ديوان (جزيل الكلام) للشاعر مسفر ابن صمعه العرجاني


حنيني حنين اللي سرى ليلها كله
تجر الحنين وزايد الهم طاويها
على الحاشي اللي ليت راعيه ما شله
يصرم عروق فوداها فقد حاشيها
الاحي حلال القوم بالصوت والشله
وانا في خفوقي لوعة مثل مافيها
وجودي على الفنجال من صافي الدله
من الدله اللي شدني حب راعيها
وانا ودي اني كل ما رحت ما ازله
واعذل القدم وادرها عن مشهايها
ادري عليه من المناقيد والزله
وهرجه ضعيف مايثمن معانيها
هني اللذي يلقى وليفه على حله
قريب من الاحباب وتجيه ويجيها


ياصاحبي في نحاكم متعب رجلي
عينت رجلي وعنيتك على شاني
امر بيتك وانا لي لازمن عجلي
واليا بغيت انحرف واجيك ممداني
انا شفوق واعرف انك شفوق لي
ردو لي العلم منك والخبر جاني
يا صاحبي قد محبتكم عذاب لي
قربك مناتي وبعدك منك يبراني
يا تل قلبي بعد فرقا الغضي تلي
اللي سباني غرامه ما معه ثاني
كنت اتحنج عليه وكتم (ن) غلي
وانبح سد ابن صمعه يوم خلاني
سبة جروحي ولا غيره طبيب لي
ليا جيت ابا اتوب من حبه تبلاني

ياعين حر على المشراف متعلي
ما يشرف الا براس المرقب العالي
راعي عيوانن هدبها سود ومضلي
ياقطع كبدي عليه ويا بري حالي
اشوف زوله معي حتى وانا اصلي
في كل الاوقات طاريه على بالي
ويش السبب في طويل الصد ياخلي
يا شين كبر الخطا ليجاك من غالي
من اولن عنكم الاخبار توصل لي
بيني وبينك يجي ويروح الارسالي
ما اطري البور ما دامك صحيب لي
ولا نقص من غلاكم ربع مثقالي
ان كان بعد الغضي عنى حد قبلي
فانا المعنى ولا جرحي بمتشالي
لي جيت ابا اتوب من حبه تعاودلي
قمت التفت في سنعهم كنه يومالي
قلبي يحبه وانا له منتحي كلي
ولاني بعنه دلوه ولاني بسالي

انا ما يفرج ضيقة البال ويسليه
لين اجي فريق صوبه الروح نهاجه
علشان غرون يجرح القلب ويدوايه
تمكن صوابه في ضميري ولا ماجه
اجي واروح عندهم ماكن عندي فيه
وانا غير شوفه ما معي عندهم حاجه
اسوالف مع ضوالا وانا ودي احاكيه
ولا ودي احاكيه واسبب احراجه
وعينه تراعيني وانا عيني تراعيه
ويضحك حجاجي كل مايضحك حجاجه
غدى القلب كله في خياله وفي طاريه
وصارت عيوني من حلا النوم هجاجه
يقولون درب الحب من سار به يشقيه
وانا اقول يا محلاه ما دامه مواجه
لكن البلاء ليا شك فيني وشكو فيه
وسكر علي باب المواصل بمزلاجه
واناشف بالي قرب خلي وانا بغيه
ونفسي على قرب المواليف محتاجه
لكن الليالي تبعد القلب من غاليه
لابد الهجر من بيننا يبني سياجه
طراة الهوى عند اوله والعنى تاليه
وذا اللي جعل نار على الكبد وهاجه
هذي والله اللي توجع القلب وتقاصيه
وهذا البلاء اللي ماحدن يجد علاجه


يالله يا عالم الامور الخفيات
عينك عن الاسرار ماهي كفيفه
اعبدك وانته فوق سبع السماوات
وانا بالارض اخشى عذابك واخيفه
عسى الوطن دايم بخير ومسرات
وارضه عن الانجاس تبقى شريفه
فينا الولاء ما في ولانا مروات
قبل الرخاء عاد الليالي كليفه
ولوان بعضنا حامل لها شهادات
وراحت سنينه ما لقى لها وظيفه
ماحن نبي يكون عدل ومساوات
وهذي ثقتنا فالولات النظيفه
واللي تروج للفتن بالدعايات
ما فرقت بين النفوس الاليفه
للدار هذي ما رضينا قيادات
الا الملوك اهل المبادي الشريفه
بقيادة العاهل زبون الونيات
درع الوطن لاصار فالوضع خفيه
ماجاء على عرشه بصوت انتخابات
العرش عرش ابيه والسيف سيفه
نسل الملوك اهل القناء والبطولات
قادو الجزيره قود مثل العسيفه
ثم وحدوها عقب ماهي خلافات
ولبست بعد ثوب الدمار القطيفه
مجدد مجد العرب عقب مامات
مجد الوليد ومجد عمر الخليفه
لاسمه مع روس السلاطين صولات
سلمان حامل هم شعبه وريفه
وولي عهده محزمه فالمهمات
حرن تعلى للطوال المنيفه
تلمس جهوده في جميع المجالات
زارع ربيع الدار طارد خريفه
كلن يجي بعده خليفه ليامات
الا ولد سلمان ماله خليفه


