لكاعة بنات ،،،

قصة قصيرة - قصه جميلة - اجمل قصص وحكايات قصيرة منوعة مفيدة ارسال إلى Twitter ارسال إلى facebook
  1. || ღ دودة في ~ الشارع ~ ممدودة ღ ||
    29-11-2007, 09:22 PM

    لكااعة بناااات ،،،

    لكاعة بنات ،،،


    السلام عليكم



    امس كان اخر يوم من الامتحانات، طلعت من الكليه وكنت تعبانه ودايخه،حطيت راسي على المخده

    مادريت الا الفجر يأذن ، يالله يوم كامل نايمه، ياخسارة اول يوم من الاجازة ،خلصت الاجازة

    على هالحاله،صارت 14يوم،واول كانت 15 يوم ،معليش فدوه لعيوني،طبعا انا اعتبر اخر يوم من الدراسه هو

    اول يوم من الاجازه ،كان اليوم الثاني من الاجازه حافل بالافكار والتخطيط ،كيف ساقضي الاجازة؟؟؟؟؟؟

    طبعا كانت الافكار كثيره ،بعضها اني بروح للاستراحه مع صديقاتي وبروح للملاهي انا وبنات خالتي،وبرضو

    بروح للشرقيه مع عمامي ، واهلي طبعا وكالعاده ماراح يروحون لشي لان ابوي عسكري وماعنده اجازة

    طنت في بالي اروح للكويت ،جلست احن وارن على ابوي يوافقيسفرنا للكويت مع اخوي ، اخوي الكبير في اخر

    ترم له بالجامعه وخلاص كلها سنتين ويتزوج خلينا نحلله قبل لا يعلق ويروح مع مرته (انواع النذاله والاستغلال)

    واخوي يا ويلاه ويا جعله بعدي ماعنده مانع،دقيت علىبنت خالتي ..الو..هنوف.. كيفك كيف خالتي واخوانك

    واخواتك..وين بتروحون في الاجازه؟؟؟؟!!!!

    هنوف:بسم الله علينا اقول السلام سنه.

    رديت : اسفه ، سلاموو عليكوو

    هنوف :عليكم السلام

    قلت :هاه شقلتي شخبار التخطيط؟؟

    هنوف أبد والله ماهنا تخطيط...

    رديت: افا ليه؟؟؟

    هنوف :امي وابوي بيروحون لجده عشان مراجعة امي ،وانا كالعادة بجلس مع اخواني

    قلت :طيب شرايك باللي يوديك للكويت:p :p

    هنوف: هق هق شكويته بعد انتي ووجهك انتي خياليه

    رديت : وليه خياليه

    هنوف وهي معصبه : اقولك بجلس مع اخواني ، ومثلك عارف عبد الله اخوي مايعطينا من وقته ولا

    فتفوته

    رديت :اخس يارجل الاعمال ..طيب شرايك باللي يوديك.

    هنوف : اقول بلا احلام ناعمه يا ماما

    قلت: طيب شتعطيني لو وديتكم ..

    هنوف :احلىىىىىىى وديتكم مره وحده مانتيب عاقله يا كبتن الكسندر

    قلت: شتعطيني لو وديتكم؟؟

    هنوف: لك سياره بورش مع رخصه فيها اسمك وعليها صورتك ولك مني قبول في الكلية العسكريه..

    رديت : اقول .. عطيني شي سنع مو تسكيته

    هنوف :اوكي .. ورينا شطارتك شبتسوين؟؟؟

    رديت : انتي ماعليك اهم شي شتعطيني ؟

    <======= عنيده وراسها يابس

    هنوف : جهاز جوال على كيفك .. انتي اختاري .. وانا اجيب لك.

    قلت :اممممممممممممممممم يقولون فيه جهاز جديد والله انه حركه .. والظاهر انه ب3 الاف متى تجيبينه؟؟

    هنوف : اذا شفت تذاكرنا معاك..:p

    رديت : اوكي ..اتفقنا..باي

    هنوف : اتفقنا بايات.

    انا جلست افكر كيف اجرجر عيال خالتي ساره معانا للكويت.

    ( لاحظو كل هالتخطيط والتحدي والوالد لسا ما اصدر قراره)

    المهم .. رحت ترجيت الوالد وحبيت راس الوالده .. وصياح ونياح .. وشيل وحط .. انا واختي لميا .. وانا

    اقولهم ..طيب شيظركم انا كبيره بالكليه ولميا عجوز بثالث ثانوي وخلود رجال بالجامعه وحمود يجلس معك يمه..

