12

نسايم حب ( قصة قطرية )

قصة قصيرة - قصه جميلة - اجمل قصص وحكايات قصيرة منوعة مفيدة ارسال إلى Twitter ارسال إلى facebook
  1. × عاشق القلوب ×
    23-07-2010, 02:44 PM

    نسايم حب ( قصة قطرية )

    نسايم حب ( قصة قطرية )


    الجزء الأول :







    اليوم طاف على موت أمي عفراء الله يرحمها أسبوع ..... هي صدق كانت مشلولة ولا تتحرك من سريرها بس والله كانت مسويه للبيت حس .... والاهم أنها كانت كل أهلي وبعد موتها حسيت صدق أني تيتمت .... يمكن أنا أكثر وحده حسيت بفراقها والأيام الجايه بيزيد إحساسي بذا الشيء .... بس لازم ما أبين لحد ضعفي أو خوفي من المستقبل وخاصة العيال .... لازم أتم في عيونهم الجبل اللي ما يقدر شيء يهزه .... والحمد لله ... الله قدرني إلى ذا الحين أنا مسيطر على الوضع ... وتقريبا كل شيء رجع مثل ما كان خاصة بعد ما سافر حمد جعلني فداه الأمارات حق الكلية العسكرية ....
    و ارجعوا البنات يدومون عفاري في الجامعة و الريم في المدرسة ... مسكينة الريم كان عيد ميلادها من ثلاث أيام ولا احد حتى بارك لها .... صار لها شهرين وهي تحن تبي تحتفل بالسويت سكستين مثل الأجانب ... الأخت واجد تشوف أفلام أجنبية .... صدق أني كنت معترضة على ذا الشيء ولا أحب احتفل بذا الأعياد بس والله أكسرت خاطري عشان كذا لازم أجيب لها هدية .............

    سونيا وهي تطق الباب : ماما ؟؟؟؟؟؟ ماما فهده ؟؟؟؟؟؟؟؟؟
    فهده بعد ما صغرت شاشة الورد اللي تكتب فيها مذكراتها وروحت تفتح لها الباب قالت: خير يا طير ؟؟؟؟؟؟ وش تبين ؟؟؟؟؟؟؟؟؟ توني طالعه منس ؟؟؟؟؟؟؟؟؟؟؟؟؟؟
    سونيا : ماما شمله في تحت يبي أنتي .........
    فهده من أسمعت ان جملة جات راحت لها ركيض .... جملة بنت خال فهده والوحيدة من أهل أمها اللي في قطر بحكم أنها متزوجة قطري عشان كذا هم كانوا واجد قراب من بعض ......











