ديوان الشاعر ثامر بن شبيب

قصيدة حبيبة صاحبي





يابنت هذا صاحبي واقرب الناس
تبين اخونه بكل بساطه عشانك

والله لو انك خلقتي من الماس
وصرتي بعين الكل شيخة زمانك

ان صاحبي يبقا مكانه على الراس
وانتي حبيبة صاحبي في مكانك

وشلون ابادلك المشاعر والاحساس
واسرق من ايدينه غلاك وحنانك

وانا ادري ان حبك بقلبه بلا قياس
وانتي تخونين الوفا يوم صانك

تخيلي انك مكانه على ساس
مع اقرب انسانه غدربك وخانك

يسهر معاها طاردن نوم ونعاس
في منظرن لو صار زعزع كيانك

شفتي شلون ان موقفك حيل حساس
شفتي شلون انه قليلن امانك

مثل الكبير اللي صغر حيل وانداس
انتي نزلتي من حترامك وهانك

لكن انا ببقا وفي لقرب الناس
ماني بخاين في رفيقي عشانك

؛
؛
؛
 
قصيدة المكان



المكان اللي لنا عاده لنا
ماتغير للمكان ولا الزمان

بس غبت وجبت من غبت العنا
وصرت اسولف للمكان شلون كان ؟

اتنزح من هنا ليما هنا
لين انا ماضقت وضيقت المكان

صرت احس اني انا ماني انا
طبعي القاسي نسى نفسه ولان ‍‍‍‍

من عذر لو قلبي الصلب انثنا
فاقد(ن) لي شخص غالي من زمان

انت تدري عنك انا مالي غنا
بس مدري ليه تبخل بالحنان

وين اولي كل ماليلي دنا
وقمت اهوجس ليه خلاني وخان .؟

اتذكر كيف نجلس كلنا
في ركن واحد ولا ضاق الركان

كان موعدنا ثمان مع الهنا
وكنت انا دايم اجي قبل الثمان

صاحبي ماقول غير الله لنا
لاغدى مالك ولا الدنيا امان

؛
؛
؛
 
قصيدة جمر المفارق



جمر المفارق بالحشا شهور واقد
القلب عقبك كن يحمس بمحماس

تدري وربي كني الكون فاقد
من غبت عني كن ماني مع الناس

طيفك يمر دايم علي وانت ماقد
مريت في دربي مع الدرب عساس

مليت وحجاج الزمن دوم عاقد
تعال فله مابقا داخلي باس

دنيا بدونك عافها القلب ناقد
من كثر ماشاف الكدر والتعوماس

بعض العرب كنه على الكبد راقد
والمشكله يدري ولا عنده حساس !!!!

شكله متعمد داخله قلب حاقد
وده يضايقني وانا ضايق الراس

ياصاحبي والله احس كون فاقد
فاقدك وكني فاقد جملت الناس
 
قصيدة حبيبي روح


حبيبي روح لاتقعد عشاني لابغيت تروح
اذا ماعاد لك حاجه بوجودي لا تجاملني

عشاني .. لا عشان الملح والعشره ياروح الروح
اذا دمي ثقيل اصبح بعينك ماتحملني !!!

تخير بالدروب وكل درب يعجبك مفتوح
وانا لا رحت عن عيني ابلقا من يوصلني

تعذر لا بلاش انك تعذر ابتعد مسموح
تراضيني سنين البعد كان البعد يزعلني

علي لا ينشغل بالك ولو كلي غديت جروح
تهملني ربع واحباب والله مايهملني

ترى اصعب شي بالدنيا اذا صار الغلا مذبوح
بقلب اللي تحبه وعاملك باللي تعاملني

احبك شي .. وشي ثاني خطاك ان قلت لك مدموح
تجاهلني وتبي ادمح خطاك انك تجاهلني ؟

احبك لو على قلبي دلالك ترتكي وتفوح
هذاك اول زمانن فات قبل انك تبدلني

بحب اللي تحبه صرت تنطر شوفته مشفوح
انا ادري من عيونك تفضحك لوك تظللني

اشوفه في عيونك .. ياعيوني في سماك يلوح
اخذ نفس المكان اللي لجل يوصله نزلني

حبيبي روح لا تقعد عشاني لابغيت تروح
انا ادري منت في حاجة وجودي لاتجاملني !!!
 
