علي سلامة - (شاعر العامية المصرية )


x.png

هو الشاعر علي سلامة من مواليد 1960 من حي السيدة زينب
تخرج في كليه الهندسة يعمل مهندس بترول
تأثر في شعره ب صلاح جاهين وبديع خيري وبيرم التونسي
أول اغنياته قلبك الشاطر غناء محمد منير ألحان المتميز وجيه عزيز عام 1998

شارك علي سلامة المغني والملحن وجيه عزيز في اكثر من 25 أغنية
علي سلامة شاعرا يجمع ما بين البساطة والعمق

x.png
تنشر له سلامات بجريدة المصري اليوم ومن قبل الدستور
 
التعديل الأخير بواسطة المشرف:
بوابة تفتيش ( علي سلامة )

60068.jpg
بوابة تفتيش على بابك
كل ما احاول اعدي تزمر
وبتتشرط .. وبتتأمر
ارجع ادور
وتاني ادور
وكل ما احاول اعدي تزمر

طب ادي الساعة .. وادي حزامي
والولاعة ..
وادي حكايتي ..وادي امارة
ودي عنواني ..والنضارة
.. حتى الفكة الباقية في جيبي .والاشعار ..
والمحفظة مفهاش غير صورتك ليل ونهار .

...... زي ما نازل من بطن امي من غير حتى ورق التوت
وكل ما فوت ..
البوابة بردك بتزمر

...

لحد ما شفني واحد ملحراس..
وقالي اسمعني يابن الناس ......
ارمي الحتة الحلوة في قلبك .............وفوت
والبوابة عمرها ما تزمر .......

...



...

 
التعديل الأخير بواسطة المشرف:
كل ما اوزن - الاقي لسه - ناقصلي حته ( علي سلامه )

60068.jpg

ميزان حياتي
ناقص حته

وكل ما أوزن
ألاقي لسه
ناقصلي حته

أحط حته

تقل حته

وأجيب قميص
تضيع چاكته

وأعيش لي ساعة
يفوتني سته

وكل ما أوزن
ألاقي ناقص
أقول بناقص
لو هي حته

أتاري لسه
ولسه تاخد
سنين وحته

وحاجات تسيبني
وحاجات تاخدني
لحاجات تخبط
في كل حته

وأقول ها نفرح

ف يوم
ها نفرح

ويوم مانفرح
علي الله يفضل
في القلب حته
على سلامة



 
التعديل الأخير بواسطة المشرف:
كتاب القراءة

كتاب القراءة

: : : : : : : : : : :

بمنتهي البراءة
سأليتني
بنتي نور
ف أربع خمس
أمور
مش ف كتاب القراءة
قالتلي بابا بابا
مش إنت .. يا بابا
بتكتب أغاني
وتقول أشعار
أنا سمعت
الشيخ يا بابا
بيقول إنك يا بابا
ها تروح النار
زي الوحشين يا بابا
الحراميين الكفار
قوللي يا بابا
يعني إيه إستعمار
يعني إيه نيل
يعني إيه هرم
ومين اللي حط
النسر فوق العلم
يعني إيه يا بابا
إستفتاء
و يعني إيه إنتخاب
ويعني إيه حر
ويعني إيه نصاب
يعني إيه إختلاس
ويعني إيه هجاص
ويعني إيه خصخصة
يعني إيه يا بابا
دستور
يعني إيه معارضة
ويعني إيه مظاهرة
وليه النهاردة
خدنا أجازة
م المدرسة
قوللي يا بابا
يعني إيه قهر
وفين
خط الفقر
ويعني إيه حظ
ويعني إيه زهر
يعني إيه يا بابا
حريه
يعني إيه إنسان
ويعني إيه سرطان
يعني إيه يا بابا
خربوها
وكنت فين لما خربوها
ومين دول يا بابا
ولاد القطقوطة
ومين دي
سمارة يا بابا
وإزاي يا بابا
ضاعت من قلبك
يا بابا
إنت معايا
فيه يا بابا ناس
بتقول كفايه
وفيه كمان عساكر
مسكين عصايا
وبنات متعورين
وتانين
ماشين بيضحكوا
هما دول إسرائلين
يا بابا
ويعني إيه
ويعني إيه
قولتلها
نور
ممكن أسألك سؤال
قالتلي
إتفضل يا بابا
قلتلها
هيه قناة سبيس تون
رقم كام
وخدتها
عشان تنام
على سلامة