    جملة وهي تلم فهده : عظم الله أجرس في أم جابر ....
    فهده وهي تلم عليها هي بعد : أجرانا وجرس ... الحمد لله على السلامة ... متى رجعتي ؟؟؟؟؟؟؟؟
    جملة وهي تفك فهده وتروح عشان تقعد على الكرسي ويدها في يد فهده تجرها عشان تقعد معها : الله يسلمس .... رجعنا البارح فليل والله يا فهيده أني ما دريت الا البارح الصبح عن أم جابر ولا كان جيتس ولا خليتس بالحالس في ذا الوقت ......
    فهده وهي تأخذ نفس عميق وتحاول أنها تخفي دموعها قالت : مسموحة جعلني قبلس .... ولفت تشوف باب غرفة أم جابر اللي بابها في وسط الصالة وهي تبكي وقالت : البيت كله لها الله يرحمها .... كنت اقضي طول اليوم معها ذا الحين أحس أني ضايقة .... ولفت تشوف جملة وكملت : هذا وهي ما طاف عليها الا أسبوع اجل ما دري وش بسوي بعد شهر؟؟؟؟؟؟؟؟؟؟؟؟؟؟؟؟؟
    جملة وهي تحاول توسي فهده قالت : الله يرحمها ترحمي لها .... الله ريحها من اللي كانت فيه .... ولا من كان يصدق ان أم جابر القوية اللي ما كان حد يقدر عليها تطيح ذا الطيحه وتصبر عليها سبع سنين ؟؟؟؟؟؟؟؟؟ ويوم شافت فهده أرفعت رأسها تشوفها والدموع تزيد في عينها استلأمت فيها وقالت : اسمحيلي ما كن قصدي اذكرس بشيء ..... الله يرحمهم كلهم ..................
    فهده وهي تمسح دموعها اللي ما تسمح لحد يشوفها غير جملة قالت لها : ليه من قال لس أني نسيت عشان تذكريني ؟؟؟؟؟؟؟؟؟؟؟ ما با احد ينسى أهله ؟؟؟؟ وحتى إذا نسيت الدنيا لازم بتذكرني بهم إلى جارت علي .............
    أقطعتها جملة وقالت : الله يسامحس ليه تقولين كذا ؟؟؟؟ أن شاء الله ما تنضامين وأنا موجودة ... ولا أنا ما ينشد فيني الظهر ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
    ابتسمت فهده غصب عليها لجملة وقالت : جعلني ما أبكيس ما تقصرين بس أنتي تدرين بالحال ... أنا ذا الحين صرت بالحالي مسئولة عن البيت والعيال .... هم يتامى ولا لهم حد غيري وعمهم خالد الله خير ما فيه خير لعياله وأمرته عشان يصير فيه خير لنا غير ما شفناه ألا ثلاثة أيام العزاء وعقبها اختفى عند إمرته الثانية .........
    جملة باستغراب : الله يهديس يا فهده صلا أنتي اللي شله البيت وكل شيء على ظهرس من سبع سنين ولا أم جابر الله يرحمها لا تروح ولا تجي .... وبعدين ناصر وين راح ؟؟؟؟؟؟؟؟؟؟؟؟؟؟؟؟ اشوفس ما جبتي طاريه مع انه ساكن معكم في نفس البيت ؟؟؟؟؟؟؟؟؟ صدق في ملحق برى الفله بس في نفس البيت يعني وقت اللي تحتاجونه بتلقونه ؟؟؟؟؟؟؟؟؟؟؟
    فهده وهي تكرمش بوجهها قالت : الله يخليس عاد إلى طريتي الرجاجيل تطرين نويصر ؟؟؟؟؟؟؟؟ هذا أزين ما فيه اسمه وخسارة فيه بعد ....
    جمله وهي تهز رأسها قالت : الله يقطع عدوس .... ليه تتحاكين عليه كذا ؟؟؟؟ كنه اصغر عيالس ما كأنه رجال ؟؟؟؟؟؟؟؟؟؟
    فهده وهي تأخذ الدلة عشان تقهوي جملة قالت عشان تغير الموضوع : جملة وش أخبار عرس اخوس ؟؟؟؟؟؟؟؟؟؟؟؟
    جملة اللي أفهمت حركت فهده قالت لها وهي تبتسم باستهزاء : يا دفع البلاء يا فهده أنتي إلى ذا الحين شاله عليه في قلبس ؟؟؟؟؟؟؟ هو صدق غلط بس بعد خذ جزائه.... وجابر وأبوه الله يرحمهم ما قصروا فيه .... ولا تنسين انه كان بزر يوم سوى كذا .........................
    أقطعتها فهده وقالت : ثمان تعشر سنه ما هب بزر ..... غير رجال وش كبره ؟؟؟؟؟ وعلى العموم أنا ما عاد ذا السالفة تهمني .... ولا هو يهمني .... واصلا طول ذا السبع سنين وحنا كلن منا في حاله صدق هو ما قصر مع حمد ولا خواته في شيء يبونه ... بس عمرنا ما كان بينا أي حكي غير في النادر ويكون شيء عن البزران بعد.. لان أم شيخه الله يرحمها هي اللي تتحاكا معه في كل شيء .. أما ذا الحين دامه مع عيال أخوه صلاح ما نبي منه شيء ثاني .... لكن أنا عمري ما طلبت منه شيء ولا نزلت راسي له في شيء .... الحمد لله تقاعد أبوي مكفيني ..... الله لا يحوجني له .........














