قصيدة الله يا نور من جبال فاران - ناصر الفراعنة

ديوان الشاعر ناصر الفراعنة - شاعر الجن - شاعر الثقلين
  • ارسال إلى Twitter
  • ارسال إلى facebook
  • ارسال إلى google plus
    1. *مزون شمر*
      21-12-2007, 01:33 AM

      قصيدة الله يا نور من جبال فاران - ناصر الفراعنة

      قصيدة الله يا نور من جبال فاران - ناصر الفراعنة


      القصيدة هي عن ذلك الطفل الذي ولد يتيما في جبال فاران خاتم الأنبياء وسيد المرسلين
      محمد صلى الله عليه وسلم ،،
      اطرحها على اجزاء لانها طويله ،،

      ؛
      ؛
      ؛
      الجزء الاول



      الله يا نور من جبال فاران
      بان وتروع منه عباد الاوثان
      نور الهدى يا معشر الإنس والجان
      نور تلالا واهل مكة يشوفون

      فيض من النور الإلهي تلالا
      أيات رب للخلايق تتالى
      بأمره تعالى صوت حق تعالى
      وقريش في ميت صنمهم يصيحون

      له من قبل يولد علامات ورموز
      رؤيا ملوك الفرس في يوم نيروز
      ومنها اصطفاق الما على رملة القوز
      وشمشون ما هو مثله الأمس شمشون

      ساعة ظهر نجم احمد ما توارى
      منه اليهود استنوقوا والنصارى
      يوم اقفوا من الغيظ مثل السكارى
      كل على كبده من الغل طاعون

      نجم ظهر للعين من مطلع الشرق
      بينه وبين نجومها الطالعه فرق
      ساعة ظهر غنت على عشها الورق
      ترقب جموع الناس من أين يأتون

      وصار استراق السمع ما هوب جايز
      وتحركت وسط القبور الجنايز
      وتلمسن لصدورهن العجايز
      واهل الكتاب من القهر ما يريحون

      ورؤيا ربيعة نصر عمرو بن عامر
      قبل ولادة أحمد والعوامر
      منها رمت فرسانها كل ضامر
      ما هيب مثل اضغاث الاحلام وظنون

      يا حمة في ظلمة في تهامه
      علم بها (التبع ربيعه) عمامه
      وعنها الف قامه ناشدوا والف هامه
      من جن وانس واهل الاخبار يروون

      طفل وهو من قبل يكبر وينمو
      له في السما كل كوكب بان يزمو
      الناس تنزل تحت والطفل يسمو
      طفل غبطه العز موسى وهارون

      (سطيح) فسرها و (شق) كذلك
      إن الممالك تنتهي للمهالك
      ويسودها ابن لإبن فهر بن مالك
      عقب اربع قرون تلتها اربع قرون

      وحلم رواه العبد عمرو بن مرة
      عن كوكب يضفي على بطن حرة
      وصوت يقول اطمر ورا كل جره
      للي لكم من غاديات الدهر جون

      ساعة ولادته اشرف الشمس ابو وهب
      ليل ولا اخطت شياطينها الشهب
      الخوف خلى كاهن من بني لهب
      يؤمن عقب شاف اسفل العرش مصيون

      ساعة ظهر نجمه كما قال حسان
      كل اليهود موقفين على شان
      نجم يزلزل حومة الشرك من دان
      وابن اخطب كنه على راس حجون

      وفي ارتجاس إيوان كسرى علامات
      طيحة وثنهم مع سقوط الشرافات
      ورؤيا راها الموبذان وهل اللات
      دلالة منها لحق ربهم هون

      وفي خبر (قس بن سعد الإيادي)
      وزيد بن عمرو واعتراض المبادي
      واربع رجال من مضر ما تقادي
      بإسم احمد لأطرف ولدهم يسمون

      في عام تسع ميه وواحد وسبعين
      تاسع ربيع اول وفي صبح الاثنين
      ميلاد اكرم من وطى القاع يا حسين
      طفل عليه الله وخلقه يصلون

      يوم انجبته امه عقب طول مسرى
      من نور وجهه شافت قصور بصرى
      وتحطمت صلبان قيصر وكسرى
      واصبح هرم فرعون ما سر فرعون

      قالوا ملائكة السما يا أمينه
      سمي ولدك احمد وحبي يمينه
      وعيذيه بالله من حسد حاسدينه
      (إنا سنجعل منه مصباح للكون)

      هذا النبي الهاشمي النزاري
      فجر سنا صبحه يبوج الغداري
      نور النبوه في محياه جاري
      مصباح أهل الأرض يا اهل الصنم عون

      في يوم ميلاده توفوا هل الفيل
      وكاهن هل البصره وكاهن هل النيل
      وشافوا هل الساحل طواقي هل الغيل
      من نور وجهه والقمر دون في دون

      في مولده يا حسين من ضمن الايات
      من أبطن الاصنام يخرجن الاصوات
      من هاتفات الجن وكل اتي ات
      ياللي تعاتب عند دمون دمون

      تقول_فاطم بنت عاص أم عثمان_:
      ليلة ولادة أحمد شانها شان
      يكاد نور منه يذهب بالاعيان
      وخفت الكواكب فوق راسي يطيحون

