باعوا أبوهم

المواضيع الأدبية التي لا تندرج ضمن باقي الأقسام
  • ارسال إلى Twitter
  • ارسال إلى facebook
  • ارسال إلى google plus
    1. اسيرالهوى
      09-03-2005, 12:55 PM

      باعوا أبوهم

      باعوا أبوهم


      الشاعر جحيش بن مهاوش قال قصيدته في عياله ودعى عليهم فلم ينجبوا اولادا وقيل انهم تزوجوا مرة ومرتين وثلاث من أجل ان يرزقهم الله ولكن امر الله قد نفذ وانقطعت

      من ذلك الزمان ديارهم
      والقصة ومافيها انهم تنكروا لوالدهم حيث توفيت امهم وهم صغار وقام بتربيتهم حتى كبروا وكان لهم بمثابة الام والاب يسهر الليالي على رعايتهم وراحتهم وفي النهار يذهب

      لجلب طعامهم.
      وعندما كبروا تنكروا له وأصبح لايريده احد منهم مراعاة لخاظر زوجاتهم اللاتي تأففن من خدمته وصار كل واحد منهم يطرده من بيته فما كان من الوالد الا ان سكن إحدى

      (الخربات) حتى صار لايقوى على النهوض أو السير وضعف بصره فذهب زاحفا يتوسل ويترجى ابناءه بأن يمكث عندهم حتى يقضي الله أمره فلم يستجب له احد منهم.

      فقال فيهم الابيات التالية:


      قال الذي يقرا بليا مكاتيب..........ياللي تقرون العمى من عماكم

      ياعيالي اللي تشرفون المراقيب..........تريضوا لي واقصروا في خطاكم

      خذوا كلام الصدق مابه تكاذيب..........مثل السند مضمون للي وراكم

      ياعيال لاصرتوا ضيوف ومعازيب..........ترى الكلام الزين ملحة قراكم

      وتروا السبابة من كبار العذاريب..........وهرج البلايس مايطول لحاكم

      المذهب الطيب فهو مذهب الطيب..........والمذهب الخايب يبور نساكم

      ياعيال ماسرحتكم باللواهيب..........ياعيال ماعمر المعزب ولاكم

      ياعيال ماضربتكم بالمشاعيب..........ولاسمعوا الجيران لجة بكاكم

      ياما توليت القبايل تقل ذيب..........من خوف لاينقص عليكم عشاكم

      وياما شربت السمن من عرض ماجيب..........يفز قلبي يوم يبكي حداكم

      أحفيت رجليني بحامي اللواهيب..........وخليت لحم الريم يخالط عشاكم

      ياعيال دوكم لحيتي كلها شيب.......... هذا زمان قعودنا في ذراكم

      قمت اتوكا فوق عوج المصاليب..........قصرت خطانا يوم طالت خطاكم

      عطوني القرضة عليكم مطاليب..........عطوني القرضة جزى من جزاكم

      لابد يوم عاوي دوني الذيب..........بالقبر مافرق طيبكم من رداكم

      ماني بفاضحكم بوسط الاجانيب..........باعمالكم يدرون كل اقرباكم

      لو كان تدرون الردى والمعاييب..........صرتوا مع المخلوق مثل خوياكم

      خوالكم بالطيب تروي المغاليب..........ولو تتبعون الجد محدن شناكم

      وش علمكم ياتاركين المواجيب..........حسبي عليكم هالردى وين جاكم

      قصيتكم واسندت وادي سلاحيب..........ولقيت بالصبخا مدافيق ماكم

      ياعيال بعتوني بصفر العراقيب..........ماهي حقيقة سود الله قراكم

      يالله عسى اعماركم شمسها تغيب..........يعتم قمركم ثم تظلم سماكم

      ياعلكم في حاميات اللواهيب..........ياللي على الوالد خبيث لغاكم

      شفت الجفا والحيف والغلب والريب..........بضلوعكم لابيض الله قراكم

      عسى نساكم ماتحمل ولاتجيب..........ولاحدن من البزران يمشي وراكم

      اخسوا خسيتوا ياكبار اللغابيب..........اهبوا هبيتوا يقطع الله نماكم


      *************

      صفر العراقيب = النساء

      المذهب الطيب فهو مذهب الطيب .. والمذهب الخايب يبور نساكم
      البيت هذا يحكي الطيب اللي يعرفه في نسبه ويمدح خوال عياله انهم طيبين
      ويستغرب كيف الردى جاهم وصارو رديين.............
      ياعيال ما سرحتكم باللواهيب ... ياعيال ما عمر المعزب ولاكم
      هذا الشطر يحمل من المعاني المحزنه
      في الوقت الماضي ايام الفقر والناس ماتلقى من وين يجيهم دخل
      كان يروح الشخص اللي عليه قل مال ويسرح يعني يصير راعي ماشيه
      وياخذ اجره رأس من الماشيه اللي يحفضها ويرعى فيها
      وكان جحيش يخاف على عياله من الشمس والقيض والحر والسموم
      ويخاف عليهم من هواش الشخص هذا اللي اللله اكرمه وعطاه الحلال هذا
      فا راعي الحلال دايم تلقونه عصبي يخاف على حلاله وجحيش مايبي احد يزعل عياله
      يوم صارو شباب وكبرو شوي وقال الشطر هذا
      ياعيال ما سرحتكم باللواهيب ... ياعيال ما عمر المعزب ولاكم.............................
      دئما اغلب الاباء يطقون عيالهم ويقولو لعيالهم قبل
      اطلع رح عني لا تسكن معي مو كره في عياله لا بس عشان تطلع رجولته ويصير رجال
      يعتمد على نفسه...
      واللي مايطلع بعض الاباء يضربون عيالهم ومثل ماقلت ماهو كره لهم
      وكان جحيش يشوف النوع هذا من الاباء وعطانا عبره في الشطر هذا
      ياعيال ماضربتكم بالمشاعيب .. ولا سمعوا الجيران لجة بكاكم...................................
      أأأأأأأأأأأأأأأأأأأأأأأأأأأأأأأأأأأه
      ياما توليت القبايل تقل ذيب ... من خوف لاينقص عليكم عشاكم
      أأأأأأأه
      يروح الي جميع القبائل يدور اي شغله عشان مايجوعون عياله
      ................................. فعلن أأأأه
      ليش ياحريم..........
      لرجل قلب من حديد لا احد يستطيع غلبه الا النساء
      لا احد ينكر ان الزوجات طموحهن اقوى من شلال هادر....
      ولا احد ينكر ان بعض الزوجات احرص من قلوب ازواجهن عليهم
      وتخشى على زوجها اكثر ما تخشى على نفسها.....
      ولكن قله....!
      جحيش كان يروح لعياله في الرفه( القاطع في بيت الشعر المخصص لكل واحد من أبناءه
      هم ثلاثه
      راح الي رفة الكبير وطردته زوجة ابنه الكبير
      ومن ثم راح للاوسط:: وطردته زوجة ابنه الاوسط
      ومن ثم الاصغر::: وكذالك طردته زوجة ابنه الاصغر
      ولما أتى كل واحد الي رفته
      وكل وحده منهم قالت لزوجها ابوك غثنا مخرف وماعاد يحترمنا
      ومن الكلام هذا........
      وش قال عاد جحيش::::
      قال::::::::ياعيال بعتوني (بصفر العراقيب)* ... ما هي حقيقة سود الله قراكم
      صفر العراقيب يقصد بها النساء.....
      وهنا الابناء تركو ولدهم في الروض اللي كانو ساكنينه
      الروض::: الارض الصحراويه ومكان تربية جحيش لهم
      وقال::::ياعيالي اللي تشرفون المراقيب ... تريضوا لي واقصروا في خطاكم
      اقصرو خطاكم يعني وقفولي انا في عقلي لكن كبرت وماقدر افك روحي
      حتى من اصغر الحيوانات البريه
      في عز شبابه كان شجاع والريم اللي هو نوع من انواع الغزلان
      كان سريع وقله اللي يقدرون على صيده
      وكان يصيده لعيالهم
      وقالهم
      أحفيت رجليني بحامي اللواهيب ... وخليت لحم الريم يخالط عشاكم
      في عز حرارة الشمس على الارض كان يجري خلف هذا النوع من انواع الغزلان
      حتى يصيده ويعشي عياله من لحمه
      وهنا الدعوه اللي دعاها على عياله ومن المؤرخين الذين صدقوا
      ان جحيش انقطعت سلاسلته ولم يعرف بعد هذا اي نسل له
      واسمعو كيف دعى عليهم وقال:::
      عسى نساكم ما تحمل ولا تجيب ... ولا حدن من البزران يمشي وراكم
      اخسوا خسيتوا يا كبار اللغابيب ... اهبوا هبيتوا يقطع الله نماكم

      منقول..

      250*300 Second
    2. كادي
      09-03-2005, 03:23 PM

      باعوا أبوهم


      مشكور اسير على هذه القصيده التى تشعرنا بالاسى على ما جناه الابناء لوالدهم.............


      كم من أخ لك لم يلده ابوكا
      وأخ أبوه أبوك قد يجفوكا
      صاف الكرام إذا أردت إخاءهم
      واعلم بأن أخا الحفاظ أخوكا
      كم أخوة لك لم يلدك أبوهم
      وكأنما اباؤهم ولدوكا.........



      ومليووووووووووووووووووووووووووووووووووووووون شكر لك
    3. اسيرالهوى
      10-03-2005, 12:30 AM

      باعوا أبوهم


      اشكر لكم مروركم

      انا عارف ان هالقصيده مشهوره لكنها مؤثره بالنفس والله من وراء القصد
    4. جبــ الخواطر ــر
      10-03-2005, 03:08 PM

      باعوا أبوهم


      يسلمووووووووووووووو........

      وصح لسان قايلها........

      مشكووووووووور خيوووو على المجهود الرائع في انتقاء القصايد......

      ولكم مني جزيل المحبه ..

      ودمت بخيررررررررررر ......

      اخوك :

      جب الخو111طر ر
    5. اسيرالهوى
      12-03-2005, 06:43 AM

      باعوا أبوهم


      مشكور اخوي مشعل على مرورك المشرق والمشرف

      ولك اعبق وارق واجمل تحيه
    6. *مزون شمر*
      09-11-2007, 02:49 AM

      باعوا أبوهم


      الله المستعان
      يعطيك العافيه على النقل
      تحيتي
    7. نوران العلي
      11-02-2010, 09:23 PM

      باعوا أبوهم


      موضوع جميل ..وطرح رائع ..
      جعلنا الله من البارين بابائهم وأمهاتهم..

      ينقل للقسم الادبي ..