قصائد خليل الشبرمي في امسيته في حائل



بعد الاذن هذه قصائد خليل الشبرمي في امسيته البارحة


اليكم بعضا من قصائده .................

استهل خليل الشبرمي أمسيته بدعاء المولى جل وعلا :

اللهم بارك لنا في شعبان وبلغنا رمضان، وقال أن كل واحد من أهل حائل يستحق أمسية لوحده، وشارك أهالي حائل احتفالاتهم وهنأهم بمناسبة مرور عشر سنوات على تولي صاحب السمو الملكي الأمير سعود بن عبدالمحسن بن عبدالعزيز إمارة المنطقة، وقال منشدا قصيدة بعنوان فنار الجود:

قال التميمي أنا موجود

والليلة الميدان ميداني

بذن الولي لا اجود بالماجود

لعيون جادا واقوس الحاني

بيت القصيد وغاية المقصود

شي تسشوفونه بالاعياني

من رحمة الرحمن والمعبود

ومن حكمة الله عالي الشاني

الطيب ماله منطقة وحدود

والطيبين بكل الاوطاني

الى ان يقول في بيت نال استحسان الحضور:

وانجيت جيت لديرة ابن سعود

وان رحت رحت لديرة ابن ثاني



ويواصل:

شاعر وأهاب العيب والمنقود

وازن كلامي قبل قيفاني

ما جيت اتايش والرجال شهود

ولا اهذي وامذرع لساني

ماني على ذم العرب محدود

ولاني سفيه ولاني ولاني

وقال:

المختلف صديت عنه صدود

والمنحرف ما هو من اخواني

والخثرقة والغطرسة والزود

تزود الرجال نقصاني

الصمت حكمة والسخا محمود

ورمي الركاد يغيض عدواني

إلى أن قال:

سوقوا سلامي وافي ومفنود

لسلمى واجا وجبال رماني

وحايل واهلها هم فنار الجود

ورمز الوفا من ماض الازماني

وثنوا سلامي للأمير سعود

ريف الضعيف ومدهل العاني

وثنوه للنايب سمي العود

عبدالعزيز وطير حوراني



وعلى الطرق الطويل القى الشبرمي قصيدة (صيف حايل) :

التميمي تهيض وابتدا القيفان بسم الله الرحماني

الحليم العليم الواحد اللي كلنا في رجا غفرانه

مرحب وبعدها يا مرحبا مدى عبت عود الحبق نسمة مسياني

وعد ما غرد القمري على حدب الجريد وشجن بالحانه

جيت اغني بحايل واتغزل في هواها وابث اشجاني

يا شخاني بجانا جات قلب انسان والترجمان انسانه

وقبلي القاظي محمد وابن لعبون وابديوي الوقداني

كلن بديرته مفتون والشعار بأوطانها هيمانه

همت في حب حايل مثل ما هام بهيا محسن الهزاني

تتوب عن حب حايل قل لالا حب بقلبي راجح ميزانه

فضفضي يا حروفي عن شعور الشاعر المترف الولهاني

وسبحج الليله معزب وانا والوزن والقافيه غيثانه

صيف حايل لحاله صيف هايل صيف ما له ولا له ثاني

يالله اللي وهبه الشاعريه والحلى والبها سبحانه

وجو حايل طبيعي والحراره حسب نشرت حسن كراني

جو حايل معتدل وانسان ما بالندى ريانه



وأبدع شاعر المليون الشبرمي مجددا في قصيدة ترحيبية خاصة بصاحب السمو الملكي الأمير سلطان بن عبدالعزيز ال سعود ولي العهد ونائب رئيس مجلس الوزراء والوزير الدفاع والطيران المفتش العام وقال فيها:

اهلا هلا ما هل وبل الهماليل

واهلا هلا ما لاح براق بخيال

بسلطان سلطان الصخا حاتم الجيل

يا مزن جود دوم دايم الدوم همال

يا حدي يا حلحيل يا مفني الحيل

يا فزعة المضيوم يالنايف العال



والقى بعدها أبيات بالأمير تميم بن حمد ال ثاني ولي عهد دولة قطر قال فيها:

