ديوان الشاعر هيكل الشمري ,,

الحالة
مغلق و غير مفتوح للمزيد من الردود.
قصيدة مستفعلاتن فاعلاتن مفاعيل

مستفعلاتن فاعلاتن مفاعيل
مفعولها ياهل التفاعيل فعال


مار اسمحولي للتفاعيل ماميل
قلبي على نهج الطواريق ميال

اشيل من كثر الهواجيس واشيل
افخم قصايد جبتها بيال يالال


ولاهمني بالشعر ملي الكشاكيل
ماهمني غير السمينات واجزال

اعجب من اللي يقصد ابعين ياليل
ويلقى من الجمهور اعجاب واقبال


هذا دليل ان الشعر صاربه ميل
ولا بحور الشعر ماعادله جال

العين دايم ترقب الجدي وسهيل
ماتقصر بشوفه على مخايل اظلال


ارقى مراقي مارقوها المشاكيل
وليا كتبت انحت على روس الجبال


اهنيه غيمه مزنها يرسل السيل
واهنيه سيله يغرق العين لاسال


واهنيه برقه لاضرب يضربن حيل
ويشكل اهمومي على كل الاشكال


اهموم لاحلت تهد حيل حلحيل
وهي حلها بيد الذي عالم الحال


منها واذا شكلت بالشعر تشكيل
اتجيبني للواو والجيم والدال


وقبل الختام الحين ياهل التفاعيل
بيت بقوله تو جاني على الفال


ان ماحضى شعري على ذوق هالجيل
يمكن يجي في يوم تحفظه الاجيال





,,,,,,,,
 
قصيدة لاصرت مبدع في عيون الجماهير

يالله ياللي امدبر الكون تدبير
يالله لا تخيب رجا من ترجوك


انت الولي لا مايجي منك تقصير
وابطلبك تغفرلي الذنب ارجوك


يالله تصلح ناسن اقلوبهم جير
ناسن تحوك الهم في خافقي حوك


ياقلب لو زادت عليك المعايير
ياقلب خله للولي لا تولوك
ناس على دمعي تزف التباشير
وناسن تجيب المر وتقوللي دوك


