123456

ديوان الشاعر الامير / خالد بن سعود الكبير

ديوان قصائد الشاعر - ديوان قصائد الشاعره ارسال إلى Twitter ارسال إلى facebook
  1. *مزون شمر*
    19-09-2010, 06:53 PM

    حالي الريق - ورد الشاعر : عبدالرحمن بن بديع على سموه

    ديوان الشاعر الامير / خالد بن سعود الكبير


    حالي الريق


    قصيدة اسنادها سمو الامير خالد بن سعود الكبير
    للشاعر : عبدالرحمن بن بديع


    ياحالي الريق كم لي في الهوى صادي
    .................................ميت ظما وانت لاتسأل ولا ترحم

    ماتسقي اللي يسوقه للشقا حادي
    .............................له فيك حاجات وصروف الزمن تزحم

    إمن أول بلبل الخلان لي شادي
    ............................واليوم طير الهوى والحب راح أفحم

    ينعق بصوته على الأطلال ردادي
    .................................علامة البين بانت يالله إن ترحم

    واليوم أنا منكسر كسر ماهوب عادي
    ...............................يابن بديع علام الوقت راح أسحم

    شكواي لله عظيم الشان مدادي
    ................................يمدني بالصبر كود الكسر يلحم




    ****


    رد الشاعر : عبدالرحمن بن بديع على قصيدة عذبة الريق
    لسمو الامير الشاعر خالد بن سعود الكبير


    ياأمير الابداع يابهاج الأكبادي
    ..............................عزالله إنك لشعار النبط مفحم

    عزيت شعرك بمنصب حكم وشدادي
    .........................كنك تقول لملصمقة الهروج أصحم

    علاقتك بالشعر تاريخ وأمجادي
    .............................ماكنها الا علاقة طلحه ابمزحم

    يافيصليا تشب النار وتنادي
    ...........................اتنادي الضيف قبل الضيف لايزحم

    ترى الهوى مايبي له حرب وجهادي
    ...............................لكن يامير لا تهمل ولا تقحم

    اهل الهوى وضعهم ماهوب متقادي
    ..............................لأن المحبه عذاب ونارها تجحم

    امثل ابوضعهم ان ماني ابغادي
    ..........................وضع الخطوط السعودية مع الملحم
  2. *مزون شمر*
    19-09-2010, 06:57 PM

    رديــة ( قلطة ) بين الأمير خالد بن سعود الكبير والشاعر : مسفر بن حمد آل رشيد ا

    ديوان الشاعر الامير / خالد بن سعود الكبير


    هذه الأبيات مراد (قلطة) بين الأمير خالد بن سعود الكبير والشاعر مسفر بن حمد ال رشيد اليامي جرت على الهاتف.





     مسفر بن حمد ال رشيد:

    سلام ياهل العرف والعز والجود
    يا هل الوفا وأهل السيوف الصقيله
    بعض العرب يا طيب الذكر مقرود
    يطمع لحاجه والمعرفة قليله

    ،،،،


     الأمير خالد بن سعود:


    يا مرحبا ترحيب ود لمودود
    رحب الشرف والمرجله والفضيله
    ترحيب محمود تلاقى بمحمود
    من بينهم تحلا العلوم الجزيله

    ،،،،


     مسفر بن حمد ال رشيد:


    أبك البقا ولكل رجال مجهود
    يالشاعر اللي ترتكي للثقيله
    واللي يعزف العود يبقى على العود
    وانا اتمشى كل يوم وليله


    ،،،،


     الأمير خالد بن سعود:


    الحمد لله كلها سهود ومهود
    والناس كل له قبيل يشيله
    الله خلق بيض وداولهن بسود
    وكل على ما قيل قلبه دليله

    ،،،،


     مسفر بن حمد ال رشيد:


    اقول كل له معايير وحدود
    بس الزمن جا فيه عدله وميله
    ابو سعود ماهو بحول مسعود
    منه تعلمنا البيوت الأصيله

    ،،،،


     الأمير خالد بن سعود:


    صدقت مسعود ما هو بحول أبو سعود
    انشد خبير يعلمك كل حيله
    ترى الذكي ماهيب دايم له سعود
    حتى الزعيم إلى غزى له دليله



    ،،،،


     مسفر بن حمد ال رشيد:


    أحد نهر واحد بحر دايم يزود
    واحد عظامه في اللقا ما تشيله
    لا يرجع اللي يبغي الصيد مصيود
    وتقصر حباله بعد كانت طويله

    ،،،،


     الأمير خالد بن سعود:


    حتى البحر في بعض الأحيان محدود
    والنهر عذب ومثمرات نخيله
    والظبي كم جندل له نمور وفهود
    لو هو ضعيف الحال عينه مهيله

    ،،،،


     مسفر بن حمد ال رشيد:


    كل على ما قيل من جوده يجود
    والزرع شفنا ويش ناتج حصيله
    طويق ثابت ما تحرك من النود
    واللي يشوفه من بعيد يجيله

    ،،،،


     الأمير خالد بن سعود:



    عين الرضا عميا ولو شافت العود
    شافت زهور ناعمات جميله
    وعين السخط لو شافت الظل ممدود
    شافت فنود ظاميات هزيله

    ،،،،
     مسفر بن حمد ال رشيد:


    ماقول قول ماله اثبات وشهود
    ولا كل هرج عندي أخلي سبيله
    هذا التواضع منك يامير معهود
    عاداتكم يأهل الوفا والجميله


    ،،،،


     الأمير خالد بن سعود:


    طبع الكرم في يام ياصاح مشهود
    ولا هو غريب إن قلت نعم القبيله
    وأنا أحمد الله خالق كل موجود
    اللي وصل حبل القلوب النبيله
  3. *مزون شمر*
    19-09-2010, 07:00 PM

    رديــة ( قلطة ) بين الأمير خالد بن سعود الكبير والشاعر : تركي الميـزاني

    ديوان الشاعر الامير / خالد بن سعود الكبير


    هذه الأبيات مراد (قلطة) بين الأمير خالد بن سعود الكبير والشاعر تركي الميزاني جرت على الهاتف.





     تركي الميزاني:


    سلام الله سلام للعلوم الطيبة عنوان
    واعرف معزبه والضيف في حكمة معازيبه

    وانا لي صاحب ما ينطق الكلمة بلا برهان
    ابا سولف معه والعلم يدري به وانا أدري به

    ،،،،


     الأمير خالد بن سعود:


    الا يا مرحبا وأهلا بقلطة شاعر المطران
    تراحيب لها بالصدر تشريقه وتغريبه

    وانا يا صاحبي مانيب مثلك للشعر ميزان
    ترفق بي ترى توي غشيم وداخلي ريبه


    ،،،،



     تركي الميزاني:


    يدوم الك البقا والطير ما يكفخ بلا جنحان
    وانا خابرك صقر وكل صقر له مخاليبه

    سبحنا في البحور اللي تضم اللول والمرجان
    واخذنا ما نبي والوقت ما تصفى مشاريبه

    ،،،،


     الأمير خالد بن سعود:


    صحيح الوقت ما يصفى وتعكير الزمان ألوان
    واشوف الخايبه تعجب وهذي والله مصيبه

    غدى عند الهزيلة شان والجزله ثمنها هان
    وسيف الكذب والتهريج اشوف الناس تغزي به


    ،،،،

     تركي الميزاني:


    اشوف اللي تشوفه طال عمرك يالله الغفران
    واشوف الناس قامت تبتسم بسنون تركيبه

    لو ان اللي بنى البيت المسمى ثبت العمدان
    ما شفنا الريح تلعب بين ذرياته واطانيبه


    ،،،،

     الأمير خالد بن سعود:


    يا كيف الحل والحاله سفينه ما لها ربان
    يمشيها الهوى من حيث ما هبت دواليبه

    عربها ترقص وتزفن على حس الوتر والدان
    يحسبون المعاني صولها من جاب له خيبه


    ،،،،

     تركي الميزاني:


    اظن الحل نتركها تهيم بغبة النسيان
    عساها من نصيب القيض لا هبت ملاهيبه

    لو ان النابغة مخطي ما عود بالرضا حسان
    يكفينا رضا حسان والوقت وتجاريبه

    ،،،،

     الأمير خالد بن سعود:



    انا خابرك ميزاني وربعك كلهم شجعان
    علامك يوم عرض لك هدفها ما تضحي به

    ترى صمتك عن الغاوي وتصديدك عن الخوان
    عذاب للضمير الحي ولا في هرجتك غيبه


    ،،،،

     تركي الميزاني:


    انا مثلت فيك القاف ما مثلت فيه فلان
    وطبعي كل مقفي ما الحقه واشذب عراقيبه

    نبي نبعد عن المنقود والمشروه مهما كان
    ولا نفرح على المسلم ليا كثرت عذاريبه



    ،،،،

     الأمير خالد بن سعود:



    اجل بنشدك عن فيل يحب مغازل النسوان
    تضيق ابه الأماكن والمداخل من لغابيبه

    يقول إلهن انا الساحر انا الباهر وأنا الفنان
    وهو يأكل شنق غيره وكل داري بعيبه



    ،،،،

     تركي الميزاني:


    سمعت انه على كبره يحس بعقدة النقصان
    مجند له رعاة تمدحه وتقول يا طيبه

    لكن الفيل يبقى فيل يوم ان الحصان حصان
    وضلع طويق ما كل يبي المرقى يعدى به


    ،،،،

     الأمير خالد بن سعود:



    ما بين ممسح الريضان وبين ملهي الرعيان
    غدى ما للجزاله دور ولا لاهل السنع هيبه

    الا يال الزمان الشين الا يا ضيعة الوجدان
    نزل في سوق ابن قاسم وكل قال كم هي به


    ،،،،

    تركي الميزاني:



    من أول كنت يا هداج تيما تروي الضميان
    لكن اليوم جمك ما نذوقه من غثاريبه

    لابد الوقت يكشف من هو الرابح من الخسران
    وكل يلتبس له ثوب في قده يصلي به


    ،،،،

     الأمير خالد بن سعود:


    انا يعجبني الشاعر قوي الحبك والبنيان
    إلى منه بنى بيته يشوقك فن تقطيبه

    اجاذبه العلوم اللي تونس والخفا ما بان
    مثل تركي عساه يفوز بالمليون ويجيبه
  4. *مزون شمر*
    19-09-2010, 07:02 PM

    تغيب - قصيدة الشاعر : عبدالعزيز الفراج ورد سموه

    ديوان الشاعر الامير / خالد بن سعود الكبير


    (تغيب)
    قصيدة أرسلها الشاعر عبدالعزيز الفراج للأمير خالد بن سعود الكبير رسالة جوال.


    تغيب ترجع.. ترجع تغيب واغيب
    ............................عن دنيتي حتى غدا واقعي عكس

    يا فوضوي حاول تجيني بترتيب
    ............................وتسوي الترتيب بالفوضوه مكس

    مادام لك بالقلب بيت ومعازيب
    ...........................حتى بنت لك عوج الاضلاع دويلكس

    لو غبت عني كن صدري لواهيب
    .........................وإن جيت كني داهن ضلوعي بفكس

    انت الوحيد اللي ملكني بترحيب
    ...............................مني وغيرك كلهم × في ×

    تدري متى ريقك طرى وانفرى الجيب
    .............................اليوم يوم أكلت لي قطعة توكس




    


    عبد العزيز
    مجاراة الأمير خالد لقصيدة الشاعر عبدالعزيز الفراج لإعجابه بالقافية.


    عبدالعزيز غياب صاحبك تعذيب
    ..........................والظبي له روغه مثل روغه الفوكس

    كانك تبيه يلين تحتاج تجنيب
    ............................فتره.. وعني كان ما قابلك نكس

    إنشد خبير مجرب الغيد تجريب
    ............................يا ماركس في وادي القايدة ركس

    كم مره في طردها خبط الجيب
    ................................وكم مره تكسر القير والعكس

    ترى العنيده هجرها دايم يصيب
    ..........................لي شافت انك غاسل يديك باللوكس

    والله لترجع لك بليا مطاليب
    ............................إما تجي بالرجل وإلا على تكس
  5. *مزون شمر*
    19-09-2010, 07:05 PM

    مايصح الا الصحيح - رد سمو الأمير خالد بن سعود الكبير على الشاعر سعد السهلي

    ديوان الشاعر الامير / خالد بن سعود الكبير


    مكسرة القصيد


    قصيدة مسندة للأمير خالد بن سعود الكبير من الشاعر سعد السهلي.