شعاني قصيدة شاعرن مبدع منشاد
اذن العرب ليجاء الشعر منه تطرب له
تمجد بحب الوضح بالقاف يوم انقاد
يخلي راعى الوضحا يجاريه ويشله
كل الحب ينقص بس حب العفر يزتاد
ومن طاح في حب العفر ماطوى سجله
لها رونق يفرق على باقي الاذود
راعى الصنف الاخر ماهو يعينه فابله
على حب راعيها يجيها وله وعناد
هيام مهوب بهيام عنتر ولا عبله
وذا شفته تنساق له مالها رادد
تلافت لمنه جر صوته وتقبل له
وهو وده انه يفرش مراحها سجاد
حنون لها حتى من الرمث والربله
ليا غاب عنها ماتهنى بشرب و زاد
وذا شفها كان مال قارون مال له

ياعيون اللي تعلا على روس الطوال
اشقر(ن) ما طربو به ولا يعطى هدو
يا وليفي بعد فرقاك ما حالي بحال
وانت راس المال والحال يرخص لك فدو
شبه وضحا فارق بالمحاسن والجمال
بكرة ما هي تعين مع طرش البدو
لامتانا يااريش العين في روح وتعال
والتجافي بين الاصحاب عز للعدو
عامر لك في ضميري بيوتن لا تزال
فرشها بالزل وملبسات(ن) بالسدو

ياراكب اللي لزين الصنف محتلي
يرغبك فالمسير وترغب الصوره
صنعت يهود تفكر لين تندلي
عاشو على العلم ماعاشو على الثوره
لمن تساوى سريع الخط وانتلي
قام يتعدا المواتر كنه مطيوره
يسوقه اللي يزل الحد ما ذلي
لمن بغى له لزوم ما نقص دوره
سنافي ليبدا لي شان وقف لي
ماقال لي حاجتك ماهي بمقدوره
يقصد ديار غلاها بحث غلي
ياصل جوابي عشير ماقدر ازوره
ياخذ سلامي ويقبل به على خلي
سلام قلب يسوقه صدق شعوره
لولا عيوان المقرد جيتهم كلي
ما كان جاته مكاتيب بلا صوره
حبه على مايعرفه ما نقص ملي
ابغى اتنسى ونفسي فيه مسحوره
له في ضميري بيوت فرشه زلي
معموره له لو انها عنه مهجوره
العيشه اللي بدون الزين تنملي
اسج قدم العرب والحال مستوره
انشهد ان المحبه مالها حلي
وعاد البلاء من عشق شرواش يانوره

يالله ياللي ما على عينك غشاه
يا وحدان لا ساله العبد سمعه
لا نترجي غيره ولا نعبد سواه
ونلوذ به في كل سجده وركعه
من قدم المعروف لابد يلقاه
لا ضاع لا نصفه ولا ضاع ربعه
اما كسب له حسنة عند مولاه
والا كسب نعم لنفسه وربعه
والرجل يوفي حق دينه وديناه
لا نال مع طيب العمل طيب سمعه
والناس تتبع طيب الذكر والجاه
مثل الحياء من صاد طاريه تبعه
والا الردي من قاربه قال ما ارداه
واخير من مد الوصل معه قطعه

يالله اني طلبك يا معين الصابرين
كل ما ضاقو عبيدك شرحت صدورها
يا زمن ما هو بحقن تضد الطيبين
و الله ما هو بحقن اتقل اشبورها
كل مانامل على الوقت والدنيا تزين
بدل القمراء ظلم (ن) وغطى نورها
بيض وجه ظرف الليالي والسنين
بينت لي كابر الناس من مكبورها
مانخلي لزم الصاحب وحن قادرين
غير ما عند النشاما سوا مقدورها
الذميمه ما تنقص حقوق الغانمين
والهلايم ما تزيد المدايح دورها
والنصايح كان تشرا بوقت الاولين
غير ما هو كل ناس بيوخذ شورها
والتجارب مدرسه والاودام راحلين
والسنين تدور بايامها واشهورها