كم واحدن فيهم مثل نافخ الكير
وكم واحدن فيهم كلامه تقل شوك


ابذكرك ياشاعر الامس بالخير
واليوم الوم اللي على الشعر لاموك


صح الله لسانك مع كل تقدير
الشعر لوك وكل شاعر على لوك


عرفت انا مايودعك بالشعر زير
شفت الحيا من يجعل الحر مملوك


الشعر صار القاء مابه تعابير
واليوم جاله طير في قاف محبوك


شامخ ولا من يلمح الجزله ايغير
ويعافها لاشاف به نقل مشبوك


شاعر تصف ابيوت لجله طوابير
مثل العساكر صفها لجية املوك


يمشون في طوعه جنودن مغاوير
والميج تستعرض وفي بطنها هوك


وفيالقن لا ماتعرف المخاسير
واضعف سريه فيهم اسباع لاجوك


عزمت احرر ساحة الشعر واغير
على الذي ياساحة الشعر خانوك


شفت الشعر عقب البحر صايرن بير
ولا عاد يرضي ذائقة كل صعلوك


لاصرت مبدع في عيون الجماهير
ناسك مع ربعك عن القاع شالوك


وان حل محلك بالشعر شاعرن غير
عينك تشوف ان اقرب الناس شاتوك


قال المثل من فوق طير يجي طير
يعني ثلاث اسنين والرابع انفوك


دام كذا طبع البشر ياهل الخير
تبشر بعزه هيكل اليوم داكوك


طاير سما لا مايرا حوله اي طير
وان طار طير بين كفيه ممسوك


استغفر الله مو كبر مار تصوير
ياقلب مو من طبعك الناس حدوك


لاصرت مبدع في عيون الجماهير
ناسك مع ربعك عن القاع شالوك


وان حل محلك بالشعر شاعرن غير
عينك تشوف ان اقرب الناس شاتوك






,,,,,,,,,,,,,,,,,,
 
قصيدة كل مطرود ملحوق

الهم خاواني وصرنا رفاقه
حتى مكانه بالحشا صار مرموق


ميانته وياي فيها حماقه
وليا شره جاني يدور على حقوق


وليا تصنع في كلامه طلاقه
وليا تلكع مثل دلال في سوق


استغفر الله في كلامه بساقه
ولاكنه الا الضيقة الخلق مخلوق


اركيتله بالصبر ارجا فراقه
واثره مع الايام يزداد لي شوق


اركى على قلبي ولابه شفاقه
يسفط لي الاحزان ويسوقهن سوق


وليانشدت الشعر ياتي بطفاقه
وليا لفى جاني مع كل طاروق


يصور الاشواق حسب اشتياقه
وان حب شخص ومدحه طيره فوق


من لزقته طلعلنا اليوم ساقه
طبق علينا كل مطرود ملحوق


مذكر تعب من زود مابه لياقه
عن وجهته انبوق ارواحنا بوق


ماعاد في صبري على الهم طاقه
ياكيف اطيق الصبر لاصرت مخنوق














,,,,,,,,,,,,,,,,,,,
 
قصيدة ليت الليالي علمتنا خفاياه

بديت باللي رحمته مالها احدود
الواحد اللي ماترك من ترجاه


اللي سخط في عاد قوم النبي هود
وانجى نبيه يوم عاد اتحداه


ومن عقب ذكر الله ياراعي الجود
الهاجس اللي ماكنن منك انساه


ليت الذي مافات بالحاضر ايعود
وليت الليالي علمتنا خفاياه


مار الليالي امسيره يافتى الجود
ماينكتب للعبد لابد يلقاه


ياسعود لاتيأس من الوضع ياسعود
ماكل شي يلفي على ماتمناه


لالا تقول ان باب الارزاق مسدود
عين من الله خير واستغفر الله


باكر انا وياك والناس للدود
والاجودي لامات مامات ذكراه


ياسعود لاترجى ورا الربع مردود
بعض الربع ربعين وارباع واشباه


الموجبه ابذل لها كل مجهود
وخاو الذي للناس يازين ملقاه


الصاحب اللي ماورا صحبته فود
خله يولي قلعة امقيط ورشاه


والصاحب اللي لاقسى الوقت موجود
هذا الذي مايطمن الراس شرواه


وصلاة ربي واحدن حي معبود
على نبين جابت الحق يمناه





,,,,,,,,,,,,,,,,
 
قصيدة ياللخزي ماعقب غزه بعد عار

مثل الجبل راسي ولاهزني اعصار
الراس راسي لو تجي له اعاصير

باعد اقوالي على صيغة اشعار
ومن قال لي اسكت ابا قول له طييييير


بنت العرب غزه ارا سترها طار
واطفالها صارو ضحيات تفجير


انا اشهد ان معبر رفح جار بالجار
وانا اشهد ان اولمرت ملعون ابو صير