    جملة قعدت عند فهده إلى أن جات حزت طلعت البزران من المدارس .... راحت جملة تجيب عيالها من المدرسة وفهده أخذت سونيا وراحت مع الدريول تجيب ريم من المدرسة ......

    ريم أول ما أركبت السيارة : السلام عليكم ...........
    فهده : عليكم السلام .... اعلومس أم العلوم ؟؟؟؟؟؟؟؟؟؟؟؟؟؟؟؟؟؟؟
    ريم اللي لفت تشوف فهده : علوم الخير .... تبين الموجز ولا الأخبار ؟؟؟؟؟؟؟؟؟؟؟؟؟؟؟؟؟؟؟؟؟
    فهده وهي تهز رأسها : لاذا ولاذا ... امزح معس ... أنتي صدقتي أني بقعد اسمعس ؟؟؟؟؟؟؟؟؟؟؟؟
    ريم بعد ما أسمعت كلام فهده ابتسمت ابتسامة نصر لأنه تحب تطفر بها ....... وقالت : عفاري متى بتج ؟؟؟؟؟؟ أنا ما اقدر انطر ميتة من الجوع ؟؟؟؟؟؟؟؟؟؟؟؟؟؟
    فهده قالت لها بدون ما تلف عليها : مدري تقول عندها شغل وبتتأخر تبي تروح المكتبة تجمع مراجع ... وتقول أنها متفقه مع عمها يمر عليها .... فهده كان ودها تقول عمت عينه بس هي ما تحب تتكلم على عمهم قدامهم وتخرب صورته عندهم ....... وقالت لريم بعد ما تذكرت أنها تبي تشتري لها هديه : ريم اسمعي بما أن اليوم الأربعاء وباكر أجازة وش رايس نروح أنا وأنتي و عفاري السوق ؟؟؟؟؟؟؟؟
    ريم ردت بسرعة : لا اليوم ما اقدر عمي مواعدني أنا و مريوم بيودينا مكان مفاجأة ......
    قالت لها فهده بعصبيه : ومن بشوره بتروحن ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
    ريم بعند : بشور عمي .... أظن انه رجال البيت ؟؟؟؟؟؟؟؟؟؟؟؟؟؟؟؟؟؟؟؟؟؟؟
    أسكتت فهده عشان تنهي النقاش....... ولفت الصوب الثاني وهي تقول في خاطرها جعله فقيدت الرجاجيل ..... وأول ما ادخلوا البيت شافوا سيارة ناصر واقفة في الاطبيلة .... فهده خافت انه يكون نسى يجيب عفراء من الجامعة ....نست أنها متهاوشه مع ريم لفت عليها وقالت : روحي بسرعة لعمس شوفيه متى بيجيب عفاري ؟؟؟ لا يكون نساها ؟؟؟؟؟؟؟؟؟؟؟
    ريم اللي كانت تبي تحسن الجو بينها وبين فهده.... أنزلت من السيارة وراحت سيده لملحق عمها اللي عايش فيه من عشر سنين وهو عبارة عن غرفة وحمام وصالة صغيرة في طرف الحوش .... وطقت الباب عليه وهي تشوف فهده اللي واقفة على الباب حق الصالة تنطرها ...............