      لا جيت الفه باللحاف انقلب عنه
      كن الكواكب فوق تبغى تعاينه
      وصارت اواني البيت مثل الذهب منه
      وشفت الوسايد يزحفن له على هون

      يا فاطمه هذا النبي المسمى
      باكر يجيك الصبح ب(إقرأ) و (عما)
      أما من استكبر ف(نار) وأما
      من اهتدى فيبشر بتين وزيتون

      ما جا من سفاح ولا قاله الله
      جاء من نكاح حسب ما سنه الله
      يوم العرب في ملكة الشرع قله
      واغلب مناكحهم زنا لو يعودون

      هذا بن عبدالله نسل الأكارم
      والجد عبد المطلب إبن هاشم
      ابن مناف ابن قصي المغانم
      ابن كلاب الخير والخير مضمون

      وكلاب بن مره ومره إبن كعب
      ابن لؤي الحر ابن غالب الصعب
      وغالب إبن فهر وفهر مهو لعب
      وفهر لقبه قريش ياللي تعدون

      بن مالك بن النضر ابن كنانه
      ابن خزيمة إبن مدرك زمانه
      اللي ثنى دون الضعينه حصانه
      منه اهل وادي الحمض والخمض يخشون

      ومدرك هو بن الياس بن عالي الشان:
      مضر هو اول من حدا قدم الأظعان
      ابن نزار ابن معد بن عدنان
      وعدنان في اسماعيل بعد اربع بطون

      ابن براهيم الخليل بن ازر
      أهل المقام المرتضى والميازر
      خل عنك حكي أولاد بطرس وعازر
      ما هم بحوله في الشرف لو يطولون

      واترك يهود الدونما والخزريا
      لو حاولوا بأصله يحولون الأريا
      إن ما سقينا كلبهم مر شريا
      والا ترانا مثل ابو الهول ملعون

      ابن الذبيحين احمد لو تعالوا
      ياللي على جحدة محمد تمالوا
      تعالوا إلى كلمة سواء تعالوا
      وحاذور عن شمس الحقيقه تميلون؟

      يا اهل الكتاب الله عطاكم كتابه
      واسم محمد فيه ما هو تشابه
      ولا زال باق عنه بعض الكتابة
      غير اللي اخفيتوه عنا وتدرون

      يا ليتهم جهالكم بس تدري
      باللي فعلوته أول الوقت بدري
      ان كان قدني منكم اشفيت صدري
      واظهرت باطلكم لكم لو تروغون

      بأذكر بعض ما عندكم عن محمد
      في كتبكم يا اهل الصليب المصمد
      بتوراتكم وانجيلكم عن تعمد
      اخفيتوا اسم احمد مع اولاد صهيون

      اغواكم ابليس بتحريف الايات
      كتمتم الايات كتمان الاموات
      ما مات شيء فات يا ناقد الذات
      الحق باقي منه حلق ولغنون

      يا اهل الكتاب اللي حرفتم حروفه
      تحريفكم خلى عيونه بجوفه
      وتزويركم كل بعينه يشوفه
      وشلون تخفونه عن الناس وش لون

      احمد عرفتوه بعلامات جسمه
      وبكتابكم مذكور بإسمه ورسمه
      والخاتم اللي بين الاكتاف وسمه
      شفتوه شوف العين وش عاد تبغون

      حق البكورية كتمتوه عنا
      وسقتوه لأنفسكم بلا ذنب منا
      غصب علينا إن بالأمر (إن)
      وهذالصحيح وقولوا اللي تقولون

      يا أمة التوراة واصحاب الانجيل
      أحمد ذكر فيها بأدق التفاصيل
      يا مقرطسين الصبح في ظلمة الليل
      أدلتي جتكم عساكم توحون

      في سفر (حجي) من ثنين لسبعه
      جاء ذكر احمد واهل الاسلام ربعه
      وفي لفظ (حمده) في ثلاثين طبعه
      لكنكم عن كفركم ما تتوبون

      وفي سفر (دنيال) بسابع فصل منه
      حلم تحلم به وطار الكرى عنه
      حلم يأول منه ظاهره باطنه
      ما هو حكي ولادة وبن زيدون

      يوم ايحلم (دنيال) بأربع عواصف
      في وجه بحر ما يوصفه واصف
      موجه عليه اربع وحوش تراصف
      متساويات اعيون واظهور وبطون

      ليث مجنح مثل ما تذكرونه
      ودب ثلاث ضلوع حسبة سنونه
      ونمر بأربع أجنحه تاصفونه
      واربع رؤوس بلا كراعين ومتون

      ووحش قرونه أربع فوق راسه
      ثم يظهر الحادي عشر مع أساسه
      ويكسر ثلاث قرون من قو باسه
      ويصير مثل الادمي فم وعيون

      وبالكفر والالحاد يبدا يتفوه
      توه بدا وبغاية الشرك توه
      قرن براس الوحش شكله مشوه
      كنه شرب من خمرة الراس جالون

      وفجأة يجي الله فوق عرش من النور
      عرش سنا نوره تقل فت بلور
      قدمه يرى نهر من النور منثور
      حوله ملائكة السماوات يمشون

      ثم يفتحون الكتب من كل خانه
      والوحش ابو قرون احترق في مكانه
      كله يموت الا هك القرن عانه
      يدعو خلفهم للكفر لين يدعون