قال ابن صمعة عد راس الشوهايق
من ضيقه شبت بالاعماق ضوي
قال المثل تفرج على العبد وتضيق
وانا معي حبل الفرج متلوي
والحاجه اللي ميزت حزه الضيق
خلتني اعرف صحابي من عدوي
واللاش ما بيني وبينه مواثيق
جو الردي ما هو يطابق لجوي
ان عشت محني هامتي للمخاليق
وانا مت قد ماتو هل الطيب توي

ويا تل قلبي تل دلو(ن) تجث اعراه
عروايه من جور المحاحيل مبتوره
على اللي جذبني زين خلقه وزين حكاه
تريح لسمع الصوت ومشاهد الصوره
جبين يشبه طله البدر في مصحاه
ليمن تبين في سماه وسطع نوره
وجسم(ن) يشبه عود موزن راهي ماه
وعنق كما الظبي لي نوى الذوره
جزيل الكلام ارتبه في رجاء لقياه
ولا من لقيته ما اقدر اقول مجوره
يجيني لا من تواجهت انا واياه
اضيع علومي كل ما جيت بازوره

ابدى بذكر الولي وارجيه واخافه
وامنت به خالق الامه ومفنيها
الشعر هاجت بحوره واعتدل قافه
صفت سرايا جنوده عند داعيها
بنات فكري تولف الارجح اولوفه
تزهاه شراد معانيها وزاهيها
الطيب ما كلن يعدي بمشرافه
يبغي عيال(ن) معربة مجانيها
اللاش لو زر عمره ماحدن شافه
ما يعتني فالمراجل كون راعيها
شروا ولد سابر اللي بان مقيافه
قرم يمينه على العليا مضريها
متفردن بالوفاء والعالم اخلافه
فعوله الطيبه ماحدن يجاريها
يا مزبن اللي تغربل والدهر لافه
من جاه ينسى الظروف اللي يعانيها
مع الكرم والحميا شكل وعرافه
المرجله كل ابيها مشتقي فيها
يفرق عن الناس طيب وتفرق اوصافه
ترفع له البيض في عالي مباديها

انا البارحه يوم ارهجنو هل المحدود
محاجر عيوني بازرق الدمع غرقانه
حادني على المطارش وقت ظروفه كود
يخلي الهواوي يترك اديار خلانه
متى ما بغيت اسج من ناسع المرجود
ذكرته وكبدي لريش العين ضميانه
الا واعذابي منك يا بوعيوانن سود
عيوانن هدبها شابك فوق حجانه
انا رغبتي شوفة هل العايدي والذود
غلاهم غدى بالروح والروح شفقانه
انا ودي اجيهم وباب اللقاء مسدود
وتالي خبرهم بين ظلماء وسلطانه
عشير ماض بيني وبينه لقاء وعهود
ومن حشمته عندي رفع قدر شيبانه
سقا زمان يوم حبل الوصل ممدود
يسير صويب الحب ويشوف ديانه
اجي عندهم واروح مابين المقصود
وهو داري ان عنوة مجي على شانه
تنحيت عنهم وانتحا حظي المقرود
على غير شفي فارق القلب خلانه

يالله الا اله الا انت يالواحد القهار
الوذ بجنابك وارتجاك واتوبي
انا مرتجيك وممل فيك يا غفار
قبل ما تدانى قدرتي تغفر ذنوبي
تهيا مزاج الشعر واندرات الافكار
ولمني بغيت الشعر عينت مطلوبي
اسير على شرد تذير امن الشعار
لمني قنصت شعبها عودت صوبي
جذبني نبا راعي المعزه زبون الجار
ظاهر مجده اللي مع هل المجد مكتوبي
حفيد الملوك اللي تبين على الانظار
جنابه مع روس السلاطين محسوبي
محمد ولد سلمان لا عدو الاخيار
تبنا له البيض على كل مشبوبي
نبايعه في وقت الخفايف وفي الاشرار
ولانا ليوم الدين مهوب بمحسوبي
حريض على عز العروبه خفى وجهار
يوقف لما جات المهمات وينوبي
مضر على الطالات والمدح فيه يثار
وشعر ماياتي فيه مهوب مرغوبي

