مساحه خاصه له / حمد البريدي

قصيدة فرانكفورت



لا ضاق بي صدري تعيني على الرجم المنيف
اللي شموخه متعب العقبان وفروخ الحرار

ما حدني له .. كود .. فرقا واحد " ماله وصيف
ومن يوم سافر .. والضلوع مكسره وتشب نار

فإلى بكيته ما علي من حد .. حبي له شريف !!
والبعد عن من تعشقه .. فتره تعايش واختبار

خايف على دمعي ليا هليته ..يقولو .. ضعيف
ولا الضعف ماهو بصوبي .. بس للدمع انحدار

للي طيوفه .. ذابحتني ..كلبيها طيف .. طيف
وتضيع احوالي ولا ادري (ليل) انا ولا (نهار)

ويلاه !! .. يا ترف الصبا يا مالك القلب النظيف
تقول قررت السفر .. واقول يا (صعب القرار)

وش حال قلبي دام هذي عادتك في كل صيف
تسافر اوروبا وأنا ماني بحمل الانتظار !!

ما بين ( بون ) وما حواليها وباريس وجنيف
ولا انا حدي دبي او لحمدي .. او.. عين دار

يا ليتني فالطايره .. لا قدك بتسافر مضيف
على الأقل ابقى معك .. من المطار اليا المطار

ابطعمك من كفي اليمنى واقطع لك رغيف
واكلك من كل حاجه مثل تاكيل الصغار !!

تكفون يا هل ( فرانكفورت ) انا مولع في وليف
ميت بحبه واعشقه !! .. وأعشق ثناياه الصغار

ما حاز به عني سوى ..الاقدار والوقت السخيف
اللي خذا قلبي معه في الطايره واقفى وطار

امشى ولا مني مشيت امشي مثل مشي الكفيف
يا صاحبي نفسي بعد ما غبت .. عافت كل دار

ما قد هقيت ان اترك العالم ولا سولف واعيف
واجلس على اخر زاويه واعنز بظهري جدار

حزين مدري حالتي حاله .. وافكر كيف كيف
اباتطمن كيفك انت بخير ولا ويش صار ؟؟

مستانس وتضحك .. او انك تبكي وقلبك رهيف
الحين فالفندق او انك رايح بوسط القطار

باقي على ذاك الامل .. لو مجمل الواقع مخيف
رافع لك الهامه وانا اشعر من فراقك بانكسار

في ذمتي إني فاقدك .. و( ابيك ) والخاطر كسيف
لكنني مغصوب في بعدك .. وانا مالي خيار !!

يا صاحبي تبغى الحقيقه .. اخذها من دون زيف
يا أما تقبلها ( غلا ) .. ولا تقبلها .. ( مرار )

عز الله ان البعد كنه ضاربا " صدري بسيف
يا مت منه منقتل !! .. يا عشت بضلوعي كسار !!​
 
قصيدة / طيش الفتوه



حاكاك .. قلبي بالمحبه .. وحاكه
وقله ؟؟ وش اللي وسط قلبك .. وروه

تبغيه !! قلي جد.. تبغيه !! هاكه
وعش به حياتك وأنس عمرك وجوه !!

قلبي وقدهو لك .. وصعب افتكاكه
اصحابك اصحابه .. عدوك عدوه

يصعب على غيرك وصول ( امتلاكه )
ومن شب لي ضوه ابا ادوس ضوه

يا راس مال القلب وايك ملاكه
يفداك من شينه وزينه وسوه

ذبحت قلبي بالدلع و الشياكه
وانا قليبي يا حليله .. وتوه

تدهشني بطبعك مثل لعب كاكه
لا جابها تسعين فالقول .. قوه

وكلامك الراقي عديم الركاكه
يدش وسط القلب ويروح جوه

وقلبي لغيرك ما يجيه ارتباكه
ويلك من الله كل ما جيت دوه

محاسب (ن) نفسي بكل احتراكه
ولا انت كيفك ..ماتسويه .. سوه

يا جامع الوجه البري والفتاكه
وزين العقل كله وطيش الفتوه

(مفارقك) .. عندي لقلبي هلاكه !!
و(صداقتك) .. عندي تفوق الاخوه !!

وشرع الهوى يفرض علي انتهاكه
ما دامني عاشق وفيني جروه

فان لاحت ابواب الامل بانصكاكه
فماني براضي عقب نوتك نوه

وشلون بارضى في هواك .. الشراكه
ياللي اضيع .. إن حس قلبي .. دنوه

فإن شفتي شاعر واجيد الحباكه
فانت السبب وانا .. بودي أنوه !!

