1234567891011 ...

أهربت واجد ..$

مدونتي, مدونة يوميات الأعضاء, دون ما ترغب به واسترسل في افكارك بدون ان يقاطعك الاخرون ارسال إلى Twitter ارسال إلى facebook
  1. وردة الأمل
    09-06-2015, 10:04 AM

    أهـــربــــت واآجــــــد ..$

    أهربت واجد ..$


    أهربت واجد ..$


    من هنا ابدا مشواري وانادي بصوت عالي انا {طفلة} شقيه ..
    ارسم احلامي وامارسها كيف ما شئت ..
    لا لأحد الحق ليخترقها ..
    فهي من خصوصياتي انا وحدي ولا سواي ..
    لا تروا الأنثى التي بداخلي والتي أسكنها ..
    فانا ما زلت {طفلة} وسأظل طفله شقيه ..
    لا تعاتبوني وترموا علي جروحكم فانا ما زلت {طفلة} ..
    اتركوني امارس طفولتي كيف ما شئت ..
    العب وامرح واداعب الفراشات واقطف الزهور بشقاوة ممزوجة ببراءة ..
    وحين تضيق بي الدنيا التجأ بخالقي ليفرجها..
    انا هنا متناسية انوثتي وكل مشاعري المجهولة ..
    انا هنا فقط لأعبر عن ما بداخلي وعن كل يومياتي ..
    انا هنا {طفلة} مملوءة بالأمل صعبة الانكسار ..
    انا {طفلة} ولكن لا تتناسوا باني افهم عليكم ..
    انا {طفلة} ولي حق بإبداء رأيي ..
    انا {طفلة} ولي حق بالدفاع عن طفولتي وعن كل ما حولي ..
    انا {طفلة} ولكن عمري لم يأسرني لحد من الكلام ..
    وانا لست سوى {طفلة} شقيه عاقلة ..


    أهربت واجد ..$

    اليوم وبتاريخ 9 /6 / 2015 افتتح مدونتي بعد مرور سنه كاملة من دخولي لعالم وأسرة عبير ..!
    معكم وجدت الراحة والمتعة الفائدة وكل شيء ..
    فشكرا لكل من وقف بجانبي .

    ستتعرفون علي وعلى حياتي المتواضعة هنا ..
    سأسرد لكم كل ما يحدث لي وعن كل ما يضايقني..
    سأعبر عن مشاعري وعن فرحي وعن حزني..
    هنا معكم اتمنى ان تروق لكم سطوري ..



    وردة الأمل !..أهربت واجد ..$
  2. وردة الأمل
    11-06-2015, 01:32 PM

    رد: أهـــربــــت واآجــــــد ..$

    أهربت واجد ..$


    السلام عليكم جميعا ..

    سويت ذي المدونة وأنا ماني عارفه ويش أهربت فيها واليوم قلت خلني أروح أكتب كل إلي ببالي ..
    المهم سمعتوا بالعاصفة المدارية أشوبا .. مدري ليه الناس والإعلام مرتجين ومسوين ضجه ومكبرين السالفه ..
    ترا عاصفه وخلصنا وبعد اليوم قالوا بتتحول لمنخفض عميق يعني خوف ع الفاضي ..

    الصراحة انا فرحانه لانها بتمر علينا وخصوصا أن ذي السنه جفاف وحر فضيع
    بس نحن بالداخل عشان كذا بتكون خفيفه بس لو صارت أمطار قويه فنان من جد لان بيتنا في وادي بس لما بنوه قطعوا الوادي
    بس لو صارت أمطار قويه بينزل الوادي وبيتنا بيغرق وبنقذونا وكذا يعني حماس .. >> لو تسمعني جدتي بتفتح لي المحاضره رقم ٦

    باكر عرس عمي الثاني الاول كان عرسه قبل ٣ اسابيع قبل الامتحانات النهائيه بيومين تخيلوا بس وانا حاضره العرس والصباحيه كمان عادي ممشيه الأمور ..
    وعاد تعرفون الاعراس كيف تجهيزاتها بس ودي اذبح العريس تخيلوا مكيف ع الاخر ولا مسوي شئ بس عليه يأمرنا انت تعال وانتي تعالي سوي هذا وحط هذا اخخخخ قهر واحنا الي ما عرسنا نجهز اكثر منه الله كريم بس ..

    المهم ذات سيت أدري اني أهربت واجد بس عنواني كذا ..