ياللخزي ماعقب غزه بعد عار
وحنا نشاهد بالجزيره وش ايصير


تشافيز احر من قلب حكامنا صار
ثار وعطى سفير صهيون تسفير

حكامنا قومو ترا مامن اعذار
الشجب نعتبره مهانه وتخدير

بالله ماتدرون الايام تندار
والموت واحد مايجي فيه تأخير


حطولكم في صفحة المجد تذكار
خلوبها الاجيال تذكركم بخير


خلو دفاعات العرب تفتح النار
وخلو صقور الجو اتحوم وتغير


نسقي بني صهيون من كاس الامرار
ونكبد العدوان اكبر مخاسير


تشهد لنا الجولان في صد الاشرار
يوم ابو اردين عليه المناعير


مثل الجبل راسي ولاهزني اعصار
الراس راسي لو تجي له اعاصير


عديت اقوالي على صيغة اشعار
ومن قال لي لالا ابا قول له طييييير






,,,,,,,,,,,,,,
 
قصيدة فرحه مالها قياس

فرحت فرحه بشوفتك مالها اقياس
فرحة غريق بالبحر شاف قارب


مريتني في لحظة جاني الياس
وانت الامل يوم انه الوضع خارب


الله حسيب اللي من الناس بلاس
اللي بنا مابيننا سد مارب


اللي يحسب الهرج بالناس نوماس
واللي يموت ان مايشتت اقارب


الله حسيبه يوم سكرات الانفاس
في يوم مهما فر ماله مهارب


سكران من هول الحدث مو من الكاس
في ساعة تاقف عليها العقارب


ياصاحبي اكتب على كل قرطاس
مجروح من بعدك وعشت التجارب


اواجه الهوجاس في قوة الباس
وواجه اهمومي بوجه المحارب


افضل اني طول الايام قرناس
اخير مصبح طول الايام هارب


اصبر على النمام واقول لاباس
عند الحقيقه مايهز الشوارب


ناسن فلا تاوي ولاترحم الناس
هم ناس لكن من فصيلة عقارب


ناسن ابد ماعندهم ذرة احساس
تجريحهم له وقع صعق الكهارب


ليه العرب قامت تميز بالاجناس
وتقول ذا مستعرب وذاك عارب


ضرب العرب مابينهم يرفع الراس
وضرب اليهود اطير منه الغوارب






,,,,,,,,,,,
 
قصيدة والدينك

نور حياتك من تعاليم دينك
واعمل على الاثنين دينك ودنياك


وارض الولي لابد ربي يعينك
واستغفر الرحمن يغفر خطاياك


بالمعصيه لالا تضيع سنينك
لاتاخذك بالاثم عزه وتملاك


اهدا وفكر بين نفسك وبينك
لاتجعل الشيطان يافلان يالاك


نسيت امك يوم تسمع ونينك
عافت لذيذ النوم من شان ترعاك


نسيت ابوك اللي يداري كنينك
ياما طلبت اشياء واشياء وعطاك


يوم اكبرو يرجون منك حنينك
لاماهقو في يوم ترميهم اهناك


في دار لايقطك عليها جنينك
وش موقفك في ساعته كان خلاك


وعينك تشوفه وانت غاسل يدينك
انه يجي في ساعة به تمناك


انا اشهد انه ساعته رد دينك
زي انت ماسويت يتبع سواياك


يافلان لو جبت القمر في يمينك
حتى ولو الشمس جبته بيسراك


والله ماتلحق جزا والدينك
امك وابوك اللي مشو دوم لرضاك


دار الحنونه حطها وسط عينك
واخدم ابوك اللي على العز رباك






,,,,,,,,,,,,,,,,,
 
قصيدة ياهلا بالغلا

ياهلا بالغلا منك وفيك الحلا لا ولا يالغلا شفت مثلك مثيل
مثل بدرن ظهر ليلة اربع عشر لاكتمل بالبها يشبهك في بهاك


قلت ياود مامثل ودك ابد قال ابرحل ترا قلت ليه الرحيل
انت بعدك ألم لم لم الهم لم وانت لم لا ولم ترحم اللي هواك


كيف راع الهوا لاسرا مادرا قام يمشي ورا مثل عابر سبيل
والسبب في ذهب مايذوب ابلهب والعجب لاجذب جاذبية هلاك


انت عينك مثل در فاخر ندر في بحر ماذكر في بحور الخليل
هدة الحيل هد ياشهد وش بعد وانت ياود ما فيه ود ابغلاك


فيك تاه الفكر وان غدا ما هدا وابتدا لاغدا صيد شعرن جزيل
جبتلك بالغزل مايزلزل جبل مامل يا أمل دام قلبي معاك


ياهلا بالغلا منك وفيك الحلا لا ولا يالغلا شفت مثلك مثيل
مثل بدرن ظهر ليلة اربع عشر لاكتمل بالبها يشبهك في بهاك