    ناصر اللي كان توه داخل ويبدل ثيابه استغرب من الطق على الباب وراح بسرعة عشان يفتح الباب خاف أن حد من أهل البيت فيه شيء ... أول ما شاف ريم واقفة على باب الملحق وهي بعباتها و شنطتها في يدها ابتسم لها وقال : حي والله ذا العين .... وسكت يوم واجهته ريم وهي ترد له الابتسامة وقالت : الله يحيك ويبقيك يا زين شباب قطر كلهم والله .............. لمها ناصر من كتوفها وهو يقول : حياس ادخلي في البراد عن ذا القوايل ..... بس ريم أمسكت يده وهي تشر باليد الثانية على فهده وقالت له : عمي ... خالتي تحاتي عفاري وتقول لا تنسى تجيبها ....... ناصر رفع عينه يشوف مكان ما أشرت ريم شاف فهده واقفة قدام باب الصالة ويوم شافته يشوفها أدخلت البيت بسرعة ..... نزل عينه على ريم وقال لها : قولي لها أنا ما أنسى شيء .... عفراء جبتها وقدها في دارها ..... وكمل يوم شاف الطباخ جايب له الغدا : ريمي ادخلي تغدي معي ؟؟؟؟ ريم قالت وهي توخر عن طريق الطباخ اللي يبي يدخل الصينية : أن شاء الله بس بروح أقول لخالتي عن عفاري وببدل بسرعة وبجي انطرني لا تتغدا قبل لا أجي .... وقالت بصوت عالي وهي راحيه للفلة : عندي لك أخبار عجيبة ..........................
  2. × عاشق القلوب ×
    23-07-2010, 02:44 PM

    نسايم حب ( قصة قطرية )


    ريم وهي قاعدة مع ناصر تتغدا : تدري اليوم أدخلت علينا بنت خالك احتياط وقعدت تسولف معي .... ولما ما شافت عمها اهتم في الموضوع قالت له : تدري عن ويش كنا نسولف ؟؟؟؟؟؟؟؟؟؟؟؟ نسولف عنك ............ وابتسمت يوم رفع ناصر رأسه وعيونه فيها نظرة استغرب وقال : عني أنا ؟؟؟ ليه ؟؟ وش كنتوا تقولون عني ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
    ريم : هو ما هب سولف ..سولف .. هي كانت مستغبيتني وتبي تأخذ مني معومات عنك .... بس أنا لعبت في رأسها عدل وخليتها تطلع من عندنا وهي تهوجس ...............
    ناصر اللي كان يقرص عينه في ريم قال : ليه هي وش المعلومات اللي كانت تبيها ؟؟؟؟ وأنتي وش قلتي لها ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ريموه بلا كذب ... تحاكي وقولي الصدق ...........
    ريم وهي تلوي ثمها يمين ويسار قالت : الله يطول في عمرك هي كانت تسال إذا أنت تقعد معنى وتراعينا ولا حنا ما نشوفك ؟؟؟؟؟ عاد أنا ما رضيت أنها تتكلم عليك فقلت لها انك ما أنت بمخلي علينا قاصر وانك ما تفارقنا ليل ولا نهار ..... ابتسم ناصر وقال : مشكورة يا بنت جابر على دفاعس عني .. ورجع يكمل غداه بس رجع يرفع رأسه بسرعة لريم يسمع كلامها اللي قالته بعد ما ارتاحت من رد فعل عمها على الموضوع : وقلت لها بعد انك من حبك فينا تسهر معنا إلى أن تنام ويانا خاصة بعد ما سافر حمد .......
    قطعها ناصر بسرعة : أنام وياكم وين ؟؟؟؟؟؟؟؟ ريموا أن متى نمت عندكم ؟؟؟؟؟؟؟؟؟؟؟؟؟؟؟؟؟
    ريم ردت بسرعة عشان تهدي عمها : اقصد أنا اسهر عندك وأنام عندك أنت فهمت ألحكي بالغلط ...
    شافها ناصر من فوق إلى تحت وهز رأسه ورجع يأكل .... ارتاحت ريم أن عمها صدقها وسكر الموضوع وهي تقول في خاطرها اجل لو تدري وش قلت لها بعد وش بتقول ؟؟؟؟؟؟ ما هب مهم حتى إذا دريت ........ المهم أن رفوع الخايسة ما توصل اللي تبيه ............. واللي قطع عليها أفكاره كان صوت ناصر وهو يقول لها : قولي لعفاري و لخالتس أن يبرزون عشان العصر بنطلع كلنا ..
    ريم وهي متشككة قالت : بس عمي أنت تدري أن خالتي ما تطلع معنا إذا أنت مودينا مكان ؟؟؟؟؟؟؟؟؟؟
    قال ناصر لها بحزم : بس أنا ما هب مخليها في البيت بالحالها وهي ما با احد معها.... أول تقعد مع أمي عفراء ذا الحين ما لها قعده بالحالها.... أما تروحون كلكم ولا تقعدون كلكم .....ورفع حاجبه بتحدي لها وكمل : أنتي اختاري ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
