    انشغلنا في مكسرة القصيد وغربلونا
    ...............................بالصحافة والإذاعة ذا مكانك ذا مكاني

    ليتهم يا خالد ابن سعود ناموا واتركونا
    ................................سدي يا سيدي ياكم لنا نشكي نعاني

    ابلشونا شلة المكياج بالصدق ابلشونا
    ..................................لا جديد ولا قديم ولا مذاق ولا معاني

    ومشكلتهم لا قلوب ولا عقول ولا عيونا
    ................................جهلهم يا مير حتى بالدقايق والثواني

    يا أمير المجد بأنواع السفاسف غرقونا
    ...........................لو تغيب (أنغام) ما غابت عن الشاشة (أماني)

    التراث بخير لكن زمرة اللعب انكبونا
    ............................ادعموهم ناس تجهل بالذنوب وبالحساني

    بزهمك عبر (الجزيرة) وأنت يالضرغام عونا
    ...............................والجزيرة مالكه روح التقديم والتفاني

    وبالنهاية بطلبك ياللي تسوق لنا المزونا
    ..............................انك تكافي عبادك من بلاوي هالزماني



    


    ما يصح إلا الصحيح
    رد الأمير خالد بن سعود الكبير على الشاعر سعد السهلي.


    يا سعد ما خلقت الدنيا بلا عقل وجنونا
    .................................والعوالي ما يبين طولها غير الطماني

    ما يصح إلا الصحيح ولو غزونا من غزونا
    ................................والضراغم والذيابة ما تروعها الحصاني

    والشعر قمة وحنا معتلينه ما اعتلونا
    .................................والقلوب المرجهنة ثابتة بين المحاني

    والغناوي لو خذتها (نانسي) وإلا (مادونا)
    ...............................الفضا واسع وكل فيه يلقى له مغاني

    لا تحسك يا سعد بعض السوالف والظنونا
    .............................الشعر مبناه شامخ فوق مرفوع المباني

    الزمن والله زمنا غصب لو قالوا خذونا
    .............................من عصور الجاهلية والأصالة ما تهاني

    إدحم بشعرك وزاحم بالسواعد والمتونا
    ..............................مكن الرميه وجود لا تصيد إلا السماني

    هيه ياللي تمحنون الشعر قوموا واجهونا
    ..............................عند حكام القصيد وعند فريس المعاني
  6. *مزون شمر*
    19-09-2010, 07:07 PM

    مرهف القلب - مداعبة من سموه لإبنه سعود بن خالد

    ديوان الشاعر الامير / خالد بن سعود الكبير


    مرهف القلب

    هذه القصيدة مداعبة من الأمير خالد بن سعود الكبير
    لابنه سعود.


    يا سعود كانك مرهف القلب حساس
    ..........................غض البصر لا شفت غناجة الهوس

    شبه الملاك اللي مثل صافي الماس
    .......................من شافها غزه على الكبد ناهوس

    الخد خد الشمس والجفن نعاس
    ......................والعنق عنق الظبي والجسم ممسوس

    بالحاظها نبل يتطلق من اقواس
    ......................والموت في سهم النواعيس مدسوس

    تفتق شغاف القلب وترج الانفاس
    .......................اسرع من البراق وارهف من الموس

    احذر تناظرها ترى الشوف حباس
    ........................ياما سجن قبلك من الناس محبوس

    لاهيب لا ترحم ولا تاوي الناس
    ......................تدعس على الوجدان يا سعود وتدوس

    ترى البها يحرق مراهيف الاحساس
    .......................حرق الفراشه في وهج نار فانوس




    


    التجربة برهان

    هذه القصيدة قالها الشاعر سعيد بن حمد ال رشيد اليامي مجاراة لقصيدة الأمير خالد بن سعود الكبير السابقة (مرهف القلب) نيابة عن الأمير سعود.



    يامير شعرك غير واحساسك احساس
    ..............................خلاصة الأفكار منقي ومدروس

    يا مشيد البنيان بنيك على ساس
    .........................ومن الخطر تقرع جرس كل ناقوس

    التجربة برهان والحق نبراس
    .........................ومن التجارب ناخذ دروس ودروس

    يابوسعود أمرك على العين والراس
    ..........................والأمر في ماقلت واقع وملموس

    من الذي يخلف بعيدين الأرماس
    ........................ويعوث في الابطال ويحوسهم حوس

    إلا عديمات الوصايف والاجناس
    ..........................اللي هواهم يذهب عقول ونفوس

    باسبابها الشاعر من الوجد ينحاس
    ..........................ويجر من شعره هجيني ومنكوس

    بين الرجا والشوق والبعد والياس
    .............................تلعبه الأفكار مع كل هاجوس
  7. *مزون شمر*
    19-09-2010, 07:11 PM

    رمز الغزارة - إسناد من الشاعر : ياسر التـويجري ورد سموه

    ديوان الشاعر الامير / خالد بن سعود الكبير


    رمز الغزارة

    هذه القصيدة مسندة على الأمير خالد بن سعود الكبير
    من الشاعر ياسر التويجري.