إنك الوحيد اللي أود امتلاكه
ولا همني كثر الحكى بي وشوه !!​
 
قصيدة / القصه الممنوعه

اعذريني !! .. لو ضحكت وضحكتي موجوعه
دامني .. عايش بوقتي بين هم ولوعه !!

ايه .. انا رجال .. لا منه حكى ما جامل
ما يهمش لا حكى في فكره .. وموضوعه

واسمحيلي لو تكلمت بصراحه .. جدا (ن)
عن سخافات الزمن و( العالم المخدوعه) !!

ناس تضحك في مجالسها .. وهي طربانه
والغرير .. اللي فقد أمه .. غريق دموعه !!

الزمن ماهو زمان .. مصفيين النيه
كيف .. والطيبه من قلوب البشر ..منزوعه

ذكريات الامس .. راحت !! .. والرجا فالمقبل
وكلن يدور على مصلحته .. ومنفوعه

ناس تضحك لك بوجهك .. من تشوفك
والاصح كبودهم من جيتك .. مفقوعه !!

ليه .. لا صار الرجل ماهو يجامل ربعه
اكرهوه الناس .. واولهم .. قريب .. ربوعه !!

وليه لا منه حكى صادق محد يسمع له
والكذوب وهو كذوب وكلمته ..مسموعه

شي لا يمكن عقل يستوعبه... والاغرب !
انها عند العرب .. فاتورة (ن)مدفوعه

صارحيني بالحقيقه .. حتى لوهي .. مره
واخمدي نار النزاع بحيرة (ن) مفجوعه ¡¡

ريحيني .. وانطقي لي كلمة واحيده ..
وقولي (احبك) .. ترى نفسيتي مفزوعه !!

واسمعي ياللي خذيتي الفكر مني كله
ثم سكنتي وسط قلب .. المهتوي ..وضلوعه

ما عشقتش يا هواي إلا وانا مختارش
فاعشقيني واعشقي رجل فريدبنوعه !!

واتركيني اكتشف بش نظرتش وأبعادش
يا براءة الاختراع بداخل الموسوعه

اه يا عمري لو انش من بنات اعمامي
كان في .. ذمتي ذمه ..ان قدش مقروعه !!

ان فقدتش ما يعوض غيبتش انسانه
وان لقيتش تعزف اللهفه لنا مقطوعه

عانقيني واحضنيني في دفاتش ساعه
الزمن بارد .. وقربش منتهى في الروعه !!

سلسبيلش شهد .. والرقه تثير اسلوبش
مايعه والاقرب .. انش ناعمه ..ميووووعه

فاتركيني في سكاتي واستبيحش عذرا
لو دخلت بهالطريقه .. اللي ,, لا مشروعه !!

واعذريني لو رأيتيني .. كذا .. متهور
ما اقدر استحمل جمال .. الترفه .. (الدلوعه)

ماني مصدق عيوني !! .. لو اشوفش فيهم
لين يشبع بي الغرام .. اللي طفش من جوعه

حمرة خدودش .. ليا ناظرتها توحي لي
كنها حمرة خدود الجاهل المصفوعه !!

يسعد الله لي صباحش ,, واولوية حاجه
لا سقيتي بالمرشه وردة (ن) مزروعه!!

ويسعد الله غرفتش .. وعيونش الذباحه
والسرير الوردي .. وترتيبته ..وشموعه !!

وكتبش المتناثره ومبعثرات هناك وهنا
والورق .. والعلك .. والسماعه المرفوعه

والعطور اللي على تسريحتش واغراضش
والهدايا والصور... والتحفه المصنوعه

ولا انتهى اليوم الطويل وانتهت ساعاته
نبتدي نقراء بقايا ( القصه الممنوعه )

لاقتربتي واقتربت .. وذبت وانتي ذبتي
واشتهي الضامي .. شروب الماي من ينبوعه

ايه .. احبك واعذريني باتعدى حدي
يمكن ان وقتي تركني .. خارج المجموعه

مشكلتي .. اقول ما في خاطري والمعنى
واحد (ن) عفوي ولا هو يستعير طبوعه

فقولي احبك .. وانا بعد بقول احبش
واحفظي لي ذكريات .. ( القصه الممنوعه )​
 
قصيدة / استح على وجهك

رجعت لي هالحين .. اسف !! .. وين جاي ؟
ان كنت متناسي تراني .. ما نسيت

لا تقول متغير !! ولا تقول شبلاي !!
يغنيك صمتي لو سكت وما حكيت

لكن هالمره حكيت بلا حكاي
بارد لك باسلوبك وباقول ‏wait )‎‏ ‏)