    في امان الله ..
  3. وردة الأمل
    15-06-2015, 10:00 PM

    أهـــربــــت واآجــــــد ..$

    أهربت واجد ..$


    أكثر شئ يقهر في الحياة إنك تكون تعبان على شئ وكرفان فيه بكل ما تعنيه الكلمه وفجأه تنصدم بأن ينسب هالشئ لغيرك و التقدير والشكر وكل شئ يصير لغيرك وإنت حتى إسمك ما ينذكر ولا فوق كذا يحاولوا يشوهوا صورتك قدام الناس بكل الوسائل ..

    يعني تخيل إنت تتعب وتذاكر وتدخل إمتحان وتنصدم بأن أسئلة الإمتحان كانت زفته بكل معنى الكلمه ومش متوقعه أبد ومع ذلك تحلها لانه ما بيدك تسوي شئ ..

    وتشرح للناس الغير فاهمه الدروس كعمل خيري لا اكثر ولا اقل وتفهمها ..

    وتخلص الامتحانات ويعطوك الشهائد وتفرح بنسبتك وتفتخر بها واخر شئ تجيب ناس مدري ويش اقول عنها وتقول لك انت درجاتك بالحرام وانت اناني ومغرور وبس مظاهر وتغش في امتحاناتك وانت واحد دنئ و... يعني تنخدش كرامتك بس عشان درجات لا راحت ولا جات وعشان غيره تافهه تفرق بيننا ..

    قسم انه قهر يضربك لحد نص راسك ..
    بس صدق العباره الي تقول " الزيادة في بعض الأمور قد تنقلب ضد مستخدمها "

    بس على كلن نصيحه اذا صار لك كذا اسكت وما عليك غير تنطش ولا ترد على هذي السفهاء قليلة العقل أحسن لك لأن عقلك أكبر من كذا ..
  4. وردة الأمل
    16-06-2015, 02:11 PM

    رد: أهـــربــــت واآجــــــد ..$

    أهربت واجد ..$


    يسعد مساكم ..

    يعني قرب رمضان وأشوف الناس تبارك وكذا قلت خلني أسوي مثلهم وأقولكم مبروك >> أمزح أمزح

    الله يتمم علينا شهر شعبان بصحة وعافيه و اللهم بلغنا رمضان واجعلنا نختم القران واهدنا لبر الأمان يا الله يارحمن يا رحيم ..

    و..
    في ناس تصلي وتستغفر وتروح المسجد وتقرأ قران وبس يخلص رمضان تنسى ربها ولا تسوي شئ من هذي الأمور إلا في رمضان السنه إلي بعدها ..!

    خير يا المسلم المؤقت يعني بس في رمضان تذكر ربك وبعد رمضان مافي رب ولا كيف السالفه .؟!
    المهم الله يهدي الناس إلي كذا والله يجعلها تمشي في الطريق الصحيح _ امين _

    و ..
    يعني هذا شهر فضيل فيه تمحو السيئات وبعض الناس تصفى قلوبها فلذلك أحب أعتذر من كل شخص في العالم ومن عبير إذا غلطت عليه أو ما غلطت ومفيش أحد معصوم من الغلط بقصد أو بدون قصد ، وترا الدنيا مش مستاهله أية حقد أو زعل ..

    وأوجه إعتذاري خصيصا لشخص واحد هنا في عبير مدري إذا يقرأ هربتتي أو لا أنا اسفة جدا جدا لأني كذبت عليك وأدري مافي شى يشفع لي بس بعد إنت غلطان ..

    المهم الله يتقبل من الجميع طاعتهم وعسى يمر هذا الشهر بدون أي أحزان أو خسائر سواء مادية أو إجتماعيه أو روابطيه أو روحيه >> هو في ذي النواحي ولا أنا مخرفه من عندي .؟!

    و اللهم بلغ جلالة السلطان المعظم ‫رمضان‬ دون أن يشكي تعبا وهما، اللهم اشفه من كل داء وألبسه لباس الصحة والعافية ..

    واللهم بلغ جميع ناس العالم وسكان عبير رمضان بصحة وعافية ..

    ومرة ثانيه مبروك عليكم قرب الشهر الفضيل ..

    وذات سيت ..

    وردة الأمل ..
  5. وردة الأمل
    30-06-2015, 12:37 AM

    رد: أهـــربــــت واآجــــــد ..$

    أهربت واجد ..$


    أهربت واجد ..$

    يسعد صباحكم ومساكم ..

