تحمل لا تكدر سد مأرب هدته فاره

الشعر, قصيدة , شعراء, القصايد
  • ارسال إلى Twitter
  • ارسال إلى facebook
  • ارسال إلى google plus
    1. حوران
      13-01-2008, 03:40 PM

      تحمل لا تكدر سد مأرب هدته فاره

      تحمل لا تكدر سد مأرب هدته فاره


      انقل لكم هالرائعه واتمنى تنال اعجابكم

      /

      *

      \

      ثلاثيني تعدت والهقاوي خانها التعبير
      انوخ هقوتي تاره ... وأشد ركابها تاره


      انوخها واشد ركابها .. وبعير بأثر بعير
      واشوف الوقت يطحني رحاه بجاير اقداره


      وابوي يقول .. قدر .. كل شي بها لزمن تقدير
      ترى من هد داره ... قل عند الناس مقداره


      يابوك الحر حر ... والعصيفير اسمه عصيفير
      وانا خابرك حر تفهم المقصود بإشاره


      ترى طير الرخم يابوك ماهو من حرار الطير
      ولو يعجبك في حومه .. وجنحانه .. ومنقاره


      ولو جاك من اعاصير الزمان المر( شبه اعصير
      ترفع خل عنك هروج ( ابو نواس) واخباره


      نسيت أيام كنا .. لاظمينا نشرب من البير
      سقى ذاك القليب اللي تصافق ماه بحجاره


      حفرناه بيدينا .. كلبينا .. عودنا وصغير
      زمان كان فيه الجار .. يفدي بولده .. جاره


      ليا اشتد الهجير نقول .. هين تاليته عصير
      رجال ما جزعنا من عجاج الوقت وغباره


      وعز نفوسنا كنه يقول .. اللي يصير يصير
      على العزه مفاطيم .. وعلى الأقدار صباره


      تكون بفمك تمره .. والنصيب يسوقها .. للغير
      كذا .. طبع الزمان اقشر .. كذا .. الأيام دواره


      زمان عقب النشمي على المركى بنافخ كير
      وتشوف اللي يبيعون الدجاج اليوم صقاره!!


      وانا .. رجل لمح برق .. فهلل واكثر التكبير
      وصلى عالرسول احمد .. نبي الله ومختاره


      جهره النوض واستبشر يباسه بالمطر والخير
      بذاك الصيف .. واثر اكثر.. بروق الصيف غداره


      لقى ثروة شبابه بأيد حظ يعشق التبذير
      رمى باحلى سنينه للهموم وكثرة اسفاره


      غرس نخل الصفاري بأرض ناس يزرعون شعير
      وفي جني الرطب عيوا عليه يجني ثماره!!


      وانا مانيب من يسكت على ضيم الغبينه.. مير
      اشوف ان الحصاني هالزمان تناطح نماره!!


      يقولون العرب .. خل التعجل واحسن التفكير
      وانا راسي لعب فيه الصداع وشتت افكاره


      ولو هدتك ياقلبي سنين الهم والتعزير
      تحمل .. لاتكدر .. (سد مارب) هدته ... فاره


      بسيطه ياذنوبي لو تخونك شرهة التكفير
      عسى ضيم السنين اللي مضت بالعمر كفاره


      ثلاثيني تعدت ... حلم .. ماحصلت له تفسير
      انوخ هقوتي تاره ... وأشد ركابها تاره

      وسلامتكم
      250*300 Second
    2. *مزون شمر*
      13-01-2008, 06:55 PM

      تحمل لا تكدر سد مأرب هدته فاره


      حياك الله معنا في قسم الشعر
      شكرا على القصيدة الجميله
      وشكرا على الامانه في النقل
      يعطيك العافيه
      دمت بخير
    3. حوران
      15-01-2008, 01:33 AM

      تحمل لا تكدر سد مأرب هدته فاره


      الله يحييك مزون

      الشكر لك على هالمرور

      تحياتي
    4. PRICE PERSIA
      15-01-2008, 04:20 AM

      تحمل لا تكدر سد مأرب هدته فاره


      يسلمووووووو..
    5. حوران
      16-01-2008, 11:40 PM

      تحمل لا تكدر سد مأرب هدته فاره


      ياهلابكم والله


      مشكورين على مروركم لاهنتو