    يا أمير يا للي تستحق الأماره
    ..........................بالشعر ولا فا أنت مولود أمير

    أخذتها يا بو سعود بجداره
    .....................وعندي كسحت اللي تسمى شواعير

    ماتقطف إلا ورد رأس الزباره
    ............................ولا كتبت إلا البيوت المشاهير

    قصيدك أصلف من حيود السماره
    ..........................وألطف وارق من النفل والنواوير

    شعرك مع الشعار رمز الغزاره
    ..............................هذا ولا نقبل بهالوضع تغيير

    أنا نصيتك والزمان استداره
    ...............................والله يعزك ما نصيت لدنانير

    وأنا ادري إنك منت مظلم عماره
    ...........................ولا تعطي إلا نادرات المغاتير

    يا أمير أنا في قلبي الصلف شاره
    ............................للي بعيني سيد كل الغنادير

    لعب بقلبي لين فتق ستاره
    .......................واقفى طموح ولا ترك لي معاذير

    عينه مثل عين العديم بشقاره
    .........................خطوا أبلج مادهلوه الصقاقير

    غرو ذبحني في دلعه وصفاره
    ........................أقبل عصير وراح من بعد الأخير

    أبيك تشفع يا زبون الخساره
    ..........................شاعر وقافك ضاري للمشاوير

    إلى طلعت اطلع لراس المناره
    .........................وإلى نزلت انزل على جمة البير

    أنا معك يا أمير رهن الإشاره
    .............................نصيحتك والعلم بيد المقادير


    *****



    أنا عوينك

    هذه القصيدة رد الأمير خالد بن سعود الكبير على قصيدة
    (رمز الغزارة) للشاعر ياسر محمد التويجري.




    شف (ما تراه وخل عنك) العياره
    .............................واسمع كلام اللي يشاورك ويشير

    ياسر . . ترى القلب الخضر له صقاره
    ................................ماحازها الا نادرين الصقاقير

    القلب طير وضاري بالجساره
    .................................يتوق يم مشوعات المناعير

    جود سبوقه وانتبه له وداره
    .........................لى حال دون الجول شعف ومعاصير

    اصبر لعل الجو يركد غباره
    ..........................والعين يصفى شوفها والصبر خير

    واللي يروح يروح جعله وداره
    ................................مثلك يشوم ولا يلد لمدابير

    خل الطموح تهف ماهي خساره
    ..............................لا لا تحسف والحبارى مزابير

    الوايلي طبعه براسه سطاره
    ............................يشرب قراح ولا يحب الغثابير

    حتيش لو في الكبد بعض المراره
    .........................من صد خله واحذف رشاه في البير

    الصيد واجد وانت نمر المغاره
    ............................شاعر ولا ينقصك بخص وتدبير

    كم عيطموس تهتوي منك شاره
    .......................لى قمت تسخر عذب الابيات تسخير

    وانا عوينك كان ودك بغاره
    .........................نكسب لك البكره ومعها مظاهير

    حنا هل الطولات واهل النزاره
    ..........................حنا السباع الضاريه والهزابير

    عاداتنا بالكسب ناخذ خياره
    ...........................بالطيب وإلا بالسيوف البواتير
  8. *مزون شمر*
    19-09-2010, 07:13 PM

    سالم بن صليم - رد على قصيدة الشاعر سالم بن صليم

    ديوان الشاعر الامير / خالد بن سعود الكبير


    سالم بن صليم

    وردت قصيدة للشاعر سالم بن صليم يرد بها على أحد أصدقائه، وقد ختمها بمدح الشاعر الأمير خالد بن سعود الكبير قائلا:


    أنت وهل العليا حميدين الخصال

    ............................من لا ضمنكم فالزمن يحسب فقير

    افخر بأساميكم . . وهاك أبلغ مثال

    ..........................(تاج الأدب) . . خالد بن سعود الكبير



    