      يدعون من جات السحايب تشيله
      يمثل أمام الله ويرخي شليله
      ويعطيه ملك ما يوصف مثيله
      وتخضع له الدنيا اجمع روس وقرون

      هو احمد الخاتم وهو ابن الانسان
      في لفظ (برناشا) لو ان فيكم اذهان
      وتفسيرها في كتبكم خير برهان
      إنه محمد , لو تروحون وتجون

      وما قال فيه اكبر كهنة ال كلدان
      (دافيد بنجامين) قس اهل ايران
      اكبر دليل له يزوغن الاذهان
      والا على ويش اهتدي هو وخاتون

      قال :بن الانسان أحمد ما تبي شو
      روالقرن قسطنطين لابوه من ثور
      اللي بدا التثليث دورا ورا دور
      وصرتوا معه باللي ينادي تنادون

      وابليس منكم لبس اثنا عشر قس
      ثوب الخزى ما هو حرير وسندس
      يا ليت فيكم بس مثل المقوقس
      يحفظ لسانه من علوم تجيبون

      وفي سفر (شعيا) فصل ثاني وعشرين
      صفة محمد مع هل الخف والقين
      وجبال مكه والحجر والحجازين
      لكنكم عن مكركم ما تجوزون

      وفي سفر (عوبديا) وفي سفر (حزقيل)
      وفي سفر حبقوق وفي سفر (صمويل)
      واربع طعش سفر عدا كل ما قيل
      فيها احمد مذكور بالشكل واللون

      واما وفي العهد الجديد لديهم
      في كتبهم ألفين شاهد عليهم
      وماجائنا منهم سيرجع إليهم
      وقسيسهم من أكله السحت مبطون

      في سفر (يوحنا) و (لوقا) و (متى)
      وفي سفر (مرقس) والروايات شتى
      عن احمد ما يثلج الصدر حتى
      ينام طيب حال والوجه ميمون

      أحمد هو الطفل اليتيم اللي اخفوا
      ذكره, وهم في عهدة الرب ما اوفوا
      لله طفل ساعة النصر يعفو
      طفل وهو لمدورالعون ماعون

      هاك اليتيم اللي على جانب العرش
      مكتوب اسمه بأمر من يحيي الطرش
      منجي غريق الموج من عضة القرش
      في غبة سباحها ما يعومون

      وقولة (بحيرى) عنه لأقرب عمامه
      عن شأن طفل ظللته الغمامه
      عليه شاف من النبوة علامه
      وقال اجنبوا به من قبل لا تضيعون

      اللي لقت في قربه امه حليمه
      غنيمة يا كبرها من غنيمة
      وهي قبل قربه لاش خيمه وغيمه
      عيالها من شدة الجوع يبكون

      طفل ملائكة السما في فؤاده
      حطوا له الثلجه عوض للسواده
      شقوا صديره وهو طفل وعاده
      صغير ما يدري عن اللي يحطون

      هاك اليتيم اللي غشت وجهها الشمس
      ومشاعره خطر عليها من الهمس
      وبرغم ذا ما حشموها عن اللمس
      لمسة رماح ابنا عمامه لدى الكون

      وبالرغم من هذا ترضى عليهم
      وتحمل اكبر غلطة من بنيهم
      ولا طاوعه ضامره يدعي عليهم
      ولو دعى راحوا كما راح قارون

      هاك اليتيم اللي عيونه تقاطر
      رحمه لقومه كالمزون المواطر
      لعيونهم شال الأذى والمخاطر
      ما كن بلقبه من أذى سبهم لون

      في ذمتي ما في انبيا الرب مثله
      شال الأذى من لابته وسط حثله
      حبا وهم بالشين كل بعث له
      ورع يضيق خاطره كيف يرضون

      يا ويل قلبي كيف يرضون سبه
      ومثل هذا ما تجيه المسبه
      للرحمه انشا حبة فقو حبه
      وخلى عجمها مع عربها يتخاوون

      ما به نبي الا ودعى بموت قومه
      وهو ما لقى ما قد لقى احمد بقومه
      على كثر ما شينوا من علومه
      دعى لهم بالخير فيما يريدون

      اذوه في نفسه وهو ما أذاهم
      يا كثر والله ما تحمل خطاهم
      إلين ربي لأجل أحمد هداهم
      لكنهم جحادة ما يوفون

      ربي من الرحمه خلق جسم أحمد
      بثلجة في واقر الصدر تجمد
      منها عيون مدور الشر ترمد
      لا سلم الله عين ناس يتعامون

      لبعثته يشهد سواد بن قارب
      ومشارق الايام قبل المغارب
      وحمر النجوم كلابها والعقارب
      واسقف اهل نجران والكذب مركون

      وهرقل والعبد بن نوفل وعاتك
      والجن يا هاتف خريم بن فاتك
      يا مدور جرة بعيرك وشاتك
      الخير قدمك في احمد سيد الكون

      وعباس بن مرداس وراع النعامه
      وذباب بن حارث وسادن حرامه
      وشيخ الجزيره يوم يكد كلامه
      وقيصر وراع الأسكندريه وقيمون

      وهذا مخيريق اليهودي شهد له
      وحبر اليهود بن سلام قعد له
      وعيضا وابن صور كنانه وجعله
      في النار يوم اجنب عن الحق مشحون