,,,,,,,,,,,,,,,,,,
 
قصيدة كارثة الجهرا

بديت باللي رحمته مالها حدود
واسم الولي بادي على كل بادي


يالله يامن دايم الدوم موجود
انت الولي يالله ياخير هادي


ابرحمتك ارحملنا كل مفقود
واشف المريض اللي من النار غادي

يالله سترك صارت ايامنا سود
والدار عقب النار صارت سمادي


عقب الفرح عقب التباريك وورود
صارن بنات الدار للنار زادي


الكارثه في مشهد غير مشهود
يالله دخيلك مشهده غير عادي


من هولها تكسر القلب ياسعود
ولبسن بنات الفكر زي الحدادي


الموت حق واخر العبد للدود
وان طال عمر العبد موته وكادي


الا الشهيد ان مات مامات موجود
في جنة الفردوس ياهل البوادي


والله يعظم اجركم ياهل الجود
ياهل الصبر ياهل الشيم والمبادي


وصلاة ربي عد ماينبت العود
على حبيب الله خير العبادي






,,,,,,,,,,,,,,,,,,
 
قصيدة اعترافي

تصب المر لي ماقول كافي
احس المر من مرك عوافي


مثل مره على قلبي احسه
وكل ما مرة امراري تشافي


انا فيني من الباري طبيعه
ابد مابوح سري دوم خافي


ولكنك دخلت القلب فجأه
وتليت المشاعر واعترافي


أحبك حب نساني كياني
وخلاني أسير الدرب حافي


ومن شد الهوا قمت اتلفت
أدور عن خيالك بالفيافي


وحيد مامعي إلا ظلالي
يجاريني على طرق القوافي


عليك اشتاق لامن غبت عني
بدونك تصبح ايامي عجافي


اذا حطيت عينك وسط عيني
تشوف لمركب هيامك مرافي


واذا حطيت عيني وسط عينك
اشوفك ياحبيب الروح غافي





,,,,,,,,,,,,,,
 
قصيدة مايصح الصحيح

مات حبر القلم في دفتري واستراح
مات من كثر ماينزف حروفي جريح


طارن اوراق شعري مع هبوب الرياح
طارن اوراق شعري والمشاعر تصيح


يارفيقي ترفق لاتزيد الجراح
لاتعاتب تعبت اتبع مودة شحيح


تابع الهم فيني وين مارحت راح
صارلي مثل ظل ذو خيال قبيح


ناظر الوقت هذا كل شين مباح
يارفيقي ترفق مايصح الصحيح


قالو العلم اول يارفيقي سلاح
قلت الاول تحول ماجامل صريح


وقتنا به نجاحك مايجي بالكفاح
يعتمد عالوساطه يعتمد عالمديح


كان تبغى تجنب شر سمن ذحاح
يارفيقي تثبت لاسمعت الفحيح


انتبه لاتقع مثلي صويب الرماح
من عيون تضيق كل صدر فسيح


لاعطالله حمام الورق من يوم ناح
افتنني وعقلي عن هواهن رجيح


من سبايب حمامه طاح طير الفلاح
جاب راس النداوي طير هادي طريح


عقب ذاك الشموخ اصبح كسير الجناح
كل ماطار خمس امتار / فجأه يطيح







..................
 
قصيدة معاناة فتاة مريضه لن تعيش طويلا على قول الاطباء







الفتاة المريضه ::



مابي مناعه طبيبي زود احطامي
ولا لي غير الولي بامره يشافيني


زاد المرض زاد فيني ماقدر انامي
وتحطمت في عيوني اجمل اسنيني


واليوم من زود همي ناحل اعظامي
فيني اعاقه وأمي دوم تبكيني


ان نمت لحظه اشوف الموت بحلامي
الموت جاني ياهيكل مابقى شيني


ابيك تكتب قصيده باخر ايامي
لعلها باخر ايامي تسليني




الرد ::


