تويت
حقايق غرامي
شوق و افراح قلبي تكتمل حال رؤياك
و المحبة عطايا الرب يا العاذليني
وش تساوي حياتي دون لهفات لقياك
دمعة اشجان حبك تسأل البرد ويني
خافقي من عرفتك خاتم بكف يمناك
و خافقك يا غناتي امانة بوسط عيني
دون ذا الخلق عمري يطلبك و يتمناك
تبقى حقايق غرامي سر بينك و بيني
يشرح البال ذكرك تونس الروح طرياك
اجادل اطياف وجهك بغمرة الحزن فيني
يوم تندهني باسمي جاوب الشوق لباك
لبى لك الخير كله لو البشر مزعليني
اشوف ذا الناس انتي و اقول اهلا و حياك
و اتفاجا بصوت(ن) كنت احسبنه ظنيني
كثر ما الحب جابك كثر ما العز وداك
في سما الروح قدرك ماله و الله وزيني
مو مهم هرج ذولا او عاد طعنات ذولاك
تنحرق في ثياب الحسد ما هوب يميني
معتلي في كنف مولاي و اداعب افلاك
والعقارب سكنها تحت تبن(ن) وطيني ... ( كرمتوا )
الاهم بحياتي رضاك و بسمة محياك
و كل ما بعد فرحك هين (ن) صدقيني
انتي يا كل عفة طهرك اليوم علاك
في سما الروح قدرك و الله ماله وزيني
بقلمي
ناصر العبدالعزيز
تعليق