    ريم بعياره :خالتي الله يخليس لا تخربين الروحة علينا .......
    فهده بعصبية : وليه أخرب الروحة عليكم انتوا بنات أخوه روحوا معه .... أنا وش حاجتي أروح معكم ؟؟؟؟؟؟؟ أنا بقعد في البيت مثل كل مره تطلعون فيها مع عمكم ...................
    ريم بضيق : بس ذا الحين غير ... ذا الحين مابا حد يقعد معس في البيت وحنا بنتأخر ... وهو يحاتيس
    إذا جلستي في البيت بالحالس و...........................
    أقطعتها فهده وقالت وهي مستنكره : يحاتيني ؟؟؟؟؟؟؟؟؟ لا راعي واجب ويعرف المعاريف .... ما في حاجه يحاتيني ولا شيء ... أنا كبيرة ولا أني بزر عشان يحاتيني ......... روحوا انتوا معه لكن أنا انسي ........... وقامت من الصالة عشان تركب الدرج وتروح غرفتها ..... لفت ريم على أختها عفراء اللي واقفة جنبها بعايتها وهي شوي وتصيح وقالت : ذي ما هي بحاله هو يقول يا نروح كلنا ولا ما نروح وهي معية تروح معه وأنا اللي تطيح في راسي ؟؟؟؟؟؟؟؟؟؟؟؟؟؟؟؟؟؟؟؟؟؟
    ابتسمت لها عفراء و فصخت عبايتها وقالت لريم اللي تشوفها بحسره : ولا تطيح في راسس ولا في رجلس ... أنا بقعد مع خالتي وأنتي روحي مع عمي وقولي له أني أنا عندي أبحاث واجد بسويها ولا اقدر أروح معكم ... وان خالتي بتقعد معي .......

    أفرحت ريم بقرار عفراء واجد وقررت هي بعد أنها تستانس بذا الطلعة مع مريوم بنت عمها خالد هي صدق اكبر منها بسنتين بس واجد متعلقين في بعض .... ويوم قالت لعمها عن فهده وعفراء عرف أن السبب الحقيقي هو فهده ... أكيد هي اللي عيت وعفاري فديتها هي اللي ضحت عشانها بالطلعة ... يلا ملحوقه أن شاء الله في يوم بوديها بالحالها وبخلي أم اللسانين عن خالتها ..............


