      في عصمته قد جاء ضمن الأحاديث
      ما ينجي السرحان من سطوة الليث
      وما يروي الظميان من ساقي الغيث
      وما يوقد الجمره على راس غليون

      ربي عصمه من الحمايا وابو جهل
      بمجرد ما هو مجرد بني سهل
      غضنفر بيديه محض الصعب سهل
      عند المشاعر واهل مكه يراعون

      والله عصم عبده وهو داخل الغار
      بالخيط خيط العنكبوت ام عمار
      وانثى حمام فرخها ما بعد طار
      وقريش حوله في الفلاة يتعاشون

      وفي هجرته حاميه واليه من قرب
      بالقرم ابن عمه علي سيد العرب
      واعمى له ابصار الملاعين في الدرب
      عن جرته وقريشه جنبه يطوفون

      وابو لهب تبت يدينه وتبت
      حرمته يوم ان جمرة نارها منه شبت
      جت عند ابو بكر وهاجت وسبت
      ما تدري انه جنب ابو بكر محصون

      سبحان رب عنه اعمى بصرها
      وقريش عند الحجر هدت عفرها
      وفي حجرها ربي رماها بحجرها
      شافوه واقفوا جعلهم ما يثنون

      عطاه ربي هيبة في القلوبي
      من روعها تزول الأمم والشعوبي
      ومنها تهاوت كل دوله ولوبي
      هذي نبي الله وابا الشين مشيون

      ومن نضر بن الحارثه ربي انجاه
      في ثنية الحجون يوم الله اعماه
      لين التراب من المهانه ملا فاه
      بأسود حيايا أقرع يوم يلقون

      وربي حماه من ائتمار بن عثمان
      شيبه وهم بأسفل حنين أهل سلفان
      بشوظ نار من خلاف ابو سفيان
      كأنه البرق الذي يستخيلون

      وفي يوم أحد حلمه بكبش الكتيبه
      وسهومهم من صوبه ازرت تصيبه
      كما قال بن وقاص راعي النجيبه
      حديث اعجب من حديث يحفظون

      ومن أهل مكه وحربة سراقة
      ربي عصمه بلا جواد وناقه
      ثم بشره بالخيل تاطا عراقه
      وكنوز بابل من قوارير وصحون

      هذا الذي قال البراء بن عازب
      شفناه شوف العين ما هوب كاذب
      يا اهل العروش الباذخه والمواكب
      هذا حديث احمد والانذال يخسون

      والله عصم عبده من الهيس الاربد
      قيس ومن راس مثل راس الاسود
      ابن الطفيل وكل من ضاع ينشد
      سيفه بغمده واعور العين مدهون

      حقق دعاه الله بجنح الملائك
      والوضع من مكر اعور العين شائك
      والمؤمنين أحياء فوق الأرائك
      ولو شفتهم فوق الأسنه يموتون

      والله عصم عبده من اولاد مخزوم
      وابن المغيره بأملح السيف ملطوم
      يوم الكلاب استنهضت كنها البوم
      احمد هو القايم وهم ما يقومون

      ومن مرتزق قوم تجهز مع قريش
      ربى عصم عبده من الخيل والجيش
      اقفى كما ذاير نعام مع الحيش
      خبل يحسب ان الوغى فلم كرتون

      وعلى يهود الغدر ابنا النضيري
      ربي نصر عبده ونعم النصيري
      اهل الجدار الله عليهم بصيري
      وجدارهم جا فوقهم قبل يرقون

      وربي عصم عبده من يهود خيبر
      لو انهم مثل البراغيث واكثر
      ولو شاتهم من سمها حلوها مر
      اهل المكر في مكرهم ما يسرون

      وفي القبة الحمرا بقول ابن الاكوع
      راع الفرس سيفه بكفه تسلوع
      يسقيك يا راع الخنا كاس خروع
      لو كان بأيدك مرهف الحد مسنون

      ومن بني مية قبل يسلموني
      ربي عصم عبده بتوده وهوني
      يوم اصبحوا من هولها يركضوني
      دون الصفا من خوفهم ما يثارون

      ومن غدر ابو سفيان هو وبدويه
      الله حفظ لك يالبريه نبيه
      ربي حماه وصاحت الهاشميه
      لشوفة اللي شوفته تطرب النون

      ومن الشجاع معمر بن يزيدي
      ربي حماه وكل صايح يهيدي
      جاله على رمضا حصاها فديدي
      وقومه معه من روعهم ما يلدون

      ومنافقين القوم غزوة تبوكي
      في رقة ما بين عوشز وشوكي
      اقفى فحلهم من وحمها يكوكي
      يوم ان حذيفه والصحابه يسالون

      والله عصمه من الهوام وعملها
      ومن السباع وما دنى من اجلها
      ومن السبايا يوم تركز سبلها
      من روحوا من ضربها ما يعودون

      وعن دعاواته وسرعة لإجابه
      ربي عطاه من الدعا والمهابه
      ما لو درابه ثعلب وسط غابه
      جا لأجل يدعي له على كل محيون

      منها دعاؤه للكرام ال جعفر
      اهل الحراب الحمر رمح ومغفر
      يوم ازدحام الناس والقاع يصفر
      اضحو من المال اغنياء بلا لون
      250*300 Second
    2. *مزون شمر*
      21-12-2007, 01:41 AM