توك تذكرني وتتذكر ( غلاي )!!
يعني ( صباح الخير ) ما كنك دريت

استنقدوني كل ربعي واصدقاي
وانت السبب في كل شطر وكل بيت

وش كان حبك لي وشوقك في لقاي
ويا كثر ما تاخذ ولا مره .. (عطيت)

مستحملك واتحملك .. لانك خطاي !!
وانا اعترف اني تسرعت .. وخطيت

ماهوب يكسر خاطري الا (وفاي ) !!
ودي لو ان ارضيه حتى لو بكيت

(استح على وجهك) اذا به بس ماي
وابعد وربي يسامحك لامن مشيت

واذا لقيت انسان وافي لك سواي
نعمة .. ولازم تحمد الله .. لو لقيت

كنت اعشقك ضايع !! وأحبك في عماي
والحين ( دربك سمح ) .. كفيت ووفيت​
 
قصيدة / مستوحش

مستوحش من غيبتك قدلي(اسبوع)
يا حيف تنساني وانا ما اقدر انساك

وكل القضيه صوت دافي ومسموع
من عبر جوالك وانا اسمع حكاك

كني مابين اضلاعي العوج ملسوع
كل ما اتذكر يا المقفي سواياك

الهجر في سلم الاجاويد ممنوع
لكن صغير وعاذرك .. ويش دراك !!

