سوالف شاب

اجمل نكت مضحكة - اضحك على سوالف الشباب والبنات ارسال إلى Twitter ارسال إلى facebook
  1. رماد القناع
    17-04-2007, 03:57 PM

    سوالف شاب

    سوالف شاب


    اول شي حبيت اقول لكم ان القصه حقيقيه علشان تكونون معي في الصوره ....... اليكم القصه .

    انا متخرج من الثانويه قبل تقريبا ((( فيها تقريبا لا اجل مطول الاخ )))) قبل 4 سنين تقريبا تخرجت وتوظفت وصارت مشكله وانفصلت ودخلت الكليه التقنيه في الدمام وكل الكورس وانا اجي للشباب وانام بالغرفه الين الظهر وارجع للبيت مهوب سالفة فاشل لاسمح الله (((( اجل وشو يافالح انت )))) السبب اني ماكنت ابيها من اصلها بس تعرفون اذا مادخلتها واسمي من ضمن المقبولين بيقول الوالد ايه تدور للنوم والسهرات مع الشباب قلنا اهون علينا ندخلها وبعد رحلة عناء طويله قررت ادرس التخصص اللي احبه وهو قسم الكمبيوتر ورحت وسجلت بمعهد خاص مدته سنه ونص دبلوم كمبيوتر تخصص شبكات ويوم راح من مدة المعهد تقريبا 5 شهور كان اخوي الكبير في ايطاليا لأنه كان هناك قبل فتره حوالي 7 شهور واهله كانوا عندنا في البيت مرته وعياله ولد وبنت (((( عباقره على ابوهم يعقدوني اذا سولفت معهم )))) المهم وراجع هذاك اليوم من المعهد طفشان مع انه باقي اسبوع بس ونعطل والاجازه طويله بس كان فيه اختبار مابعد تحدد قالوا لنا اطلعوا للأجازه وراجعوا المعهد علشان تعرفون متى يوم الاختبار

    طلعت من المعهد في الخبر ورجعت للدمام وانا في الطريق للبيت مشغل شريط خالد عبدالرحمن ومروق من جد وجالس افكر في الملل اللي بيقابلني طول الاجازه مافيه وظيفه علشان تقول اذا جاء الراتب يمديك تطلع منا ولا منا

    المهم وصلت للبيت دقيت الجرس فتحت لي الوالده لانها كانت جالسه مع ابوي في الحوش
    حبيتها على راسها ودخلت انا وياها لقينا ابوي جالس مسيت عليهم بالخير وسولفت معهم شوي وكنت ناوي اجلس شوي وافرك لغرفتي اجلس على النت شوي لعل وعسى الملل يروح يوم جيت باقوم الا الوالد يقول اجلس بغيتك بموضوع ((( انا قلت بدينا بالاشغال من اول الاجازه ))))
    انا : لبيه امر وش بغيت انا اسمعك ((( اركد طيب وحده تكفي )))
    ابوي : اخوك كلمني من ايطاليا ويبي واحد يطلع مع اهله لأيطاليا . ((( يقولها وهو يراقب ردة الفعل )))
    انا : طيب وش المشكله انا وش دخلني ((( مسوي ثقيل مابيه يقول اني ابي اروح اهستر هناك )))
    ابوي : انت خلصت الدوام ولاوراك شي وقال اخوك لي يبيك انت اللي تجيبهم له
    انا : اللي تأمر فيه يبه ((( ودي اطير بس اخاف الوالد يهون ))))

    رحت لغرفتي وجلست اتخيل الله باروح لأيطاليا تعرفون انا ماطلعت الا لدبي واندونيسيا هذولي اللي بعيد اما البحرين ماتعتبر سفره لانهم جيرانا وحبايبنا بس لأول مره بتروح لدوله اوروبيه ودوله مثل ايطاليا خاصه ان اخوي ومرة اخوي كانوا يمدحونها لي من ناحية السياحه المهم جلست افكر وارسم واخطط
    رحنا وطلعنا تأشيرة السفر لي ولأهل اخوي وضبطنا كل شي وطلعنا هذاك اليوم من المطار وانا ماني مصدق المهم الطياره اول شي توقف بألمانيا قبل ايطاليا وانا اللغه الانجليزيه مش ولابد ((( تعرفون متخرج من الثانوي لي 4 سنين وش ترجون مني )))) وصلنا لمطار المانيا ونزلت الطياره لازم نغير الطياره ونركب الطياره اللي طالعه لايطاليا قدرت امشي نفسي الين عرفت الرحله وجلسنا ننتظر وطلعنا على الطياره الين وصلنا ايطاليا استقبلنا اخوي ورحنا للشقه
    وانا جالس اناظر ومضيع من جد اخوي يقول الحمد لله على السلامه وانا اقول له هلا بك والله منور اخوي (((( من جد مفهي )))) اخذنا سوالف شوي بعد ماوصلنا الشقه واخوي حس اني ودي اطلع من الشقه ابي اروح امشي على رجولي افر هنا كأني ماني متأكد شوي الا وهو مطلع لي 700 يورو قلت وش هذي (((( ناسي انا من العمله الجديده )))) قال هذا اليورو خذ الفلوس واطلع تمشى بالحاره بس لاتروح بعيد وتضيع قلت افا عليك
    طلعت وانا من جد كأني بحلم لكن حلم حلو واتمشى واروح وافر تقولون كأني بالسعوديه ماهمني شي اضيع ولا لا ودي اشوف الدوله كلها وبالاخير ماشفت الا وانا بوسط محطة قطار ((( مترو ))) سألت المسئول قال هذا يروح لميلانو ويرجع بشكل مستمر وقمت وحجزت لي تذكره ومشى فينا القطار الين وقف بميلانو ونزلت
    يوم نزلت اول شي قبالي في الشارع محل قهوه وشكله حلو دخلت وطلبت واحد كابتشينو اللي هم يسمونه كابوتشي وجلست اتقهوى واستمر الحال على كذا حوالي ثلاث ايام اطلع من البيت واروح للقطار واطلع لميلانو وارجع للبيت بعد ماتقهوى في الكوفي ومبسوط من جد حتى اخوي قال باروح معك اشوف وين تروح قلت لا خلك عند اهلك



    (((( السالفه طويله وتعبت والله خلوني ارتاح الحين واذا اعجبتكم كملت لكم باقي السالفه ))))
  2. *مزون شمر*
    17-04-2007, 04:08 PM

    رد : سوالف شاب

    سوالف شاب


    سالفه حلوووه وممتعه

    نابي النهايه بسرعه

    يعطيك العافيه بحررر