    بعدين نبي نروح احنا وعيال خالتي ساره ..مافيها شي .. نبي نوسع صدورهم .. امهم بتروح وتتركهم .. حرام

    كذا ..(شوفو كذا الاسلوب والا بلاش) المهم كسرنا خاطرها .. وابوي لان ووافق

    الحين خلصت نص الخطه وباقي نص المشواراللي هو كيف اجيب هنوف وجريرتها؟؟

    جلست افكر كيف اقنع عيال خالتي يجون معانا ..طبعا اكيد خالتي وزوجها ماراح يرفضون

    بس المشكله من يجيبهم ؟؟؟ جلست افكر وافكر واعصر مخي وطنت في بالي فكره على كيف كيفكم!! صحيح

    انها بايخه ، وانا ماتعودت عليها بس مضطره .. انا ما اقدر اسافر بدون هنوف.

    دقيت على هنوف: هلا هنوفوه اخبارك ، علومك ..

    هنوف بخير شعندك

    رديت : عبيد يعرف رقم جوالي؟؟

    هنوف : شعبيده

    رديت : عبيد اخوك عبد الله

    هنوف : الله اكبر عابدا الله صار عبيد ..يعز من يشاء ويذل من يشاء..

    قلت : خلصينا يعرفه او لا..

    هنوف: اييييييييه ، ما اعتقد انه يعرفه .. بس نصيحتي لك لا يعرفه..

    رديت : وو .. اكيد .. مافي شك .. انا اخاف على نفسي ومستقبلي (حشا هذا دراكولا مو ادمي)

    (طبعا الكل يعرف ان عبد الله راعي حركات نص كم وبنات وخرابيط )

    المهم قلت لها بليييييييييييييز .. لا يعرف رقمي .. وان سالك عنه لاتعلمينه..اوكي..

    هنوف : اوكي

    رديت : باي

    هنوف : فمان الكريم

    سكرتها هنوف من هنا وانا دقيت على جوال عبد الله من هنا ..

    عبيد : مرحبا ..

    رديت : اهلين .

    عبيد : هلا وغلا ..

    قلت : من معي ؟؟!!

    عبيد : معاك المهندس عبد الله ..

    (مهندس حته وحده.. كثر منها .. داخل تقنيه بالواسطه وبالحسره طلع منها.. وصار مهندس..خخخخخخخخخ)

    رديت : عفوا .. اسفه .. انا غلطانه

    عبيد: لا . لا. مو غلطانه . انتي تبين مين بس ..

    قلت : ابي جوال روان.

    قال : طيب اصير روان عشان خاطرك.

    رديت : وجع

    قال : يوجع العدوين..

    قلت : خلاص مع السلامه

    طوط .. طوط .. طوط .. طوط

    طبعا قفلت الخط على طول وكنت واثقه اني بكلمه مره ثانيه وثالثه ورابعه .. بس ياليته يعجل ويدق .. وبعد

    ساعه رن جوالي

    رديت : الو .. مرحبا

    المتصل : مرحبتين هلا وسهلا

    قلت : من معي؟؟

    قال : انتي فاضيه الحين؟؟

    قلت : انت شتبي فيني ؟؟

    قال : شوفي يابنت الناس .. انا ابي جوال روان ( جالس يقلد صوتي .. ياربيييييه يسوي نفسه خفيف دم ..

    وانا ودي اعطيه بوقس يكسر سنونه )

    قلت : اقول بلييييييز .. لاعاد تدق على الرقم هذا والا ترا اغيره .

    قال : اصلا انا عاجبني الرقم وابي اشتريه ( طبعا هو جالس يتهزا فيني .. لان رقمي حوسه كنه عزبة زيود

    مالهم والي )

    قلت : اقول انت على بالك ضايق صدري او فشلانه .. صحيح ان رقم جوالك مميز .. بس صدقني ما يجيب

    الارقام المميزه الا اللي يحس بالنقص ومو واثق في نفسه .. اما انا .. مايزيد ولا ينقص من مقامي رقم مصفصف

    <=========== ميته تبيه وما حصل (عادي وسعو صدوركم)

    وبعدين .. لو ادري انك بتشتري جوالي ما ابيعه لو بمليون ريال..

