ليه من اساسه اروح اتضبط وانا عارفه اني بجي ومابيجيني نفس اتقرب له

    ليه ماتنطلقين باحساسك وبحياتك يعني الحين بالله حارمه نفسك اشياء كثير وحارمه زوجك طلتك وجوك وانوثتك بس عشان ما تاخذين من وقتك كل يوم ربع ساعه عشان تكونين جاهزه له ولنفسك باي لحظه وباي وقت

    قولي لنفسك وش المتعب ؟ وش المكلف ؟ وش الشاق ؟

    -تعب عليك بعد كل دوره شهريه تقعدين ساعه او اقل تزيلين شعر جسمك كله

    ساعه فالشهر كثير ؟

    -طيب تتحممين فرضا مرتين فاليوم

    طيب متعب تدهنين يدينك وجولك بكريم مرطب بياخذ دقيقتين

    طيب تبخين سبراي معطر بياخذ نص دقيقه يتعب ؟
    ماظن انه يتعب

    تشيلين المنشفه عن شعرك وتمشطين شعرك وتحطين سيروم وتفركين شعرك وتنشفينه بسشوار هوا وتسشورين كم خصله من قدام وترفعين الباقي باكسسوار شعر انيق وتنزلين كم خصله كل ذا مابياخذ خمس دقايق وكل ماتعودتي صار الوقت اقل

    نرجع لموضوعنا

    البسي حلق وخاتم نعوم وححطي خلخال صغير فساقك والبسي أي قميص نعوم قصير وش يمنعك ورجولك ناعمه ونظيفه ؟
    وماله اكمام بعد وش يمنعك ويدك مافيها ولا شعره وناعمه وتكونين باخه على مكان النبض اللي فيدك بخة عطر ياسلام واظافرك مقصوصه كل اسبوع مره ونظيفه واسنانك مفرشيتها ولا فيك ولا سوسه ولا بقعه فاسنانك وتكملين طلتك ببختين عطر وشبشبك النعوم ابو فيونكه ورديه ...

    يالله روحي طالعي نفسك وقوليلي وش يمنعك تكونين كل يوم كذا واحلى ؟ وش بينقص عليك؟ ساعه واكثر وتتصفحين مجله خمس دقايق عشر دقايق

    مستخسره فنفسك نص ساعه كل يوم موزعه تهتمين بنفسك؟

    مستخسره فنفسك انك تستقطعين من الفلوس اللي تروح بالهبل على الماركه الفلانيه ومحل الفساتين العلانيه بس ميتين ريال كل شهر تجيب لك اربع خمس غيارات للبيت كل شهر
  2. دانة بوظبي
    14-01-2008, 02:13 PM

    استرجعي ثقتك بنفسك بجمال جسمك


    يعطيج الف عافيه ع المعلومات
  3. وهج المشاعر
    14-01-2008, 02:23 PM

    استرجعي ثقتك بنفسك بجمال جسمك


    استرجعي ثقتك بنفسك بجمال جسمك
  4. صعبة المنال
    14-01-2008, 09:58 PM

    استرجعي ثقتك بنفسك بجمال جسمك


    الله يعافيكم يارب

    يسلمووووووووووو على المروووووووووووووور
  5. عذبه الريق
    17-03-2008, 01:09 AM

    استرجعي ثقتك بنفسك بجمال جسمك


    والله انتي خطيرررررررررررررررررررررررررررره
  6. &أم فارس&
    18-03-2008, 09:43 PM

    استرجعي ثقتك بنفسك بجمال جسمك


    كلامك درر يا غالية والله يجعله في موازين حسناتك
  7. عسولة بغداد
    21-03-2008, 09:45 AM

    استرجعي ثقتك بنفسك بجمال جسمك


    اوووووووووو
    ما شاء الله عليك
    مشكورة على النصائح
    لا عدمانك
  8. (¯`·._.·(roro )·._.·°¯)
    30-03-2008, 03:04 AM

    استرجعي ثقتك بنفسك بجمال جسمك


    [
    مشكورررررررررره على نصايحك الحلوه الله يعطيك العافية يا عسل ......
  9. مصرقعه بقوه
    28-10-2011, 04:48 PM

    رد: استرجعي ثقتك بنفسك بجمال جسمك

    استرجعي ثقتك بنفسك بجمال جسمك


    مشكوووووووووووووووووره


    نصائح رائعه ومفيده
  10. همي رضى ربي
    29-10-2011, 07:12 AM

    رد: استرجعي ثقتك بنفسك بجمال جسمك

    استرجعي ثقتك بنفسك بجمال جسمك


    مشكووووووووووووره ع الطرح