ياسيدي ماتسود الا الاسود

واستحاله ما يفل الحديد الا الحديد

واشهد ان المرجله من عهد عاد وثمود

كايده والطيب كايد وذا علم اكيد

والفرايد لابغيت امدحك جني وفود

وريع لي ياتميم التميمي يافريد

اتعزوى واعتزي وانتخي وارقى سنود

وانطرب واشوش ويزين لي بدع القصيد

والمعاني ياعريب المجاني والجدود

والقوافي تفتخر في سموك والنشيد

ياتميم المجد والجود واجود من يجود

ياولي العهد والعز والمجد التليد

والشكاله والكرم والتكانه والركود

والقبال السمح والسمت والراي السديد

والتواضع والوفاء فيك ياوافى العهود

وفيك مع هيبة عمر حزم هارون الرشيد

وبك رزانه زانها عفو وعفه وجود

ومع دهاء معاويه فيك باس ابن الوليد

وانت من صامن بعينه غدة ليام سود

وانت ابن زبن الدريك وعمى عين الضديد

فارق بين الزعامات وجهوده جهود

وكل من دوحة حمد راعي العليا يشيد

ياحفيد اللي برمز التفاني والصمود

والنقا والحلم والعلم والباس الشديد

من فتق بالترك واخزى النصارى اليهود

خيال العليا ذرى الدار وكعام العنيد

قاسم اللي عن حمى الدين والمله يذود

راعي المعروف والعلم والعقل الرشيد

قلتها ياسيدي والغلا ماله حدود

والولاء ماينقص يزود والمولى شهيد

شاعر ماهمني لاهبات ولانقود

شوفتك تغنيني وحب متنك يوم عيد

وقربكم ياماكر الطيب طب للكبود

وراس مال ومكسب وشيك وسلاح ورصيد

جعلكم ذخر وملاذ وعساكم فالوجود

وجعل عمرك يابلج الوجه مبروك ومديد



ثم شال شاعر المليون خليل الشبرمي قصيدة ثناء على صاحب السمو الملكي الأمير سلمان بن عبدالعزيز ال سعود أمير منطقة الرياض جاء في مطلعها:

تحية الإسلام يا سلمان أمير العاصمة

سلام أحلى من رطب طيبة وبرحي القصيم

وشهد اليمن والشام يا سلمان أمير العاصمة

يالصيرمي الصارم الصمصيم يا عود الخصيم



بعدها قال الشاعر الكبير قصيدة رائعة:

ياواحدن مادون بابك خفارات

ياسامع اللي بالدجاء لك ينادي

يالله طلبتك ياله البريات

عفوك وسترك والهدا والرشادي

ومن بعدذا يامحزمي بالمهمات

اللازمات الملزمات الشدادي

ياماكر الصلولات نسل التميمات

يامعرب الجدين سقم الاعادي

حاولت اشوفك بس هيهات هيهات

انا بوادي وانت عني بوادي

والجندي الماخوذ مابه مروفات

يهوشني ويقول وين انت غادي؟

والطيب كايد بس للطيب حزات

والفعل صمله والدوادي دوادي

واديم الله ماتدوم المقصات

تمسي لوتصبح انسان عادي

والشر له بوجيه الاشرار شارات

والجود باهل الجود بين بادي

وغيري يجيب من الامير اعتمادات

واناعلى رب العباد اعتمادي

يقوله اللي مايخون الامانات

ولايجحد المعروف عنده مبادي

وصلو على مبعوث رب السموات

شفيعنا يوم الحشر والتنادي



ثم تفاعل الحاضرون كثيرا مع قصيدة مؤثرة وهي شيلة ابيات رثائية بالشاعر الكبير طلال بن عبدالعزيز الرشيد يرحمه الله:

عم حزن عظيم رجال كل القبايل

وفرحة العيد ماتت مع طلال الرشيد

وحل خطب جلل برجال وجبال حايل

والسناعيس شمر من قريب وبعيد

أحسن الله عزاهم في عريب السلايل

من كسب كل طيب وعلم حميد

مرث الجود كساب الثنا والجمايل

والنواميس والطولات عوق العضيد

ونسأل اللي اليا من سيل مارد سايل

ونطلب الواحد المعبود رب العبيد

جعله لجنة الفردوس ذرب الفعايل

بين ظل ظليل وبين طلح نضيد

واحسن الله عزا كل العرب والحمايل

واخ وام وحرم وارحام وابنا الفقيد

والوزن والقوافي والوفا والنفايل

واخوياه (وفواصل) وامسيات القصيد

والقلم والورق وطيور واف الخصايل

والكرم والشجاعه والمقال السديد

وانت وأنت وأنا ورجال كل القبايل

أحسن الله عزانا في طلال الرشيد



ثم استمتع الجمهور الكبير الحاضر ببشيلات الألحان اللويحانية لقصيدة ترحيبية :