    قال : طيب ادفع مليون وخمسين هلله تبيعين ؟؟

    (ياربيه ياخف دمه .. تكفون ودي بمعصاد جريش على راسه )

    قلت : اقول .. ترا بقول لاخوي عنك ..

    قال : يمه خفت .. بس حلو انا ابي كذا عشان اتعرف عليه ، واعرف هو مثلك ..

    قلت : كيف يعني مثلي؟؟

    قال : عنيد وراسه يابس ..

    قلت : لا ابد مو عنيد ولا شي بس هو يسوق وايت الصباح وبالليل يسوق باصات يعني 24ساعه نفسه في

    طرف خشمه .. واللي يتعرض لخواته .. يحجز له في مغسلة الراجحي قبل لا يروح له .. ويوصي على حفر قبر

    له في مقبرة العود ..

    قال : الله يكفينا شره .. كش برا وبعيد .. الا على فكره .. انتي بالثانوي او بالكليه؟؟

    قلت بعناد وعلى بالي كبيره وقويه : بالكليه

    قال : انا برضو توني متخرج.

    (اللهوو اكبر يا عبيد من 4 سنوات متخرج وتقول توك متخرج اه بس من يفضحك ..)

    المهم زادت العلاقه بيننا مع انها بس من يومين باديه هو يستخف دمه ويفرد عضلاته علي وانا اعاند واكابر.. لين

    جا اليوماللي قال فيه : ابي اطلب منك طلب

    قلت : نعم شتبي..

    قال : ياتقولين لي اسمك .. يا اروح ادوره في الاتصالات جوالك ومعي وخويي يشتغل هناك.

    قلت :: لا.لا .الله يخليك بقول اسمي .. بس .. اوعدني ما تسال عن اسمي الكامل لمن اقول .. اوكي ..

    قال وهو مستغرب : اوكي .. بس اسمك؟؟

    قلت : هنوف.

    قال : يالله نفس اسم اختي للي اصغر مني اسمها هنوف وهي مثلك والله .. حبوبه ومرحه ودمها خفيف .. وانا

    احبها ولايمكن ارفض لها طلب .. لانها نقطة ضعفي بالبيت .

    ( وينك يا هنوف يابنيت خويلتي.. تسمعين اخوك عبيد اللي امس انتس وياه طق وطقيق تبين كمبيوتر وهومايبي

    يجيب يقول الكمبيوتر للبنات فساد )

    (عقليته متحجره)

    المهم .. مرت الساعات .. وهو كل شوي يسال.. بدور اسمك الكامل .. وانا اترجاه لا يسال مع اني عارفه ان

    ماعند ماعند ماي قراند موذر الله يرحمها

    قال : ابي اطلب منك طلب اخير ..

    قلت : اطلب.... ويجيك يا مهنا ما تمنا .

    قال : ابي اشوفك .

    ( هذا اللي ابيك تقوله من زمان)

    قلت : لا .. سوري .. ما اقدر

    قال : وليه ماتقدرين ؟؟

    قلت : تبي الهيئه تكفشنا ؟؟

    قال : لا .. عادي .. اجيب اخوي الصغير عمره 3 سنوات ولو مسكونا اقولهم انك اختي .. وهم شيعرفهم ماهنا

    اثبات ولا شي !!

    (اه منك يا عبيد .. الحين عرفت .. كذا تسوي بنواف اخوك .. اثاريك كل يوم شايله معاك عشان مواعيدك

    المشبوهه.. اذا ما قلت لخالتي .. ماكون منوله ..)

    قلت : سوري .. سوري .. سوري

    قال : مو على كيفك .. غصب

    قلت : يعني مصر

    قال : ايه مصر ونصين وثلاث ارباع .

    قلت : معزم ؟؟

    قال : معزمين

    قلت : اوكي .. انا بروح للكويت ممكن اشوفك هناك اذا كنت بتروح وغير كذا .. نو .. نو .. نو.. نو

    قال : اوكي مافي مانع

    0هو قال كذا ولا لا .. ودي اروح واحب راسه .. اول مره يسوي شي حلو ..)

    المهم سكرتها من هنا .. دقيت على هنوف من هنا ..

    هنوف : هلا وغلا وينك يا منول من 3 ايام عنك يالقاطعه

    قلت : غصب عني ، بس اقول .. قولي لاهلك ولاخوك عبيد ان عيال خالتك منيره بيروحون للكويت ونبي

    نخاويهم .

    هنوف : وش الطاري انتي عارفه عبد الله اكثر مني..