يالله ياللي ابد ماعينك اتنامي
ياسامعن للدعا ومجيب داعيها


ياللي هديت البشر بالدين الاسلامي
انت الوحيد الذي عينك تراعيها


ياللي بيديك الأمر وعلم الايامي
يالله راجيك انا انك تشافيها


نخيت ربي وثم الوالد السامي
وانخا هل الخير وانخا من يداريها


نوال لاتاخذك بالهم الاوهامي
وش كثر ناسن اطبا ماتداويها


والله كتب له عمر وعاشت اعوامي
وارواح كل الخلايق بيد باريها
 
قصيدة - آتحداك

رسالتي الى امير قطر حمد ال ثاني



وقفت في وجهك وجيت اتحداك
واسمعك مالا سمع به معاليك


لاوالذي من صلصل الطين سواك
ماجيت انا من ديرتي غير اوريك


شوف الخفوق اللي سكن فيه شرواك
فنك تقول اليوم وشكثر يغليك

ينبض مع الشريان من فعل مولاك
خلاني اعلن بالمحبه تحديك


ان قلتلي ياهيكل اليوم وشجاك
اقول لك يحقلي افتخر فيك


امر يابو مشعل ترا الكل يفداك
وقلوبنا دايم معك ماتخليك


قلوبنا وياك لا لا عدمناك
الله يسدد يابو مشعل خطاويك


لاجيت اعدد يابو مشعل مزاياك
اسما سماة في مسماك تعنيك


حلحيل قرم للشرابيك فكاك
ياسعد عين اللي لفى وانتخى فيك


مثل البحر ياسيدي كف يمناك
في مدتك ياسيدي من يجاريك


ارجو السموحه يوم قصرت وياك
وانت القصايد كلها ماتوفيك


واليوم عيدك ياقطر عاش ذكراك
ولاجيت انا من ديرتي غير اهنيك


في ذر ابو مشعل عسى الله يرعاك
وفي ذر ابو مشعل يعزك ويغنيك





,,,,,,,,,,,,,,,,,,,
 
قصيدة عيون الحقيقه

في جنوني خيال وفي خيالي جمال
ياعيون الحقيقه صوري وابصري


ساحة الشعر سوق به تجاره ومال
جبت فيها نصايح بعت من يشتري


كنت اقول ابلاش ولاعطوني مجال
ويوم زودت سعره صرت شاعر ثري


حكمتي بالحقيقه واقع لايقال
والحقيقه تجيب الضغط والسكري


الحقيقه تغير من وجيه الرجال
تقلب الوان وجه نحسب انه بري


وجه الايام تكشف ماخفته الليال
والخفايا تبين ياعيون اصبري


لاتقولين حلمي صار صعب المنال
للأماني مرايا شفت به منظري


شفت حورية افكاري تنادي تعال
جيتها شوق لكن ماخذن احذري


قالت اعذب كلام الشعر هل هو خيال ؟
قلت صدق المشاعر أعذب بناظري


كل شاعر اشوفه في عيوني مثال
واعتبر كل شاعر منهم شاعري


كان للشعر قامه في علو الجبال
فنحتي في قممها (( هيكل الشمري ))












,,,,,,,,,,,,,,,,,,,,,,
 
قصيدة أول قصيده بالغزل

ابشري يالحبيبه بالغلا والدلال
ابشري ياملاذ الروح والمستقر


انتي لي راس مالي يالحلا والحلال
انتي ياياسمين الورد ياحلا زهر


انتي اول قصيده بالغزل ياغزال
ولجل عينك اجيب البيت بفخم صور


صف شعري لوصفك بالبيوت الجزال
والمعاني دررها جبتها لك مهر


لاتأملت زولك شفت فيك المنال
وعشت بك ياغرامي امنيات العمر


فيك سحر الطبيعه .. فيك روح الجمال
ولايشادي جمالك غير وجه القمر


العذارا بعد زينك نجوم الليال
وانت وجهك بدر والليل خلفك شعر


في خدودك طيوف الشمس وقت الزوال
وفي عيونك كسوف الشمس عز الظهر


في حجاجك هلال وفي رموشك ظلال
وفي رسومك ملامح حور ماهي بشر

صدقيني احبك فوق حد الخيال
وانتي اغلا واندر درة بالدرر








,,,,,,,,,,,,,,,,,,,,,,,,
 
ابيات تقرا افقي وعامودي واذا عكست احرف الكلمات

تعطي اجابه عن كل بيت....