اللي لا دعته الناس لبى واجاب

رب عطوف يشوف ظروفها ويروف باحوالها

ومن بعد ذا مرحبا واهلا هلا ماهل وبل السحاب

وعداد ماناح ورق ولاح ضوح البرق بخيالها

اهلا هلا بالضيوف اهل الوفا والطيب شيب وشباب

اهلا هلا بالجميع ومرحبا مليون برجالها

روس الحمايل زحازيح الرجال مصخرين الصعاب

نشهد وتشهد لهم ماض السنين وحاضر اجيالها

والمدح لاجا مجاله وانفتح للمدح باب وجواب

أشد الامة تميم اليا ظهر للناس دجالها

ومن فضل رب الخلايق والملا جزل العطا والثواب

ربعي اليا عدت افعال الرجال تنومس افعالها

ولا شك بان الحسب ماينفع المخلوق يوم الحساب

وان النسب مايفكه من عذاب النار واهوالها



واصله وفصله وماله باكر اليا حط حدر التراب

والله ماتنفعه والناس يوم العرض باعمالها

تمسكوا بالفلق والناس والأخلاص وام الكتاب

تلقونها يوم الحشر لازلزلت ذا الارض زلزالها

والهرج لازاد زروده نقص والحكمه بفصل الخطاب

والحر حر يرى مخراجها من قبل مدخالها

والحمد للواحد اللي لادعته الناس لبى واجاب

رب عطوف يشوف ظروفها ويروف باحوالها

والختم صلوا على خير الملا مابان نجم وغاب

وما حمس بن اليمن والشاذليه دار فنجالها



ثم تفاعل الحضور مجددا مع قصيدة سلسلة وغاية في الجزالة وهي قصيدة: (وسمي على بلي) :

ومنها..

ألا مرحبا واهلا هلا عد ماهلي

سحاب على سلمى واجا دوم همالي

وحي الرفيق اللي علومه يجوز لي

وحي الكتاب كتاب غالي ومن غالي

ولاوالله الا مرحبا بالرفيق اللي

مضرا على كسب النواميس ريبالي

مديم حجاجه طلق ولسانه يهلي

به الطيب طبع معرب الجد والخالي

صديق صدوق صادق الود صافي لي

نقي تقي ماله اجناس وامثالي



ومن بعد ذا ياحمد ابا ارسل وحولي

وشرواك ذيب موجته تلقط ارسالي

انا يالحميدي عان وسمي على بلي

علام الوسوم اللي على بلك اشكالي

وش اللي جرى وايش السبب يافتى قلي

علام العلوم علوم جزلات وهزالي

لاصرت فوقي مانت ملزوم تنزل لي

ولاصرت حدري مانت مكلوف ترقى لي

وكانك تقول الناس قالت فعين لي

من اللي سلم من راعي القيل والقالي

ولاتبعد ابدن بس من ملك وملي

تحسس ودور كم حقود ومحتالي

بلانا بلانا بيننا دوم ينسلي

ومنا بنا واشين ورخوم وانذالي

وبالناس يابن الناس طامن ومتعلي

وانا ما ارفع الطامن ولا اطمن العالي

وقلبي دليلي يالحميدي يدربل لي

واميز هماجه قبل اذوقه من الحالي

وانا احمد ربي ماخبرت القدم زلي

ومشيي لك الله دوم دغري وطوالي

ونفسي عزيزه بالردى ماتسولي

وسود النوايا ماتشوش على بالي

ولا اداني العيله ولا الميل لو ملي

ولا اطفف لغيري ولا ازيد مكيالي

وانا داري انك يافتى الجود وافي لي

ولاهي غريبه منك ياطيب الفالي

وعلى كل حال جيت كلي على حلي

وخذني شقيق لك على كل ابو حالي

أبلبس على ماتشتهيه انت فصلي

وضبط عسى الله مايعريك تفصالي

وقل واهني اللي عن الناس متسلي

دليخ فضيخ داله خالي سالي

وصلوا على سيد البشر عد ماهلي

سحاب توالى نوض براقه يلالي



ثم شال الشاعر شيلة تفاعل معها الجمهور وهي:

والليالي تودع العاقل هبيل

والامور اليوم سلم ياسلام

راح جيل ومقبل ياخوك جيل

يالله اني طالبك حسن الختام

العزيز يذل ويعز الذليل

والسباع يباع في سوق النعام

ودفتر الشيكات في مخبا البخيل

ماظهر في حرب وإلا في سلام

حسبي المولي وهو نعم الوكيل

عالم النيات خلاق الانام

مانبي منهم كثير ولا قليل

0ولا لنا مقصد ولا غاية مرام

والحظيظ اللي يحسب للرحيل

باكر اليا لف في مترين خام

مايفيده لا خوي ولا زميل

ولا يفيده لا خوال ولا عمام

فانيه والادمي عابر سبيل

اترك اللي فات وانظر للامام

والكلام احيان احد من الصقيل

يتلف الارواح ويقص العظام

مانبي يفرح بها نقال قيل

الحشيمه يالحشام ابنا الحشام

استغلوا فرصة الشهر الفضيل

وافتحوا صفحه محبه وانسجام

والصبر طيب لو انه حنظليل

والعفو والصفح من طبع الكرام

والنعيمه لو مسك فتحي كميل

ماوصل للقول من عشرين عام

وان بغيت العلم يازبن الدخيل

اسلم وسلم على عادل امام



ثم قصيدة مؤثرة القاها ايضا بطريقة الشيلة شاعر المليون خليل الشبرمي بعنوان: (وا وجودي ) :

