قصائد العليوي

مجموعة قصائد للشاعر عبدالله العليوي رحمه الله



ياليتني ماشفت زولك ولا جيت
دربك ولا شافت عيوني عيونك
ليتي معك بالمعرفة ما تماديت
ليت الظروف وسود الأيام دونك
من قبل أشوفك ليتني عنك صديت
قبل تمكن بالضماير طعونك
الوقت ما جالي على ما تمنيت
خلن بحالي ما ترجيت عونك
يا زين من طول المشاوير مليت
يا مشغل قلب شقا فيك هونك
وين أنت أنا لك تالي الليل ناديت
حتى السهر ماله حلاة بدونك

.............................. ............

مما راق لي

محاولة نسيان حبك وطاريك
أكبر خطاء فكرت به في حياتي
حبك سطابي حطني بين أياديك
صار إندفاعي لك من أبرز صفاتي
ابيع كل الناس يازين وأشريك
وشوف في نظرة عيونك غناتي
ليت الهموم تصيب قلبي وتخطيك
ما اقول قلي من يسوي سواتي
يزداد حبي لك بزايد تغليك
حسيت إني فيك حققت ذاتي

.............................. .
لا تزيد الجرح ماقصر زماني
شايل بالقلب أحزان السنين
لاتزيد الجرح مافيني كفاني
لا تصير اليوم مع وقتي معين
ياحياة الروح ربي بك بلاني
بالحشاء لك جرح يالغالي مكين
في زمان فات يالغالي تراني
أخفي الأحزان والعبرة تبين
مندفع لك جيت شوقي لك حداني
جيت أبي نظرات عطفك والحنين
عمري اللي ظاع باحلام وأماني
شوفتي لك يوم والفرقا سنين
.............................. ...........

الصيف قرب وا عذابي من الصيف
يبي يروح الزين ماعاد ينشاف
لا غاب عن عيني حسين التواصيف
عز الله إني للشقاء صرت ميلاف
العام جرحي داخل القلب ماشيف
واليوم أخاف جروح فرقاه تنشاف
قلبي معه والدرب يمه صواديف
ليته بجنبي كان ما عندي خلاف
ياصيف ... لا تبعد قلوب مواليف
ارفق ترى قلبي على جال ميهاف
في بحر حبه ما تفيد المجاديف
انشهد ان الدار لا غاب تنعاف

.............................. ........
ذكرتني حبك وأنا أقول ناسيه
جرحت جرحك يوم قرب يطيبي
في شوفتك شديت قلبي لماضيه
يوم أنت عني ساعة ماتغيبي
يا للي تلوم القلب بفراق غاليه
ليتك بدنيا الحب تأخذ نصيبي
تمشي بدرب ما تحسب تواليه
ماتدري إنك بالنهاية صويبي
تذكر حبيب راح تبكي لياليه
دار الزمان وكل شمس تغيبي
بيديه قلبي يا عرب كيف أخليه
من حبه الظالم تعذر طبيبي
.............................. ........

خايف عليك ومنك بالحيل خايف
عزي لقلبي يجمع الحب والخوف
خليت قلبي والشقاء بك ولايف
قلبي عمى وش عاد لو عيني تشوف
عمري قضى ماقلت لك واحسايف
عندي نهايه درب الاشواق معروف
جرحت قلبي يا عديم الوصايف
ماظن تشرح ما بقلبي لك حروف
قلبي لغيرك لو تغليت عايف
حبك ملك قلبي ونساني الخوف

.............................. ......

ما بقى بي حيل للجرح الجديد
جرحك اللي فات توه مابرا
صارت الأيام مثلك ياعنيد
عن جروح القلب قلبك مادرا
من خطاك العام حاول تستفيد
وادفن الذكرى القديمة بالثرا
يوم قلبي عنك مايبعد بعيد
وأنت قلبك بالهوى باع وشرا
ليت من ينساك في حب جديد
ليت حبك ما على بالي طرا
..............................
 
الشاعر عبدالله بن عبدالعزيز العليوي رحمة الله عليه
من شعراء المتميزين المعروفين
وسبق ان وضعت له ديوان في قسم الدواوين
بارك الله فيك على طرحك الراقي المذهل
 
عودة
أعلى