غـــــــربـــــــــــــة


مدخل: أبيات تائهة ومبعثرة مشتتة لا يجمعها إلا أمر واحد.....غربة

طال السفر لين ضيعت العناويني
وان ضاق صدري من الغربة تمنيتك

إشتقت لك حيل ياسيد المزاييني
خذاني الشوق وداني على بيتك

الليل ما باته ولا غمضت عيني
أخاوي الليل من وجدي وخاويتك

في ذمتي يابعد روحي وحشتيني
غصب علي ماهو بكيفي انا جيتك

مقدر انا انساك كيف انساك يا عيني
مامر ساعة ولا لحظة تناسيتك

حبك مع الدم يسري في الشراييني
السالفة ماهي اني بس حبيتك

حبك عن الزين والحلوات معميني
ماشوف غيرك ولا صدقت لاقيتك

تدرين لا زاد همي وش يسليني
بس أتذكر سوالفك وتناهيتك

أغمض عيوني أتخيلك في يديني
وأدخل معك جو رومانسي وضميتك

كل العذارى يخالط زينهم شيني
الا أنت لو قلت حلوة بس.....ذميتك!!!

أنت كمال الحسن والملح والزيني
خلقك وأخلاقك وذوقك وإتيكيتك

يا بعد كل البشر الأقصى والأدنيني
من جمعة الناس انا راضي بتشتيتك

يا أحلى قصيدة عشق وأغلى دواويني
ماأغني البيت وافي لين غنيتك

يفداك قلبي ونبضه والشراييني
ولوعندي أغلى من الخفاق فديتك

والسالفة بإختصار إنك وحشتيني
وخذاني الشوق وداني على بيتك




قلم عادل بوبدر​ الدوسري