يالله يا والي جميع التدابير
عنده بمافي الكون حكمه واداره
تمشي بيديه احكامها والمقادير
ما قدرة كاين ويمشي قراره
تفرج على قلب همومه طوابير
قلب مع حزنه يقضي نهاره
قسمة وراس المال بدع التعابير
ماله مع بنك التجاره تجاره
شفه هوى باله وشوف المغاتير
ومندمة شعره بحسب اقتداره
شوفة عشايرها وشوف المصغاير
اتفك من هم يطول احتكاره
وسج القدم في زيفات المخضاير
عشب بعد سيل تلاعب بكاره
تسوى حياة اهل الترف والدنانير
اللي تقضي يومها في حضاره
لو صنفوهم من كبار الهوامير
ارباحهم قلة وراحت خساره

الايا وجودي طول صبري وصل تاليه
يبين الخلل في راعي الهم لو يكناه
على ابوجبين ياخذ القلب من راعيه
بياضه يشبه طله البدر في مصحاه
وجسم وسيع النحر والخصر زاوييه
اصابع اكفوفك تلتقي شبر فالمثناه
ولمن تكلم هرجته تسحر امحاكيه
تقول انه يدوي جروحي بزين حكاه
الا يا نديبي روح له رد لي نابيه
والا غير دور لي اعلومه مع من جاه
اغيابه يمزع ستره القلب ويقاصيه
ما تنزح عني ضيقه البال لين القاه
واجامل واقول لي سنين وانا ناسيه
وانا زرع قلبي قام طول الجفا يلاحاه
الا ياعذول القلب مافاد نصحك فيه
وقلبن تولع حب غليه ما ينساه
كيف يتوب مجروح المحبه عن مداويه
وهو اعين فيه جرح الحشا وادواه

يا عين حرن تعلى راس ملواحه
متعود في طويل الرجم مشرافي
بين التلاتيب سرج النور وضاحه
مثل القمر لا تبين والسما صافي
والجسم عود يشبه عود تفاحه
كاسيه راسن يكده فوق الاردافي
يا زين كييك تعدى مدة انجاحه
واكن جرح الحشا واقول متعافي
لاخفيت حبك دموع العين فضاحه
تسيل زرق الدموع وتظهر الخافي
عيفت قلبي ملوك الحسن واملاحه
وغديت له بين كل البيض ميلافي
نفسي على شوفتك طربه وجماحه
في غيبتك يبس زرع القلب والافي
قلبن يلاحيك يا عنق الظبي لاحه
لا تتلف الحال يا معشوقه اتلافي

ياروح روحي عليك الروح منهده
وانت السبب في العذاب وكل ماجاني
انا بغيتك رفيق لي على الشده
ماهوب بيوم صحيب ويوم تجفاني
الله علم صاحبي لو ان حدن لده
والا تركني على النابي وخلاني
من اول جيه لين اوقف على حده
واليوم لا عاد لا جيته ولا جاني
قد جا ضميري من اللوعات ماسده
طول المفراق كوى كبدي وكفاني
يبقى عزيز علي لو طالت المده
ماني بناسيه كانه ما تنساني
اصوغ فيه النشيد الڒين واعده
من حشمته كل بيت يسبق الثاني

وعڒي لقلب بعد الاحباب حامسه
يلحي حمام الورق لي ناح نايحه
ويفوح قلبي من همومن تلامسه
كما فوح رسلان على النار فايحه
تجدد جروحن فالمعاليق دامسه
من افراق مجمول كثيرن مدايحه
له اربع سنين وتمت العام خامسه
ظروف اللقاء وياه ماهي بتايحه
يحول دموع العين تالي مرامسه
عليهم عيوني بازرق الدمع سايحه
احبه ونفسي في محبته غامسه
ولا لي مع غيره عهود(ن) ولايحه
اقوي عزومي القلب والهم لامسه
كواه الفراق اللي على الزين جايحه
فانا بسند الموضوع ماني طامسه
تعابير نفس في هوى الزين رايحه
على شاعر بحر القصايد يهامسه
على كل طرقن طياعته قرايحه

يامل عينن تهل الدمع مجبوره
على الدقيقه تهل الدمع دفاقي
كل السبايب خبر فرقاش يانوره
ضاقت علي الفجوج وضاقت اخلاقي
ابشفي اخذ معكم فالهوى دوره
نقضي بجو المحبه عمرنا الباقي
يتل قلبي بزين الصوت والصوره
والحال يشفق عليه وتهجر اعماقي
من يوم شفته ونفسي فيه مسحوره
كنها على شوفته تحدى وتنساقي
ابو جبينن يسفر فالدجى نوره
والجسم يشبه لعود باول الساقي
يا جعل داره من اتلا الصيف ممطوره
نتلم باطرافها عقب التفراقي
ما ادرى على موتري لو حن ماطوره
والله ان يذوق الشقا ما دامني شاقي
الين اوجه يالطيف الروح وازوره
واسلم عنى خاطري واسلم عنى ساقي