      قصيدة الله يا نور من جبال فاران - ناصر الفراعنة


      الجزء الثاني من القصيدة السابقة :

      ومنها دعاؤه للجرير بن عبده
      ودعاه للي صلفط الجوع كبده
      ولا بن زيد وملحة القول زبده
      بدعا رسوله صار قاضي وملسون

      ومنها دعاؤه لابن ابي طالب الفذ
      علي وهو لا ضاقت النفس منقذ
      قال اللهم اجعله على الحق جهبذ
      الين صار اقضى قضاة يعدلون

      ويوم ان علي امتد طول الوجع به
      سهل دعاؤه كل عسره وصعبه
      واشتد في قلب المعادين رعبه
      الين صار اسطى هل السيف شامون

      واصبحت علي لا ضيقت قائد الحرد
      واصبح خلاصة سادة السرد والشرد
      وعنه اذهب الله وعكة الحر والبرد
      ابا الحسن به في الحروب يتتقون

      وفي دعوته للعبد أنس بن مالك
      بالمال مع كثر الولد والمسالك
      يروي لنا التاريخ تأكيد ذلك
      حسبي على من للحقايق يكنون

      ولا بن هشام بل وزوجته زينب
      من فقرهم كانوا على كور جندب
      وصار بيديهم مجدب الأرض مخصب
      بيديهم الدرهم غدا اليوم مليون

      وللحر بن عوف بساعة دعى له
      حدر العياله يوم تبكي عياله
      اغنت يمينه بالدراهم شماله
      واصبح على بيت من الفقر مامون

      ومنها الثنين اللي تفرق ظعنهم
      بدعا رسوله عودوا في وطنهم
      روت لنا الأخبار منهم وعنهم
      سوالف يسعد لها كل مشحون

      واللي من الانصار يطلب حرامه
      كما روى في قوله ابو امامه
      خلاه من أهل التقى والامامه
      وعاف الزنا واللي عليه يتلاقون

      وسهم سعد ما يخطي الراس لله
      وأويس ما تخطي أبد دعوة له
      ولعمرو بن الحمق في شبة له
      ما شيف شيبه لين مرت ثمانون

      وللعود ابو طلحه وزوجته أيضا
      مات الغلام وراية الحق بيضا
      واصبح لهم مع غيضة القيظ فيضا
      ويبشرون بتسعة ما يحاكون

      ولابن قيس يوم كدر مزاجه
      طول المرض ما احد قدر في علاجه
      بدعا رسول الله تبهلل حجاجه
      وقمز كما الضرغام ما منه مخبون

      ونابغ بني جعده بساعة دعى له
      من شان قاف حزة العصر قاله
      ما طاح سن منه بايات حاله
      وعمره على المائة سنه زاد عشرو
      ن
      وابو هريره صار احفظ هل الحفظ
      قدره رفعه الله عن الجر والخفض
      ما همنا ما يزعمونه هل الرفض
      واسلافهم تشهد لابن دوس من دون

      ومنها دعاؤه للزبيب بن ثعلب
      والشاهد ابن عمرو سمره وأغلب
      اهل السريه بين حالب ومحلب
      حسامه اقوى ضرب مما يظنون

      وعن ام ابان بنت وازع وابيها
      عن جدها الواقف وشاهدها اخيها
      يوم ابنها اصبح من نوادر بنيها
      من عقب ما هو قبل ساعات مجنون

      وللقرم ابو حفص دعى بالشهاده
      لين الله اعلى في الخلايق عماده
      من رمح ابو لولو شهيد وزاده
      حب الرسول ومنكر الحق ملعون

      ومنها دعاؤه للعمى في نظيره
      يوم اشهب الايام أعمى بصيره
      شاف الصغيره والوسط والكبيره
      بدعا الرسول يشوف ما لا يشوفون

      وبن ضمرة ثعلب بقول يقوله
      الله حمى روحه بدعوة رسوله
      كم فوق سرج عبيته دش ضوله
      ويسلم وغيره في غسقها يصابون

      ومصعب ولد شيبه روى عن أبيهي
      خاف ان هوازن تغلب ابنا أخيهي
      دون الرسول اصبح سوات البليهي
      فزعه فقط, ما هو بالاسلام مفتون

      وبدعا رسول الله بوقعة حنيني
      جا للرسول اقرب من الاقربيني
      مسلم عقيدة كنه المسلميني
      ما هو من اللي للرسول يتعدوون

      ولا بن حنيف سهل من عين اصابته
      من اعين الخلق الله اشفى ذؤابته
      بدعا رسول الله ما عاد شابته
      عيونهم لو كلهم له يعينون

      وفي دعاه لمازن بن العضوبه
      ومازن عليهم من صنمهم عقوبة
      عقب الطرب وملاعبه كل لعوبه
      غير اي ربه ما سمع ما يغنون

      وعثمان بن العاص فيما رووا له
      نهار ينسى كل شيء يقوله
      رجع له الله ذاكرته محموله
      ما عاد ينسى والمخاليق ينسون

      وبدعاه بن رواحه ارتاح ضرسه
      والبارقي عروه ومن مات غرسه
      ولزيد بن ثابت يراعه وطرسه
      صاروا من الصحه على راس صعنون