وا وجودي كل ماشفت زوله من بعيد

وجد من من زود ما به غبن عاف الحياة

ووجد من صلى على امه وابوه بيوم عيد

يوم صلى العيد مد الجنايز للصلاة

ووجد عود قيدوه العساكر بالحديد

ذابح له نفس من دون عرضه والبنات

واصغر القصر بلغ ما عفا راسه عنيد

أقشر لاجاه جاه العرب قال الصفاة

ووجد مجدور العرب بالخلا خلي وحيد

بعنته ما حوله الا الذيابه عاويات

ووجد رجل اعمال عقب المعزه والرصيد

فلس وحلت عليه العطيه والزكاة

أتوجد وادري ان التوجد مايفيد

وجد من مانال شفه ولا حصل نجاة



واتبعها بشيلة لقصيدة جميلة:

حرام ... ياباشة الغيد

والله .. ورب البريه

لولاي اهاب المناقيد

واللوم والهرج فيه

لاشق ثوبي ضحى العيد

وادنها هاشميه

وانخى جميع الاجاويد

تكفون يا اهل الحميه

راع الهوى يالاوليد

شيلوه في مروحيه

لاحركت هزت البيد

ترزم رزيم برديه

ودوه يم اتلع الجيد

تكفون قبل المنيه

ولا تكثرون المناشيد

بالحيل حاله رديه

عيده عذاب وتناهيد

وجروح قلبي طريه

وشفا العيون المراميد

شوفة رهيف الثنيه

ما جت على كيف ما اريد

مير الوعد بالضحيه

يا مخلفين المواعيد

من غير ذنب وخطيه

وما ودي انقص ولا ازيد

واكشف امور خفيه

محروم من فرحة العيد

من ذاق فرقا خويه





ثم شيلة لقصيدة (يا سعد):

ياسعد وش شاف مجنون ليلى بالغرام

أشهد انه وان بلي بلوته ياهونها

ياسعد ليلاه وان مات فيها مستهام

تدري انه بالهوى ياسعد مجنونها

المصيبه من غدى ميت له كم عام

عشقته ماتدري انه قتيل عيونها

قرهدت نفسه عليها ومر الكبد زام

ودوك قلبه ياسعد مزعته طعونها

ياسعد والله يالولا الحيا واخشى الملام

والقرابه والحيا والهوى وجفونها

لانهبه وانحاش واجلى جنوب ديار يام

ما يردن لو وقف جيش هتلر دونها

ياسعد راع الهوى بالهوى لاضيم شام

مايرده طول بيبانها وحصونها

وان غوى راع الهوى في هواها مايلام

لاجتمع غبن الزمن ياسعد وغبونها

وياسعد والله فلا اسلى هواها لاحرام

لو يلوح الشيب في لحيتي وقرونها

وخذ وصاتي ياسعد وصله بنت الحشام

ذي وصاتي كان غيري غدى مظنونها

لا شرت ثوب الفرح تشتري لي باع خام

يدفنوني ليلة العرس ويزفونها



واختتم عرف الأمسية الزقدي بشكر الشاعر خليل الشبرمي الذي قال قصيدة جديدة (شبابية) حسب وصف الشاعر قبل الختام وهي بعنوان (استثنائي) منها:

استمتعي يا مترفة باغوائي

واسترسلي يا حبني لاغوائك

وتفنني يا فاتنة بإغرائي

بفتنة حلاك وفتنة استحيائك

حصري حلاك وملحك استثنائي

وحسنك فريد من ألفك ليائك



وقد حضر الأمسية عدد كبير من محبي الشعر ومتذوقيه ومثقفي المنطقة وعدد من رجال الإعلام والصحافة وطواقم القنوات الإعلامية، وفي نهاية الحفل قدم رئيس اللجنة العليا المنظمة لمهرجان (صيف حائل 30 ) الأستاذ علي بن عبدالوهاب الفايز درعا تذكاريا للشاعر الشبرمي، كما قدم درعا تذكاريا اخر لعريف الأمسية الأستاذ صالح بن نواف الزقدي، غادر بعدها الشاعر الكبير مقر الأمسية وسط تصفيق حار.

وقد بذلت اللجنة المنظمة للامسية جهودا جبارة في التنظيم داخل وخارج المدرجات

كما كان للتواجد الكثيف من قبل دوريات المرور والشرطة دور كبير في تنظيم السير وانسيابية دخول وخروج السيارات في الشوارع المحيطة بالاستاد.