قصيدة البلوتوث

ياصاحبي لجلك شريت البلوتوث
عشان اصير انسان مثلك معاصر

كنت احسب انه لخدمة الناس مبعوث
اثره خراب بيوت شر مقاصر

ياجعل ماهو لجيل الاسلام ماروث
اكبر خطر للجيل هذا يحاصر

شي يخلي راكد العقل ملهوث
واللي يناصر صاحبه مايناصر

افه تحرث بقاع ماهوب محروث
تشوف فيها رقص هز الخواصر

يفرحبها جاهل من الجهل محثوث
ويلقابها كمل المهابيل قاصر

والحين دام ان الحدث صار محدوث
يارب ثبتني من عصار عاصر

وياصاحبي مابيك ولابا البلوتوث
ولابا اصير انسان مثلك معاصر

/
/
/
 
قصيدة منت اختياري



تعال ارسم على وجه الزمن بسمه
عبت من دنيتن فيها الحزن ضيفي

القلب ضاق بجفاك ومل من جسمه
صبرت مير الصبر كسر مجاديفي

مرت سنه !!! والجدار معلق الرسمه
اخر هداياك وكانت بأخر الصيفي

ايام كان الخيال يداعب النسمه
صنفت جزل القصايد قبل تصنيفي

عشيتها من جزال افكاري الدسمه
غلفتها في يدي وختمت تغليفي

وان عودت للغلا والله منحسمه
هالمسأله شرفت من غير تكليفي

غلاك عانه وسم في داخلي وسمه
مكتوب فوق الوسم ( اغلا مواليفي )