    وقد أبى الأمير خالد بن سعود الكبير إلا أن يرد على قصيدته بهذه القصيدة:



    سالم بن صليم أحرجني وقال
    .....................(تاج الأدب) خالد بن سعود الكبير

    والثنا والمدح من زحل الرجال
    .......................للخواطر والعواطف يستثير

    يا رفيقي كلمتك فيها جدال
    .......................كيف أبقلبها وأنا راعي ضمير

    خاف أصدقها ويلحقني سؤال
    .........................والأدب تاجه على شعري كثير

    واللقب من قلبك الصافي زلال
    .........................وأدري انك راسي وعقلك كبير

    وأعرف انك صافي النيه عدال
    ..........................وأعرف أنك ما تداهن كل سير

    وأجزم انك ما تحريت النوال
    ............................لا ولا قصدك تنافق للأمير

    وأعرف أنك شاعر جزل المقال
    ...........................وأعرف انك ناقد وسيفك شطير

    والحقيقة بينه مثل الجبال
    ............................ساطعة للعين في (في وهجير)

    والصداقة يا عزيزي لا تزال
    ................................كل يوم تزيد والدنيا بخير

    والحياة ألوانها بيض وليال
    ..............................والزمن يا صاح لازم يستدير

    لو ظهر في بعض حالاته ميال
    ..............................يعتدل والصبر جبار الكسير

    ما يشيل الحمل غير أقوى الجمال
    ...............................والعزايم تنجز اللي ما يصير

    وأنت من ناس يشيلون الثقال
    .............................يضربون الدرب لو قالوا خطير

    استمع للي ضرب أصدق مثال
    .............................الصديق اللي محب لك (خضير)

    ما على الله شي في كونه محال
    .............................والعسر لابد يتبعه اليسير
  9. *مزون شمر*
    19-09-2010, 07:16 PM

    ياخضير - إسناد للشاعر : خضير البراق ورد الشاعر

    ديوان الشاعر الامير / خالد بن سعود الكبير


    يا خضير

    هذه القصيدة موجهة من الأمير خالد بن سعود الكبير
    للشاعر خضير البراق بعد أن أرسل له خضير رسالة
    ختمها بتلميذك خضير البراق.



    يا خضير والله ما أنت في الشعر تلميذ
    ...............................هذا كلام الصدق والصدق نقاذ

    حطيت نفسك في صفوف التلاميذ
    .......................وأنت الذي في الذوق والشعر أستاذ

    قلته وأنا يا صاح مانيب لويذ
    ..............................عن قول هرج الحق والحق نقاذ

    نادر قصيدك فيه متعة وتلذيذ
    ...............................واسلوبك الراقي للألباب أخاذ

    وأغلى الدرر توخذ من البحر تنقيذ
    .............................وأعذب مطر ما هل ديمه ورذراذ

    وأهل الشعر: شاعر، ومفلق، وخنذيذ
    ........................واللي قصر عنهم.. يرايش على ماذ؟!

    والله لو قالوا قصيدة تعاويذ
    .............................حنا نعرف الهذر من شعر الأفذاذ


    



    كريم ذات

    هذه القصيدة رد على قصيدة الأمير خالد بن سعود الكبير
    (يا خضير) من الشاعر خضير البراق.



    يا شاعر ما لاذ فكره ولا ليذ
    .......................وينحي عن الدرب الملاوذ الى لاذ

    شعره رفيع ولا تجيه المواخيذ
    .......................أنصع من الجوهر وبالسبك فولاذ

    يوم إن غيره يكتبون الشعاويذ
    ........................ما حاد عن منهج سلفنا ولا شاذ

    كريم ذات وينبذ الذات تنبيذ
    .................وهذي صفات أهل الوفاء والوفاء هاذ

    العفو يا نسل الكرام الجهابيذ
    ..........................وراك ما خليت لي فرصة انقاذ

    غمرتني بالعطف واللطف تحبيذ
    ........................وخليتني في القافيه شبه شحاذ

    أبي مجاراتك ولا صار تنفيذ
    .......................ومثلك عن أهل الشك والشك ينعاذ
  10. *مزون شمر*
    21-09-2010, 02:53 PM

    ياليت جرحي - قصيدة مسندة من الشاعر : راشد شرار لسمو الأمير

    ديوان الشاعر الامير / خالد بن سعود الكبير


    يا ليت جرحي

    هذه القصيدة مشاكاة مسندة على الأمير خالد بن سعود الكبير
    من الشاعر راشد شرار.