      ولعتبة في فتح مكه ومعتب
      أمر له اقصى خاثر الدم يلتب
      عن معجزاته لو بنكتب ونكتب
      والله فلا نملى من البير جالون

      وما قاله الفضل بن عباس عنه
      أن الجبان بدعوته صار جنه
      بين الأسنه دايم والأعنه
      ومبطي يموت ان شاف قوم يغيرون

      ومنها دعاؤه للصحابي حذيفه
      وعلى هل الرده بوادي حنيفه
      ولشعاب يثرب لين صارت مريفه
      من دعوته ناش الحيا اوراق وغصون

      ومهرة جعيل الأشجعي من فلاها
      بدعا رسوله بارك الله نماها
      وبثنا عشر ألف وألف سواها
      بيعت وهي قبل اقصر الخيل عرنون

      ولا بن قرفه وابو عزه وغيره
      وللوليد الثاني بن المغيره
      بدعاه صار اللي شكوا منه خيره
      والحنظله صارت من الخير ليمون

      وعن ابن مخمر إبن عم النجاشي
      ساعة غدت نوقه ومعها المواشي
      بدعاه عادت جلها والحواشي
      واحيى عليها الله رجال يشدون

      وعن قتلة الساحر وعن فعل جندب
      أخبر وهندب يا ابيض القلب هندب
      من سور بغداد الى باب مندب
      بدعاه مشيون امس هاليوم مزيون

      وعن بن عنفوة الشقي وارتداده
      اخبر وعن راعي الجمل والمزاده
      وعن وقعة الحره وعام الرماده
      اخبر هله واللي عليه يتواصون

      وإبن سلمه عامر من دعاؤهخ
      لى ثمام ابن أثال ورائه
      بأبيض حسام ما تدنس نسائه
      راحوا منه مثل السكارى يهيمون

      ودعاه أن لا تعبد الناس قبره
      ولوفد بن مره عقب طال صبره
      يوم الظما يقصر من الكف شبره
      اخضر ورقهم والسحايب يهلون

      ودعا رسول الله لزوجة جليبيب
      يوم انها من جورها شقت الجيب
      يوم المنايا تخطي العبد وتصيب
      يحيى جليبيب وغيره يموتون

      وبدعاه مزق ربنا عرش كسرى
      وتخاطفته البين يمنى ويسرى
      وبدعوته يصبح مع العسر يسرا
      ويصير للعوصا ملحى وعثنون

      وعلى أهل مكه بدعوته بالقحط
      ما منهم اللي ما شحطه الفقر شحط
      تسمع لسوط الوقت في وجيههم محط
      ومنهم لحق كرباجه كتوف ومتون

      وعلى أبي رثوان عاقر تميمي
      يوم انه اعرض راحل ما يقيمي
      اصبح مع الايام مثل الهتيمي
      بقعا تغني له بدلعون دلعون

      ثم مكنه ربه من العبد نبهان
      واخبر قبل عن حال زيد بن صوحان
      وعن كم شيطان لبس ثوب إنسان
      قال لمعاذ وابن صخر يتحرون

      ونويفل بن خويلد من دعاءه
      نجى ولا ينجى دعاء سواءه
      وابن معيط عقبة من هجاؤه
      ما صاد خير وراح في الوقت مديون

      وفي بن قمئة وابن وقاص عتبه
      دعاه صار وكل حي شمت به
      وما روحت به سود الايام جت به
      في بيضها للناس مهما يكونون

      وعلى قشير في حديث بن حيده
      ربي جعله من الدهر يقلب ايده
      سيفه ولو هو من حديده جريده
      من دعوته اقبل من العجز موهون

      وعلى عتيبه سلط الله اسوده
      في صحصح بيضه تجي مثل سوده
      بدعا رسوله يوم ناموا جنوده
      تناوشته سباعها يوم يغفون

      وعلى الشقي محلم ابن جثامه
      قامت طيور الجو تنهش عظامه
      هذا جزا من لا يثمن كلامه
      عن عنتر ما اغنى ولا شيء شيبون

      ومنها دعاه لخيثمه بالشهاده
      وعكل وعرينه عقب ما هم بساده
      اضحوا عبيد شلوهم في الحماده
      تلعب به العقبان لعب ام ميسون

      ومنها دعاه لذروة المجد الاشرف
      في قتلة الملعون كعب بن أشرف
      اللي بهت اصحابه الغر واسرف
      لين اقتفى راسه من السيف شاطون

      ومنها دعاه لثابت في رجوله
      عقب العرج يقمز بها في ذلوله
      وبنت الخطيم الذيب منها رموا لهك
      راع ثم ذراع وجنوب ومتون

      ومعاويه ذو الراي والراي فطنه
      دعى بأن لا يشبع الله بطنه
      وابن الجموح ولو على العين قطنه
      بدعاه صار أول شهيد يطرون

      وتلك العجوز سبيعه الاسلميه
      راحت سبب دعوته قش صلبيه
      وابن سنان رافع والصبيه
      وقيلة بني شيبان ياللي تعرفون

      والان ندخل في ذكر معجزاته
      باللي حصل منها وهو في حياته
      وباللي لقينا عقب ساعة وفاته
      بالحق ما للحق باب وكيلون

      الشمس تحبس له على شان فرضه
      والجذع له حن قبل تاكله الارضه
      وصار العسيب حسام طوله وعرضه
      ومصباحهم يوم السرى عود عرجون