منت اختياري ولكن صرت لي قسمه
الله كتب لي احبك ماهو بكيفي

عاد انت يالله تعال ورجع البسمه
مليت من دنيتن فيها الحزن ضيفي

/
/
/
 
قصيدة اخير انسان

يتلني قلبي على هرجتك تل
واجي اسولف لك ولو ماسئلتي

كنتي اصغيره .. بس اغلا من الكل
كنت اتامل خير لامن كملتي

لكن خساره مانفع : ياعسى وعل
صرتي مثل ورده .. كبرتي وذبلتي

انتى وصلتي مرحله مالها حل
اتفه سبب لا من حصل لك زعلتي

انكان قلبك من تعب عالمي مل
محد جبرك انتى بكيفك دخلتي

ابعتبر نفسي مثل غادي دل
وانتى معايه .. مانجحتي فشلتي

مرضى عليك ولا على نفسي الذل
اعادلك بالروح مهما عملتي

انا اخير انسان .. في حقك يزل
اموت ‍‍‍.. وانتى بشيمتي مانخذلتي

انا عطيتك ما تعذرت بالقل
وانتى بقول الحق فيني بخلتي

انا رسمتك غيمة للبشر ظل
اعلا مكانه في حياتي وصلتي

كنتى بمكانن مرتفع تحتك الكل
لكن خساره من مكانك .. نزلتي


/
/
/
 
قصيدة غلطة حياتي


لا تنصدم ماعدت شي بحياتي
كلك على بعضك كرهتك وعفتك

مابيك لو انه وجودك غناتي
حذفت انا اسمك من سجلي وحذفتك

صارت حياتي معك تشبه مماتي
مافيك حاجه طيبه لا وصفتك

عمر الخطا ماكان نوع بصفاتي
حتى مشيت العام دربك وشفتك

انا غلطت بحق نفسي وذاتي
غلطه بدت من يوم جبتك وضفتك

داخل خفوق حط حبك مناتي
كبرك في عيني وجيت وعرفتك

وصرت القريب اللي .. شتاته شتاتي
جرفتني كلي .. وكلك جرفتك

لكن خساره منت كفو لسواتي
اللي حصل بين رداك وكشفتك

تدري بصراحه ايش غلطة حياتي
اني نزلت لمستواك وعرفتك

/
/
/
 
قصيدة ارفعك بيدي لسما



لاجيت افكر بالوجيه المفاليح
وفرقت بين الناس عالي و واطي

فكرت بك ضمن الوجيه المشافيح
متقلطن ببساط ماهو بساطي

علاقتي وياك تحتاج توضيح
من شفت في بعض الامور اختلاطي

مثلك خطا يحتاج وقفه وتصحيح
بين مثل تفريق ماخذ وعاطي

ربيت من صغري على هبة الريح
ولبست لي ثوبن كمومه اخياطي

يوم انت تلعب في يدين المراجيح
انا انطح الضيفان وافرش سماطي

ماعابني لاصرت ظمن المجاريح
اغلا جروحي بين الاظلاع ساطي

العيب لاسقت القدم دون تصريح
وخليتها بدرب الرديين تاطي

والمشكله انك تحرث النار وتصيح
اركد قبل لافك عنك رباطي

خابرك ماتبعد قريب المراويح
زايد عن العالم بكثر الهياطي

اكبر طموحك لاتعطرت بالريح
تطلع تمشى بين شاطي وشاطي

عندي سؤال وخابرن فيه تجريح
لكن ضروري تسمعه بأنبساطي

ارفعك بيدي لسما ترجع اتطيح
قلي شسوي فيك لا صرت واطي .؟

/
/
/
 
قصيدة ليلة افراق

الليله هذي واضحه ليلة افراق
حاولت اعديها وعيت تعدي

اظروف ماتنطاق ولا راح تنطاق
صد القدر ماهو بصدك وصدي

تعال اخذني بين اياديك مشتاق
قبل انتفارق حط يدك بيدي

بجلس معك ساعه حبايب وعشاق
من بعدها كيفك ولو صرت ضدي

فيني خليط اشواق باشواق باشواق
واصل معك من كثرت الشوق حدي

ودي ألمك واحضنك حضنت عناق
ياشيب عيني كل ماقلت ودي

في خاطري ‍.. وش خاطري ؟ خاطري ضاق
الكون كله ضاق ماهو بقدي

حتى الدموع اللي استحت كبر واخلاق
تساقطت من فوق خدك وخدي

لوحة شعر تبكي على بيض الاوراق
بيحت فيها من ردى الحظ سدي

ليلة جفا وافراق مامثله افراق
حاولت اعديها وعيت تعدي

/
/
/
 
قصيدة اضحك حبيبي




راسك علامك رافعه يوم احاكيك
الضاهر اني فوق حجمك عطيتك

لحظه .. نبي نرجع دقيقه لماضيك
بذكرك في أي حاله لقيتك

كان الضياع ودمعتينك تخاويك
منهار وفي عز انهيارك خذيتك

وارخصت عمري لجل احبك واداريك
هدمت قصر الذل فيك وبنيتك

كان الغلا شمعه تنور لياليك
لو اظلمت دنياك جيت وضويتك

يالاسف كنت امدحك وافتخر فيك
رفعت من شانك وعليت صيتك

كنت انت .. عندي غير مقدر اخليك
اموت واحيا ان قلت سم وفديتك

واليوم اشوفك خنت حتى مباديك
صغرت في عيني وانا اللي هويتك

الضيف لو انه عدو معاديك
غصب عليك تقدره وسط بيتك

ياصاحبي بتموت ماني براجيك
واشره علي انكان حتى طريتك

لاصار ذل النفس في قلب يغليك
يلعنك ياقلب عشقك وشريتك

اضحك حبيبي دام وقتك مسليك
بكره تموت من القهر لا نسيتك
 
