قصيدة يالشيح - حمد السعيد


ماجيت منك وخاطري فيك يالشيح
ماجيت منك الا وانا خالص منك

طرت على قلبي طواري المراويح
للديره اللي شوفها يعوضني عنك

الله اكبر كن مالك مساريح
بفياضنا ذي جرتك ذا تفننك

ماكن مريتو قنوص مصابيح
من كثر صيدي عقب الامحال مسمنك

ودعت بك ربع كرام مفاليح
بعيونهم عشق قديم لمواطنك

وانا دموعي مثل دمع التماسيح
ياموطني يالله عسى الخير يسكنك

يرزقني اللي منشي السحب والريح
وبل يخلي كل روض يجننك

واللي قعدوا عندي عساهم مرابيح
فقع وصيد وانت يالعجل مارعنك

يالشيح دوك ايدي شهب مجاريح
من قو بردك نشعلك ثم ندفنك

ولالقيت ابك الدفا وهبة الريح
كم ليلة ازرت ظلوعي تزبنك

مثلك يبي رمث وبيض صحاصيح
ياذا المسافر تو بينت معدنك

روح..وباكر لالفيتو مشافيح
والله لادسس كل ماتشتهي عنك

يالشيح ماقصدي ملل يوم انا اصيح
يالشيح شوق لديرتي وانت مازينك

يطري علي (خالد)عقب وقفة الريح
واهل دمع لو تحسه يحزنك

انا اتحضن وهم وافز واطيح
وانت السحاب وكل نجمه تحضنك