      وانشق له وجه القمر في السما فوق
      نصفين كالغرنوق في وجه غرنوق
      بعثته والساعه كما العنق والطوق
      راعي المقام اللي مقامه يغبطون

      اسرى به الله يم الاقصى من ادنى
      واصبح عن الرب قاب قوسين وادنى
      لو فيه قلنا ثم عدنا وزدنا
      من بعض حقه ما عطيناه عربون

      اللي وقف عن سدرة المنتهى خلف
      ما خاشره في ذاك واحد ولا ألف
      عند احتدام القاع من وابل الشلف
      له معجزات تذهل اللي يراعون

      سبح بسم ربه وهو لم يزل طفلي
      سوع بشر به وموسى وذوالكفل
      في البيت الاقصى صار للأنبيا حفل
      ساعة لفاهم وهم خلفه يصلون

      من شانه الأبكم نطق مع لسانه:
      إنه رسول, وجاهل في الحضانه
      ناغاه مصباح القمر في مكانه
      في المهد واعمامه لشوفه يويقون

      كم راهب شاف الغمامه تظله
      والناس عز القيظ والقيظ عله
      طفل حبيبات الحصى سبحن له
      ما هي خرافة أو علوم يجيبون

      اسم لقته قريش فوق المقامي
      منقوش نقش اغريقها للرخامي
      وعصاة ابو عبس انورت في الظلامي
      من نور احمد أنورت لونها لون

      وابن الحضير اسيد اضاءت عصاته
      واضاءت اصابع حمزة في فلاته
      والليل من فوقه مضفي عباته
      كل اصبع خطر به الناس يسرون

      ورمياته اللي تصيب دايم هدفها
      يوم السيوف من العلابي علفها
      كم صخره بإيده تزعزع صلفها
      ثابت وهم مثل النعام يتعادون

      وجبل ثبير يوم حرك سكونه
      مشيه بحرف منه زلزل ركونه
      وحرا وأحد كل له ارخى متونه
      له من عظيم الوجد خطرات يمشون

      والسدره اللي مرها وافتحت له
      والشجره اللي في الطريق اسجدت له
      مانيب الوم الشجره اللي عدت له
      وكل كائنات الأرض لو جوه يسعون

      يا ظبية في وادي الراك صاحت
      بسم احمد من وجدها لين طاحت
      ولجفرها راحت وجت عقب راحت
      باحمد ولا مثل احمد لو يمارون

      له من ملائكة السماوات عزوه
      قاموا معه في حول عشرين غزوه
      وكم من طعين به من الرمح نزوه
      بإيده لمسه وراح ماتقل مطعون

      وبكا الجمل والحجر ساعة يسلم
      عليه واغصان الشجر له تكلم
      اكرم نبي له في سما العرش سلم
      واهل الصليب اللي تسبه يعقبون

      شهد له الجني بنور النبوة
      واسلام ابو ذر بما قد تفوه
      واشفاء كف لابو بكر تشوه
      من لدغ ديبان لدى الغار يدبون

      وسدانة الكعبة بني شيبة الحمد
      بدعاه صاروا هم وهي سيف في غمد
      مفتاحها بيدنهم عمد عن عمد
      الين خلق الله على الحوض يردون

      يرى بعينه كل ما لا يرى الغير
      وصوته بلغ ما لا بلغ في الفضا الطير
      بايدينه احيي حول خمسة عشر بير
      ماهن قراح عذب ماهوب ماسون

      مماته اوقظ نومة النايمينا
      واهل القبور وروع الغافلينا
      وناحت عليه النوق في طور سينا
      وكل الملائك بأحمد جو يعزون

      ومن معجزاته صاد هي والمعارج
      واخباره بقتلة علي للخوارج
      وذكر بعض ما غاب دارج وعارج
      فيما اطلعه ربه من الغيب بعيون

      ومن معجزاته في حديث الذبابه
      ما اثبت العلم وعجز عن جوابه
      كل كافر ما ينتداوى صوابه
      لا القول معقول ولا الهرج موزون

      عن فتحنا المقدس وبلدان فارس
      اخبر وفتح الشام في شهر مارس
      من عاد يجحدها وان ابن ابو فارس
      شيء حصل كل العرب له يعيشون

      وعن فتح مصر واليمن والمدائن
      اخبر وما قاله هو اليوم كائن
      ياكم مررناهن صباحا مساء
      من غير من فيها عشاء يمرون

      أخبر بنية خمة من جهينة
      وما حكى حاطب بسوق الظعينه
      وبما نووه اصحاب مكه بحينه
      وحلت صلاة الخوف ساعة يخافون

      وعن الشقي قزمان يوم القتر ثار
      اخبر بأنه رغم فزعته في النار
      وفعلا قتل نفسه على اتفه سبب صار
      يالله دخيلك من رجال يخورون

      وعن ابن الاكوع عامر سيد القوم
      أخبر بأنه ميت ذلك اليوم
      وفعلا غدا في ذلك اليوم مرحوم
      يا عل قبره روض ورد وينسون

      وعن اهل موته وخيرة من قرابته
      أخبر بموتتهم أجلة صحابته
      وعن من استشهد وهو في جنابته
      اخبر وعن من في بحرها بيغرقون