قصيدة فيني بدوي


لاتسئليني عن سبب ضيقة البال
مبطي وانا ماذقت طعم السعاده

ظروف خلت حالتي ماهي بحال
كافحت ليما مابقت بي إراده

بنيت لي في عالم الصبر تمثال
وباد الزمن تمثال صبري إباده

حاولت اوسع خاطري بلعب الاطفال
وكل ماسليت شوي ضاقت زياده

لو المشاكل حلها الدمع لا سال
استغفر الله .. صار دمعي عباده

لبكي بكا .. ضيقه ولوعه وغربال
مابكي بكا .. خوف وذل وشراده

يابنت .. وديار البدو عشب ورمال
ومسرى بليا شور كله جهاده

وانا سريت بوادي فوقه جبال
الحر ماشاف الشبك يوم صاده

فيني بدوي طبعه ورى الخير رحال
اكثر مقيمه فوق مركب شداده

يشد وينزل كل فتره بمنزال
قربه صعب جدا وسهل ابتعاده

ان قال فرقا .. ماتراجع اليا قال
ماتقدر الدنيا تكسر عناده

فينا الولد .. يسوا ثمانين رجال
فينا الكرم .. خلقه وسنه وعاده

وبالعشق اخذت اللي مواصيفها ثقال
في زينها ماهي بحاجة شهاده

حبيبتي .. مازينوها بسلسال
من زود ماتبرق تضيع القلاده

اسود شعرها .. للبست فوقه الشال
الشال الاسود .. ينصدم من سواده

ارجولها خلخال .. من دون خلخال
خلقتها لفت انظار .. ماهي عماده

لو نفترض مرت على شارع الجال
فاض البحر يشكي عليها وداده

الارض تهتز حدرها هز زلزال
زلزالهاتعشق حدوثه بلاده

فيها الحلا .. عايل على كلها عال
ان سولفت بالليل انسى رقاده

بس المصيبه حظك الشين لا مال
اليارقد يابعد والله قعاده

وانا مع حظي .. بعض ناس عذال
زادوا علي .. من النكاده نكاده

صحيح انا عايش .. ولو الحزن طال
الحمد لله والشكر والشهاده

الفضل لله .. عزني بكل الاحوال
ماذلني بحاجه تشمت إعباده

مير البلا ضيقات الوان واشكال
لاجني خلني طريح الوساده

هذ انا . ياناشدتني عن الحال
من كثر ضيقاتي نسيت السعاده

/
/
/
 
قصيدة ملح القصايد

ملح القصايد حدني لشي مابيه
ووردت له حمل الركايب لحالي

له هقوة(ن) فيني ولي هقوة(ن) فيه
والغالي مايشره على غير غالي

اموت والله قبل اخيب هقاويه
لو احتمل شي(ن) يفوق احتمالي

انا من اللي ذراع الايام تلويه
جماعة(ن) مافرقتها الليالي

عمي وخالي للشرف راس ووجيه
من طيب مجنايه عمامي خوالي

ناس اتذكرها .. وهي ماهي هنيه
وناس اتناساها .. ولو هي قبالي

اشد طعنات الزمان وبلاويه
طعنت ضهر بيد الرفيق الموالي

بيت(ن) لفاه الضيف عيا يعشيه
يعل ماتلفي عليه الرجالي

الشعر تشتاق لخيالي معانيه
شوق القصايد للبيوت الجزالي

حقه علي .. مثل الخوي يوم اخاويه
ارفعه فوق النايفات الطوالي

لعيون من راسه على القلب راكيه
اللي فدا قربه حلالي ومالي

اني لسوي شي محد(ن) مسويه
ان شافه العاقل يصيبه هبالي

وان عودت يم الغلا شلون مغليه
لا صار له كل الغلا اول وتالي

يخطي على قلبي ولا قلت له ليه
وكل ماجرحني قلت له لا تبالي

فداه لو تل المعاليق بيديه
ثم حط له بين الحنايا مجالي

لجل يتخطا عروق قلبي برجليه
ويعضد يدينه بالضلوع متعالي

دامي احبه حيل .. واعشق طواريه
خله يتل القلب كل ما طرالي

ملح القصايد حدني لشي مابيه
ووردت له حمل الركايب لحالي
 
قصيدة ياناشدن ساحات الاعلام عني

ياناشدن ساحات الاعلام عني
ارتاح من كتب الرسايل بالاقلام

مبعد عن الساحه وغثاها لأني
شاعر حقيقي ماني بحاجة اعلام

الشعر احسه قطعت انسان مني
كبرته بعيني على مر الاعوام

كتبت كل اللي احسه وكني
اترجم احساس المخاليق بالهام

ومن شفت جنيه لشاعر وجني
عرفت ان المسأله صارت أوهام

تركت شعار المجنن تغني
على لحن: ياشاعر الناس نيام

ولجروح قلبي قلت: في صمت وني
ماودي تسمعها الاماني والاحلام

ظنيت في شعري ولاخاب ظني
حشمته سواة الرجاجيل الاحشام

للمقفيه ماقلت تكفين حني
ادوس ماضيها مثل دوس الاقدام

و للشيخ ماقلت الركايب تعني
ازين اسلوب المدايح لحكام

وعن الملحن والطبل والمغني
حرمتها بحكم الشريعة بالاسلام

واليوم رد العلم للناس عني
وارتاح من كتب الرسايل والاقلام

مبعد عن الساحه وغثاها لأني
شاعر حقيقي ماني بحاجة اعلام
 
عودة
أعلى