    يا ليت جرحي في إيدي كان عالجته
    .................................لكن جرحي بقلبي يصعب اعلاجه

    ولو كان همي الزمان إن كان فرجته
    ...............................لكن همي الغرام ويصعب إفراجه

    مادام باب المحبه بروحي أولجته
    ..................................أنا حليف الصبر وأجيد المواجه

    طفل الهوى كم درسته وخرجته
    .................................ولما كبر ما تبع يا حيف منهاجه

    يا كم باب انفتح لكني أزلجته
    .................................أخاف بحر الهوى تطميني أمواجه

    درب المحبه عوج لكني أعرجته
    ....................................باب دخلته وانا أدري بمخراجه

    يا كم قلب بصوت الشعر هجهجته
    ..................................حتى غدت تحت ضلعه نار وهاجه

    الشعر صبحي وأنا للحب أججته
    ................................وان خيم الليل أشعل بيدي اسراجه

    الحرف بالشوق والإحساس مازجته
    ...................................وأبيحه لعين من حسيت به حاجه.

    أنا صنعت العشق للناس وأنتجته
    ...................................حتى شغلني لهذا اليوم بانتاجه

    يا سيد الشعر كم عذر تحججته
    ................................عشان أوصل خيالك حرفي أفواجه

    بو سعود قل لي يا كيف الحب غنجته
    .................................وخليت أهله تجيك اليوم محتاجه

    يا كم غرنوق بالأبيات بنجته
    ............................من سمع شعرك غدا ما يرفع احجاجه

    الحب في قلوب أهل الحب روجته
    .......................................زرعت ريضان ثم مديت ديباجه

    لولا يا خالد غلاك القاف ما انسجته
    ................................ولا جيت عاني محطم ظرفي اسياجه

    أمير بالحب بين الناس توجته
    ................................وفي الشعر قلبي تلبس سيدي تاجه

    لافي وشافي أبا قلبي معالجته
    ...............................وبو سعود فاهم وفيده وصفة اعلاجه


    


    فنون الحب
    هذه القصيدة رد الأمير خالد بن سعود الكبير على قصيدة
    (يا ليت جرحي) للشاعر راشد شرار.



    الشاعر اللي محرجني وحرجته
    ...........................خوض على الشواطي والبحر راجه

    جتني جيوشه تزاحم فوق بارجته
    ............................والله يعين المعنى كيف بيواجه

    لاشك انا اللي مليك الشعر توجته
    ........................أبصخر الحرف لين أصعد على ابراجه

    والشعر يا صاح كم صغته ودبجته
    ...............................ديباجة تطرب السامع لها لاجه

    يابو سعود الهوى مادمت فلجته
    ............................ما اظن تجهل محاديره ومعراجه

    دامك (صنعت العشق للناس وانتجته
    ............................منك نتعلم فنون الحب واخراجه

    اما محاكيك لو بالحب هرجته
    ............................سالت دموعه على خديه ثجاجه

    قلبه على نار محرقته ولاعجته
    ............................واللي يحبه فواده وسط ثلاجه

    طفل زعجني وأنا ما عمري أزعجته
    ............................الله حسيبه على الغنج وتعواجه

    كثر الدلع منه تتعبني محاججته
    .........................ضلع عوج لو عدلته ينكسر عاجه

    غالي ويهوى التغلي.. رافع درجته
    ...........................عندي بهاه وجماله مع توهاجه

    يهوى القصايد وأنا خابر وباهجته
    ...............................الى سمع ونتي زادت تبلاجه

    لى قمت أناجيه بأبياتي وخالجته
    .......................سمعني الضحكة اللي تظهر غناجه

    يبقى صداها نغم في السمع مازجته
    .......................أشجن معازف حنين القلب وخلاجه

    يا راشد العشق علجني وعلجته
    ......................ماله دوى والهوى معروف بإحراجه

    سبحت بحره وغصته والفضا دجته
    ........................سفينة الحب شالتني على أمواجه

    ما شفت حي يقول أعرف معالجته
    .............................ولا حكيم عرفته خط منهاجه

    ماله يكود الصبر والصبر أنا لجته
    ........................طعمه على الكبد ممرضني تعلاجه
123456