    (اي والله )

    ولا تخليني اعيش في احلام واماني

    قلت: قولي له وشوفي والوعد بكرا .. بس .. لاوصيك .. خلي اسلوبك اسلوب ضعوف مساكين منتهكه حقوقهم

    وكثري من العياط .. اتفقنا ..

    هنوف: اوكي اتفقنا ..

    هنوف كلمت ابوها وامها وهم ماعندهم مانع بس بشرط يوافق عبد الله يوديهم ( عارفين ان عبد الله مامن وراه

    طلعات خخخخخخخخخخخخخخخخخخخخخخخ)

    يوم جا عبد الله ودخل البيت .. نقزت هنوف واعطته كاس مويه بارد .. وقالت: هلا عبد الله اخيي كيف حالك

    شعلومك شخبار الشغل ..

    عبد الله : اخلصي شعندك شتبين ؟

    اعوذ بالله .. جفس مع اخواته ..ومع بنات خلق الله .. ولا انبل رجل في الدنيا )

    (وعععععععععععععععععع على هيك اشكال )

    هنوف : شوف عبد الله .. انت عارف ان امي وابوي بيروحون لجده وانا ورنا ونواف لا يمكن نجلس لحالنا هنا

    بالرياض ..خاصه ان عمامي كلهم بدبي وخالي ماجد بلبنان وعيال خالتي منيره بيروحون للكويت .. وهم يبونا

    نخاويهم

    عبد الله : منهم ذولا ..

    هنوف : عيال خالتي منيره

    عبد الله : يعني احمد بيروح معاهم

    هنوف وهي مبسوطه : هو اللي بيوديهم ..

    وعلى فكره امي وابوي ماعندهم مانع اذا انت ماعندك مانع تودينا .. يعني تكفى .. الله يخليك خلينا نروح .. يعني

    يرضيك نجلس الحالنا بالرياض كن ماعندنا اهل .. مثل الايتام .. (وجلست تصييييييح) تكفى عبد الله .. الله

    يخليك ويوفقك .. خلينا نروح مع خالتي

    عبد الله : اوكي .. مافي مانع .. بس لاتقولين مع خالتي قولي مع منال بنت خالتي .. ونروح بس بشرط ..

    مانطول هناك .

    هنوف نقزت وحبت راسه : : ولا يهمك اسبوع لو بغيت .. بس.. انت ودينا


    عبد الله : اوكي زهبوا اغراضكم بعد بكرا ..


    هنوف ما توسعها الدنيا .. راحت وقلت لمنال عن اللي صار .. ومنال مبسوطه بنجاح خطتها المهم .. راحو الجماعه للكويت .. طبعا البنات في سويت والأولاد في سويت .. منال وهنوف انبسطو .. وهنوف إلى الأن وهي ما تدري شلون منال اقنعت عبد الله شلون ؟؟ وكيف ؟؟؟ الله أعلم . ومنوله تقول أهم شي انك بالكويت .. المهم منال مستمره بالمكالمات مع عبيد .