يا عين حرن طويلات مراقيبه
ما يدهل الا وكورن رجمها عالي
الصاحب اللي بعيدات مناديبه
لا عاد يلقى ولا ياتيه مرسالي
اللي على خاطري يلحق مشهايبه
يا جرح كبدي عليهم باول وتالي
اعروق قلبي تنامى به وتسنيبه
ما يسمح البال لين اشوفه قبالي
واجامل اهل الحكي واقول ماليبه
لو انه عندي عزيز ودايمن غالي

يالله لا اله الا انت يا عالم الاحوال
عليك اتكل العبد يا فارج اهمومه
عسى الله يوقفنا على خيره الاعمال
جعل قسمنا عند الولي خيره قسومه
بيوت القصايد كلن يجر له موال
ويطيب القصيد اللي تجي فيه معلومه
الله يقطع الجاحات ومجادل الجهال
وحظ ليا قلن نافع طاحت سهومه
مادام الجمايل في عيوان الرجال اجلال
طراة الفتى يبذل على الطاله عزومه
ظروف الليالي تكتشف معدن الرجال
تحده على الشدات وتبين اعلومه
يطيب السنافي ويتعثر ردي الخال
يحده ردى خاله على الدون ويهومه
وانا شرهتي تسند على طيب الافعال
فعوله مع اهل الطيب ماهي بمذمومه

الا يانديبي فوق جمس يسد الشان
مناة الغريب وفزعة لي بغى داره
يوقف بدار ما تجيها هل الشيصان
ولا يلحقه من نادر الصنع سياره
ليمن تساوى الخط تواه وجوك زان
اتحس انك من اقلعته فوق طياره
بلاده امريكا ما يورد من اليابان
مصممه لاصحاب المهمات مختاره
تولم عليه لديره صوبها شفقان
اغليها مثل ما ربعنا تغلي القاره
مراتع غزال كان يذكر مع البدوان
وتالي خبرهم يوم قفيت من داره
جميل المزايا كامل الزين والاحسان
ياسبحان رب خاصة الزين واختاره
اسلي ضميري بالقصايد وبالقيفان
وانا ماسليت من الحبيب ولا اخباره

ياعين حر على العسرات منزاله
ما يدهل الا طويلات المراقيبي
ابو ثمان(ن) تلامع من وراء شاله
ومعنق فايح بالمسك والطيبي
يا مرحبان يا دواء روحي وسلاله
جيتك عقب الفراق تدوي اللي بي
القلب لا جيت عندك زانت احواله
وان رحت منك مع الهجوس يدويبي
وانت السبب في عنا قلبي وغرباله
وانت المبدى على كل المطاليبي
صبر على البعد منك ما اقدر احتاله
عود وعلاج جروحك قبل تبطيبي
حب الخلايق لحال وحبك لحاله
يا متلف الروح يا سيد الرعابيبي

يالشاعراللي جنابه معتبر ومحسوب
بشرتنا والحياء كلن يحب اخبره
لا انشت مخييل ربانه وجاله صبوب
يجعل همال ودانه ايدور اشهره
على مراعي البدو كن سحب نوه تذوب
من وبل سحبه مايبقى ديرة مدهره
يعلها من عطف بيشه لبدر الجنوب
الارض رويت بماها والسماء ممطره
لين تخلط طبيعتها بزين العشوب
المنظر اللي يريح المشتحن منظره
تلتم فيه البدو وتسج فيه القلوب
ويجي للاوناس دور وللشديد ثمره

راكب اللي من بلاده ورد تواه جديد
محتوي كل المزايا عده في مصنعه
جاهز لمن بدى لزمي ما هو يحيد
مايعود سايقه من قبل قضي سنعه
يقطع اطول المسافات بيد بعد بيد
كنه يطوى نيد الخط من تحت اربعه
اتصبر والحشا كنه يكوى بالحديد
الضماير من فراق الوليف مولعه
صاحب ما اجوز عنه وحبي له وكيد
ماتفرج ضيقه البال لين اجلس معه
كل ما نويت بازوهم راحو شديد
يرتحل به شايب شف ذوده يتبعه
اشهد ان الفرق بين البشر فرق بعيد
واحد ودك تشوفه والاخر تقطعه