قلبي لا كنه يا اريش العين ممزوع
مزعة قدم حافي وعاثر بالاشواك

من يوم ما قفيت والدمع ينبوع
كنه يتدفق من عيوني ويرجاك

لكن مشيت وصار لشداد مرفوع
ولا عاد بك حيله وقفت مطاياك

واصبحت كني خالي العقل مصروع
وجف الحكي من قبل لا انطق ولا جاك

شهيتني صوتك .. وجوعتني جوع
ويا حالة محبك .. ويا شين فرقاك

تحدني لقصاي واجي لك بطوع
وانا ما احب اني احدك على اقصاك

وش ذنب من حبك يلاقيك دلوع
تخطي عليه وكل ما اخطيت مشاك

ما للخطايا منك ناتج ومجموع
سوى العذاب بخافق اللي تمناك

لكن على الله والامل غير مقطوع
في شوفت عيونك وفي لمس يمناك

من يوم غبت وكل ليله لي شموع
تذوب لين الفجر حتى تحراك

ابكي بدمع اللي لقى اخيه مصروع
ويصيح كنه يوم اناديك ناداك

فيني لحبك ارض واشجار وفروع
0تشبها بالطيش وانا اتدفاك

باتقول لي وشفيك باقول موجوع
باتسبني من خاطرك باتفداك

الله خلقني انسان لكن لي طبوع
بس الوكاد انه عطاني ولا اعطاك

اني احس بغيبتك طول ( الاسبوع )
وانك على بالي ولا اقدر انساك !!​
 
قصيدة / ليال الحب



يا طول صبري عليك ويا عنا حالي
اتعبني رضاك يا وجدي وعزي له

ما تشوف حبك بقلبي ويش سوالي
معذب (ن) قلب خلك صبحه وليله

اهج ذود المشاعر كل مقيالي
ترعى خزامي ربيعك في مساييله

وارقى على رجمها واجر ( موالي )
للصاحب اللي قطعني في مراسيله

الله يسقي ( ليال الحب ) يا غالي
والله يبلى الزمن ذا مشين الميله

من أول افز لا من صاح جوالي
واليوم لو صاح لين الفجر ما اشيله

من حب لازم يذوق المر والحالي
واللي يحبك وربي منك يا ويله

قفيت في فالك وقفيت في فالي
والوقت لابوه إلى ضيق رياجيله

اخاف ( اصادفك ) ولا اشوفك ( قبالي)
واموت من حسرتي ما في يدي حيله !!​
 
قصيدة / المسرجات



ما يقود المسرجات من الرجال الا الصمايل
وما يعود للسفاهه كود رجال سفيه

والفعايل ما تبين إلا معا شب الفتايل
لا قدح للحرب زند وخيل العليا وهيه

ولاعتلى صوت الفتاة اللي تلاعب بالجدايل
كل رجال من الغيره تعزوى باسم اخيه

والوفا ماهو تجارة من شراها صار نايل
والوفا اعلى من طويق على اللي هم فيه

والمراجل ماتجي بالحكي تاتي بالفعايل
يولد الرجال وإلى جاء غدا اخير من ابيه

والمعرفه ترفع الرجال فعيون القبايل
والغبي من يازن الرجال في مدت يديه

الرياء يا ساتر استر صار في أرقى العوايل
لا يفرق بين خبش ولا يفرق بين بيه

والشعر ماهو بنسخ ولصق وفلوس وتحايل
الشعر تحفة مشاعر شاعر ماله شبيه

والشعر ما ينغرف لك كود من بحر الجزايل
والكلام اللي يبعثر دون معنى ليه ليه

الشعر وزن ومعاني ترجمان احساس هايل
ما هو بس اكتب وشخبط والعرب تصفق وهيه

واه يا الدنيا تذكرتش وليه الحظ مايل
من مشى سيده مع الايام عودتي عليه

كن فيني حرقة الجرو الكليبي ابن وايل
يوم صاح بوجه خاله وهو اللي ذابح ابيه

من عنى قسوة عذابك يا مرويني القوايل
تبتعد واللي يحبك ضاقت ثيابه عليه

كل ما اقرى لك رساله وسط صندوق الرسايل
ضاق بي حزن الفراق وهل دمعي كلبيه

وان لقيتك كني اللي ينتظر شوف المخايل
ويضحك حجاجه ويفرح لا قبضت فراحتيه

يا وجودي وجد من يرقى ع روس الطوايل
ضيقته ضيقة شجاعن كل حزن الكون فيه

كل ما ضاقت رفع راسه وقال العمر زايل
والله يفرج هموم اللي همومه تبتليه

الفراق اصعب نهايه .. والوصل رد الجمايل
والزمن دوم يتغير والوفا الله عليه​
 
قصيدة / آخر العوق

لبيه ياللي شوفتك تبري العوق
(ابرة غلا) من دون وصفه ولا شي

يسري مخدرها معا دم وعروق
ساعة تلامس جلدة ايديك بيدي

لكن ليا ناظرت في كحلة الموق
ايقنت اني كنت ميت وانا حي

تعال واحضني على الصدر برفوق
وكمل جميلك بالعطاواسقني مي

تضنيني بحبك وانا بحبك اتوق
لمعانق ورود حيت دون ما ري

ترى المحبه شي راقي ومرموق
واناعبر لك عن الواقع الحي

اشتقت لك واذبح قلبي من الشوق
امشي على رمضاك واحسهافي

كني اطير اطير واطير لك فوق
لين اتقبض فالقمر وامتلي ضي

في خدك اليمنى مخاييل وبروق
وفخدك اليسرى محطات وضوي

ربي خلق لكن فرق كل مخلوق
واعطاك عين رمشها ملتوي لي

يامحوق من سود النواظر ويامحوق
لوقلت في عينك سحر يمكن شوي

لوانك طيري ما لمس رجلك سبوق
كاسك براسك وين ما تروح وتجي

ادلعك برضاي واقول معتوق
لكنك اخذت ارضاي مابقيت لي شي

دامك هنا منته مخلي ولا سوق
ماغير اداري عنك واتعبت رجلي

بس المصيبه والبلا و(اخر العوق)
اسبوع في برلين واسبوع فدبي

وانا على حالي ليا اتعبني الشوق
أقول ( يكفي بعد ) واصفق ايدي​
 
قصيدة / الاصحاب

بين استثارة جرح ومعاند نفوس
وبين الحسافه يوم صدات الاقراب

وبين العذاب وبين دمعات محبوس
زنزانة الدنيا تحبسه ولا تاب

اخذ بعقلي بين الارجاء واحوس
واقلب اوراق الخفا وافتح ابواب

امشي على خطه وتكتيك مدروس
ولاهو بهمي اكسب اصوات واعجاب

ويا فكري اللي تملك احساس معكوس
يا لعنبوك اليا متى وانت غلاب

ويا قلبي اللي من عنا الهم متروس
ما ابيك تضعف لا قدك عند الاجناب

لا شك ابيك تكون لعداي كابوس
في عصر شعر كله فسرق وانهاب

ما دامك العالي تعليك ناموس
خلك كذا كايد ويحسب لك حساب

علم هل النمات نقارةالسوس
اللي يزيدون الحكي زود واكذاب

اني ارى قد اينعت للفنا روس
حان القطاف وحان تقطيع الارقاب

صاحب وخاين صار لعداي جاسوس
وصاحب فشى سري كذا دون اسباب

يا رب انا في رفقتي ليه منحوس
برحمتك ترحم صويب ومنصاب

لا جن ليل الهم هب لي الكوس
كنها تذكرني مواعيد الاحباب

اجر صوتي واسحبه سحب منكوس
من خاطر فيه الهواجيس تنتاب

وانا بحبه ناحل القد ( مهووس)
حبه يعذبني يا لبى التعذاب

اغليه ما (امريكا) بها كره للروس
واشتاق له ما خوف الغرب ( الارهاب)

