قصيدة من بنات الريح - خالد الفيصل


(( من بنات الريح ))



من بنات الريح لي صفرا جفول
كنها ظبي الفلا بجفالها

منوة الخيال عساف الخيول
زينها في دقها وجلالها

زينها ماشفت وصفه بالمثول
ألله اللي بالجمال اصخى لها

تستذير كحيلتي من كل زول
ما يصخرها سوى خيالها

اذكر الله كل ماقامت تجول
واحمد الله خصني بحبالها

كنها تمشي على قرع الطبول
فتنة اللي خافقه يبرى لها

ظافي القصه على الطرف الخجول
تنكسر شمس العصر بظلالها

وصفها وصف السحاب اللي يجول
كل عين تستخيل خيالها

أو كما طاري على الخاطر عجول
صاحبه حقيقته ماطالها

كل رجل في حياته له ميول
والهوايه تمتلك رجالها