      عمر الخلافه يا حسين الحقيقي
      احصاه في عشر وعشر بالطريقي
      مع عشر فيها يصير ما لا يليقي
      يا فتنة اطرافها ما يسبون

      وهيي خلافة الاربعه الطاهريني
      عمر وابو بكر وعلي نور عيني
      وعثمان بن عفان ناد الجبيني
      بطيبهم لازالوا الناس يحكون

      وعن هلاك ثنين من جملة الناس
      بسبة علي اخبر علي من الراس
      اللي يسبونه وهم ارذل الناس
      واللي تقدس له وهم مثلهم دون

      ياللي تسب حسين وتسب ابو بكر
      ثنينهم منا له الحمد والشكر
      لكنكم ناس بهايم واهل مكر
      في الجاهليه كنكم لا تزالون

      خلوا كلام اهل العبي والعمايم
      واستذكروا التاريخ ما انتم بهايم
      اهل العمم خلوا نساكم غنايم
      واهل العبي للكره والبغض يدعون

      واحد يكفر يحسب الدين حقه
      وواحد عطى بعض البشر فوق حقه
      مالي مع الاثنين زمل وحقه
      ماغير دايم في بعضهم يسبون

      وعن الحسن واصلاحها الفرقتيني
      اخبر وانه خيرهم أجمعيني
      وعن قتلهم في كربلا للحسيني
      اخبر واخبر عن مزقرة الافيون

      وعن ثنين من ثقيف بالاذكار
      هذاك كذاب وهذاك جبار
      مختارهم غار وحجاجهم نار
      وثنينهم في النار فيما يعدون

      ويوم رقاب العيس مثل العساوه
      وعيون اهل مكه عليها غشاوه
      انزل عليهم من إلاهه تلاوه
      اي بها كل المخاليق يقرون

      اي تعجز كل كاتب وشاعر
      تذهل عقول اهل البقر والأباعر
      قرانه المقروء عند المشاعر
      دلائل الاعجاز به لو تأنون

      يشفي من الوسواس من ظنهم ظن
      واللي سدح راسه على يابس الشن
      ويشفى به اللي فيه مس من الجن
      تلاوته تذهب حزم كل محزون

      ستر من اهل السحر واهل الكهانه
      واهل السيوف الغشم واهل البطانه
      واهل العيون الشهب واهل اللعانه
      والحسد واهل الحسد واللي يكيدون

      هذا نبي الله زين المواري
      اكرم عباد الله طريا وطاري
      تبكي عليه وحوشها والضواري
      وفيه اهل صنعا لأهل بصرى يعزون

      اشرف شريف عاش فوق البسيطه
      في الوقع المؤلم ووسط الخريطه
      عليه ثوبي بأحمر الدمع اخيطه
      حسبي على من لابن هاشم يسيئون

      هذا محمد سيد الإنس والجان
      واخير من عاشوا على الارض من دان
      منقذ بني الانسان من ظلم الانسان
      والجن من فضله عليهم يحجون

      اكرم بني الانسان جد ووالد
      وذكره مدام الناس حيين خالد
      ولا يسبه الا ضايعين المتالد
      رباتة الخنزير وابليس ملعون

      اختصه الله بالرساله وزكاه
      ليث كأن البدر طلعة محياه
      أنقذ هل الناقه وأنقذ هل الشاه
      وحثالة من حول الاصنام يومون

      يا شيب عيني كيف مثله يعادى
      ويا كيف مثله في الوعر ما يشادى
      وكيف بن عم القرد كيف يتمادى
      في سبه احمد قدمنا يا هل الشون

      هاك النبي الله يكرم مقامه
      راع المقام المنتظر والمقامه
      يا عابد الخنزير ما من كرامه
      ملعون واللي ما يعاديك ملعون

      وسبك لأحمد ما ينزل سموه
      يرفع مقامه وانت مثل المشوه
      احمد يعرفه فيكم اهل المروه
      والا انت ما تسوى ثمن كيس صابون

      يبقى محمد فوق من فوقكم فوق
      والعود باباكم من الضيم مصفوق
      حاخام خلاكم لكل شين رقروق
      لا هز راسه معه قمتم تهزون

      هذا نهاية أول اللي كتبته
      في سيرة أطهر سائر الخلق نبته
      واللي غدت به سود الايام جت به
      لا ابو رياجيل عن الحق ينحون

      أبديت ما أملى ضميري عليه
      في اول بيوت السيرة الهاشمية
      الله يجازيني بشفاعة نبيه
      لامي ولي وابوي في يوم يلفون

      يا كثر ما قصرت في حق ربي
      طرد الهوى عن درب ربي لعب بي
      مالي سوى ربي ولا غير ربي
      ينجيني اليا صرت للموت مرهون

      يا كثر من ملوا مقابل بهيجه
      وغيدا وصافيناز مدري خديجه
      وملوا كثر سجاتهم يا فريجه
      من باب بلقيس إلى سور سيمون

      هذا كلام قلت فيما اريدي
      وان كان انا زليت ما هوب بإيدي
      ماني مورخ كل حكيه وكيدي
      مانيب ابن خاقان والا بن خلدون

      وصلى الله الوالى على احمد واله
      اهل العلوم الطاهره والشكاله
      عداد ما تمطر سحايب خياله
      وعداد من في بيت ربي يلبون