    عبد الله : هاه هنوف الحين انا بالكويت متى اشوفك ..
    منال : أوكي بعد خمس ايام بنروح لسوق شرق نتقابل هناك ..
    : يؤ .. خمس أيام .. لا ما يصير كذا .
    : عاجبك أهلا وسهلا مو عاجبك دور على غيري .
    : الشكوى لله خمس ايام خمس ايام أهم شي نشوفك .
    قلت : ها مابي احد يكون معاك اوكي
    قال : اوكي من عيوني انا كم هنوف عندي
    قلت : هنوفتين
    قال : ههههههههههههههههه ماشاء الله عيني عليك بارده تتذكرين لحد الحين ؟
    طبعا كنت انا مخططه ان اليوم اللي بنتقابل فيه بيكون هو اخر يوم لنا بالكويت .. عشان مايزعل عبد الله ويعاند ويرجع للرياض .. واجلس بها الحالي..
    المهم .. جا بعد خمس ايام ، كان عبد الله هذاك اليوم مبسوووووط ، راح الصباح للساونا وحلق وكشخ
    ( حشا صار معرس في ليلة دخلتو )
    ومنال تشوفه وهو كاسر خاطرها وتقول ( ليتك ماتتعب ، حوستك عارفينها ، وشهابتك ماهي غريبة علينا ، بلا كشخه بلا هم)
    بس والله منال انبسطت ان في احد يكشخ ويتعب عشانها
    يوم اذن العصر .. وصلوا .. بدا عبد الله في الصجه .. بسرعه .. عجلو .. ويدق على البنات
    قال : يالله اجهزوا ..لا تقطعونا
    هنوف : وين العزم ؟؟؟
    قال : سوق شرق
    هنوف تقول لشلتها السالفه
    قامت منال تعاند وتقول: قولي لاخوك مانبي نروح له اليوم نبي نروح للبحر وبكرا نروح للسوق
    قال: تبون تروحون اهلا وسهلا ماتبون نروح احنا وانتم اجلسوا هنا
    هنوف : لا .. خلاص .. الشكوى لله .. نروح معاكم
    ( ماتلاحظون .. اول مره تصير .. البنات مايبون يروحون للسوق .. والاولاد يبونه .. تصير باكبر العوائل..خخخخخخخخخخخخخخخخخخخخخخخخخخ)
    المهم .. راحو مع بعض .. الاولاد قالو : يالله انتم روحو لحالكم ولمن نخلصون بيننا جوال اوكي..
    البنات : طايب ( الله من شين النفس )
    تفرقوا ، الاولاد في جهه ، والبنات في جهه ..
    راحت منول ودخلت واحد من المحلات تبي تتهرب من شلتها شوي عشان تتكلم براحتها .
    دقت على عبد الله
    عبد الله : هلا وغلا ومرحبا ..
    منال : اهلين
    عبد الله : الكويت منوره
    منال بوجودك
    عبد الله : ها وصلتو ؟؟
    منال : شدعوا .. احنا ما تواعدنا اليوم في سوق شرق .؟؟
    عبد الله : انا الحين بوسطه .
    منال تستخف دمها : وانا تحت سقف احد محلاته
    عبد الله كن الدنيا فتحت ابوابها له: هاه وين القاك ؟
    منال : مو الحين .
    عبد الله: مو بكيفك .. الا الحين .
    منال:لا .. نفسي اتمشى مع اهلي واخواني واخواتي (انواع المذله )
    عبد الله : مالي شغل تصرفي .
    منال : طيب بعد المغرب اوكي؟؟
    عبد الله : الله يصبرني .. ولو اني كل ماشفت بنت بجلس افكر .. هو انتي او لا..
    منال : ههههههههههههه ... ان كنت شاطر بتعرفني واتحداك تعرفني
    في اللحظه هذي دخلو لميا وهنوف ورنا ومعاهم نواف ..
    منال : اوكي انا الحين محاصره .. بعد المغرب في الكوفي الفلاني
    عبد الله : اوكي.. بس كيف بتعرفيني؟؟
    منال : بيننا جوال يا ذكي
    عبد الله : اتفقنا .. انتبهي لنفسك
    البنات: من تكلمين يا منول ؟؟؟؟
    منال : خويتي مها .. تقول عيدكم مبارك .. ياحليلها .. توها تصحصح..
    ( اييييييييييه هين بس .. مها.. خخخخخخخ .. يا حبي لك يامها مادري ليه جيتي في بالي ولزقتها فيك ؟؟!!:p المهم يوم اذن المغرب .. راحت منال تبي تتهرب من شلتها .. راحت ..نزلت ..طلعت ..دخلت ..لما ضيعتهم ..المهم شلتها زهقوا منها ومن تهربها ..وقالو متى مابغتنا تدق علينا ونروح لها .
    راحت منال ودقت على عبد الله واتفقت هي وياه انهم بيتلاقون في الكوفي الفلاني
    قال عبد الله : اوكي انا الحين موجود فيه ولما تدخلين بتعرفيني على طول ..علي ثوب ابيض وشماغ وعلي نظارات لونها موف
    ( يا مصلك انت ونظاراتك .. مايدري ان عدوي اللدود تقليعات الشباب )
    المهم قالت منال: عبد الله
    عبد الله : سمي
    منال : ابي اقولك شي ..
    عبد الله : قولي .. امري ..
    منال : بس اوعدني ماتزعل
    عبد الله استغرب .. وضاق صدره وجا في باله افكار شينه قال لها ونبرة صوته متغيره : لا تقولين انا مو بالكويت
    منال : الا والله انا بالكويت وعندك بعد ..بس .. ابي اقول لك شي ..بس اوعدني ماتزعل .
    عبد الله : اوعدك.
    منال : احلف بالله .
    عبد الله : احلف على ايش ؟؟
    منال : احلف ماتزعل .
    عبد الله : ( والله النشبه ) والله ما ازعل عليك .. ولو يا هنوف .
    منال : اوكي .. انا داخله عليك الحين .
    وفتح باب المقهى .. وكان الجو هادي على غير العاده .. راحت منال وهي متجهه لطاولة عبد الله .
    عبد الله لما شافها صنج .. منال سحبت الكرسي وجلست وبكل برود : سلامو عليكم
    عبد الله :و عليكم السلام
    منال وهي خايفه ومرتبكه وفشلانه : كيفك؟؟
    عبد الله انتي كيفك
    منال : ماعرفتني ؟؟
    عبد الله : لا .. بس شبهت عليك
    منال : لا .. ماشبهت .. اناهي