    أول ما وصلوا بيت خالد دخل ناصر سيارته في الحوش وسوى هرن لمريم بنت أخوه عشان تطلع لهم بس اللي طلع كان حمد ولد خالد الكبير وراح لدريشة ناصر اللي نزلها أول ما شاف حمد جايه .... وقال حمد وهو يحط يده على الباب حق السيارة ويفتحه : يا مرحبا... يا مرحبا ..حي الله أبو حمد ... اقلط . اقلط المجلس .....
    ناصر : والمرحب باقي ....غير ما هب جاي اقعد معك أبي فرقا وجهك ... طول اليوم وأنا مقابلك ....
    حمد وهو يسوي نفسه زعلان قال : افا ليه كذا يا عمي ؟؟؟؟؟؟؟؟؟؟؟؟؟؟؟؟؟
    ناصر وهو يجر باب السيارة عشان يسكره قال لحمد : عمت عينك ... جدك أنا ؟؟؟؟؟ كل اللي بيني وبينك أربع سنين يا الجحش ؟؟؟؟؟؟؟؟؟؟؟؟؟؟؟؟؟؟؟؟
    أضحكت ريم على فشيلت ولد عمها وسكتت يوم قال لها حمد : ريموه تلايطي قبل انزلس من السيارة واكوفنس بذا العقال .........................
    ناصر رد عليه بسرعة : كان في أبوك اللي ما ادري وينه خير جرب ؟؟؟؟؟؟؟؟؟؟؟؟ أختك وين ؟؟؟؟؟؟
    حمد وهو يبتسم قال : بتجي .... وبعدين أنت ليه اليوم معصب ؟؟؟؟؟؟؟؟ ما خبر يوم طلعنا من الشركة الظهر فيك شيء مزعلك ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ وذا على الشيخة ريم ترى أنا اضحك معها ؟؟؟؟
    ناصر قال وهو يشوف مريم جايه : ما فيني شيء المهم أنا اليوم ما هب جاي الشركة بعد المغرب أنت إذا رحت مر مكتبي بتلقي الفاكس حق البضاعة اللي في الجمارك عطه فتحي خله يخلصه لا تنسى ... يلا مع السلامة ......
    ناصر وهو يوخر عن السيارة : إن شاء الله ... الله يحفظكم ....
    أركبت ريم السيارة وطلع ناصر بهم واشتغلت الحشرة على رأسه أول ما اجتمعوا الثنتين ...........



















    ناصر اللي كان موديهم عشان يشتري لكل وحده فيهم لابتوب .... عشان يفكونه من حشرتهم اللي مسوينها له من كم شهر .... وداهم جرير وخلاهم يختارون اللي يبونه ...ومثل العادة اخذوا نفس الجهاز ثنتينهم .... وبعد ما خلصوا وداهم محل كمبيوتر عشان ينزل لهم في الأجهزة البرامج اللي يبونها .... ولا خلصوا إلا على الساعة تسع .... والأخوات أصروا انه يمر يشتري لهم عشا من الكنتاكي ..... وهم مخلصين من كنتاكي ورايحين لبيت خالد عشان ينزلون مريم وكانت الساعة عشر تقريبا ..... رن جوال ناصر وكانت المتصلة هي عفراء .......
    ناصر بتعب : هلا والله بالغلا عفاري ................
    عفراء بصوت مخنوق : عمي ..........................
    ناصر تخرع من صوت عفراء وخاف ... قال لها : عفور وش فيس وش يعورس ؟؟؟؟؟؟؟؟؟؟؟؟
    عفراء وهي تحاول تسيطر على نفسها : عمي لا تخاف جعلني قبلك ما فيني شيء ... بس انتوا بتتاخرون بعد ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
    ناصر قال بحده : عفور لا تلعبين في أعصابي وش فيس صوتس تبكين ؟؟؟ خالتس فيها شيء ؟؟؟؟؟؟؟
    عفراء من أسمعت عمها يسألها عن خالتها إذا فيها شيء .... قامت تبكي ولا قدرت تمسك نفسها أكثر قالت : عمي الله يخليك تعال بسرعة لا تتأخر.....
    ناصر من سمع عفراء عرف أن فهده أكيد فيها شيء....غير طريقه عن بيت خالد لطريق البيت وقال لها : دقيقتين وأنا عندكم ..........


