لاجال حرفي هنا البحر جال
حرفي هنا رد قول خيال


هنا البحر ردي توالا جمال
جال خيال الجمال وقال




,,,,,,,,,,,,,,
 
قصيدة سحر القلوب

بكتب اوصافك على بحر قراح
بحر شاعر عن هيامك مايتوب


في عيونك شفت زرقات الرماح
ومن حلاتك فيك سحر للقلوب


ريحة انفساك بها أزكى رياح
مع نسيم البرد لاهب الهبوب


بالملامح ملح ياسيد الملاح
ما بزينك لا شمال .. ولاجنوب


انت قربك يشبه أيام النجاح
وانت بعدك يشبه أيام الرسوب


والدلايل صارت اشواقي جراح
وانت بعدك عن عيوني به ذنوب


لي ليالي ضاق فكري ماستراح
ومن همومي صرت عاشق للهروب


صرت عقبك طير مكسور الجناح
عقب ماهو بالسما دايم يجوب


تشبهين الشمس في وقت الصباح
ولازعلتي تشبهينه .. بالغروب


وتشرقين الصبح في وجهك سماح
من شعاعك كل هم بي يذوب






,,,,,,,,,,,,,,,
 
قصيدة البدون __ كلمة عتب







المدينه شاحبه صارت سكون
وانطفت عين الحقيقه بالهدب


مالت الاوضاع ميلات الغصون
وطارت اوراق الحمايل بالمهب


والشجر طايح ولونه غير لون
عقب ماهو شامخ اصبح حطب


والسبايب فاس ناس يحطبون
بالقبايل حتى تشعلها لهب


شنت الاوضاع حربه عالبدون
وضاع وضعه في وضيعن له يسب


ياوضيع الطبع .. تدري من اكون !
ابدوي من هل السيف الحدب


في ولائي ماتشك إلا العفون
ولايشكك غير أول من هرب


الوطن وان جاربي والله يمون
بس عندي للوطن كلمة عتب


لو يزود القمع فيني ماخون
من ولائي للوطن كلي ادب


القبايل والحضر لا ماتهون
نعم فيهم كلهم نعم النسب


يكفي اني مسلم كويتي واكون
من بدون معدنه معدن ذهب


عزوتي شمر واذا قالو بدون
قلت أصلي تاج راس
ن للعرب​
 
قصيدة رد على الشاعر الايراني



اجنب اهل الطيب واخص الاشرار
وهل الفتن واهل الهروج الخطيره


واخص صعلوك تمادا بالاشعار
شاعر ومكنون السواد بضميره


من ذمنا لاشك ناقص وجوار
مو بس ناقص / حاسد وفيه طيره


أول كسرنا جيش كسرى بذيقار
وافحمنا كسرى في خساير كثيره


في معركه صارت على الفرس تذكار
وبدحة الويلان ذكرى وسيره


حنا هل الطولات حنا هل الكار
حنا كسرنا ربع كسرا وغيره


تحت امر ابومتعب اذا صار ماصار
خليجنا يالفرس كله عشيره


ناقف مع البحرين في وجه الاخطار
ناقف معه وقفة رجل فيه غيره


نضرب كيان الفرس في سيف بتار
ونصد ضرباته بدرع الجزيره
 
قصيدة ميازين

ميازين من زينه تغار المزايين
ميازين لمة زين من كل مزيونه


من الحين تلت لي خفوقي ميازين
قوى الجاذبيه كله بنظرة عيونه


جماله يفوق ازين مزايين برلين
وباريس مع لندن وروما ولشبونه


تمام القمر مثله اذا صار عشرين
وليل الفرح ناعم شعرها على متونه


لقيته مع حلمي بخضر البساتين
واصبح علي الصبح واصبحت مجنونه


وروحي سجينه في غلاها من الدين
فلا اوفي غلاها خلو الروح مسجونه


عليها سحر هاروت بين الحجاجين
وبه من سحر ماروت في ملحه ولونه


قلبتي بقلبي ياحياتي موازين
على مولدك كن الهواجيس مدفونه


من الشوق عيت صورتك تترك العين
من الشوق عينها بشاشة تلفونه


فكونك تمكنتي من القلب تمكين
ابوك وغلاتك اسعد الناس في كونه






.....................
 
الحالة
مغلق و غير مفتوح للمزيد من الردود.
عودة
أعلى