هني اللذي شوف المداهيل مايشقيه
ولا هي تحرك فيه هوجس واجراحي
ولا شاف مدهال الغضي يومهو ياتيه
يوم ان الليالي كان سجات وافراحي
مكان اللقاء ياجعل غر المزن تسقيه
تعله مزون الصيف ممساء ومصباحي
الا واعيوان اللي لمنه اطلاقه راعيه
يتل السبوق ولابرق الريش ذباحي
غلاك امتحن قلبي ولا فاد طب فيه
ولا زال حبك داخل القلب ما انزاحي
جذبني هوى اللي يجرح القلب ويعنيه
جميل(ن) غرامه من تولاه ما ارتاحي
لا عاد جاء رسول له وانا ماقدرت اجيه
غدى في نحرنا الحظ لاجاء ولاراحي
شفوق(ن) لقربه والتفراق ما دانيه
وبارت ليالينا وبرق الهجر لاحي
لو ان البكى بفيد طول العمر ببكيه
لكن البكاء ماعاده يرد من راحي
ولاعاد لي كون اجبر القلب واسليه
وطول الدهر لمعمق جروحنا ماحي

ياراكب اللي لابد اللزم يقوم
مقام شغموم براسه حميا
كنه على قطع المشاوير ملزوم
يطوي بعيدات المسافات طيا
يشبه لحر لاشهر يبعد الحوم
ماهو بمثل البوم ولا الحديا
ينحر ديار مصوب القلب بسهوم
رموش عينه بلايتني بلايا
بنحر بلد خلي ولو ناسها قوم
عقب الجفا عسى لقاه يتهيا
حبه على قلبي مقدر ومقسوم
ياما عذلت القلب والقلب عيا
اجزي عن اللذات واجزي عن النوم
واكبد الهوجس صبح وعشيا
من عقب فرقا اللي له القلب مثلوم
اللي عليه القلب يشفي شفيا
عديت بقدومي على كل مزموم
واونست تاثير المفارق هنيا
لو ان على غيره تواصيف ورسوم
ماعاد لي من بعد فقده بشيا

ابتدي بسم الله المعبود خلاق البريه
الاله اللي بسط قيعانها وارفع سماها
واحد لانترجي غيره ولا نعبد سويه
الكريم اللي ليا كبرت الحاجه قضاها
يا سلامي يالقبال الزين والكف النديه
وياسلامي يالرجال اللي تجمل من نصاها
القريحه في نبا سالم معانيها جريه
تفخر بيوت القصيده فيه ويشرف نباها
المحيرقي راعي الواقفات مزبان الونيه
كل قمه من صروح المجد بفعوله رقاها
اعتقد مافي ربوع المملكه رجل زيه
المراجل كل ابيها سالم عبيد خذاها
ترثت اللي في فعول الطيب تاخذ الاولويه
روس قوم تمنع المضيوم ويذري ذراها
من رجال وعيل لاجات الظناخه والحميه
اتفخر في صلب جدي واتباها

انا في رجاء اللي تسجد الناس في رجواه
ايوصله عبده في صلاته وفي صومه
عسى الله يثبتني على طاعته ورضاه
ويجعل نفسي ضمن الابرار مرحومه
الله يقطع الحاجه وراء واحد تشناه
والله يقطع معامل هل الكبر والزومه
والله يقطع اللي ليبدى لازمك خلاه
لما جات صكات الزمن ضاعت اعلومه
يطيب الشلي من طيب راسه ومن مجناه
ولو كان ما نفسه على الطيب ملزومه
فان والله اني ما اشره الا على شرواه
والا اللي تعداه المشاريه ما لومه
فلا كل من يقضي لزوم العرب تنصاه
ولا كل من جاب الخطا تقدر تلومه
ولا كل عد(ن) لي وردته قراح (ن) ماه
ولا كل شي ينصفط لو غلي سومه
ولا كل من قفى بتحزن على فرقاه
ولا كل من قاربت تصلح لك اسلومه
وما قدره ربي على العبد شين جاه
ولا تنقسم حاجه ماهي له بمقسومه

ابتدي بسم الله المعبود علام السريره
القدير المستعان اللي بقدرته استعنا
لاقضاء الا قضاه ولا مصير الا مصيره
شايف مالا نشوفه عالم باللي جهلنا
في نبا سلمان ديوان الشعر ذعذع عبيره
واستقاده ندار الابيات للشاعر وغنا
الامام اللي على العليا طموحاته كبيره
حامل هم العباد وقايد الامه واملنا
لا يهاب ولا يضام ولا يمالي في جويره
دون جاره يلحق الغارات مزبان المجنا
يوم جا للحرب نار فسل سيف من جفيره
لين ولعها على راس العدو منا ومنا
قال حنا نصرة المضيوم مقباس السعيره
والفخر حنا رجاله والزمن هذا زمانا
ترثت معزي حكيم الراي نطاح المغيره
المليك اللي حكمها من عراق الى يمنا
احتماها بالرماح وبالسيوف وبالذخيره
يوم في روضه خريم ويوم في روضه مهنا
فصيلي بسط حكمه على شبه الجزيره
حكم بالشرع والمله وبالسيف المحنا
والامل فالقايد اللي مشى نفس المسيره
سيدي سلمان ليا جات الشدايد ماتونا
دام قيادنا زعيم العرب مقباس السعيره
لاتحاتي يامواطن وارقد امنا ياوطنا

