قصيدة احمد ونورة

الامير العنيد

Well-known member
ألو .. بابا

هلا بنتي , هلا يا دنيتي انتي
هلا يا ضحكة ايامي
يا فرحي وصوتي وصمتي

علامك ساهره بابا؟
الين الحين ما نمتي؟
وش تقولي!!
يزعلونك؟!
من اللي زعلك قولي؟
بأجي الحين واطقه ..

تبي لعبه؟
بأجيب احلى عروسه لك ،
عروسه تشبه عيونك
ولكن هاه ، غطيها اذا نامت
و وكليها اذا جاعت
وش تقولي؟
تطقك ماما لو ضاعت؟
فداك ان ضاعت اللعبه ،
وماما وبابا يفدونك ،

هلا؟ ، وشو؟!
اعرف اكتب!
خلاص شوي انا ارجع ،
اجيك ونكتب الواجب ،

يحاكيها وجنبه صاحبه احمد ،
كسر سمعه ،
لقى في حكيهم متعه ،
نزل دمعه على حاله ،
وسج بلا وعي باله ،
تمنى لو يجي لحظه مكانه ، ويتهيا له ،
واحمد له ثمان سنين متزوج ،
بدون عيال . . .
يموت ، وينعصر قلبه اذا مر بشتات اطفال ،
وفجأه رن جواله ،

ألو ، احمد بتتأخر؟
ترى حضرت لك أكلك ، متى بألقاك قدامي؟

هلا ، لا لا ، ابتأخر ، تعشي انتي ونامي ...

علامك؟ ليه متضايق؟

تنحنح احمد وجاوب ، ابد .. جدا انا رايق ،

درت ما هو على بعضه ، علامك قول!
تخبي عن غلا روحك ، تكلم قول وش نوحك؟
انا كلي فدى همومك ،

حكى احمد بلا رحمه ،
خنقتيني ، أبي خلفه ، أبي مولود ،
أبي جاهل يشيل اسمي ، يشابه بالشكل رسمي ،
ابي أصحى على ازعاجه ، وأرد ارقد على ازعاجه ،
ابيه يعطل اشغالي عشان ارتب العابه ،
وألبسه مثل ما البس ثيابي تشبه ثيابه ،
يروح المدرسه ويرجع يكلمني عن اصحابه ،
في بالي لو يجي والله مية رغبه ورغبه ،
حكى أحمد ، وصك الخط . .
ولكن حالته صعبه ،

بكت نوره بليا صوت ، تمنت لو خذاها الموت ،
ولا تسمع حكي منه يموتها بلا سبه ،
ألا يا صعب حالتها ولكن ويش حيلتها ،
تمنت بيدها حاجه وتبشر بالفرح قلبه ،

دقايق بس . .
وطق الباب ،

درت انه بيراضيها ،
ما هو للحين شاريها ،
تخبت عن مدامعها ...
وهلت به ،

وقف احمد معه ورده ،
ودمعاته على خده ،
خذاها بحضنه وسالت مدامعها على كمه
كتم حزنه ، ولكن دمعها زود معه همه ،

وقالت له ، بعد ما لملمت من حزنها بسمه ،
تزوج . . عادي ما بزعل ،
بأشوفك أب وافرح بك ،
لو غيري تكون أمه ،
ترى هاليوم هو عيدي ،
ترى من كثر ما احبك ، أحسك انك وليدي ،

وحط ايده على فمها ،

وقاطعها بقولة اششش ،
اذا بأفرح بمولودي مع غيرك احسه غش ،
قسم بالله يا نوره ، غلاك يفوق تصويرك ،
اذا ما صرت أبو منك ، أنا ما ابيه من غيرك ،
انا بك مكتفي اصلا ، مليتي دنيتي انتي ،
يا بنتي ، وزوجتي ، واختي . .
وترى الدنيا كثير اجمل ، وعادي بلا طفل تكمل ،

وتبين الصدق انا مرتاح ،
يجينا طفل ، يكبرنا ، ويزعجنا الى من صاح ،
ويمكن يشغلك عني ، ويمكن ياخذك مني ،
وانا اصلا عليك أغار ،
كذا أجمل ،
انا من يوم جيتيني وانا صاير لعينك أب ،
يا احلى واجمل واوفى ويا اغلى عطايا الرب ،

يكفي ، عشتك الماضي ، وبأعيشك عمري الاتي ،
الين أشوف شيباتك ، والين تشوفي شيباتي ،
والى من مت انا قبلك ، وصرتي من بعد موتي أم ،
ابيك تصيري أم أحمد ، عشان يذكرك فيني ،
ويقولو ما نسيتيني ،

وبكت نوره وهي تهمس ، عسى يومي قبل يومك ،

اقولك سر يا نوره ،
مع ان ما بيننا اسرار ،
ولكني أبي اثبت لك بإني حاسبك بنتي ،
اذا تدرين . .
انا ربعي موصيهم ينادوني ..
أبو نوره ،



رووووووووعة
راقت لي

Sent from my GT-I9100 using منتدى عبير mobile app
 
اخي الامير...
أخذتني كلماتك في رحلة
قصيرة..ولكنها كانت جميلة
استمتعت خلالها بكل كلمة كانت مكتوبة
سلمت يداك..
 
عودة
أعلى