    ناصر أول ما فتح باب الصالة حقت الفلة شاف عفراء قاعدة فيها تبكي بس أول ما أرفعت عينها وشفت عمها قامت تخب له وهي تقول لناصر اللي تم واقف قدام الباب وهو ماسكه بيده بعد ما لوت عليه : عمي ....
    لمها ناصر وهو يقول بحزم : فهده وش فيها ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
    أرفعت عفراء رأسها لعمها وقالت وعيونها كلها دموع : عمي حنا كنا قاعدين نتعشى ... ادخلوا علينا فجأة مرت خالك وبنتها هادين .... رحبنا فيهم وقلطناهم في المجلس ... بس هم كانوا معصبين ما هب عارفه ليه ؟؟؟؟ وخالتي يوم شافتهم معصبين قالت لي اطلع من المجلس .... بعد ما طلعت سمعتهم قاموا يصارخون وصوتهم كان يوصل وين ..... وعقب اطلعوا .... وطلعت خالتي تخب رايحه لدارها يوم لحقتها لقيتها قافلة دارها ناديتها بس ما ردت علي بس كنت اسمعها تبكي ..... أنا خايفه عليها هي إلى ذا الحين ما أفتحت الباب ولا ترد علي ......
    ناصر اللي كان ما هب قادر يفهم اللي صار حب انه يستوضح السالفة من عفراء و قال : زين أنتي ما سمعت هم وش كانوا يقولون ؟؟؟؟؟؟
    عفراء لفت برأسها تشوف ريم ومريم اللي واقفين ورا عمها ورجعت تشوفه أشارة أنها ما تقدر تتحاكا قدامهم ..... ناصر فهم الإشارة ولف بسرعة على البنات وقال لهم وهو يسويلهم طريق : ريم اخذي بنت عمس وروحي شوفي خالتس فوق بسرعة ....................
    ريم اللي كانت صدق خايفه على خالتها أمسكت يد مريم وربعت للدرج ..... ناصر أول ما شافهم اختفوا من الدرج لف يشوف عفراء وقال : قولي وش قالوا ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
    عفراء وهي تبلع ريقها قالت : عمي اسمحلي بس هو كلام ما ينقال .............
    ناصر اللي بداء يفقد السيطرة على أعصابه قال وهو يصر على ضروسة : عفور تحاكي وخلصيني ....
    قالت عفراء وهي منحرجه وجها احمر : هم كانوا يقولون لخالتي ...................... أنها تبي تلعب عليك وتأخذ دراهمك... وانها .............................
    ناصر قال بحده بعد ما سمع الكلام اللي قالته عفراء : أنها ويش ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
    دنقت عفراء رأسها في الأرض وقات : انها ..... أم الرجاجيل وسوده وجه و........
    قطعها ناصر وقال : بس خلاص لا تكملين ............ ولف بسرعة عنها عشان يطلع من الصالة وهو عند الباب لف عليها وقال : روحي شوفي خالتس وقعدي معها .... وقولي لها عمي يقول ان قال له الله ما تباتين مضيومه ......................... وطلع وسكر الباب وراه ...............
  3. *مزون شمر*
    23-07-2010, 06:51 PM

    نسايم حب ( قصة قطرية )


    يعطيك العافيه عاشق
    واتمنى تكملها لنا لاهنت

    بما انها روايه مكانها قسم الروايات وليس القصص
  4. انثى من الخيال
    23-07-2010, 10:55 PM

    نسايم حب ( قصة قطرية )


    يعطيك العافيه

    تابع
  5. × عاشق القلوب ×
    24-07-2010, 12:29 AM

    نسايم حب ( قصة قطرية )


    مزون

    حبيبه نفساه

    خلاصت القصه
  6. *مزون شمر*
    24-07-2010, 03:32 PM

    نسايم حب ( قصة قطرية )


    يعطيك العافيه
    ولانها ماهي طويله مكانها القصص القصيره

    ماتندرج مع الروايات
  7. × عاشق القلوب ×
    24-07-2010, 04:56 PM

    نسايم حب ( قصة قطرية )


    طيب يا مزون
  8. ح ـكآية
    30-07-2010, 02:02 AM

    نسايم حب ( قصة قطرية )


    الله يعطيك العافيه ,,
  9. ميوثه
    06-06-2011, 02:01 PM

    رد: نسايم حب ( قصة قطرية )

    نسايم حب ( قصة قطرية )


    حلوة بصراحة عجبتني كثير
  10. وردة العمر
    07-06-2011, 11:13 PM

    رد: نسايم حب ( قصة قطرية )

    نسايم حب ( قصة قطرية )


    يعطيك العافيه

    القصه حلووه
12