يالله يامزبان عبدك لي ضاق
ياباهج صدور الخلايق واملها
ياجالي جنح الليل اسود باشراق
بشمس تضي سفولها مع جبلها
من نال من وجهك مدارت واعتاق
فاز بنعيم جنان عدن ودخلها
تاقت هجوسي للشعر والفكر راق
وقطفت من روض الخباري نفلها
واختارت من شعر الحكم كل مالاق
هدايه تهدى على من قبلها
لو كثرت انواع البضايع بالاسواق
السلعه الزينه رصيدن لاهلها
الناس ما تاقف على باب الارزاق
ولا تموت النفس قدام اجلها
اما تجي لصروح الامجاد سباق
والا اترك العليا ودور بدلها
للدون عشاقه وللمجد عشاق
وكلن يحب الديره اللي نزلها
والمراجله ما لحقها كل لحاق
مايعتني فالمراجله كون اهلها
والناس كلن له مفاهيم واخلاق
ولكل نفس ميزة (ن) تنتحلها
ماتستوي فيها الطبايع والاذواق
لوتستوي عالي الرجوم وسهلها
والفكر لمن صار مشلول ومعاق
روس ما ينفع نقلها من نقلها
العلم نور يكشف بعيد الافاق
واهل الجهل مظلومة من جهلها
لاتبني علومك على كذب ونفاق
وان طلب منك كلمه الحق قلها

حنيني حنين اللي تنثر دموع العين
خذو غيده ويردها الشبك بسياجه
تهجرع بطول الصوت وامتها ممسين
معاليقها يوم ابعد الشوف لجاجه
الا حي الخلوج وهي بتدله بعد يومين
وانا اللي صوابي ماحدن يجد علاجه
على اللي مع زين الوصايف حديثه زين
هو اللي بدينه قفل قلبي ومزلاجه
ليا جيت عنده سج قلبي مع السالين
والى رحت كني راعي الدين والحاجه
فراق الولايف عقب طول المحبه شين
وهذا مسبب لوعة القلب وخلاجه
لمني ذكرته قلت يامال فراق العين
شتتنا فراق ماحصل عقبه مواجه

عديت رجم يدهله كل قرناس
من زدات همومه لجى في ركونه
خذيت في راسه عن الهم مرواس
لعل شاقي القلب تذهب حزونه
الله من قلب غدى فيه هوجاس
قلب هواجيس العشا يدهلونه
عمر الفتى لاعاش به شامخ الراس
اخير من روس تعيش مهيونه
حلفت مااجي للحقودين جلاس
يالعنبو جلاس من يكرهونه
وحلفت ماطرب بسري على الناس
شكيته ما هي بلله مهونه
اما يجي ما بين حاقد وبلاس
والا مقاريد العداء يسمعونه
لان الغدر مامات من موت جساس
في كل عصر ماشي به زبونه

شعاني حمام فوق خضر الغضون ينوح
يغني على طربة فوداه ويشحنا
لوانه درى ان صوته ينقض علي جروح
تجنب لحون الحزن منه ولا غنا
لحونه تزيد الهم فالخاطر المجروح
تعنيه لمن قال راح العنى عنا
لمني تذكرت الغضي فاح صدري فوح
وتشوقت للايام بها طرب ومهنا
سقا الله زمان يوم باب اللقاء مفتوح
ڒمانن تفرقنا الليالي وتجمعنا
قبل مايجي من دون زين النبا ساموح
ويقطع زمانه فيه منا ويقطعنا
حادني المفارق عن لقياء لطيف الروح
ولا عاد به فالوضع منا ولا منا
لوان حنا تنوداعنا عاد اوصلنا مسموح
لكن البلاء حل الهجر ما توداعنا
وان راضي باللي كتبه الوالي فاللوح
جروح الهوى طابت وحنا بعد طابنا