ولو المحبه شي واقع وملموس
ما شفت عاشق يشتكي هم واتعاب

لكن ما دامه شي فالقلب محسوس
تبقى الحقيقه دونها ستر واحجاب

يا قطع كبدي قطعة الجلد بالموس
لا صارت افعال الرياجيل تنعاب

ما يربح اللي يذخر لوقته فلوس
الرابح اللي يذخر لوقته (اصحاب)​
 
قصيدة / روعة وصوفك

تعبت اوصفك واستعصى خيال الشاعر الموهوب
من رماح العيون اللي بها كبر وبها هيبه

احط الحرف تلو الحرف واصيغه كذا باسلوب
لجل ما حد يقول اني اقلد حد باساليبه

ابفتح قلب واعلن حرب واحط لخطاي دروب
واصيد بطير شعرن ماحدن يشبه مخاليبه


اداعب مبتدى الفكره واشبعها بطيشي كوب
اغذيها من صدور الخيال ومن تراكيبه

لان الوصف في بحر العيون وغاية المطلوب
تزلزل له جبال الشوق وتنفذ مطاليبه

ليا مني كتبت البيت يذوب يذوب فيك يذوب
يذوب يذوب ويبرهن مدى شوقه وترحيبه

لو اقول ان جبينك مشرق الشمس وشفاك غروب
زعل مني الظلام اللي ذوايب شعرك تذيبه

فالى منك تمايلت وتمايلت ارحم المسلوب
يكابد روعة وصوفك وعينه ما تقدي به

وليا منك تثنيت اتثنى من حلاك قلوب
تزوى وانت ما تدري بأنك عامل مصيبه

احبك اعشقك ادري ولكن الشقامكتوب
على قلب جروح الوقت تتفنن بتعذيبه

عشقت اسمك ومن عشقي لاسمك يا زهي الثوب
ليا مني حكيت اخطي فنص حكاي واهذي به

وإلى مني تباطيتك اسوي من جفاك قروب
وقلبي عيبه يحبك وانا راضي به وعيبه

يقولون الكذب منجا ولكن الصدق مرغوب
واقول ان الشعر مابه حلا الا في اكاذيبه

واقول الله تغفر لي وكل مره اقول اتوب
واعود واذنب بنفس الخطا واقول مدري به​
 
قصيدة / دمعة الرجال

يا عذابي كل ما حان المغيب
وارتسم لونه على لون السحاب

والهدو يطغى على الجو الرهيب
هاضني شوفه وشرع كل باب

واستثار الشوق جرح مستصيب
وغنت جروحي على ليلي عذاب

حولت بي كل هم من شعيب
واستباحت حرمة القلب المصاب

وقامت الذكرى على قلبي تجيب
الهموم اللي من اسباب الغياب

عزتي للي مفارق له حبيب
واحد قلبي معه من يوم غاب

لا ذكرته تنزل دموعي صبيب
من سبايب خاطر فالحب ذاب

صرت كني لاجي ولا غريب
دور الماء ما لقى غير السراب

العرب في سيب وانا لي فسيب
ضاقت الدنيا بعيني والرحاب

من يقول ان دمعة الرجال عيب
اشهد انه ماهو بحول الصواب

تنزل الدمعه غصب ماهو بطيب
لجل من ترخص على شانه رقاب

لو يخيب الظن ظني ما يخيب
يلعن الحظ الردي لو يوم خاب

لو شربتك ما رويتك ياللبيب
سل حال اللي غديتي له شراب

لو حروفي فيك يقراها اديب
كان الف من معاناتي كتاب

ولو يردك عن بعادك شق جيب
قلت يالمضنون تفداك الثياب

اسمعو قولي وانا ربي حسيب
دام ما فوق التراب الا تراب

من مشى دربي ترى دربي صعيب
حيله يوقف ويعلن لانسحاب

والحياه اقدار والصايب يصيب
كود ينفعك الدعاء المستجاب

والمحبه اصلها حظ ونصيب
والهوى ما بين غربه واغتراب

ومن يقول ان دمعة الرجال عيب
اشهد انه ما هو بحول الصواب​
 
عودة
أعلى