لازم الواحد يعبر عن نفسه

قصة قصيرة - قصه جميلة - اجمل قصص وحكايات قصيرة منوعة مفيدة ارسال إلى Twitter ارسال إلى facebook
  1. عرباوى
    06-11-2006, 03:29 AM

    لازم الواحد يعبر عن نفسه

    لازم الواحد يعبر عن نفسه


    أنا دايما مش بحب اتكلم عن نفسي.
    ومن ساعة ما طلبوا مننا في منتدى عبير اننا نكتب يومياتنا او قصص، حسيت إنه حمل تقيل. وكنت دايما باكتب عن شخصية أنا مألفاها اسمها "مريم" وأحكي عن مشاكلها واستخبى وراها عشان أحكي عن نفسي.

    بس من كام يوم وأنا قاعد مع أصحابي بعد الشغل، حسيت إن فيه حاجات جوايا كتير عايزه أقولها لحد. وإن اليوميات اللي بنكتبها ممكن تكون فرصة للواحد يفضفض عن مشاعره بدون ما يستخبى ورا شخصيات وهمية هو مخترعها. وحسيت إن حياة الواحد رغم إنها بسيطة ممكن يكون فيها حاجات كتير تستاهل إننا نقف عندها، ونعمل عليها زووم، ونقعد نناقشها بينا وبين نفسنا ونستمتع هنا بموقف فيه نجاح، ونحزن هناك لموقف كان فيه فشل.

    إمبارح كان يوم مهم في حياتي. متهيأ لي ممكن أقعد كمان خمس سنين أفتكره بتفاصيله الصغيره، وأنا باقول لنفسي إن الواحد ممكن يحقق أحلامه رغم الصعوبات وكل الأزمات البسيطة اللي ممكن لوحدها تخلي الواحد فينا يكتئب.

    من سنين وأنا بكتب قصص قصيرة، وفيه كام شخصية قابلتهم في حياتي القصيرة زي أمي وأبويا وناس تانية أثروا في. وكنت حابه أكتب عنهم في القصص اللي بكتبها، بس كنت دايما باحس إن مفيش فايده...! ما كنتش عارفه أنشر أعمالي إزاي. وكنت أحيانا أعرض أعمالي على الأساتذه اللي كانوا بيدرسو لي في الجامعة، وكانوا بينبسطوا من الحاجات اللي باكتبها.

    وفي يوم أخدت بعضي على أخبار الأدب، وقابلت الأستاذ "جمال الغيطاني" ووريته كام قصة من اللي كتبتهم، وقاللي إنه مبسوط منهم وإنه هينشر لي قصة في الجريدة. أنا فاكره يوم ما عرفت إن القصة هتتنشر لي في أخبار الأدب، نزلت أنا وأخويا الساعة اتنين بالليل عشان نجيب أول عدد، ما كنتش قادرة استنى للصبح عشان أشوف القصة بتاعتي منشورة في الجريدة.

    كل ده كويس، بس المشكلة بدأت لما كملت القصة ال 15 وقلت لنفسي إنه ان الأوان إني أطلع مجموعة. قدمت القصص بتاعتي في هيئة حكومية عشان تدخل لجنة تناقش القصص بتاعتي، وتقول إذا كانت تنفع للنشر ولا لأ.

    اللجنة بعد انتظار ست شهور قالت: لأ. وجالي أنا إحباط وحسيت إن الواحد إيه لازمته يوجع دماغه في ورقة وقلم طالما مافيش فايده.

    وفضلت على الحال ده فترة وأنا لا عايزة أكتب قصص ولا أقرا حاجة من أساسه. بس بعد مدة، قعدت أفكر في الأسباب اللي ممكن تخلي الأعمال تترفض ولقيت إن اللغة بتاعتي فيها أخطاء كتير. أخذت المجموعة بتاعتي تاني، صلحت الأخطاء اللي فيها وقلت لنفسي لازم تحاولي تاني.

    من شهر تقريبا سمعت عن دار "ميريت" (اللي عرفت إنها أكبر دار لنشر الأعمال القصصية دلوقت) واتصلت بالدليل عشان أعرف عنوانها (اللي طلع في وسط البلد) ورحت...
    طول ما أنا ماشيه، كان متهيأ لي إني هلاقي عمارة كبيرة بأسانسيرات فخمة، وإن أكيد هتقابلني سكرتيرة تقعدني نص ساعة لغاية ما أقابل مدير الدار وأعرض عليه أعمالي.

    بس لما وصلت لشارع قصر النيل، لقيت العمارة متواضعة ومفيش أسانسيرات فخمة ولا حاجة وحسيت إني طالعة في بيت جدتي اللي ياما لعبت فيه وأنا صغيرة وقضيت فيه أحلى أيام حياتي.

    خبطت على الباب، وحسيت للحظة إني هلاقي حد من عيلتي بيفتحلي.. فتح لي شخص ما عرفوش طبعا. وقالي: "تحت أمرك؟". قلت له وأنا قلبي بيدق جامد إني عاوزه أقابل مدير الدار عشان أنشر أعمالي. ابتسم وقال لي إن هو مدير الدار. ودعاني للدخول في الصالون اللي موجود في الشقة.

    أول ما دخلت، لقيت ناس كتير عنده وكلهم شكلهم أدباء.. عرفني عليهم وهم كمان اتعرفوا عليا. ولما عرفوا إني جايه أقدم أعمالي، بدأ كل واحد فيهم يسألني سؤال :
    بتكتبي ليه؟
    عشان بحب الكتابة..

    بتقري لمين؟
    لأي حد..قصدي أي كتاب يقع تحت إيدي.

    زي مين يعني؟
    زي "يوسف إدريس" (الله يرحمه) وزي "صلاح جاهين" و"محمد المخزنجي" وناس كتير مش فاكره أسماءهم.

    وابتدا كل واحد فيهم يسألني إن كنت قرأت اخر أعماله. ولما لقوا إني ما قريتهاش، كل واحد فيهم طلع اخر حاجة كتبها، وقالوا إنهم حيهدوا لي كتبهم بشرط إني أقراها.. وكتبوا لي عليها إهداء...
    كنت مبسوطة طبعا.. ما كنتش أتوقع إنه يكون فيه ناس أخلاق كده..

    المهم، سلمت المجموعة بتاعتي وقال لي مدير الدار إن المجموعة بتاعتي هتدخل لجنة تقراها وممكن أعرف بعد أسبوع النتيجة.

    فات من الأسبوع يومين دلوقت ولسه فاضل خمس أيام بحالهم من الانتظار مش عارفة، بعدها إيه اللي هيحصل. أنا متهيأ لي أول حاجة أعملها لما المجموعة تتقبل إني أترمي في حضن والدتي واخد منها حضن كبير. ولو ما تقبلتش أكيد برده هاترمي في حضنها ويمكن أعيط. حتى لو اترفضت المجموعة، مش مهم...أهم حاجة الواحد ما ييأسش
  2. سفيـــ المحبه ـــرة
    06-11-2006, 11:10 PM

    رد: لازم الواحد يعبر عن نفسه

    لازم الواحد يعبر عن نفسه


    عرباوي

    اتمنى لك التوفيق وان يتم قبول قصصك[ونشرها

    اعجبتني طريقه كتابتك التي تنم عن ابداع

    سلمت اناملك

    تحياتي
  3. هيلدا
    03-02-2007, 03:09 AM

    رد : لازم الواحد يعبّر عن نفسه

    لازم الواحد يعبر عن نفسه


    ميرسي على الموضوع

    تحاتي