انافي رجاء اللي مايقاد الرجاء لسواه
سميع لخلقه ماقفل دونهم بيبيان
سلامي على اللي يكسب الطيب من مجناه
تورث فعول الطيب ورث من الجدان
وانا ما امدح الا مثل صالح رفيع الجاه
طليق الحجاج اللي تبشر به الضيفان
لان الشعر لمن صار في واحد شرواه
تخلد معانيه وتمشي به الركبان
وانا ودي اني دايمن من حدى اخوياه
لكن لا وصلني لا رساله ولا عنوان
لماشرح وضعي عند راعي الوفاء قضاه
وهذي عوايد راعي الوقفه كحيلان
من زدات همومه من ظروف الدهر ينصاه
عز الله العزيز انه لما قام سد الشان
ما سواو صنديد العرب من وفاء سواه
من عصر الجهل الاول لعصر الملك سلمان

حنيني حنين اللي وراء الشبك والذرا
حجزها سياج الشبك عن كل مدهالي
ذابحها الحنين وفطر الجوف وانفرا
خلوج تبي عشب الحياء عقب الامحالي
على اللي غرامه باع فالقلب واتشرا
وغدى حبه الصافي عذاب على حالي
الا يا وليفي مكن الجرح ما برا
واجامل على الانظار واقول متشالي
عيوني يجيه الصبح ما ذاقت الكرا
اسهر نجوم الليل للمذان التالي
يعاتبني اللي عن هوى الزين ما درا
دلوه يضيقون الخلايق وهو سالي
فايليت هجران المحابين ما جرا
ولا نزحت الايام خلي وهو غالي

ما يطرب فودي كل ما خمني التفكير
لين شوف وضح مخذها كل تفكيري
غلاها رفيع وحبها فالعروق يسير
تزايد غلاها عربها والخواويري
نقدمه لها اللي نملكه حشمه وتقدير
على شانها ما حن نحسب المخسايري
وتستاهل الوضحا المباهاه والتكبير
شهاداته قد جات مني ومن غيري
على صوت راعيها تحث الخطا وتسير
لمنه جذبه بالدعا تلت السيري
تهوم الفيافي قدمه كنها بتطير
تقول انه يخبط جنبها بالمواصيري
لكن عاد به حمراء بقلبي غلاها غير
يكرم ويحشم من وداد الغناديري
نظير سناد كنها من هضاب النير
ومن در مقدمه تخلى المواخيري
ليا شفتها متردم نيها وبخير
تقول ان دنانير الحكومه دنانيري

يالله يارب السماء الاعلى ولافوقك علو
انت اللذي بيدك مفاتيح العطاء وقفولها
اعوذ بك من قلة الطاعه ومن زود الغلو
ورحمتك ياغافر لعبدك ياعساني حولها
سلام مني للمليك اللي عرب شعبه سلو
من طيب وقفاته مع شعبه وطيب فعولها
مليكنا اللي للحرايب مر ولشعبه حلو
مكانته تجعز املوك الارض ما وصلولها
ترثت سلاطين تجلو فالجزيره وانزلو
احماتها ليا قامت الهيجاء تدق طبولها
اعلن بعاصفه الحزم لين المعادين خذلو
حرب الاعادي هولت منها وشافت هولها
يعلم اللي في مصدمنا وفالحرب جهلو
حنا نسل قوم على الفزعه تعن خيولها
اما نبيد اهل الفتن والا عن الديره جلو
هذي فعايلنا ليا جات العدات نزولها
شزدمتنا من نصرة الاسلام والعفه خلو
وعلى العباده للخاميني مشينامفعولها

ياجعل سحب من المنشاه مطاره
تعل مدهل عطايا الله وتسقيها
من قبل ياتي لهيب القيض وغباره
نسج بارض جديد العشب كاسيها
ليا زم نبت الربيع وزان مخضاره
والبدو تبعت دبشها في مشهايها
مرباع وقتن يرد الفاطر حواره
ترتع به الوضح لا زانت مفاليها
في خايع زايفن ريفه ونواره
والقرنوه والزهر متفتقن فيها
تعيش في جو لندن وانت فالقاره
الا يغطي على لندن ومن فيها

ويالج قلبي لج شول صخيف وخلج
تحنج على مقهورها يوم قفو به
على جرته مر (ن) ترزم ومر اتهج
تخالف عباريها على الخد مسكوبه
على اللي برى حالي وفج الضماير فج
جميل الوصوف اللي مزاياه محبوبه
عليه المشاعر والضلوع الحني تلج
وهواجيس فكري مستخله ومنكوبه
اقبله وسط الفكر واخذ معه واسج
عن الناس كني داخل وسط غيبوبه
مع لمعة العاتق جميل وشريف وغنج
هنوف يحضر ابليس معها ومندوبه