    بين همي وبين شوقي والحنين ..
    حايرن والحظ بعده ما كمل
    اترقب شوف زوله كل حين
    مثل صايم يترقب صوب المهل ..




    كنت أحاكي صورته وأشكي غيابه
    وانثر دموعي واقول اني نسيت

    ما نسيت الا حياتي في ذهابه
    وان بغيت أنساه صديت وبكيت




    أحيانا تشوف شخص إنت نسيته من زمان بس ما زلت تفكر فيه بس أول ما تشوفه ترجع لك كل المشاعر إلي كنت تحسها إتجاه هالشخص ..

    تحاول تقنع نفسه بإنه إنسان عابر في حياتك وخلاص أنا بأنساه في شئ داخلك يناديك لا انت ما زلت تريده .. ما راح تنساه ..
    شعور صعب جدا لما تعرف إن هالشخص ما فكر فيك .. نساك تماما .. إنت تعتبر شخص عادي واقل من عادي في حياته ..


    عالعموم اضحك وفرفش وحاول تتجاهل هالمشاعر ما بقول انساها لانه مستحيل بس تجاهلها يكون أفضل لك خصوصا إذا كان الأمل منقطع من هذا الشخص ..

    وردة الأمل ..أهربت واجد ..$
  6. وردة الأمل
    05-07-2015, 12:35 AM

    رد: أهـــربــــت واآجــــــد ..$

    أهربت واجد ..$


    صباح الخير ..

    تدرون أحسد الناس الي تعيش بمكه يا حظهم كل وقتهم بالحرم وقريب منهم ..

    زرت السعوديه قبل 4 سنوات تقريبا وكان عمري وقتها 10 او 9 كذا ..
    رحنا بر أنا وأمي وأبوي وأخواني وعمتي كانت رحله حلوه بكل معنى الكلمه على الرغم من انه تعب يوم ونص طريق بس حلوه ..

    رحنا مكه والمدينه وبعدها رجعنا اذكر منطقتين مرينا عليهم للحين اتذكرهم الدمام والهفوف اعتقد انها بالاحساء في الشرقيه .. للحين باقيه في الذاكره ..

    وموقفين صاروا معي مستحيل انساهم :
    الاول بمكه طبعا كنت صغيره لما رحت ومره طلعنا لصلاه الظهر وبعدها بننزل للاسواق هناك كنت انا وامي وابوي بس ..
    وقتها كنت لابسه بنطلون وقميص طويل ولابسه حجاب وملابسي تعتبر ساتره مع بنت عمرها 10 سنوات المهم صادفنا رجال هو سعودي كان من النوع الاسمراني مره وطويل وماسك بيده عصا
    نادا ابوي ووقفنا وقام يهاوش ابوي ليش ملبسينا كذا ملابس ومدري ايش وانتوا بتضعيوا الاجر والخ ..

    ابوي ما رد عليه بس سمعه ولما خلص قال له ابوي جزالك الله خير الرجال معصب مدري ليه وعاد معاه عصا الصراحه يخوف شكله انا متخبيه وقتها ورى امي حسبالي بيضربني بس الحمد لله تركنا وراح ..

    والثاني ما يصير اذكره لانه انتوا يمكن تعتبروه عادي بس بالنسبه لي اعتبره قمه في الوقاحه ..

    المهم كانت المدينه المنوره احلى مكان رحناه اهلها طيبين وناس حبابين .. والمكان فيه راحه كبيره ..

    وإن شاء الله بعد ثلاث ايام بجي عمره لمده 8 ايام . .

    طبعا انا وعمتي مخططين من قبل رمضان بس مافي محرم يجي معنا ..
    الكل مشغول ودوامات وخلاص فقدنا الامل لدرجه اني اقول لهم خلاص انا بتزوج الهندي حقنا لمده اسبوعين وبخليه يكون محرم وبعدها يتوكل ع ربه ..

    عن جد كان قهر اننا نريد نروح وكل شئ جاهز ما عدا المحرم..

    بس اليوم كلمنا جدي وقال انا بجي معكم هو متعود سنويا يروح الحج ما شا ءالله عليه وكم مره راح عمره برمضان فقال لنا انا بجي ..

    خلصنا من سالفه المحرم .. والحجز حصلنا بس بر تعب بس شئ احسن من لا شئ ..

    ادعوا اني اروح من زمان ودي اروح بس الظروف ما تسمح وذي المره عسى ما يصير شئ وتخرب الروحه ..