    ( ملاحظه : منال كانت متنقبه )
    المهم منال: عبد الله اعذرني اني لعبت هاللعبه
    عبد الله وهو يقاطعها : اخر ماتوقعه انه تكوني انتي يامنال .
    منال والدموع تتجمع في عيونها من الفشيله : والله العظيم .انت اللي اضطريتني استخدم الاسلوب السخيف اللي اناماتعودت عليه .. والحين .. انا استاذن
    عبد الله : لا .. يا منال
    منال : لا .. ايش ؟؟؟
    عبد الله : انتي بديتي اللعبه .. وانتي جنيتي على نفسك .. ودخول الحما م مو مثل خروجه..
    منال طاحت على الكرسي وهي متخرعه : كيف يعني ؟؟
    عبد الله : يعني اللعبه ما انتهت مثل ماقلتي ..
    منال عاندت وكابرت مثل عادتها وقامت وطلعت .. والكل بالمقهى يطالعون فيهم ( شكلهم شبهه والله )
    المهم جلس عبد الله وبعد نصف ساعه طلع ، ومنال راحت مع البنات وكانت طول الوقت ساجه وتفكر يعني معاهم وبالها مع الاولاد ..
    لما طلعو ..راحو للفندق يرتبون اغراضهم لان موعد الاقلاع 11الصباح .. يوم رجعو للرياض .. كانو امها وابوها في الاستقبال .. وهنوف واخوانها تقابلو مع امهم وابوهم في المطار ..طبعا كانو توهم جايين من جده
    اما الاتصال بين منال وعبد الله متوقف .. ولو دق عبد الله ماردت منال عليه ..
    وبعد اسبوعين من الرحله .. جا عبد الله يتميلح عند امه..
    عبد الله : اقول يمه
    الام : سم وانا امك
    عبد الله : يمه كم عمري الحين ؟؟
    الام : اسم الله عليك 27 يا وليدي
    عبد الله : تعرفين يمه خويي منصور؟؟
    الام : ايه اعرفه .. شلون امه واخوانه
    عبد الله : الحمد لله ..كلهم تمام ..بخير..بس مادريتي ان ملكته بعد اسبوع
    الام : ماشاء الله .. الله يوفقه ويسعده ويمهل له .. وانت ياجنيني ليه ماتغار من هالعالم اللي يعرسون ..ليه ماتاخذلك بنت سنعه وتصير رجال؟؟
    عبد الله : والله فكره ماهيب شينه :p
    الام طارت عيونها : خلاص .. اليوم اخطب لك
    عبد الله مستانس متشقق : من تخطبين لي يمه
    الام : البنات واجد
    عبد الله : لا يمه .. انا ابي وحده حلوه وبنت ناس صح
    الام : ابشرمن عيوني بس اركد وانا امك وراك كنك متشفق على العرس
    عبد الله طاح وجهه : لابس اشوف .
    الام : ليه انت في بالك احد ؟؟؟
    عبد الله : لا ابد .. بس اسالي هنوف يمكن تعرف احد .. او شي ..
    الام : هنوف ماوراها الا الدجه وانا امك ماعندها الا ريم ومنال وخلود
    عبد الله : بس وصلنا خير
    الام : وشهو وانا امك
    عبد الله وهو مستحي : ابي منال بنت خالتي
    الام : هاذي الساعه المباركه وانا امك .. بس منال ماهنا ركادة .
    عبد الله : احسن يمه عشان اركدها انا وماتروح لناس ثانين وتفشلنا فيهم ( ايه هين بس )
    الام وهي تضحك : ايييييييييييه ابشر على خشمي بس نشاور ابوك فالاول ..
    .................................................. ..
    بعد ثلاث ايام جت الام لمنال
    وبدت خطبتها المعهوده
    منال وانا امك الحين انتي كبرتي وصرتي عروس ( متاثره بالمسلسلات ) وترا خطابك كثروا والله فشلنا من كثر مانردهم ولاتتعذرين بالدراسه وانا امك الدراسه تقدرين تكملينها وانتي في بيت زوجك .د
    منا صكها راسها : يمه جعلك في الجنه ووالديك اذا تخرجت يكون خير .ولاعاد تفتحين هالموضوع تكفين
    الام : شوفي وانا امك جايك واحد سنع ولد ناس وتعلم وحليو وبيعجبك .
    منال : شسمه يمه (الله من زين الاسئله ...بلا والله التفكير )
    الام : وانتي شتبين باسمه
    منال : يمه صراحه اخاف يجيني واحد اسمه خلفه وغير شكل .. والله فشله .. وابي انا كذا ..
    الام قاطعتها : لا ابشرك اسمه يهبل ومن ازين الاسامي .. بس فكري زين وانا امك قبل لاتردين
    منال : طيب يمه من هو ؟ من ولده ؟ وشهي شغلته؟
    الام : يعني تفكرين مثل الاوادم او تلعبين .
    منال افكر يمه
    الام : طيب وانا امك تراه هو
    منال: ايه
    الام : عبد الله ولد خالتك
    منال : هاه
    منال طبعا اعجبتها الفكره .. وعبد الله مهوب شين ..بس راعي بنات..
    ..................................................
    الام تنادي : منال التليفون
    منال :مين يمه
    الام : هنوف
    منال : هلا هنوف
    هنوف : هلا والله وغلا منول وش الحركات هاذي بتصيرين مرت اخونا :p
    منال طاح وجهها وخنقتها العبره من الفشيله والروعه : وش مرتخوه الله ياخذك
    هنوف : شوفي يامنال ترا عبد الله يسلم عليك ويقول خذي رقم جوالي الجديد لانه غير حياته الاوله وبدا حياة جديده بشكل جديد
    .................................................. ..
    بعد شهر كان يوم الملكه دخلت منال على عبد الله ةابتسم ابتسامه لين صارت خشته من اذنه هذي الى اذنه هذي وهو منبهر من شكلها
    قال عبد الله : انتي ليه مافكرتي نروح للكويت من زمان ؟؟؟مو حسافه يروح العمر كذا ؟؟
    منال وهي مستحيه وفشلانه : يعني انت لازم تبي احد يصحيك من سباتك ؟؟
    عبد الله يستدرك : وانا قلت لك من قبل دخول الحمام مو مثل خروجه