 
ميدان الجيزة

ميدان الجيزة
,,,,,,,,,,,,,,,,,,,,,,,,
ضيعت شويةسنين كده
بحب من بعيد لبعيد
والحكاية مقضيانى
ومبسوط وراضى وسعيد
أفرح بأى حاجة
وأستنى هدوم العيد
وبعدين ضيعت شوية سنين
نفسى أبقى أشطر واحد فى الكيميا
مع أنى مش فاهم ميدان الجيزة
والحياة رغم قسوتها
شايفها لذيذة
وضيعت شوية سنين بقى
نفسى أعدى أختبارات الكورة
فى النادى الأهلى
وأشتغل فى وكالة ناسا
وأبقى واحد من العلماء المهمين
وبعدين ضيعت شوية سنين
منتهى املى كرسى فاضى
فى أتوبيس تلات خمسات
عين الصيرة أم المصريين
وضيعت شوية سنين
عايز أفهم الفرق
بين النكسة والهزيمة
والأحترام وقلة القيمة
وأبقى نجم سيما
م المشهورين
وبعين ضيعت شوية سنين
واقف عند نظرية المؤامرة
لا عارف أعيش ف الزمالك
ولاراضى أعيش فى غمرة
ومش عارف ليه الحشيش ممنوع
مدام مصرحين بالخمرة
وياترى بقى أتجوز
واحدة بيضة ولا سمرة
ولا أسأل فيها
رجال الفتوى والدين
وضيعت شوية سنين
مركز فى السيراميك
والبيبان والشبابيك
وألوان الحيطان
وده بيج وده سن فيل
والموضة الأصفر
وقشرة الموزة
وضيعت شوية سنين
لا أنا بحر ولا نيل
حاجة كده بعيد عنك
ملهاش عوزة
ولما بقيت كام وخمسين
لقيتنى لسة
بحب من بعيد لبعيد
وبرضة مش فاهم
ميدان الجيزة
على سلامة
 
أنا المواطن نقط نقط نقط

أنا المواطن نقط نقط نقط

يكون في علمك انا مش جبان

ولا بتهان وأسكت زى زمان

أنا بصرخ وأكتب وأبعت وأتكلم ...

وأسمع بقى يا معلم ...

أنا المواطن نقط نقط نقط....
رقم قومى نقط نقط نقط...
محل الأقامة نقط نقط نقط بجوار البنزينة

بصراحة حرام تعملوا فينا نقط نقط نقط...
وتطلعوا نقط ونقط أهالينا ...
عملتوا انتخابات وكلها نقط نقط نقط ...
وشيلتوا وحطيتوا حاجات نقط نقط نقط ...
بصراحة ...
أنا بقيت قدام مراتى حاسس انى مش نقط خالص ...
وأقولها نفسى أبقلى نقط بجد ..
تقولى يا اخويا ماتحرقش دمك
محدش بينفع حد...
حسك ف الدنيا ..
بكرة تبقى نقط نقط نقط ....!!!
علي سلامة
اسمعها بالقائه
 
مصر والكاميرون

60068.jpg

مصر والكاميرون



بقول لهم مين اللى بيعيط بحرقة ده؟
قالوا لى مواطن إتصور وهو بينضرب

قلت لهم ومين الأمور اللى بيضحك ده؟
قالوا لى ده واحد عمل شوية كوارس وهرب

قلت لهم والدنيا عتمة هناك ليه؟
قالوا لى دى حتة جديدة بتتخرب

قلت لهم ومين الحاوى اللى بيتكلم ده؟
قالوا لى ده الوضع بيتقلب

وإيه الهيصة اللى فى الساحل الشمالى دى؟
قالوا دى البقرة بتتحلب

قلت لهم وأنتوا قلقلين كده ليه؟
قالوا لى أصل بنلاعب الكاميرون وخايفين نتغلب.


....



..

علي سلامة شاعر العامية المصرية
 
يسعدنى إنى أول من يرد على هذا النقل الرائع
سلمت أناملك على هذا النقل الجميل
تقبل مرورى
تحياتى لك
 
واو
مشكور على النقل الررررررررررروعة
سلمت يمناك الرقيقة
واناملك الدهبية
كلمات في قمة الابداع والررررررررررروعة
 
واحنا لسه فى ابتدائى

من علي سلامة‏ في 25 نوفمبر، 2010‏، الساعة 09:15 صباحا‏‏




وسط أوراقى القديمة

اللى لسه منها باقى..

شفت صورتى بين زمايلى..

واحنا لسه فى ابتدائى..

الوشوش كانت بسيطة

طاهرة لكن مش عبيطة

نرسم الأحلام خريطة

فى قلبها نقطة تلاقى

هو صاحبى

لما كان فى الدنيا صاحب

أما دول كانوا جيرانى

كل واحد فينا حقق

جزء من بعض الأمانى

أما دى الشاطرة البليدة

العنيدة أم الضفاير

تبقى حبى الأولانى..

أد إيه حزنت عليها

لما راحت فصل تانى..

ما احنا كنا تخته واحدة

فى تانيه تالت..

مرة قلت..

وهى قالت..

لما مدت إيدها شالت..

دمعة وقعت غصب عنى

جوه كراسة الحساب..

كنا لسه صفحة بيضة فى الكتاب..

الوشوش كانت بسيطة..

طاهرة لكن مش عبيطة..

نرسم الأحلام خريطة..

فى قلبها نقطة تلاقى..

واحنا لسه فى ابتدائى..
 
عودة
أعلى