    وذات سيت ..
    إلى اللقاء
  7. وردة الأمل
    25-07-2015, 05:05 PM

    رد: أهـــربــــت واآجــــــد ..$

    أهربت واجد ..$


    يسعد مسائكم بكل خير ..
    كيفكم.؟

    تصدقوا إني نسيت إنه عندي مدونة الا امس تذكرتها ..
    وراح العيد وانا ما هنيتكم في ذي الهربته ..
    يلا ان شاء الله العيد القادم ..
  8. وردة الأمل
    26-07-2015, 10:50 PM

    رد: أهـــربــــت واآجــــــد ..$

    أهربت واجد ..$


    السلام عليكم ..

    شكرا لكل شخص مر من هنا وحط إعجاب أو تقييم شكرا شكرا اوي اوي ..
    ما كنت ادري انه هربتتي ذي بتروق لبعض منكم ..

    بخصوص عنوان المدونه في شخص قال لي عنوانها غريب ما كنت ادري انه البعض ما عارفه ..
    "أهربت واجد " يعني أتكلم واجد وبكلام ما منه فايده او مش مفهوم كذا يعني أتمنى وصل لكم المعنى ..

    وربي يسعدكم جميعا ..
  9. وردة الأمل
    29-07-2015, 09:25 PM

    رد: أهـــربــــت واآجــــــد ..$

    أهربت واجد ..$


    يسعدلي مسائكم ..

    اليوم سمعت كلمه "خطار" الخاء مضمومة والطاء عليها شده وتذكرت سالفة صارت معي ..
    إسمعوا مره من المرات جالسين انا وجدتي وجدي كان أسمع جدتي تقول باكر بيجيوا الخطار بيتكم وتجهزي زين ..
    أنا اول ما سمعتها صنمت مكاني خطار وفي بيتنا ..
    انا حسبالي أن خطار يعني خطاب ههههه
    المهم قلت كيف بيجيوا خطاب في بيتنا يعني اذا هم جايين لوحده من عماتي بيروحوا بيت جدي
    والافكار قامت توديني وتجيبني وبالاخير حضرة جناب عقلي
    استنتج ان الخطاب جايين عشاني انا >> يالله حيهم بس هههه
    لانه مافي ببيتنا بنت غيري انا ..
    وقمت اقول كيف اهلي بيزوجوني لالا مستحيل يسووها كيف يزوجوا وحده صغيره
    والعقل الباطني يرد علي مافي شئ مستحيل اهلك بيزوجوك وانتي جالسه تضيعي وقت وتفكري روحي تصرفي ..
    وقمت افكر وافكر المشكله ان الي بيجي باكر أهل زوجة عمي يعني كيف بيجيوا في نفس الوقت هم والخطار ..
    وبعدها مره ثانيه عقلي الذكي استنتج انه الخطاب هم اهل زوجه عمي وقمت افكر اي واحد من اهلها
    الي اعرفه انه مافي احد من اهل زوجه عمي على سن زواج ..
    وتعبت من التفكير وجاني صداع ..
    وبالاخير عشان اريح نفسي
    رحت لجدتي قلت لها من الخطار الي بيجيوا باكر قالت لي اهل زوجه عمك قلت لها الحين ويش يعني خطار .؟
    قالت لي { ضيوف }
    صدمت حياتي يعني الحين وبعد هالافكار ومدري ايش واخرتها تطلع خطار يعني ضيوف
    قسم اني ضحكت على نفسي وانقهرت يعني لو سالتها من اول ما احسن لي انا ووجهي
    وخلاص من ذاك اليوم لحد ساعتكم ذي وانا اي كلمه ما افهمها اسال ويش يعني ..

    إلى اللقاء ..
  10. وردة الأمل
    02-08-2015, 09:03 PM

    رد: أهـــربــــت واآجــــــد ..$

    أهربت واجد ..$


    أهربت واجد ..$

    ما شاء الله .. صار لنا اسبوع تقريبا أمطار غزيره
    تسبقها ريح قويه ..
    وأحيانا ريح وأمطار في نفس الوقت بس اليوم أكثر شئ ..
    كان الظهر والعصر ريح قويه ومن الساعه ٧ ولحد الحين الساعه ١٠ أمطار ما توقفت ..
    الجو خرافي بس بارد مره ورطب ..
    أحس بإرهاق الحين من كثر اللعب تحت الامطار وبرد ..
    اللهم إجعلها أمطار خير لنا ..

    إلى اللقاء
1234567891011 ...