    منقووووووول لعيوونكم ،،





    عاشقة الجوري
  2. وزير السلطان
    01-12-2007, 07:49 PM

    لكاعة بنات ،،،


    ألف شكر أختي الغاليه على النقل المميز
    يسعدك ربي
  3. رحاال
    01-12-2007, 11:31 PM

    لكاعة بنات ،،،


    يسلمو على النقل
  4. maisem
    04-12-2007, 06:02 PM

    لكاعة بنات ،،،


    يصراحة القصة أكثر من روووووووووووووووعة
    مشكورة على النقل
  5. || ღ دودة في ~ الشارع ~ ممدودة ღ ||
    04-12-2007, 07:41 PM

    لكاعة بنات ،،،


    جزاكم الله خيير ع المرووور


    نورتوا الموضووع
  6. مودي مووون
    05-12-2007, 09:55 AM

    لكاعة بنات ،،،


    روووووووووووووووووووعه ه القصه
  7. || ღ دودة في ~ الشارع ~ ممدودة ღ ||
    05-12-2007, 10:19 AM

    لكاعة بنات ،،،


    مشكوور اخووي المروور
  8. ღ~ باسكنr روبنز~ღ
    06-12-2007, 12:30 PM

    لكاعة بنات ،،،


    مشكوووووووووووووووووووووووورة ...

    قصة حلللوة
  9. ..Amonty..
    14-10-2010, 10:42 PM

    رد: لكااعة بناااات ،،،

    لكاعة بنات ،،،


    مششكووورررر على القصصه
  10. ح ـكآية
    15-10-2010, 09:19 PM

    رد: لكااعة بناااات ،،،

    لكاعة بنات ،،،


    الله يعطيك العافيه